መጽሐፈ ኩፋሌ 22

22 1 ወኮነ ፡ በሱባዔ ፡ ቀዳሚ ፡ በዘ ፡ አርብዓ ፡ ወአርባዕ ፡ ኢዮቤልዉ ፡ በካልእ ፡ ዓመት ፡ በዘ ፡ ሞተ ፡ አብርሃም ፡ መጽኡ ፡ ይስሐቅ ፡ ወይስማዔል ፡ እምዐዘቅተ ፡ መሐላ ፡ ከመ ፡ ይግበሩ ፡ በዓለ ፡ ሱባዔያት ፡ ዛቲ ፡ በዓል ፡ ዘቀዳሚ ፡ ማእረር ፡ ኀበ ፡ አብርሃም ፡ አቡሆሙ ፡ ወተፈሥሐ ፡ አብርሃም ፡ እስመ ፡ ክልኤሆሙ ፡ ደቂቁ ፡ መጽኡ ፡ 2 እስመ ፡ ብዙኅ ፡ ጥሪቱ ፡ ለይስሐቅ ፡ በቤርሳቤ ፡ ወየሐውር ፡ ይስሐቅ ፡ ወይዋሒ ፡ ጥሪቶ ፡ ወይገብእ ፡ ኀበ ፡ አቡሁ ፡ 3 ወበዝ ፡ መዋዕል ፡ መጽአ ፡ ይስማዔል ፡ ይርአይ ፡ አባሁ ፡ ወመጽኡ ፡ ኵሎሙ ፡ ኅቡረ ፡ ወጠብሐ ፡ ይስሐቅ ፡ መሥዋዕተ ፡ ለጽንሐሕ ፡ ወአዕረገ ፡ ዲበ ፡ ምሥዋዐ ፡ አቡሁ ፡ ዘገብረ ፡ በኬብሮን ። 4 ወሦዐ ፡ መድኃኒተ ፡ ወገብረ ፡ ግዝአ ፡ ግሥሓ ፡ በቅድመ ፡ ይስማዔል ፡ እኁሁ ። ወገብረት ፡ ርብቃ ፡ ዳፍንተ ፡ ሐዳሰ ፡ እምስርናይ ፡ ሐዲስ ፡ ወወሀበቶ ፡ ለያዕቆብ ፡ ወልዳ ፡ ከመ ፡ ያብእ ፡ ለአብርሃም ፡ አቡሁ ፡ እምቀዳሚ ፡ ፍሬ ፡ ምድር ፡ ከመ ፡ ይብላዕ ፡ ወይባርክ ፡ ፈጣሬ ፡ ኵሉ ፡ እንበለ ፡ ይሙት ። 5 ወይስሐቅኒ ፡ ውእቱ ፡ ፈነወ ፡ በእደ ፡ ያዕቆብ ፡ ዘይሤኒ ፡ መሥዋዕተ ፡ ዘመድኃኒት ፡ አብርሃም ፡ ይብላዕ ፡ ወይስተይ ። 6 ወበልዐ ፡ ወሰትየ ፡ ወባረኮ ፡ ለአምላክ ፡ ልዑል ፡ ዘፈጠረ ፡ ሰማየ ፡ ወምድረ ፡ ዘገብረ ፡ ኵሎ ፡ ስብሐ ፡ ምድር ፡ ወወሀቦሙ ፡ ለውሉደ ፡ ሰብእ ፡ ይብልዑ ፡ ወይስተዩ ፡ ወይባርኩ ፡ ፈጣሪሆሙ ። 7 ወይእዜኒ ፡ እትጋነይ ፡ ለከ ፡ አምላኪየ ፡ እስመ ፡ አርአይከኒ ፡ ዛተ ፡ ዕለተ ፡ ናሁ ፡ አነ ፡ ወልደ ፡ ምእት ፡ ወሰብዓ ፡ ወኃምስ ፡ ክረምት ፡ ልሂቅ ፡ ወፍጹመ ፡ መዋዕል ፡ ወኵሎን ፡ መዋዕልየ ፡ ኮናኒ ፡ ሰላመ ፡ 8 ሰይፈ ፡ ጸላኢ ፡ ኢሞአኒ ። ወበኵሉ ፡ ዘወሀብከኒ ፡ ወለውሉድየ ፡ ኵሎ ፡ መዋዕለ ፡ ሕይወትየ ፡ እስከ ፡ ዛቲ ፡ ዕለት ፡ 9 ትኩን ፡ ሣልስከ ፡ ወሰላምከ ፡ ላዕለ ፡ ገብርከ ፡ ወላዕለ ፡ ዘርአ ፡ ውሉዱ ፡ ከመ ፡ ይኩንከ ፡ ሕዝበ ፡ ኅሩየ ፡ ወርስተ ፡ እምኵሉ ፡ አሕዛበ ፡ ምድር ፡ እምይእዜ ፡ ወእስከ ፡ ኵሉ ፡ መዋዕል ፡ ዘትውልደ ፡ ምድር ፡ ለኵሉ ፡ ዓለማት ። 10 ወጸውዖ ፡ ለያዕቆብ ፡ ወይቤሎ ፡ ወልድየ ፡ ያዕቆብ ፡ ይባርክ ፡ አምላከ ፡ ኵሉ ፡ ወያኀይልከ ፡ ለገቢረ ፡ ጽድቅ ፡ ወፈቃዱ ፡ በቅድመ ፡ ዚአሁ ፡ ወይኅረይ ፡ ብከ ፡ ወበዘርእከ ፡ ከመ ፡ ትኩንዎ ፡ ሕዝበ ፡ ለርስቱ ፡ በከመ ፡ ፈቃዱ ፡ በኵሉ ፡ መዋዕል ። ወአንተኒ ፡ ወልድየ ፡ ያዕቆብ ፡ ቅረብ ፡ ወሰዐመኒ ፡ 11 ወቀርበ ፡ ወሰዐሞ ። ወይቤ ፡ ቡሩክ ፡ ወልድየ ፡ ያዕቆብ ፡ ወኵሎሙ ፡ ውሉዱ ፡ ለእግዚአብሔር ፡ ልዑል ፡ ለኵሉ ፡ ዓለማት ። የሀብከ ፡ እግዚአብሔር ፡ ዘርአ ፡ ጽድቅ ፡ ወእምውሉድከ ፡ ይቀድስ ፡ በማእከለ ፡ ኵላ ፡ ምድር ፡ ይትቀነዩ ፡ ለከ ፡ አሕዛብ ፡ ወይስግዱ ፡ በቅድመ ፡ ዘርእከ ፡ ኵሎሙ ፡ አሕዛብ ። 12 ኩን ፡ ኀያለ ፡ በቅድመ ፡ ሰብእ ፡ ወእንዘ ፡ ትሜብል ፡ ውስተ ፡ ኵሉ ፡ ዘርአ ፡ ሴት ፡ አሜሃ ፡ ይጸድቃ ፡ ፍናዊከ ፡ ወፍናወ ፡ ውሉድከ ፡ ለከዊነ ፡ ሕዝብ ፡ ቅዱስ ፡ 13 የሀብከ ፡ አምላክ ፡ ልዑል ፡ ኵሎን ፡ በረከታተ ፡ እለ ፡ ባረከኒ ፡ ወእለ ፡ ባረኮ ፡ ለኖኅ ፡ ወአዳምሃ ፡ ያዕርፍ ፡ ዲበ ፡ ድማኀ ፡ ቅዳሴ ፡ ዘርእከ ፡ ለኵሉ ፡ ትውልደ ፡ ትውልድ ፡ ወእስከ ፡ ለዓለም ። 14 ወያንጽሕከ ፡ እምኵሉ ፡ ርስሐተ ፡ ርኵስ ፡ ከመ ፡ ታስተስሪ ፡ እምኵሉ ፡ አበሳ ፡ ዘበ ፡ ኢያእምሮ ፡ ጌጋይከ ። ወያኀይልከ ፡ ወይባርከ ፡ ወትረስ ፡ ኵላ ፡ ምድረ ፡ 15 ወየሐድስ ፡ ኪዳኖ ፡ መስሌከ ፡ ከመ ፡ ትኩኖ ፡ ሕዝበ ፡ ለርስቱ ፡ በኵሉ ፡ ዓለማት ። ወውእቱ ፡ ይኩንከ ፡ ለከ ፡ ወለዘርእከ ፡ አምላከ ፡ ዘበህልው ፡ ወዘበጽድቅ ፡ በኵሉ ፡ መዋዕለ ፡ ምድር ። 16 ወአንተኒ ፡ ወልድየ ፡ ያዕቆብ ፡ ተዘከር ፡ ቃልየ ፡ ወዕቀብ ፡ ትእዛዛተ ፡ አብርሃም ፡ አቡከ ። ተፈለጥ ፡ እምአሕዛብ ፡ ወኢትብላዕ ፡ ምስሌሆሙ ፡ ወኢትግበር ፡ በከመ ፡ ምግባሪሆሙ ፡ ወኢትኩኖሙ ፡ ቢጸ ፡ እስመ ፡ ግብሮሙ ፡ ርኵስ ፡ ወኵሉ ፡ ፍናዊሆሙ ፡ ግሙን ፡ ወምናኔ ፡ ወሰቆራር ። 17 መሥዋዕቶሙ ፡ ለአብድንት ፡ ይዘብሑ ፡ ወለአጋንንት ፡ ይሰግዱ ። ወበውስተ ፡ መቃብራት ፡ ይበልዑ ፡ ወኵሉ ፡ ግብሮሙ ፡ ከንቱ ፡ ወበክ ፡ 18 ወአልቦሙ ፡ ልበ ፡ ለኀልዮ ፡ ወኢኮነ ፡ አዕይንቲሆሙ ፡ ዘይሬኢ ። ምንተ ፡ ግብሮሙ ፡ ወእፎ ፡ እሙንቱ ፡ ይስሕቱ ፡ እንዘ ፡ ይብሉ ፡ ለዕፅ ፡ አንተ ፡ አምላኪየ ፡ ወለእብን ፡ አንተ ፡ እግዚእየ ፡ ወአንተ ፡ መባልሕየ ፡ ወኢሀሎ ፡ ልብ ። 19 ወአንተኒ ፡ ወልድየ ፡ ያዕቆብ ፡ አምላክ ፡ ልዑል ፡ ይርዳእከ ፡ ወአምላከ ፡ ሰማይ ፡ ይባርከ ፡ ወያግኅሥከ ፡ እምነ ፡ ርኵሶሙ ፡ ወእምኵሉ ፡ ስሕተቶሙ ፡ 20 ተዐቀብ ፡ ወልድየ ፡ ያዕቆብ ፡ ከመ ፡ ኢትንሣእ ፡ ብእሲተ ፡ እምነ ፡ ኵሉ ፡ ዘርአ ፡ አዋልደ ፡ ከናአን ። እስመ ፡ ኵሉ ፡ ዘርኡ ፡ ለሥራዌ ፡ እምድር ፡ 21 እስመ ፡ በአበሳ ፡ ካም ፡ ስሕተ ፡ ከናአን ፡ ወኵሉ ፡ ዘርኡ ፡ ይደምሰስ ፡ እምድር ፡ ወኵሉ ፡ ተርፉ ፡ ወዘይድኅን ፡ አልቦ ፡ እምኔሁ ፡ አመ ፡ ዕለተ ፡ ደይን ፡ 22 ወለኵሎሙ ፡ እለ ፡ ያመልኩ ፡ ጣዖተ ፡ ወለጽሉኣን ፡ አልቦሙ ፡ ምንተኒ ፡ ተስፋ ፡ በምድረ ፡ ሕያዋን ፡ እስመ ፡ ውስተ ፡ ሲኦል ፡ ይወርዱ ፡ ወውስተ ፡ መካነ ፡ ደይን ፡ የሐውሩ ። ወአልቦሙ ፡ ምንተኒ ፡ ዝክረ ፡ በዲበ ፡ ምድር ። ከመ ፡ ተንሥኡ ፡ ውሉደ ፡ ሰዶም ፡ እምድር ፡ ከማሁ ፡ ይትንሥኡ ፡ ኵሎሙ ፡ እለ ፡ ያመልኩ ፡ ጣዖተ ። 23 ኢትፍራህ ፡ ወልድየ ፡ ያዕቆብ ፡ ወኢትደንግፅ ፡ ወልደ ፡ አብርሃም ፡ አምላክ ፡ ልዑል ፡ ይዕቀብከ ፡ እምነ ፡ ሙስና ፡ ወእምኵሉ ፡ ፍኖተ ፡ ስሕተት ፡ ውእቱ ፡ ይባልሕከ ። 24 ዘንተ ፡ ቤተ ፡ ሐነጽኩ ፡ ሊተ ፡ ከመ ፡ አንብር ፡ ስምየ ፡ ላዕሌሁ ፡ በዲበ ፡ ምድር ፡ ተውህበት ፡ ለከ ፡ ወለዘርእከ ፡ ለዓለም ፡ ወትሰመይ ፡ ቤተ ፡ አብርሃም ፡ ተውህበት ፡ ለከ ፡ ወለዘርእከ ፡ ለዓለም ፡ እስመ ፡ አንተ ፡ ተሐንጽ ፡ ቤትየ ፡ ወታቀውም ፡ ስምየ ፡ ቅድመ ፡ አምላክ ፡ እስከ ፡ ለዓለም ፡ ዘርእከ ፡ ወስምከ ፡ ይቀውም ፡ ውስተ ፡ ኵሉ ፡ ትውልደ ፡ ምድር ። 25 ፡ ወአኅለቀ ፡ እንዘ ፡ ይኤዝዞ ፡ ወይባርኮ ፡ 26 ወሰከቡ ፡ ክልኤሆሙ ፡ ኅቡረ ፡ ውስተ ፡ ዐራት ፡ አሐቲ ፡ ወኖመ ፡ ያዕቆብ ፡ ውስተ ፡ ሕፅነ ፡ አብርሃም ፡ አበ ፡ አቡሁ ፡ ወሰዐሞ ፡ ስብዐ ፡ ወተፈሥሐ ፡ ምሕረቱ ፡ ወልቡ ፡ ላዕሌሁ ፡ 27 ወባረኮ ፡ በኵሉ ፡ ልቡ ፡ ወይቤ ፡ አምላክ ፡ ልዑል ፡ አምላከ ፡ ኵሉ ፡ ወፈጣሬ ፡ ኵሉ ፡ ዘአውፅአኒ ፡ እምነ ፡ ኡር ፡ ዘከለዳዊያን ፡ ከመ ፡ የሀበኒ ፡ ዛተ ፡ ምድረ ፡ እረሳ ፡ ለዓለም ፡ ወከመ ፡ አቅም ፡ ዘርአ ፡ ቅዱሰ ፡ ከመ ፡ ይትባረክ ፡ ለዓለም ። 28 ወባረኮ ፡ ለያዕቆብ ፡ ወልድየ ፡ ዘበኵሉ ፡ ልብየ ፡ ወዘበምሕረትየ ፡ በእለ ፡ እትፌሣሕ ፡ ቦቱ ፡ ወይኩን ፡ ሣህልከ ፡ ወምሕረትከ ፡ ነዋኀ ፡ ላዕሌሁ ፡ ወላዕለ ፡ ዘርኡ ፡ ኵሎ ፡ መዋዕለ ፡ 29 ወኢትኅድጎ ፡ ወኢትትሀየዮ ፡ እምይእዜ ፡ ወእስከ ፡ መዋዕል ፡ ዘለዓለም ። ወይኩና ፡ አዕይንቲከ ፡ ክሡታተ ፡ ላዕሌሁ ፡ ወላዕለ ፡ ዘርኡ ፡ ከመ ፡ ይዕቀብዎ ፡ ወከመ ፡ ትባርኮ ፡ ወከመ ፡ ትቀድሶ ፡ አንተ ፡ ለሕዝብ ፡ ዘለርስትከ ፡ 30 ወባርኮ ፡ በኵሉ ፡ በረከታቲከ ፡ እምይእዜ ፡ ወእስከ ፡ ኵሎን ፡ መዋዕል ፡ ዘለዓለም ። ወሐድስ ፡ ኪዳነከ ፡ ወሣህለከ ፡ ምስሌሁ ፡ ወምስለ ፡ ዘርኡ ፡ በኵሉ ፡ ፈቃድከ ፡ በኵሉ ፡ ትውልደ ፡ ምድር ።