መጽሐፈ ኩፋሌ 18

18 1 ወይቤሎ ፡ እግዚአብሔር ፡ አብርሃም ፡ አብርሃም ፡ ወይቤ ፡ ነየ ፡ አነ ፡ 2 ወይቤሎ ፡ ንሥእ ፡ ወልደከ ፡ ፍቁረከ ፡ ዘታፈቅር ፡ ይስሐቅሃ ፡ ወሖር ፡ ውስተ ፡ ምደር ፡ ልዕልት ፡ ወአዕርጎ ፡ ውስተ ፡ አሐዱ ፡ እምአድባር ፡ ዘአነ ፡ አየድዐከ ፡ 3 ወአሌለየ ፡ በነገህ ፡ ወጸዐነ ፡ አድግቶ ፡ ወክልኤተ ፡ ደቆ ፡ ነሥአ ፡ ምስሌሁ ፡ ወይስሐቅሃ ፡ ወልዶ ፡ ወዕፀወ ፡ መሥዋዕት ፡ ሠፀረ ፡ ወሖረ ፡ ወስተ ፡ መካን ፡ በሠሉስ ፡ ዕለት ። ወርእየ ፡ መካነ ፡ እምርሑቅ ፡ 4 ወበጽሐ ፡ እስከ ፡ ዐዘቅተ ፡ ማይ ፡ ወይቤ ፡ ለደቁ ፡ ንበሩ ፡ ዝየ ፡ ምስለ ፡ አድግት ፡ ወአነ ፡ ወሕፃን ፡ ነሐውር ፡ ወሰጊደነ ፡ ንገብእ ፡ ኀቤክሙ ። 5 ወነሥአ ፡ ዕፀ ፡ መሥዋዕት ፡ ወአስከሞ ፡ ለይስሐቅ ፡ ወልዱ ፡ ወነሥአ ፡ በእዴሁ ፡ እሳተ ፡ ወመጥባሕተ ። ወሖሩ ፡ ክልኤሆሙ ፡ ኅቡረ ፡ እስከ ፡ ውእቱ ፡ መካን ። 6 ወይቤ ፡ ይስሐቅ ፡ ለአቡሁ ፡ አባ ። ወይቤ ፡ ነየ ፡ አነ ፡ ወልድየ ። ወይቤሎ ፡ ናሁ ፡ እሳት ፡ ወመጥባሕት ፡ ወዕፀው ፡ ወአይቴ ፡ በግዕ ፡ ዘለጽንሓሕ ፡ አባ ። 7 ወይቤ ፡ እግዚአብሔር ፡ ያሬኢ ፡ ሎቱ ፡ በግዐ ፡ ለጽንሓሕ ፡ ወልድየ ። ወቀርበ ፡ ኀበ ፡ መካን ፡ ዘደብረ ፡ እግዚአብሔር ፡ 8 ወሐነጸ ፡ ምሥዋዐ ፡ ወአንበረ ፡ ዕፀወ ፡ ዲበ ፡ መሥዋዕት ፡ ወአሰረ ፡ ይስሐቅሃ ፡ ወልዶ ፡ ወአንበሮ ፡ ዲበ ፡ ዕፀው ፡ ዘመልዕልተ ፡ ምሥዋዕ ፡ ወሰፍሐ ፡ እዴሁ ፡ ይንሥእ ፡ መጥባሕተ ፡ ከመ ፡ ይዝብሖ ፡ ለይስሐቅ ፡ ወልዱ ። 9 ወአነ ፡ ቆምኩ ፡ ቅድሜሁ ፡ ወቅድመ ፡ መኰንነ ፡ መስቴማ ፡ ወይቤ ፡ እግዚአብሔር ፡ በሎ ፡ ኢያውርድ ፡ እዴሁ ፡ ላዕለ ፡ ሕፃን ፡ ወኢይግበር ፡ ምንተኒ ፡ ላዕሌሁ ፡ እስመ ፡ አእመርኩ ፡ ከመ ፡ ፈራሄ ፡ እግዚአብሔር ፡ ውእቱ ። 10 ጸዋዕክዎ ፡ እምሰማይ ፡ ወእቤሎ ፡ አብርሃም ፡ ወደንገፀ ፡ ወይቤ ፡ ነየ ፡ አነ ። 11 ወእቤሎ ፡ ኢትፈኑ ፡ እዴከ ፡ ዲበ ፡ ሕፃን ፡ ወኢትግበረ ፡ ምንተኒ ፡ ዲቤሁ ፡ እስመ ፡ ይእዜ ፡ አእመርኩ ፡ ከመ ፡ ፈራሄ ፡ እግዚአብሔር ፡ አንተ ፡ ወኢመሐከ ፡ ወልደከ ፡ በኵረከ ፡ እምኔየ ፡ 12 ወተኀፍረ ፡ መኰንነ ፡ መስቴማ ፡ ወአንሥአ ፡ አብርሃም ፡ አዕይንቲሁ ፡ ወርእየ ፡ ወናሁ ፡ አሐዱ ፡ በሐኵ ፡ እኁዝ ፡ ወይመጽእ ፡ በአቅርንቲሁ ፡ ወሖረ ፡ አብርሃም ፡ ወነሥኦ ፡ ለበሐኵ ፡ ወአዕረጎ ፡ ለጽንሓሕ ፡ ህየንተ ፡ ወልዱ ። 13 ወጸውዖ ፡ አብርሃም ፡ ለውእቱ ፡ መካን ፡ እግዚአብሔር ፡ ርእየ ፡ ከመ ፡ ይትበሀል ፡ እግዚአብሔር ፡ ርእየ ፡ ውእቱ ፡ ደብሩ ፡ ለጽዮን ። 14 ወጸውዖ ፡ እግዚአብሔር ፡ ለአብርሃም ፡ በስሙ ፡ ዳግመ ፡ እምሰማይ ፡ በከመ ፡ አስተርአይነ ፡ ከመ ፡ ንትናገሮ ፡ በስመ ፡ እግዚአብሔር ፡ 15 ወይቤ ፡ በርእስየ ፡ መሐልኩ ፡ ይቤ ፡ እግዚአብሔር ፡ እስመ ፡ ገበርከ ፡ ዘንተ ፡ ቃለ ፡ ወኢመሐከ ፡ ወልደከ ፡ በኵረከ ፡ እምኔየ ፡ ዘአፍቀርከ ። እስመ ፡ ባርኮ ፡ እባርከከ ፡ ወአብዝኆ ፡ አበዝኅ ፡ ዘርአከ ፡ ከመ ፡ ከዋክብተ ፡ ሰማይ ፡ ወከመ ፡ ኆፃ ፡ ዘድንጋገ ፡ ባሕር ። ወይወርሱ ፡ ዘርእከ ፡ አህጉረ ፡ ፀሮሙ ፡ 16 ወይትባረኩ ፡ በዘርእከ ፡ ኵሎሙ ፡ አሕዛበ ፡ ምድር ፡ ህየንተ ፡ ዘሰማዕከ ፡ ቃለ ፡ ዚአየ ። ወአይዳዕኩ ፡ ለኵሉ ፡ ከመ ፡ ምእመን ፡ አንተ ፡ ሊተ ፡ በኵሉ ፡ ዘእቤለከ ፡ ሖር ፡ በሰላም ። 17 ወሖረ ፡ አብርሃም ፡ ኀበ ፡ ደቁ ፡ ወተንሥኡ ፡ ወሖሩ ፡ ቤርሳቤ ፡ ኅቡረ ። ወኀደረ ፡ አብርሃም ፡ ኀበ ፡ ዐዘቅተ ፡ መሐላ ። 18 ወይገብር ፡ ዛተ ፡ በዓለ ፡ በኵሉ ፡ ዓመታት ፡ ሰቡዐ ፡ ዕለተ ፡ በፍሥሓ ፡ ወሰመያ ፡ በዓለ ፡ እግዚአብሔር ፡ በከመ ፡ ሰቡዕ ፡ ዕለት ፡ እለ ፡ ሖረ ፡ ወተመይጠ ፡ በሰላም ። 19 ወከመዝ ፡ ሥሩዕ ፡ ውእቱ ፡ ወጽሑፍ ፡ ውስተ ፡ ጽላተ ፡ ሰማይ ፡ በእንተ ፡ እስራኤል ፡ ወዲበ ፡ ዘርኡ ፡ ለገቢረ ፡ ዛቲ ፡ በዓል ፡ ሰቡዐ ፡ ዕለተ ፡ በፍሥሓ ፡ በዓል ።