ዘአሞጽ ነቢይ 6

አሌ ፡ ሎሙ ፡ ለእለ ፡ ይሜንንዋ ፡ ስጽዮን ፡ ወለእለ ፡ ይትአመኑ ፡ በደብረ ፡ ሰማርያ ፡ ይቅስምዎሙ ፡ መላእክተ ፡ አሕዛብ ። ወባኡ ፡ አንትሙ ፡ ቤተ ፡ እስራኤል ፡ ዕደው ፡ ኵልክሙ ፡ ወርእዩ ፡ ወኅልፉ ፡ እምሀየ ፡ ውስተ ፡ ኤማታርባ ፡ ወረዱ ፡ ውስተ ፡ ጌት ፡ ዘኢሎፍሊ ፡ ዘይጸንዕ ፡ እምኵሉ ፡ ነገሥት ፡ እስመ ፡ ዘይበዝኅ ፡ ብሔር ፡ ደወለ ፡ ዚአሆሙ ፡ ውእቱ ። እለ ፡ ይትሜነይዋ ፡ ለዕለት ፡ እኪይት ፡ እለ ፡ ይቀርቡ ፡ ወያስተሳጽቁ ፡ ሰንበታተ ፡ ሐሰት ። እለ ፡ ይሰክቡ ፡ ውስተ ፡ ዐራታት ፡ ዘቀርነ ፡ ነጌ ፡ ወይፈግዑ ፡ ውስተ ፡ ምስካባቲሆሙ ። እለ ፡ ይሴሰዩ ፡ መሓስዐ ፡ እምውስተ ፡ መራዕይ ፡ ወመቍዓለ ፡ ላህም ፡ እምውስተ ፡ አዕጻደ ፡ ወፍር ። እለ ፡ ይጠፍሑ ፡ ወየኀብሩ ፡ ምስለ ፡ ቃለ ፡ ዕንዚራ ፡ ወይመስሎሙ ፡ ዘኢያኀልፍ ፡ ወኢያአምሮሙ ፡ ከመ ፡ ያመስጦሙ ። እለ ፡ ይሰትዩ ፡ ወይነ ፡ ጸዓዳ ፡ ወይትቀብኡ ፡ ዕፍረተ ፡ ቅድወ ፡ ወኢየሐሙ ፡ ወኢምንተኒ ፡ በቅጥቃጤሁ ፡ ለዮሴፍ ። በእንተ ፡ ዝንቱ ፡ ይፄወዉ ፡ ዐበይቶሙ ፡ ይእዚ ፡ ቅድመ ፡ ወየኀልቁ ፡ አፍራሰ ፡ ኤፍሬም ፡ ረዋጺያን ። እስመ ፡ መሐለ ፡ እግዚአብሔር ፡ በርእሱ ፡ እንዘ ፡ ይብል ፡ አነ ፡ ኣርኵሶ ፡ ለኀሳረ ፡ ያዕቆብ ፡ ወጸላእኩ ፡ በሓውርቲሁ ፡ ወኣጠፍእ ፡ አህጉሪሁ ፡ ምስለ ፡ እለ ፡ ይነብሩ ፡ ውስቴቶሙ ። ወእመሂ ፡ ተርፉ ፡ ዓሠርቱ ፡ ውስተ ፡ አሐዱ ፡ ቤት ፡ ይመውቱ ፡ ወይተርፉ ፡ እለ ፡ ተርፉ ። ይነሥእዎሙ ፡ ሰብአ ፡ ቤቶሙ ፡ ወይትሔየልዎሙ ፡ ወያወፅኡ ፡ አዕፅምቲሆሙ ፡ እምነ ፡ ቤት ። ወይቤሎ ፡ ለዐቃቤ ፡ ቤት ፡ ቦኑ ፡ ዘተረፈ ፡ ኀቤከ ፡ ወይቤሎ ፡ አልቦ ። ወይብሎ ፡ አርምምኬ ፡ ከመ ፡ ኢይጸውዕ ፡ ስመ ፡ እግዚአብሔር ። እስመ ፡ ናሁ ፡ ይእዜ ፡ ይኤዝዝ ፡ እግዚአብሔር ፡ ወይቀስፎ ፡ ለዐቢይ ፡ ቤት ፡ በድቀት ፡ ወለንኡስሰ ፡ ቤት ፡ በንፅኀት ። ይረውጼኑ ፡ አፍራስ ፡ ውስተ ፡ ኰኵሕ ፡ ወያረምምኑ ፡ እምአንስት ፡ እስመ ፡ አንትሙሂ ፡ ሜጥክሙ ፡ ፍትሐ ፡ ውስተ ፡ መዐት ፡ ወአምረርክሙ ፡ ፍሬ ፡ ጽድቅ ። እለ ፡ ይትፌሥሑ ፡ በነገረ ፡ ከንቱ ፡ እለ ፡ ይብሉ ፡ አኮኑ ፡ በኀይልነ ፡ በቄለ ፡ አቅርንተ ። በእንተ ፡ ዝንቱ ፡ ናሁ ፡ አነ ፡ ኣነሥእ ፡ አሕዛበ ፡ ላዕሌክሙ ፡ ቤተ ፡ እስራኤል ፡ እለ ፡ ይሣቂዩክሙ ፡ ወኢያበውሑክሙ ፡ ትባኡ ፡ የማት ፡ ወእስከ ፡ ፈለገ ፡ ዐረብ ።