ዘዓብድዩ ነቢይ 1

ዘዓብድዩ ፡ 1 ዘርእየ ፡ ዓብድዩ ። ከመዝ ፡ ይቤ ፡ እግዚአብሔር ፡ በእንተ ፡ ኤዶምያስ ፤ ሰሚዐ ፡ ሰማዕኩ ፡ እምኀበ ፡ እግዚአብሔር ፡ ወፈነወ ፡ ማዕገተ ፡ ላዕለ ፡ ሕዝብ ፡ ተንሥኡ ፡ ወንትነሣእ ፡ ላዕሌሃ ፡ ወንትቃተላ ። 2 ናሁ ፡ ውኁደ ፡ ረሰይኩከ ፡ ውስተ ፡ አሕዛብ ፡ ወክቡር ፡ አንተ ፡ ፈድፋደ ። 3 ወተዝኀረት ፡ ልብከ ፡ እስመ ፡ ዐበይከ ፡ ዘይነብር ፡ ውስተ ፡ ግበበ ፡ ኰኵሕ ፡ ወአንኀ ፡ ቤቶ ፡ ወይቤ ፡ በልቡ ፤ መኑ ፡ ያወርደኒ ፡ ውስተ ፡ ምድር ። 4 እመሂ ፡ ሰረርከ ፡ ከመ ፡ ንስር ፡ ወአንበርከ ፡ እጐሊከ ፡ ማእከለ ፡ ከዋክብት ፡ እምህየኒ ፡ ኣጸድፈከ ፡ ይቤ ፡ እግዚአብሔር ። 5 እመኒ ፡ ሰረቅት ፡ ቦኡ ፡ ላዕሌከ ፡ እመኒ ፡ ጕሕልያ ፡ በሌሊት ፡ አይቴኑ ፡ ወረውከ ፡ እምኢሰረቁኒ ፡ ዘይአክሎሙ ፡ ወሶበሂ ፡ ቀሣም ፡ ቦኡ ፡ ላዕሌከ ፡ እምኢያትረፉኒ ፡ ለከ ፡ ትቅራመ ። 6 እፎኑ ፡ ፈተንዎ ፡ ለኤሳው ፡ ወነሥእዎ ፡ ዘየኀብእ ። 7 ወሰደዱከ ፡ እስከ ፡ ወሰንከ ፡ ወተቃተሉከ ፡ ዕደው ፡ እለ ፡ ተመሐልከ ፡ ወጸብኡከ ፡ ስንኣከ ፡ ወሞኡከ ፡ ወዐገቱከ ፡ እምታሕቴከ ፡ እለ ፡ ኢመሕኩከ ። 8 ይእተ ፡ አሚረ ፡ ይቤ ፡ እግዚአብሔር ፡ ኣጠፍኦሙ ፡ ለጠቢባን ፡ እምነ ፡ ኤዶምያስ ፡ ወእስዕር ፡ ምክረ ፡ እምብሔረ ፡ ኤሳው ። 9 ወይደነግፁ ፡ መስተቃትላኒከ ፡ ለቴማን ፡ ከመ ፡ ይጠፍእ ፡ ሰብእ ፡ እምደወለ ፡ ኤሳው ። 10 በእንተ ፡ ኀጢአተ ፡ ቀትሉ ፡ ዘምስለ ፡ ያዕቆብ ፡ እኁሁ ፡ ወይደፍነከ ፡ ኅፍረት ፡ ወትደመስስ ፡ ለዓለመ ፡ ዓለም ። 11 እስመ ፡ ተቃወምከ ፡ ፍጽመ ፡ አመ ፡ ይፄውዎሙ ፡ ካልእ ፡ ሕዝብ ፡ ወአመ ፡ ኀየሉ ፡ ወቦኡ ፡ ፀር ፡ ውስተ ፡ አናቅጺሁ ፡ ወተካፈልዋ ፡ ለኢየሩሳሌም ፡ ወአንተሂ ፡ ከመ ፡ ፩እምኔሆሙ ። 12 ወኢመሀኮ ፡ ለእኁከ ፡ ይእተ ፡ አሚረ ፡ በዕለተ ፡ ፀር ፡ ወኢተፈሣሕከ ፡ ላዕለ ፡ ደቂቀ ፡ ይሁዳ ፡ አመ ፡ አጥፍእዎሙ ፡ ወኢታዕቢ ፡ አፉከ ፡ በዕለተ ፡ ምንዳቤሆሙ ። 13 ወኢቦእከ ፡ አናቅጸ ፡ ሕዝብየ ፡ አመ ፡ ሐጸርዎሙ ፡ ወኢመሀኮ ፡ አንተሂ ፡ ተዓይኒሆሙ ፡ አመ ፡ ሠረውዎሙ ፡ ወኢትዌስክ ፡ ዲበ ፡ ሰራዊቶሙ ፡ አመ ፡ አኅለቅዎሙ ። 14 ወኢተበቀልከሆሙ ፡ ለእለ ፡ አምሠጡ ፡ ታጠፍኦሙ ፡ ወኢዐገትኮሙ ፡ ለእለ ፡ ድኅኑ ፡ ታመንድቦሙ ፡ በዕለተ ፡ ተኀስሩ ። 15 እስመ ፡ አልጸቀት ፡ ዕለተ ፡ እግዚአብሔር ፡ ላዕለ ፡ ኵሉ ፡ አሕዛብ ፡ ወበከመ ፡ ገበርከ ፡ ከማሁ ፡ ይከውን ፡ ፍዳከ ፡ ዘእፈድየከ ፡ ዲበ ፡ ርእስከ ። 16 ወበከመ ፡ ሰተይከ ፡ በደብረ ፡ መቅደስየ ፡ ከማሁ ፡ ይሰትዩ ፡ ኵሉ ፡ አሕዛብ ፡ ይሰትዩ ፡ ወይነ ፡ ወይወርዱ ፡ ወይከውኑ ፡ ከመ ፡ ዘኢተፈጥሩ ። 17 ወይከውን ፡ መድኀኒት ፡ በደብረ ፡ ጽዮን ፡ ወይከውን ፡ ቅዱሰ ፡ ወይወርስዎሙ ፡ ቤተ ፡ ያዕቆብ ፡ ለእለ ፡ ወረስዎሙ ። 18 ወይከውን ፡ እሳተ ፡ ቤተ ፡ ያዕቆብ ፡ ወቤተ ፡ ዮሴፍ ፡ ነበልባል ፡ ወቤተ ፡ ኤሳው ፡ ብርዐ ፡ ወይነድዱ ፡ ወይበልዕዎሙ ፡ ወአልቦ ፡ ዘይሰውድ ፡ በቤተ ፡ ኤሳው ፡ እስመ ፡ እግዚአብሔር ፡ ነበበ ። 19 ወይወርስዎ ፡ ሰብአ ፡ ናጌብ ፡ ለደብረ ፡ ኤሳው ፡ ወእለ ፡ ላዕለ ፡ ሴፌላ ፡ ለኢሎፍሊ ፡ ወይወርስዎ ፡ ለደብረ ፡ ኤፍሬሞ ፡ ወአሕቃላተ ፡ ሰማርያ ፡ ወብንያም ፡ ወገለዓድ ፡ ወበሓውርቲሆሙ ። 20 ወዛቲ ፡ ቀዳሚቶሙ ፡ ለደቂቀ ፡ እስራኤል ፡ በምድረ ፡ ከነዓን ፡ ከመ ፡ ሰራጰታ ፡ በሐውርተ ፡ እስራኤል ፡ እስከ ፡ ኤፍራታ ፡ ወይወርሱ ፡ አህጉረ ፡ ናጌብ ። 21 ወእለ ፡ ድኅኑ ፡ የዐርጉ ፡ እምደብረ ፡ ጽዮን ፡ ከመ ፡ ይትበቀልዎ ፡ ለደብረ ፡ ኤሳው ፡ ወይከውን ፡ መንግሥተ ፡ እግዚአብሔር ። ።