መጽሐፈ ኩፋሌ 35

35 1 ወበቀዳሚ ፡ ዓመት ፡ ዘሱባዔ ፡ ቀዳሚ ፡ በዘ ፡ አርብዓ ፡ ወኃምስቱ ፡ ኢዮቤልዉ ፡ ጸውዐቶ ፡ ርብቃ ፡ ለያዕቆብ ፡ ወልዳ ፡ ወአዘዘቶ ፡ በእንተ ፡ አቡሁ ፡ ወበእንተ ፡ እኁሁ ፡ ከመ ፡ ያክብሮሙ ፡ ኵሎ ፡ መዋዕለ ፡ ሕይወቱ ፡ ለያዕቆብ ። 2 ወይቤ ፡ ያዕቆብ ፡ አነ ፡ እገብር ፡ ኵሎ ፡ ዘከመ ፡ አዘዝክኒ ፡ እስመ ፡ ክብር ፡ ወዕበይ ፡ ሊተ ፡ ዝንቱ ፡ ነገር ፡ ወጽድቅ ፡ ሊተ ፡ በቅድመ ፡ እግዚአብሔር ፡ ከመ ፡ አክብሮሙ ። 3 ወአንቲኒ ፡ እሞ ፡ ታአሞሪ ፡ እምዕለተ ፡ ተወለድኩ ፡ እስከ ፡ ዛቲ ፡ ዕለት ፡ ኵሎ ፡ ምግባርየ ፡ ወኵሎ ፡ ዘውስተ ፡ ልብየ ፡ ከመ ፡ ኵሎ ፡ መዋዕለ ፡ እኄሊ ፡ ሠናየ ፡ ለኵሉ ። 4 ወእፎ ፡ ኢይግብር ፡ ነገረ ፡ ዘአዘዝክኒ ፡ ከመ ፡ አክብር ፡ አባየ ፡ ወእኅዋየ ፡ 5 ንግርኒ ፡ እሞ ፡ ምንተ ፡ ርኢኪ ፡ በላዕሌየ ፡ ጥውየተ ፡ ወተግሕሦ ፡ እትገሐሥ ፡ እምኔሁ ፡ ወይከውን ፡ ላዕሌየ ፡ ሣህል ። 6 ወትቤሎ ፡ ወልድየ ፡ ኵሎን ፡ መዋዕልየ ፡ አልቦ ፡ ዘርኢኩ ፡ በላዕሌከ ፡ ምንተኒ ፡ ግብረ ፡ ጠዋየ ፡ አላ ፡ ርቱዐ ፡ ወባሕቱ ፡ ጽድቀ ፡ እነግረከ ፡ ወልድየ ፡ አነ ፡ በዛቲ ፡ ዓመት ፡ እመውት ፡ ወኢይትዐደው ፡ ዛተ ፡ ዓመተ ፡ በሕይወት ። እስመ ፡ ርኢኩ ፡ በሕልም ፡ ዕለተ ፡ ሞትየ ፡ ከመ ፡ ኢየሐዩ ፡ ፈድፋደ ፡ እምእት ፡ ወኀምሳ ፡ ወኀምስ ፡ ዓመት ፡ ወናሁ ፡ አነ ፡ ፈጸምኩ ፡ ኵሎ ፡ መዋዕለ ፡ ሕይወትየ ፡ ዘሀሎኩ ፡ እሕየው ፡ 7 ወሠሐቀ ፡ ያዕቆብ ፡ በእንተ ፡ ነገረ ፡ እሙ ፡ እስመ ፡ ትቤሎ ፡ እሙ ፡ ከመ ፡ ትመውት ፡ ወይእቲሰ ፡ ትነብር ፡ አንጻሪሁ ፡ ወኀይላ ፡ ላዕሌሃ ፡ ወኢደክመት ፡ እምኀይላ ፡ እስመ ፡ ትበውእ ፡ ወትወፅእ ፡ ወትሬኢ ፡ ወአስናኒሃኒ ፡ ጽኑዕ ፡ ወምንተኒ ፡ ሕማም ፡ ኢለከፋ ፡ ኵሎ ፡ መዋዕለ ፡ ሕይወታ ። 8 ወይቤላ ፡ ያዕቆብ ፡ ብፁዕ ፡ አነ ፡ እሞ ፡ እመ ፡ ቀርበ ፡ መዋዕልየ ፡ ለመዋዕለ ፡ ሕይወትኪ ፡ ወይሄሉ ፡ ኀይልየ ፡ ላዕሌየ ፡ ከመዝ ፡ በከመ ፡ ኀይልኪ ፡ ወኢትመውቲ ፡ እስመ ፡ በከ ፡ በጸው ፡ ትትናገሪ ፡ ምስሌየ ፡ በእንተ ፡ ሞትኪ ። 9 ወቦአት ፡ ኀበ ፡ ይስሐቅ ፡ ወትቤሎ ፡ አሐተ ፡ ስእለተ ፡ አስተበቍዕ ፡ በኀቤከ ፡ እምሕሎ ፡ ለዔሳው ፡ ከመ ፡ ኢያሕስም ፡ ላዕለ ፡ ያዕቆብ ፡ ወኢይስድዶ ፡ በጸልእ ። እስመ ፡ አንተ ፡ ታአምር ፡ ኅሊናሁ ፡ ለዔሳው ፡ ከመ ፡ ፀዋግ ፡ ውእቱ ፡ እምንእሱ ፡ ወአልቦ ፡ ላዕሌሁ ፡ ኂሩተ ፡ እስመ ፡ ይፈቅድ ፡ ውእቱ ፡ እምድኅረ ፡ ሞትከ ፡ ይቅትሎ ፡ 10 ወአንተ ፡ ታአምር ፡ መጠነ ፡ ገብረ ፡ ኵሎ ፡ እምአመ ፡ ዕለተ ፡ ሖረ ፡ ያዕቆብ ፡ እኁሁ ፡ ውስተ ፡ ካራን ፡ እስከ ፡ ዛቲ ፡ ዕለት ፡ ከመ ፡ በኵሉ ፡ ልቡ ፡ ኀደገነ ። ወገብረ ፡ ምስሌነ ፡ እኩየ ፡ መራዕየከ ፡ አስተጋብአ ፡ ወኵሎ ፡ ጥሪተከ ፡ ሄደከ ፡ እምቅድመ ፡ ገጽከ ፡ 11 ወእንዘ ፡ ናስተበቍዕ ፡ ንስእሎ ፡ ዘእምዚአነ ፡ ወውእቱ ፡ ይሬሲ ፡ ከመ ፡ ዘብእሲ ፡ ዘይምሕረነ ። 12 ወያመርር ፡ ላዕሌከ ፡ በእንተ ፡ ዘባረከ ፡ ያዕቆብሃ ፡ ወልደከ ፡ ፍጹማዊ ፡ ወራትዐ ፡ እስመ ፡ አልቦ ፡ እከየ ፡ ዘእንበለ ፡ ኂሩት ። ወእምአመ ፡ መጽአ ፡ ምእካራን ፡ እስከ ፡ ዛቲ ፡ ዕለት ፡ ኢያኅፀፀ ፡ ለነ ፡ ወኢምንተኒ ፡ እስመ ፡ ኵሎ ፡ ያመጽእ ፡ ለነ ፡ በበ ፡ ጊዜሁ ፡ ኵሎ ፡ ዕለተ ፡ ወይትሬሣሕ ፡ በኵሉ ፡ ለቡ ፡ ሶበ ፡ ንነሥእ ፡ እምእዴሁ ፡ ወይባርከነ ። ወኢተፈልጠ ፡ እምኔነ ፡ እምአመ ፡ ዕለተ ፡ መጽአ ፡ እምካራን ። እስከ ፡ ዛቲ ፡ ዕለት ፡ ወውእቱ ፡ ይነብር ፡ ምስሌነ ፡ ዘልፈ ፡ ውስተ ፡ ቤት ፡ እንዘ ፡ ያከብረነ ። 13 ወይቤላ ፡ ይስሐቅ ፡ አነኒ ፡ አአምር ፡ ወእሬኢ ፡ ግብረ ፡ ያዕቆብ ፡ ዘምስሌነ ፡ ከመ ፡ በኵሉ ፡ ልቡ ፡ ውእቱ ፡ ያከብረነ ። አፍቀርክዎ ፡ ለዔሳው ፡ ቀዲሙ ፡ እምነ ፡ ያዕቆብ ፡ እምዘተወልደ ፡ ወይእዜ ፡ አፈቅር ፡ ያዕቆብሃ ፡ እምነ ፡ ዔሳው ፡ እስመ ፡ አብዝኀ ፡ አእክዮ ፡ ምግባሪሁ ፡ ወአልቦ ፡ ጽድቀ ፡ ሎቱ ፡ እስመ ፡ ኵሉ ፡ ፍኖቱ ፡ ዐመፃ ፡ ወግፍዕ ፡ ወአልቦ ፡ ጽድቀ ፡ ሎቱ ፡ ዐውዶ ። 14 ወይእዜኒ ፡ ልብየ ፡ ይትሀወክ ፡ በእንተ ፡ ምግባራቲሁ ፡ ወኢኮነ ፡ ውእቱ ፡ ወዘርኡ ፡ ለድኂን ፡ እስመ ፡ እለ ፡ ይትሐጐሉ ፡ እሙንቱ ፡ እምነ ፡ ምድር ፡ ወእለ ፡ ይሤረዉ ፡ እሙንቱ ፡ እምታሕተ ፡ ሰማይ ። እስመ ፡ አምላከ ፡ አብርሃም ፡ ኀደገ ፡ ወሖረ ፡ ድኅረ ፡ አንስቲያሁ ፡ ድኅረ ፡ ርኵስ ፡ ወድኅረ ፡ ስሕተቶን ፡ ውእቱ ፡ ወውሉዱ ፡ 15 ወአንቲኒ ፡ ትብልኒ ፡ ከመ ፡ አምሕሎ ፡ ከመ ፡ ኢይቅትል ፡ እኅዋሁ ፡ ያዕቆብሃ ። እመኒ ፡ መሐለ ፡ ኢይሄሉ ፡ ወኢይገብር ፡ ኂሩተ ፡ ዘእንበለ ፡ እከይ ፡ 16 ወእመኒ ፡ ፈቀደ ፡ ይቅትል ፡ ያዕቆብሃ ፡ እኅዋሁ ፡ ውስተ ፡ እደ ፡ ያዕቆብ ፡ ይትወሀብ ፡ ወኢያመሥጥ ፡ እምእዴሁ ፡ እስመ ፡ ውስተ ፡ እዴሁ ፡ ይወርድ ። 17 ወአንተኒ ፡ ኢትፍርሂ ፡ በእንተ ፡ ያዕቆብ ፡ እስመ ፡ ዐቃቢሁ ፡ ለያዕቆብ ፡ ዐቢይ ፡ ወኀያል ፡ ወክቡር ፡ ወእኩት ፡ እምዐቃቢሁ ፡ ለዔሳው ። 18 ወለአክት ፡ ርብቃ ፡ ወጸውዐቶ ፡ ለዔሳው ፡ ወመጽአ ፡ ኀቤሃ ፡ ወትቤሎ ፡ ስእለተ ፡ ብየ ፡ ወልድየ ፡ እንተ ፡ እስእል ፡ እምኀቤከ ፡ ወበል ፡ ከመ ፡ ትግበራ ፡ ወልድየ ፡ 19 ወይቤ ፡ አነ ፡ እገብር ፡ ኵሎ ፡ ዘትቤልኒ ፡ ወኢየአቢ ፡ ስእለተኪ ። 20 ወትቤሎ ፡ አነ ፡ እስእል ፡ እምኀቤከ ፡ በዕለተ ፡ አመ ፡ ሞትኩ ፡ ከመ ፡ ታብአኒ ፡ ወትቅብረኒ ፡ ቅሩበ ፡ ሳራ ፡ እመ ፡ አቡከ ፡ ወከመ ፡ ትትፋቀሩ ፡ አንተ ፡ ወያዕቆብ ፡ በበይናቲክሙ ፡ ወኢይኅሥሥ ፡ እኩየ ፡ አሐዱ ፡ ለእኁሁ ፡ ዘእንበለ ፡ ተፋቅሮ ፡ ክመ ፡ ወትሴርሑ ፡ ውሉድየ ፡ ወትከብሩ ፡ በማእከለ ፡ ምድር ፡ ወኢይትፌሣሕ ፡ ላእሌክሙ ፡ ጸላኢ ፡ ወትከውኑ ፡ ለበረከት ፡ ወለምሕረት ፡ በቅድመ ፡ አዕይንቲሆሙ ፡ ለኵሎሙ ፡ እለ ፡ ያፈቅሩክሙ ። 21 ወይቤ ፡ አነ ፡ እገብር ፡ ኵሎ ፡ ዘትቤልኒ ፡ ወእቀብረኪ ፡ አመ ፡ ዕለተ ፡ ሞትኪ ፡ ቅሩበ ፡ ሳራ ፡ እሙ ፡ ለአቡየ ፡ በከመ ፡ አፍቀርኪ ፡ አዕጽምቲሃ ፡ ከመ ፡ የሀሉ ፡ ቅሩበ ፡ አዕጽምቲኪ ። 22 ወያዕቆብሃኒ ፡ እኅዋየ ፡ አነ ፡ አፈቅር ፡ እምኵሉ ፡ ዘሥጋ ፡ ወአልቦ ፡ ሊተ ፡ እኅወ ፡ በውስተ ፡ ኵሉ ፡ ምድር ፡ ዘእንበለ ፡ ውእቱ ፡ ባሕቲቱ ። ወአኮ ፡ ዐቢይ ፡ ዝንቱ ፡ ሊተ ፡ እመ ፡ አፍቀርክዎ ፡ እስመ ፡ እኁየ ፡ ውእቱ ፡ ወኅቡረ ፡ ተዘራእነ ፡ በማእከለ ፡ ከርሥኪ ፡ ወኅቡረ ፡ ወፃእነ ፡ እምሕረትኪ ፡ ወእመ ፡ ኢያፍቀርኩ ፡ እኅዋየ ፡ መነ ፡ አፈቅር ። 23 ወአነ ፡ ክመ ፡ አስተበቍዐኪ ፡ ከመ ፡ ትገሥጽዮ ፡ ለያዕቆብ ፡ በእንቲአየ ፡ ወበእንተ ፡ ውሉድየ ፡ እስመ ፡ አአምር ፡ ከመ ፡ ነጊሠ ፡ ይነግሥ ፡ ላዕሌየ ፡ ወላዕለ ፡ ውሉድየ ። እስመ ፡ አመ ፡ ዕለተ ፡ ባረኮ ፡ አቡየ ፡ ኪያሁ ፡ ረሰየ ፡ ልዑለ ፡ ወኪያየ ፡ ትሑተ ፡ 24 ወአነ ፡ እምሕል ፡ ለኪ ፡ ከመ ፡ አፈቅሮ ፡ ወከመ ፡ ኢይትኀሠሥ ፡ ሎቱ ፡ እኩየ ፡ ኵሎ ፡ መዋዕል ፡ ሕይወትየ ፡ ዘእንበለ ፡ ሠናይ ፡ ክመ ። ወመሐለ ፡ ላቲ ፡ በእንተዝ ፡ ኵሉ ፡ ነገር ። 25 ወጸውዐቶ ፡ ለያዕቆብ ፡ በቅድመ ፡ አዕይንቲሁ ፡ ለዔሳው ፡ ወአዘዘቶ ፡ በከመ ፡ ነገር ፡ ዘተናገረት ፡ ምስለ ፡ ዔሳው ። 26 ወይቤ ፡ አነ ፡ እገብር ፡ ሥምረተኪ ፡ ተሐበይኒ ፡ ከመ ፡ ኢይወፅእ ፡ እምኔየ ፡ ወእምነ ፡ ውሉድየ ፡ እኩይ ፡ ላዕለ ፡ ዔሳው ፡ ኢይቀድም ፡ ዘእንበለ ፡ ተፋቅሮ ፡ ክመ ። 27 ወበልዑ ፡ ወሰትዩ ፡ ይእቲ ፡ ወውሉዳ ፡ በይእቲ ፡ ሌሊት ። ወሞተት ፡ ወለተ ፡ ሠለስቱ ፡ ኢዮቤልዉ ፡ ወሱባዔ ፡ አሐዱ ፡ ወዓመት ፡ አሐዱ ፡ በዛቲ ፡ ሌሊት ፡ ወቀበርዋ ፡ ክልኤሆሙ ፡ ውሉዳ ፡ ዔሳው ፡ ወያዕቆብ ፡ ውስተ ፡ በአት ፡ ዘእንተ ፡ ክልኤ ፡ ቅሩበ ፡ ሳራ ፡ እመ ፡ አቡሆሙ ።