መጽሐፈ ሄኖክ 38

ምሳሌ ፡ ቀዳሚ ፡ ሶበ ፡ ያስተርኢ ፡ ማኅበረ ፡ ጻድቃን ፡ ወይትኴነኑ ፡ ኃጥኣን ፡ በኀጢአቶሙ ፡ ወእምገጸ ፡ የብስ ፡ ይትሀወኩ ። ወሶበ ፡ ያስተርኢ ፡ ጻድቅ ፡ በገጾሙ ፡ ለጻድቃን ፡ እለ ፡ ኅሩያን ፡ ተግባሮሙ ፡ ስቁል ፡ በእግዚአ ፡ መናፍስት ፡ ወያስተርኢ ፡ ብርሃን ፡ ለጻድቃን ፡ ወለኅሩያን ፡ እለ ፡ የኀድሩ ፡ ዲበ ፡ የብስ ፡ አይቴ ፡ ማኅደረ ፡ ኃጥኣን ፡ ወአይቴ ፡ ምዕራፎሙ ፡ ለእለ ፡ ክህድዎ ፡ ለእግዚአ ፡ መናፍስት ፡ እምኀየሶሙ ፡ ሶበ ፡ ኢተወልዱ ። ወሶበ ፡ ይትከሠታ ፡ ኅቡኣቲሆሙ ፡ ለጻድቃን ፡ ይትኴነኑ ፡ ኃጥኣን ፡ ወይትሀወኩ ፡ ረሲዓን ፡ እምገጸ ፡ ጻድቃን ፡ ወኅሩያን ። ወእምይእዜ ፡ ኢይከውኑ ፡ አዚዛነ ፡ ወኢልዑላነ ፡ እለ ፡ ይእኅዝዋ ፡ ለምድር ፡ ወኢይክሉ ፡ ርእየ ፡ ገጸ ፡ ቅዱሳን ፡ እስመ ፡ ለእግዚአ ፡ መናፍስት ፡ ተርእየ ፡ ብርሃኑ ፡ ለገጸ ፡ ቅዱሳን ፡ ወጻድቃን ፡ ወኅሩያን ። ወነገሥት ፡ አዚዛን ፡ በውእቱ ፡ ጊዜ ፡ ይትኃጐሉ ፡ ወይትወሀቡ ፡ ውስተ ፡ እደ ፡ ጻድቃን ፡ ወቅዱሳን ። ወእምህየ ፡ አልቦ ፡ ዘያስተምህር ፡ ኀበ ፡ እግዚአ ፡ መናፍስት ፡ እስመ ፡ ተወድአ ፡ እንቲአሆሙ ፡ ሕይወት ።