መጽሐፈ ሄኖክ 9

ወአሜሃ ፡ ሐወጹ ፡ ሚካኤል ፡ ወገብርኤል ፡ ወሱርያን ፡ ወኡርያን ፡ እምሰማይ ፡ ወርእዩ ፡ ብዙኃ ፡ ደመ ፡ ዘይትከዐው ፡ በዲበ ፡ ምድር ፡ ወኵሎ ፡ ዓመፃ ፡ ዘይትገበር ፡ በዲበ ፡ ምድር ። ወይቤሉ ፡ በበይናቲሆሙ ፡ ቃለ ፡ ጽራኃቲሆሙ ፡ ዕራቃ ፡ ጸርኀት ፡ ምድር ፡ እስከ ፡ አንቀጸ ፡ ሰማይ ። ወይእዜኒ ፡ ለክሙ ፡ ኦቅዱሳነ ፡ ሰማይ ፡ ይሰክዩ ፡ ነፍሳተ ፡ ሰብእ ፡ እንዘ ፡ ይብሉ ፡ አብኡ ፡ ለነ ፡ ፍትሐ ፡ ኀበ ፡ ልዑል ። ወይቤሉ ፡ ለእግዚኦሙ ፡ ለንጉሥ ፡ እስመ ፡ እግዚኦሙ ፡ ለአጋእዝት ፡ ወአምላኮሙ ፡ ለአማልክት ፡ ወንጉሦሙ ፡ ለነገሥት ፡ ወመንበረ ፡ ስብሐቲከ ፡ ውስተ ፡ ኵሎ ፡ ትውልደ ፡ ዓለም ፡ ወስምከ ፡ ቅዱስ ፡ ወስቡሕ ፡ ውስተ ፡ ኵሉ ፡ ትውልደ ፡ ዓለም ፡ ወቡሩክ ፡ ወስቡሕ ፡ አንተ ። ገበርከ ፡ ኵሎ ፡ ወሥልጣነ ፡ ኵሉ ፡ ምስሌከ ፡ ወኵሉ ፡ ክሡት ፡ ቅድሜከ ፡ ወግሁድ ፤ ወአንተ ፡ ትሬኢ ፡ ኵሎ ፡ ወአልቦ ፡ ዘይትከሀል ፡ ይትኀባእ ፡ እምኔከ ። ርኢኬ ፡ ዘገብረ ፡ አዛዝኤል ፡ ዘከመ ፡ መሀረ ፡ ኵሎ ፡ ዓመፃ ፡ በዲበ ፡ ምድር ፡ ወአግሀደ ፡ ኅቡኣተ ፡ ዓለም ፡ እለ ፡ ይትገበራ ፡ በሰማያት ። ወአመረ ፡ ስብዐታተ ፡ ስምያዛ ፡ ዘአንተ ፡ ወሀብኮ ፡ ሥልጣነ ፡ ይኰንን ፡ እለ ፡ ምስሌሁ ፡ ኅቡረ ። ወሖሩ ፡ ኀበ ፡ አዋልደ ፡ ሰብእ ፡ ኅቡረ ፡ ወሰከቡ ፡ ምስሌሆን ፡ ምስለ ፡ እልኩ ፡ አንስት ፡ ወረኵሱ ፡ ወአግሀዱ ፡ ሎን ፡ እሎንተ ፡ ኃጣውአ ። ወአንስትሰ ፡ ወለዳ ፡ ረዓይተ ፡ ወበዝ ፡ መልአት ፡ ኵላ ፡ ምድር ፡ ደመ ፡ ወዐመፃ ። ወይእዜኒ ፡ ናሁ ፡ ይጸርሑ ፡ ነፍሳት ፡ እለ ፡ ሞቱ ፡ ወይሰክዩ ፡ እስከ ፡ አንቀጸ ፡ ሰማይ ፡ ወዐርገ ፡ ገዓሮሙ ፡ ወኢይክሉ ፡ ወፂአ ፡ እምቅድመ ፡ ገጸ ፡ ዐመፃ ፡ ዘይትገበር ፡ በዲበ ፡ ምድር ። ወአንተ ፡ ተአምር ፡ ኵሎ ፡ ዘእንበለ ፡ ይኩን ፤ ወአንተ ፡ ተአምር ፡ ዘንተ ፡ ወዘዚአሆሙ ፡ ወአልቦ ፡ ዘትነግረነ ፡ ወምንት ፡ መፍትው ፡ ንረስዮሙ ፡ በእንተ ፡ ዝንቱ ።