ዘአሞጽ ነቢይ 4

ስምዑ ፡ ዘንተ ፡ ነገረ ፡ እጐልተ ፡ ባሳን ፡ እለ ፡ ውስተ ፡ አድባረ ፡ ሰማርያ ፡ እለ ፡ ይትኤገላ ፡ ነዳየ ፡ ወየሀይዳ ፡ ምስኪናን ፡ እለ ፡ ይብላሆሙ ፡ ለአጋእስቲሆሙ ፡ ሀቡነ ፡ ንስተይ ። መሐለ ፡ እግዚአብሔር ፡ በቅዱሳኒሁ ፡ ናሁ ፡ ይመጽእ ፡ መዋዕል ፡ ላዕሌክሙ ፡ ይቤ ፡ እግዚአብሔር ።ወይነሥኡክሙ ፡ በንዋየ ፡ ሐቅል ፡ ወእለሂ ፡ ምስሌክሙ ፡ ለጸሀራት ፡ እኩያን ፡ ወጽልሕዋን ። ወያወፅኡክሙ ፡ ዕሩቃኒክሙ ፡ ወትትናጸሩ ፡ በበይናቲክሙ ፡ ወይገድፉክሙ ፡ ውስተ ፡ ደብረ ፡ ራማን ። ከመዝ ፡ ይቤ ፡ እግዚአብሔር ፡ እግዚእ ። ቦእክሙ ፡ ቤቴል ፡ ወአበስክሙ ፡ በገልገላሂ ፡ አብዛኅክሙ ፡ ኀጢአተክሙ ፡ ወአምጻእክሙ ፡ መሥዋዕተክሙ ፡ በጽባሕ ፡ አመ ፡ ሠሉስ ፡ መዋዕል ፡ ዓሥራቲክሙ ። ወአንበብክሙ ፡ ኦሪተ ፡ በአፍአ ፡ ወሰመይክምዎ ፡ ምእመነ ፡ ንግሩኒ ፡ ዘአፍቀሩ ፡ ደቂቀ ፡ እስራኤል ፡ ይቤ ፡ እግዚአብሔር ፡ እግዚእ ። አነ ፡ እሁበክሙ ፡ ትጽረሱ ፡ ስነኒክሙ ፡ በኵሉ ፡ ፍናዊክሙ ፡ ወረኃበ ፡ እክል ፡ በኵሉ ፡ በሓውርቲክሙ ፡ ወኢተመየጥክሙ ፡ ኀቤየ ፡ ይቤእግዚአብሔር ። ወአነ ፡ ከሳእኩክሙ ፡ ዝናመ ፡ እምቅድመ ፡ ሠለስቱ ፡ አውራኅ ፡ ለማእረር ፡ ወእዘንም ፡ ውስተ ፡ አሐቲ ፡ ሀገር ፡ ወውስተ ፡ ካልእት ፡ ሀገር ፡ ኢያዘንም ።አሐደ ፡ ከመ ፡ ገጸ ፡ ይዘንም ፡ ወብሔር ፡ ኀበ ፡ ኢይዘንምሰ ፡ ይየብስ ። ወይትጋብኡ ፡ ክልኤ ፡ ሀገር ፡ ወሠላስ ፡ ውስተ ፡ አሐቲ ፡ ሀገር ፡ ወይሰቲያ ፡ ማየ ፡ ወኢይረዊያ ፡ ወምስስ ፡ ከመዝ ፡ ኢተመየጥክሙ ፡ ኀቤየ ፡ ይቤ ፡ እግዚአብሔር ። ወአነ ፡ ቀሠፍኩክሙ ፡ በፈጸንት ፡ ወበብድብድ ፡ ወሰሚሮ ፡ አቅማኅክሙ ፡ ወወይንክሙ ፡ ወበለስክሙ ፡ ወዘይትክሙ ፡ በልዖ ፡ አናኳዕ ፡ ወምስለ ፡ ከመዝ ፡ ኢተመየጥክሙ ፡ ኀቤየ ፡ ይቤ ፡ እግዚአብሔር ። ወፈነውኩ ፡ ላዕሌክሙ ፡ ሞተ ፡ በፍኖተ ፡ ግብጽ ፡ ወቀተልክዎሙ ፡ በኲናት ፡ ለወራዙቲክሙ ፡ ወማህረኩ ፡ አፍራሲክሙ ፡ ወአምጻእኩ ፡ እሳተ ፡ ላዕለ ፡ ተዓይኒክሙ ፡ ወቀሠፍኩክሙ ፡ ወበዝኒ ፡ ኢተመየጥክሙ ፡ ኀቤየ ፡ ይቤ ፡ እግዚአብሔር ። ገፍታእኩክሙ ፡ ከመ ፡ ገፍትአ ፡ እግዚአብሔር ፡ ለሰዶም ፡ ወለገምራ ። ወኮንክሙ ፡ ከመ ፡ ትንታገ ፡ እሳት ፡ ዘአውፅእዎ ፡ እምአፍሓም ፡ ወበዝኒ ፡ ኢተመየጥክሙ ፡ ኀቤየ ፡ ይቤ ፡ እግዚአብሔር ። በእንተ ፡ ዝንቱ ፡ ከመዝ ፡ ይቤ ፡ እግዚአብሔር ፡ እሬስየከ ፡ እስራኤል ፡ እስመ ፡ ከመዝ ፡ እሬስየከ ፡ ታድሉ ፡ ከመ ፡ ትጸውዕ ፡ ስመ ፡ አምላክከ ፡ እስራኤል ። እስመ ፡ አነ ፡ ውእቱ ፡ ዘኣጸንዕ ፡ ነጐድጓደ ፡ ወእፈጥር ፡ ነፋሰ ፡ ወይዚንው ፡ ለሰብእ ፡ በእንተ ፡ መሲሑ ፡ ዘይገብር ፡ ጊዜ ፡ ጽባሕ ፡ ወይትሌዐል ፡ ውስተ ፡ ኑኃ ፡ ለምድር ። እግዚአብሔር ፡ እግዚእ ፡ ዘኵሎ ፡ ይመልክ ፡ ስሙ ።