መጽሐፈ ሄኖክ 86

ወካዕበ ፡ ርኢኩ ፡ በአዕይንትየ ፡ እንዘ ፡ እነውም ፡ ወርኢኩ ፡ ሰማየ ፡ መልዕልተ ፡ ወነዋ ፡ ፩ኮከብ ፡ ወድቀ ፡ እምሰማይ ፡ ወይትሌዐል ፡ ወይበልዕ ፡ ወይትረዐይ ፡ ማእከለ ፡ እልኩ ፡ አልህምት ። ወእምዝ ፡ ርኢኩ ፡ አልህምተ ፡ ዐቢያነ ፡ ወጸሊማነ ፡ ወናሁ ፡ ኵሎሙ ፡ ወለጡ ፡ ምዕያሞሙ ፡ ወምርዓዮሙ ፡ ወአጣዕዋሆሙ ፡ ወአኀዙ ፡ የዓውይዉ ፡ ፩ምስለ ፡ ካልኡ ። ወካዕበ ፡ ርኢኩ ፡ በራእይ ፡ ወነጸርክዎ ፡ ለሰማይ ፡ ወነዋ ፡ ርኢኩ ፡ ከዋክብተ ፡ ብዙኃነ ፡ ወወረዱ ፡ ወተገድፉ ፡ እምሰማይ ፡ ኀበ ፡ ዝኩ ፡ ኮከብ ፡ ቀዳማዊ ፡ ወማእከለ ፡ እልኩ ፡ ጣዕዋ ፡ ወአልህምት ፡ ኮኑ ፡ ምስሌሆሙ ፡ ይትረዐዩ ፡ ማእከሎሙ ። ወነጸርክዎሙ ፡ ወርኢኩ ፡ ወነዋ ፡ ኵሎሙ ፡ አውፅኡ ፡ ኀፍረታቲሆሙ ፡ ከመ ፡ አፍራስ ፡ ወአኀዙ ፡ ይዕርጉ ፡ ዲበ ፡ እጐላተ ፡ አልህምት ፡ ወፀንሳ ፡ ኵሎን ፡ ወወለዳ ፡ ነጌያተ ፡ ወአግማለ ፡ ወአዕዱገ ። ወኵሎሙ ፡ አልህምት ፡ ፈርሕዎሙ ፡ ወደንገፅ ፡ እምኔሆሙ ፡ ወአኀዙ ፡ እንዘ ፡ ይኔዝሩ ፡ በስነኒሆሙ ፡ ወይውሕጡ ፡ ወይወግኡ ፡ በአቅርንቲሆሙ ። ወአኀዙ ፡ እንከ ፡ ይብልዕዎሙ ፡ ለእኩ ፡ አልህምት ፡ ወነዋ ፡ ኵሎሙ ፡ ውሉደ ፡ ምድር ፡ አኀዙ ፡ ይርዐዱ ፡ ወያድለቅልቁ ፡ እምኔሆሙ ፡ ወይንፍጹ ።