መጽሐፈ ኩፋሌ 12

12 1 ወኮነ ፡ በኡባዔ ፡ ሳድስ ፡ ዓመቱ ፡ ሎቱ ፡ ይቤ ፡ አብራም ፡ ለታራ ፡ አቡሁ ፡ እንዘ ፡ ይብል ፡ አባ ፡ ወይቤ ፡ ነየ ፡ አነ ፡ ወልድየ ። 2 ወይቤ ፡ ምንተ ፡ ረድኤተ ፡ ወተድላ ፡ ለነ ፡ እምእሉ ፡ ጣዖት ፡ ዘአንተ ፡ ታመልክ ፡ ወትሰግድ ፡ ቅድሜሆሙ ፡ 3 እስመ ፡ አልቦ ፡ ላዕሌሆሙ ፡ ምንተኒ ፡ መንፈሰ ፡ እስመ ፡ ስግመት ፡ እሙንቱ ፡ ወስሕተተ ፡ ልብ ፡ እሙንቱ ፡ ኢታምልክዎሙ ። 4 አምልኩ ፡ አምላከ ፡ ሰማይ ፡ ዘያወርድ ፡ ዝናመ ። ወጠለ ፡ ላዕለ ፡ ምድር ፡ ወይገብር ፡ ኵሎ ፡ ላዕለ ፡ ምድር ፡ ወኵሎ ፡ ፈጠረ ፡ በቃሉ ። ወኵሉ ፡ ሕይወት ፡ እምቅድመ ፡ ገጹ ። 5 ለምንት ፡ አንትሙ ፡ ታመልኩ ፡ እለ ፡ አልቦሙ ፡ መንፈሰ ፡ ላዕሌሆሙ ፡ እስመ ፡ ግብረ ፡ እደው ፡ እሙንቱ ፡ ወዲበ ፡ መታክፍቲክሙ ፡ አንትሙ ፡ ትጸውርዎሙ ፡ ወአልቦ ፡ እምኔሆሙ ፡ ለክሙ ፡ ረጽኤተ ፡ ዘእንበለ ፡ ኀሳር ፡ ዐቢይ ፡ ለእለ ፡ ይገብርዎሙ ፡ ወስሕተተ ፡ ልብ ፡ ለእለ ፡ ያመልክዎሙ ፡ ኢታምልክዎሙ ፡ 6 ወይቤሎ ፡ አነሂ ፡ አአምር ፡ ወልድየ ፡ ምንተ ፡ እሬሲ ፡ ለሕዝብ ፡ እለ ፡ አዘዙኒ ፡ እትለአክ ፡ ቅድሜሆሙ ፡ 7 ወእመ ፡ ነገርክዎሙ ፡ ጽድቀ ፡ ይቀትሉኒ ፡ እስመ ፡ ተለወት ፡ ነፍሶሙ ፡ ኀቤሆሙ ፡ ከመ ፡ ያምልክዎሙ ፡ ወይሰብሕዎሙ ። አርምም ፡ ወልድየ ፡ ኢይቅትሉከ ፡ 8 ወነገረ ፡ ዘንተ ፡ ነገረ ፡ ለክልኤ ፡ አኃዊሁ ፡ ወተምዕዑ ፡ ላዕሌሁ ፡ ወአርመመ ። 9 ወበአርብዓ ፡ ኢዮቤልዉ ፡ በሱባዔ ፡ ካልእ ፡ በሳብዕ ፡ ዓመቱ ፡ ሎቱ ፡ ነሥአ ፡ ሎቱ ፡ አብራም ፡ ብእሲተ ፡ ወስማ ፡ ሶራ ፡ ወለተ ፡ አቡሁ ፡ ወኮነቶ ፡ ሎቱ ፡ ብእሲተ ። 10 ወአራን ፡ እኁሁ ፡ ነሥአ ፡ ሎቱ ፡ በዓመት ፡ ሣልስ ፡ ዘሱባዔ ፡ ሣልስ ፡ ወወለደት ፡ ሎቱ ፡ ወልደ ፡ በዓመት ፡ ሳብዕ ፡ ዘሱባዔ ፡ ዝንቱ ፡ ወጸውዐ ፡ ስሞ ፡ ሎጥ ። 11 ወናኮርኒ ፡ እኁሁ ፡ ነሥአ ፡ ሎቱ ፡ ብእሲተ ። 12 ወበዓመት ፡ ዘስሳ ፡ ዘሕይወተ ፡ አብራም ፡ ውእቱ ፡ ሱባዔ ፡ ራብዕ ። በዓመት ፡ ራብዑ ፡ ሎቱ ፡ ተንሥአ ፡ አብራም ፡ በሌሊት ፡ ወአውዐየ ፡ ቤተ ፡ ጣዖታት ፡ ወአውዐየ ፡ ኵሎ ፡ በውስተ ፡ ቤት ፡ ወሰብእ ፡ አልቦ ፡ ዘአእመረ ። 13 ወተንሥኡ ፡ ሌሊተ ፡ ወፈቀዱ ፡ ያድኅኑ ፡ አማልክቲሆሙ ፡ እማእከለ ፡ እሳት ፡ 14 ወሰረረ ፡ አራን ፡ ከመ ፡ ያድኅኖሙ ፡ ወነደደ ፡ እሳት ፡ ላዕሌሁ ፡ ወውዕየ ፡ በእሳት ፡ ወሞተ ፡ በኤኑር ፡ ዘከላዴዎን ፡ በቅድመ ፡ ታራ ፡ አቡሁ ፡ ወቀበርዎ ፡ በኤኑር ፡ ዘከላዴዎን ። 15 ወወፅአ ፡ ታራ ፡ እምነ ፡ ኡር ፡ ዘከለዳዊያን ፡ ውእቱ ፡ ወውሉዱ ፡ ከመ ፡ ይምጽኡ ፡ ውስተ ፡ ምድረ ፡ ሊባኖስ ፡ ወውስተ ፡ ምድረ ፡ ከናአን ፡ ወኀደረ ፡ ውስተ ፡ ካራን ። ወኀደረ ፡ አብራም ፡ ምስለ ፡ አቡሁ ፡ ውስተ ፡ ካራን ፡ ክልኤ ፡ ዓመታተ ። 16 ወበሳድስ ፡ ሱባዔ ፡ በዓመት ፡ ኃምሱ ፡ ሎቱ ፡ ነበረ ፡ አብራም ፡ በሌሊት ፡ በሠርቀ ፡ ወርኅ ፡ ሳብዕ ፡ ከመ ፡ ያበይን ፡ ከዋክብተ ፡ እምሰርክ ፡ እስከ ፡ ነግህ ፡ ከመ ፡ ይርአይ ፡ ምንተ ፡ ግብረ ፡ ዓመት ፡ በዝናማት ፡ ወሀሎ ፡ ውእቱ ፡ ባሕቲቱ ፡ ይነብር ፡ ወያቤይን ፡ 17 ወመጽአ ፡ ውስተ ፡ ልቡ ፡ ቃል ፡ ወይቤ ፡ ኵሉ ፡ ተአምረ ፡ ከዋክብት ፡ ወተአምሪሃ ፡ ለወርኅ ፡ ወለፀሐይ ፡ ኵሉ ፡ በእደ ፡ እግዚአብሔር ። ለምንት ፡ አነ ፡ እትኃሠሠ ፡ 18 ለእመ ፡ ፈቀደ ፡ ያዘንም ፡ ነግህ ፡ ወሰርክ ፡ ወእመ ፡ ፈቀደ ፡ ኢያወርድ ፡ ወኵሉ ፡ ውስተ ፡ እዴሁ ። 19 ወጸለየ ፡ በዛቲ ፡ ሌሊት ፡ ወይቤ ፡ አምላኪየ ፡ አምላኪየ ፡ አምላክ ፡ ልዑል ፡ አንተ ፡ ባሕቲትከ ፡ ሊተ ፡ አምላክ ፡ ወአንተ ፡ ኵሎ ፡ ፈጠርከ ፡ ወግብረ ፡ እደዊከ ፡ ኵሉ ፡ ኮነ ፡ ወሀለወ ፡ ወኪያከ ፡ ወመለኮትከ ፡ ኀረይኩ ። 20 አድኅነኒ ፡ እምእደ ፡ መናፍስት ፡ እኩያን ፡ እለ ፡ ይሴለጡ ፡ ውስተ ፡ ኅሊና ፡ ልበ ፡ ሰብእ ፡ ወኢያስሕቱኑ ፡ እምድኅሬከ ፡ አምላኪየ ፡ ወትረስየኒ ፡ ኪያየ ፡ ወዘርእየ ፡ አንተ ፡ ለዓለም ። ወኢንስሐት ፡ እምይእዜ ፡ ወእስከ ፡ ለዓለም ። 21 ወይቤ ፡ እመ ፡ እገብእሁ ፡ ውስተ ፡ ኡር ፡ ዘከለዳዊያን ፡ እለ ፡ እሙንቱ ፡ የኀሥሡ ፡ ገጽየ ፡ ከመ ፡ እግባእ ፡ ኀቤሆሙ ፡ ወሚመ ፡ እንበር ፡ ዝየ ፡ በዝ ፡ መካን ፡ ፍኖተ ፡ ርቱዐ ፡ ቅድሜከ ፡ ኪያሃ ፡ ሰርሕ ፡ በእደ ፡ ገብርከ ፡ ይግበር ፡ ወኢይሖር ፡ በስሕተተ ፡ ልብየ ፡ አምላኪየ ። 22 ወውእቱ ፡ ሶበ ፡ ፈጸመ ፡ ተናግሮ ፡ ወጸዕዮ ። ወናሁ ፡ ቃለ ፡ እግዚአብሔር ፡ ተፈነወ ፡ ኀቤሁ ፡ በእዴየ ፡ እንዘ ፡ ይብል ፡ ነዓ ፡ አንተ ፡ እምድርከ ፡ ወእምነ ፡ ትዝምድከ ፡ ወእምነ ፡ ቤተ ፡ አቡከ ፡ ውስተ ፡ ምድር ፡ እንተ ፡ አርእየከ ። ወእሬስየከ ፡ ሕዝበ ፡ ዐቢየ ፡ ወብዙኀ ፡ 23 ወእባርከከ ፡ ወአዐቢ ፡ ስመከ ፡ ወትከውን ፡ ቡሩከ ፡ ውስተ ፡ ምድር ። ወይትባረኩ ፡ ብከ ፡ ኵሎሙ ፡ አሕዛበ ፡ ምድር ፡ ወለእለ ፡ ይባርኩከ ፡ እባርኮሙ ። ወለእለ ፡ ይረግሙከ ፡ እረግሞሙ ፡ 24 ወእከውነከ ፡ ለከ ፡ ወለወልድከ ፡ ወለወልደ ፡ ወልድከ ፡ ወለኵሉ ፡ ዘርእከ ፡ አምላከ ፡ ኢትፍራህ ፡ እምይእዜ ፡ ወእስከ ፡ ኵሉ ፡ ትዝምደ ፡ ምድር ፡ አነ ፡ አምላክከ ። 25 ወይቤለኒ ፡ እግዚአብሔር ፡ አምላክ ፡ ፍታሕ ፡ አፉሁ ፡ ወእዘኒሁ ፡ ይስማዕ ፡ ወይንብብ ፡ በልሳኑ ፡ በልሳን ፡ እንተ ፡ ታስተርኢ ፡ እስመ ፡ አዕረፈ ፡ እምአፈ ፡ ኵሉ ፡ ውሉደ ፡ ሰብእ ፡ እምዕለተ ፡ ድቀት ፡ 26 ወፈታሕኩ ፡ አፉሁ ፡ ወእዘኒሁ ፡ ወከናፍሪሁ ፡ ወአኀዝኩ ፡ እትናገር ፡ ምስሌሁ ፡ ዕብራይስጥ ፡ በልሳነ ፡ ፍጥረት ። 27 ወነሥአ ፡ መጻሕፍተ ፡ አበዊሁ ፡ ወጽሑፋት ፡ እማንቱ ፡ ዕብራይስጥ ፡ ወደገሞን ፡ ወአኀዘ ፡ ይትመሀሮን ፡ እምአሜሃ ፡ ወአነ ፡ አየድዖ ፡ ኵሎ ፡ ዘይሰአኖ ። ወተምህሮን ፡ ስድስተ ፡ ወርኀ ፡ ዝናም ። 28 በዓመት ፡ ሳብዕ ፡ ዘሱባዔ ፡ ሳድስ ፡ ወተናገረ ፡ ምስለ ፡ አቡሁ ፡ ወአይድዖ ፡ ከመ ፡ የሐውር ፡ ውእቱ ፡ እምካራን ፡ ለሐዊረ ፡ ምድረ ፡ ከናአን ፡ ይርአያ ፡ ወይግባእ ፡ ኀቤሁ ፡ 29 ወይቤሎ ፡ ታራ ፡ አቡሁ ፡ ሖር ፡ በሰላም ፡ አምላከ ፡ ዓለም ፡ ያርትዕ ፡ ፍኖተከ ፡ ወእግዚአብሔር ፡ ምስሌከ ፡ ወይትማኅፀንከ ፡ እምኩሉ ፡ እኩይ ። ወየሀብ ፡ ላዕሌከ ፡ ሣህለ ፡ ወምሕረተ ፡ ወሞገሰ ፡ በቅድመ ፡ እለ ፡ ይሬእዩከ ፡ ወኢይኰንንከ ፡ ኵሉ ፡ ውሉደ ፡ ሰብእ ፡ ለአእክዮ ፡ ዲቤከ ፡ ሖር ፡ በሰላም ። 30 ወእመ ፡ ርኢከ ፡ ምድረ ፡ አዳም ፡ ለአዕይንቲከ ፡ ለኀዲር ፡ ውስቴታ ፡ ነዓ ፡ ወንሥአኒ ፡ ኀቤከ ፡ ወንሥኦ ፡ ለሎጥ ፡ ምስሌከ ፡ ወልደ ፡ አራን ፡ እኁከ ፡ ለከ ፡ ለወልድ ፡ እግዚአብሔር ፡ ምስሌከ ፡ 31 ወናኮርሃ ፡ እኅዋከ ፡ ኅድግ ፡ ኀቤየ ፡ እስከ ፡ ትገብእ ፡ በሰላም ፡ ወነሐውር ፡ ኵልነ ፡ ኅቡረ ፡ ምስሌከ ።