መጽሐፈ ኩፋሌ 37

37 1 ወበዕለተ ፡ ሞተ ፡ ይስሐቅ ፡ አቡሁ ፡ ለያዕቆብ ፡ ወለዔሳው ፡ ሰምዑ ፡ ውሉደ ፡ ዔሳው ፡ ከመ ፡ ወሀቦ ፡ ይስሐቅ ፡ ልህቃነ ፡ ለያዕቆብ ፡ ወልዱ ፡ ዘይንእስ ። ወተምዑ ፡ ፈድፋደ ፡ 2 ወተጋአዙ ፡ ምስለ ፡ አቡሆሙ ፡ እንዘ ፡ ይብሉ ፡ በእንተ ፡ ምንት ፡ እንዘ ፡ ሀሎከ ፡ አንተ ፡ ዘትልህቅ ፡ ወእንዘ ፡ ይንእስ ፡ ለያዕቆብ ፡ ወሀቦ ፡ አቡከ ፡ ልህቃነ ፡ ወኪያከ ፡ ኀደገ ። 3 ወይቤሎሙ ፡ እስመ ፡ አነ ፡ ሤጥኩ ፡ ቅድመተ ፡ ልደትየ ፡ ለያዕቆብ ፡ በኅዳጥ ፡ ጸብሐ ፡ ብርስን ። ወበዕለተ ፡ ፈነወኒ ፡ አቡየ ፡ እንዐው ፡ ወአሥግር ፡ ወአምጽእ ፡ ሎቱ ፡ ከመ ፡ ይብላዕ ፡ ወይባርከኒ ፡ መጽአ ፡ በተጠብቦት ። ወአብአ ፡ ለአቡየ ፡ መብልዐ ፡ ወመስቴ ፡ ወባረኮ ፡ አቡየ ፡ ወኪያየ ፡ ረሰየኒ ፡ ታሕተ ፡ እዴሁ ። 4 ወይእዜኒ ፡ አምሐለነ ፡ አቡነ ፡ ኪያየ ፡ ወኪያሁ ፡ ከመ ፡ ኢንትኃሠሥ ፡ በእከይ ፡ አሐዱ ፡ ላዕለ ፡ እኁሁ ፡ ወከመ ፡ ነሀሉ ፡ በተፋቅሮ ፡ ወበሰላም ፡ ብእሲ ፡ ምስለ ፡ እኁሁ ፡ ወኢናማስን ፡ ፍናዊነ ፡ 5 ወይቤልዎ ፡ ኢንሰምዐከ ፡ ለገቢር ፡ ምስሌሁ ፡ ሰላመ ፡ እስመ ፡ ኀይለ ፡ ዚአነ ፡ ይጸንዕ ፡ እምኀይሉ ፡ ወንሕነ ፡ ንጸንዕ ፡ እምኔሁ ፡ ነሐውር ፡ ላዕሌሁ ፡ ወንቀትሎ ፡ ወናሐጕል ፡ ውሉዶ ፡ ወለእመ ፡ ኢተሐውር ፡ ምስሌነ ፡ ለከሂ ፡ ናሐስም ። 6 ወይእዜኒ ፡ ስምዐነ ፡ ወንፈኑ ፡ ውስተ ፡ አራም ፡ ወውስተ ፡ ፍልስጥኤም ፡ ወውስተ ፡ ሞአብ ፡ ወውስተ ፡ አሞን ፡ ወንኅረይ ፡ ለርእስነ ፡ ኅሩያነ ፡ ሰብአ ፡ እለ ፡ ይዳለጉ ፡ ውስተ ፡ ቀትል ፡ ወንሖር ፡ ላዕሌሁ ፡ ወንትቃተል ፡ ምስሌሁ ፡ ወንሠርዎ ፡ እምድር ፡ እንበለ ፡ የአኀዝ ፡ ኀይለ ። 7 ወይቤሎሙ ፡ አቡሆሙ ፡ ኢትሖሩ ፡ ወኢትግበሩ ፡ ምስሌሁ ፡ ፀብአ ፡ ከመ ፡ ኢትደቁ ፡ ቅድሜሁ ። 8 ወይቤልዎ ፡ ዝኑ ፡ ክመ ፡ ግብርከ ፡ ዘእምውርዙትከ ፡ እስከ ፡ ዛቲ ፡ ዕለት ፡ ወአንተ ፡ ታበውእ ፡ ክሳደከ ፡ ታሕተ ፡ አርዑቱ ፡ ኢንሰምዕ ፡ ንሕነሰ ፡ ዘንተ ፡ ነገረ ። 9 ወፈነዉ ፡ ውስተ ፡ አራም ፡ ወኀበ ፡ አዱራም ፡ ኀበ ፡ ዐርከ ፡ አቡሆሙ ፡ ወተዓሰቡ ፡ ምስሌሆሙ ፡ ዐሠርተ ፡ ምእተ ፡ መስተባእሳነ ፡ ዕደወ ፡ ወስተቃትላነ ፡ ኅሩያነ ። 10 ወመጽኡ ፡ ኀቤሆሙ ፡ እምነ ፡ ሞአብ ፡ ወእምኀበ ፡ ውሉደ ፡ አሞን ፡ እለ ፡ ተዓሰቡ ፡ ዐሠርቱ ፡ ምእት ፡ ኅሩያን ። ወእምነ ፡ ፍልስጥኤም ፡ ዐሠርቱ ፡ ምእት ፡ ኅሩያን ፡ መስተቃትላን ፡ ወእምኤዶም ፡ ወእምነ ፡ ኮሬውስ ፡ ዐሠርቱ ፡ ምእት ፡ ኅሩያን ፡ መስተባእሳን ፡ ወእምነ ፡ ኬጤዎን ፡ ዕደው ፡ ጽኑዓን ፡ መስተቃትላን ። 11 ወይቤልዎ ፡ ለአቡሆሙ ፡ ፃእ ፡ ምርሖሙ ፡ ወእመአኮ ፡ ንቀትለከ ። 12 ወመልአ ፡ መዓተ ፡ ወቍጥዓ ፡ በጊዜ ፡ ርእየ ፡ ውሉዶ ፡ ከመ ፡ ይትኤገልዎ ፡ ከመ ፡ ይሖር ፡ ቅድመ ፡ ይምርሖሙ ፡ ኀበ ፡ ያዕቆብ ፡ እኀሁ ። 13 ወእምዝ ፡ ተዘከረ ፡ ኵሎ ፡ እከየ ፡ እንተ ፡ ሀሎት ፡ ውስተ ፡ ልቡ ፡ ኅብእት ፡ ላዕለ ፡ ያዕቆብ ፡ እኁሁ ፡ ወኢተዘከረ ፡ መሐላ ፡ ዘመሐለ ፡ ለአቡሁ ፡ ወለእሙ ፡ ከመ ፡ ኢይትኃሠሥ ፡ ኵሎ ፡ እከየ ፡ ኵሎ ፡ መዋዕሊሁ ፡ ላዕለ ፡ ያዕቆብ ፡ እኁሁ ። 14 ወበዝ ፡ ኵሉ ፡ ኢያእመረ ፡ ያዕቆብ ፡ ከመ ፡ እሙንቱ ፡ ይመጽኡ ፡ ኀቤሁ ፡ ለቀትል ። ወውእቱሰ ፡ ይላሑ ፡ ልያሃ ፡ ብእሲቶ ፡ እስከ ፡ ሶበ ፡ ቀርቡ ፡ ኀቤሁ ፡ ጥቃ ፡ ማኅፈድ ፡ በአርብዓ ፡ ምእት ፡ ብእሲ ፡ መስተቃትላን ፡ መስተባእሳን ፡ ኅሩያን ። 15 ወለአኩ ፡ ኀቤሁ ፡ ሰብአ ፡ ኬብሮን ፡ እንዘ ፡ ይብሉ ፡ ናሁአ ፡ እኁከአ ፡ መጽአአ ፡ ላዕሌከአ ፡ ይትቃተል ፡ ከአ ፡ በአርብዓ ፡ ምእት ፡ ብእሲ ፡ ቅኑታነ ፡ ሰይፍ ፡ ወይጸውሩ ፡ ወልታ ፡ ወንዋየ ፡ ሐቅል ፡ እስመ ፡ ያፈቅርዎ ፡ ለያዕቆብ ፡ እምዔሳው ፡ ነገርዎ ፡ እስመ ፡ ያዕቆብ ፡ ብእሲ ፡ ጸጋዊ ፡ ወመሓሪ ፡ ውእቱ ፡ እምነ ፡ ዔሳው ። 16 ወኢአምነ ፡ ያዕቆብ ፡ እስከ ፡ ሶበ ፡ ቀርቡ ፡ ጥቃ ፡ ማኅፈድ ፡ 17 ወዐጸወ ፡ አናቅጸ ፡ ማኅፈድ ። ወቆመ ፡ ውስተ ፡ ተድባብ ፡ ወተናገረ ፡ ምስለ ፡ እኁሁ ፡ ዔሳው ፡ ወይቤ ፡ ሠናየ ፡ ኑዛዜ ፡ መጻእከ ፡ ትናዝዘኒ ፡ በእንተ ፡ ብእሲትየ ፡ እንተ ፡ ሞተት ። ዝኑ ፡ ውእቱ ፡ መሐላ ፡ ዘመሐልከ ፡ ለአቡከ ፡ ወለእምከ ፡ ካዕበ ፡ ዘእንበለ ፡ ይሙት ፡ አበስከ ፡ እመሐላ ፡ ወበሰዓት ፡ መሐልከ ፡ ለአቡከ ፡ ተኰነንከ ። 18 ወውእቱ ፡ ጊዜ ፡ አውሥአ ፡ ዔሳው ፡ ወይቤሎ ፡ አልቦ ፡ ለውሉደ ፡ ሰብእ ፡ ወለአራዊተ ፡ ምድር ፡ መሐላ ፡ ጽድቅ ፡ ዘመሐሉ ፡ ምሒሎሙ ፡ እስከ ፡ ለዓለም ። ወእንተ ፡ ጸብሐት ፡ የኀሥሡ ፡ ዝንቱ ፡ ለዝንቱ ፡ እኩየ ፡ ወከመ ፡ ይቅትል ፡ አሐዱ ፡ ጸላኢሁ ፡ ወፀረ ። 19 ወትጸልአኒ ፡ አንተ ፡ ኪያየ ፡ ወውሉድየ ፡ እስከ ፡ ለዓለም ፡ ወአልቦ ፡ ገቢረ ፡ ምስሌከ ፡ ታእኃ ። 20 ስማዕ ፡ ዘንተ ፡ ነገርየ ፡ ዘአነ ፡ እነግረከ ፡ እመ ፡ ይዌልጥ ፡ ሐራውያ ፡ ማእሶ ፡ ወጸጕሮሂ ፡ ከመ ፡ ፀምር ፡ ለእመ ፡ አድከመ ፡ ወእመ ፡ ወፅአ ፡ ዲበ ፡ ርእሱ ፡ አቅርንት ፡ ከመ ፡ አቅርንተ ፡ ሀየል ፡ ወአባግዕ ፡ አሜሃ ፡ እገብር ፡ ምስሌከ ፡ ታእኃ ። ተፈልጣ ፡ አጥባት ፡ እምእሞን ፡ እስመ ፡ ኢኮንከኒ ፡ እኅወ ። 21 ወእመ ፡ ገብሩ ፡ ተኵላት ፡ ሰላመ ፡ ምስለ ፡ መሐስዕ ፡ ከመ ፡ ኢይብልዕዎሙ ። ወከመ ፡ ኢይትአገልዎሙ ፡ ወእመ ፡ ኮነ ፡ አልባቢሆሙ ፡ ወአሠንዮ ፡ አሜሃ ፡ ይከውን ፡ በውስተ ፡ ልብየ ፡ ላዕሌከ ፡ ሰላም ፡ 22 ወለእመ ፡ ኮነ ፡ አንበሳ ፡ ማኅፈሮ ፡ ለላህም ። ወለእመ ፡ ተፀምደ ፡ ምስሌሁ ፡ በአርዑት ፡ ወሐረሰ ፡ ምስሌሁ ፡ ወገብረ ፡ ሰላመ ፡ ምስሌሁ ፡ አሜሃ ፡ እገብር ፡ ሰላመ ፡ ምስሌከ ። 23 ወእመ ፡ ጻዕደወ ፡ ቋዓት ፡ ከመ ፡ ራዛ ፡ አሜሃ ፡ አእምር ፡ ከመ ፡ አፍቀርኩከ ፡ ወእገብር ፡ ምስሌከ ፡ ሰላመ ። ተሠረው ፡ አንተ ፡ ወይሠረዉ ፡ ውሉድከ ፡ ወኢይኩን ፡ ለከ ፡ ሰላም ። 24 ወነጊዜ ፡ ርእየ ፡ ያዕቆብ ፡ ከመ ፡ አእከየ ፡ እምልቡ ፡ ላዕሌሁ ፡ ወእምኵሉ ፡ ነፍሱ ፡ ከመ ፡ ይቅትሎ ። ወመጽአ ፡ እንዘ ፡ ያንፈርዕፅ ፡ ከመ ፡ መፍለስ ፡ ዘይመጽእ ፡ ውስተ ፡ ረምሕ ፡ ዘይረግዞ ፡ ወይቀትሎ ፡ ወኢይሴስል ፡ እምኔሁ ። 25 ውእተ ፡ ጊዜ ፡ ይቤ ፡ ለእሊአሁ ፡ ወለአግብርቲሁ ፡ ከመ ፡ ይሩድዎ ፡ ወለኵሎሙ ፡ ካልአኒሁ ።