መጽሐፈ ሄኖክ 25

ወይቤለኒ ፡ ሄኖክ ፡ ምንተ ፡ ትሴአለኒ ፡ በእንተ ፡ መዐዛሁ ፡ ለዝ ፡ ዕፅ ፡ ወትጤይቅ ፡ ከመ ፡ ታእምር ። ወውእተ ፡ ጊዜ ፡ አውሣእክዎ ፡ አነ ፡ ሄኖክ ፡ እንዘ ፡ እብል ፡ በእንተ ፡ ኵሉ ፡ እፈቅድ ፡ አእምር ፡ ወፈድፋደሰ ፡ በእንተዝ ፡ ዕፅ ። ወአውሥአኒ ፡ እንዘ ፡ ይብል ፡ ዝንቱ ፡ ደብር ፡ ዘርኢከ ፡ ነዊኀ ፡ ዘርእሱ ፡ ይመስል ፡ መንበሮ ፡ ለእግዚእ ፡ መንበሩ ፡ ውእቱ ፡ ኀበ ፡ ይነብር ፡ ቅዱስ ፡ ወዐቢይ ፡ እግዚአ ፡ ስብሐት ፡ ንጉሥ ፡ ዘለዓለም ፡ ሶበ ፡ ይወርድ ፡ የሐውጻ ፡ ለምድር ፡ በሠናይ ። ወዝንቱኒ ፡ ዕፀ ፡ መዐዛ ፡ ሠናይ ፡ ወኢ፩ ፡ ዘሥጋ ፡ አልቦ ፡ ሥልጣን ፡ ከመ ፡ ይግሥሦ ፡ እስከ ፡ አመ ፡ ዐቢይ ፡ ኵነኔ ፡ አመ ፡ ይትቤቀል ፡ ኵሎ ፡ ወይትፌጸም ፡ እስከ ፡ ለዓለም ፡ ዝኩ ፡ ለጻድቃን ፡ ወለትሑታን ፡ ይትወሀብ ። እምፍሬ ፡ ዚአሁ ፡ ይትወሀብ ፡ ለኅሩያን ፡ ሕይወት ፡ መንገለ ፡ መስዕ ፡ ይተከል ፡ ውስተ ፡ መካን ፡ ቅዱስ ፡ መንገለ ፡ ቤቱ ፡ ለእግዚእ ፡ ንጉሥ ፡ ዘለዓለም ። ውእተ ፡ ጊዜ ፡ ይትፌሥሑ ፡ በፍሥሓ ፡ ወይትሐሠዩ ፡ ውስተ ፡ ቅዱስ ፡ ያበውኡ ፡ ሎቱ ፡ መዐዛ ፡ በበአዕፅምቲሆሙ ፡ ወሕይወተ ፡ ብዙኃ ፡ የሐይዉ ፡ በዲበ ፡ ምድር ፡ በከመ ፡ ሐይዉ ፡ አበዊከ ፡ ወበመዋዕሊሆሙ ፡ ኀዘን ፡ ወሕማም ፡ ወጻማ ፡ ወመቅሠፍት ፡ እይገሥሦሙ ። ውእተ ፡ ጊዜ ፡ ባረክዎ ፡ ለእግዚአ ፡ ስብሐት ፡ ንጉሥ ፡ ዘለዓለም ፡ እስመ ፡ አስተዳለወ ፡ ከመዝ ፡ ለሰብእ ፡ ጻድቃን ፡ ወከመዝ ፡ ፈጠረ ፡ ወይቤ ፡ የሀብዎሙ ።