መጽሐፈ ኩፋሌ 43

43 1 ወገብረ ፡ በከመ ፡ ይቤሎ ፡ ዮሴፍ ፡ ወመልአ ፡ ሎሙ ፡ አሕስሊሆሙ ፡ ኵሎ ፡ ሲሲተ ፡ ወወርቆሙኒ ፡ ወደየ ፡ ውስተ ፡ አሕስሊሆሙ ፡ ወኮራ ፡ ወደየ ፡ ውስተ ፡ ሐስለ ፡ ብንያም ። 2 ወነግሀ ፡ በጽባሕ ፡ ሖሩ ፡ ወኮነ ፡ ሶበ ፡ ወፅኡ ፡ እምህየ ፡ ይቤሎ ፡ ዮሴፍ ፡ ለብእሴ ፡ ቤቱ ፡ ዴግኖሙ ፡ ሩጽ ፡ ወተጋአዞሙ ፡ እንዘ ፡ ትብል ፡ ህየንተ ፡ ሠናይት ፡ ዐሰይክሙኒ ፡ እኩየ ፡ ሰረቅሙኒ ፡ ጽዋዐ ፡ ብሩር ፡ በዘይሰቲ ፡ እግዚእየ ፡ ወአግብኦ ፡ ሊተ ፡ ለእኁሆሙ ፡ ዘይንእስ ፡ ወፍጡነ ፡ አምጽኦ ፡ ዘእንበለ ፡ እፃእ ፡ ውስተ ፡ ምኵናንየ ፡ 3 ወሮጸ ፡ ድኅሬሆሙ ። ወይቤሎሙ ፡ በከመ ፡ ዝንቱ ፡ ነገር ፡ 4 ወይቤልዎ ፡ ሐሰ ፡ ሎሙ ፡ ለአግብርቲከ ፡ ኢይገብሩ ፡ ዘንተሰ ፡ ነገረ ፡ ወኢይሰርቁ ፡ እምቤተ ፡ እግዚእከ ፡ ምንተኒ ፡ ንዋየ ። ወወርቀኒ ፡ ዘረከብነ ፡ ቀዲሙ ፡ ውስተ ፡ አሕስሊነ ፡ አሶጥነ ፡ ደቅከ ፡ እምድረ ፡ ከናአን ፡ 5 እፎ ፡ እንከ ፡ ንሰርቅ ፡ ምንተኒ ፡ ንዋየ ። ናሁ ፡ ንሕነሂ ፡ ወአሕስሊነሂ ፡ ፍትን ፡ ወበኀበ ፡ ረከብከ ፡ ጽዋዐ ፡ ውስተ ፡ ሐስለ ፡ አሐዱ ፡ ብእሲ ፡ እምኔነ ፡ ይትቀተል ፡ ወንሕነሂ ፡ ወአእዱጊነሂ ፡ ንትቀነይ ፡ ለእግዚእከ ፡ 6 ወይቤሎሙ ፡ አኮ ፡ ከማሁ ፡ በኀበ ፡ ብእሲ ፡ ዘረከብክዎ ፡ ባሕቲቶ ፡ እነሥእ ፡ ገብረ ፡ ወአንትሙሰ ፡ ተአትዉ ፡ በሰላም ፡ ቤተክሙ ፡ 7 ወእንዘ ፡ ይፈትን ፡ ውስተ ፡ ንዋዮሙ ፡ እምዘ ፡ ይልህቅ ፡ ቀደመ ፡ ወፈጸመ ፡ በኀበ ፡ ዘይንእስ ፡ ወተረክበ ፡ ውስተ ፡ ሐስለ ፡ ብንያም ፡ 8 ወሠጠጡ ፡ አልባሲሆሙ ፡ ወጸዐኑ ፡ ዲበ ፡ አእዱጊሆሙ ፡ ወተመይጡ ፡ ሀገረ ፡ ወበጽሑ ፡ ቤቶ ፡ ለዮሴፍ ፡ ወሰገዱ ፡ ሎቱ ፡ ኵሎሙ ፡ በገጾሙ ፡ ውስተ ፡ ምድር ። 9 ወይቤሎሙ ፡ ዮሴፍ ፡ እኩየ ፡ ገበርክሙ ፡ ወይቤሉ ፡ ምንተ ፡ ንበል ፡ ወምንተ ፡ ንትዋቀሥ ፡ እግዚእነ ፡ ረከበ ፡ አበሳሆሙ ፡ ለአግብርቲሁ ፡ ነየነ ፡ ንሕነ ፡ አግብርቱ ፡ ለእግዚእነ ፡ ወአእዱጊነሂ ። 10 ወይቤሎሙ ፡ ዮሴፍ ፡ እግዚአብሔር ፡ አንሰ ፡ እፈርህ ፡ አንትሙሰ ፡ ሖሩ ፡ አብያቲክሙ ፡ ወእኁክሙ ፡ ከመ ፡ ይኩን ፡ ቅኑየ ፡ እስመ ፡ እኩየ ፡ ገበርክሙ ፡ ኢታአምሩኑ ፡ ከመ ፡ ያስተአድም ፡ ብእሲ ፡ ጽዋዖ ፡ በከመ ፡ አነ ፡ በዝ ፡ ጽዋዕ ፡ ወኪያሁ ፡ ሰረቅሙኒ ። 11 ወይቤ ፡ ይሁዳ ፡ ላዕሌየ ፡ እግዚኦ ፡ እትናገር ፡ ገብርከ ፡ ቃለ ፡ ውስተ ፡ እዝነ ፡ እግዚእየ ። ክልኤተ ፡ አኀወ ፡ ወለደት ፡ እሙ ፡ ለገብርከ ፡ ለአቡነ ፡ ለነ ፡ አሐዱ ፡ ወፅአ ፡ ወተገድፈ ፡ ወአልቦ ፡ ዘረከቦ ፡ ወውእቱ ፡ ባሕቲቱ ፡ ተረፈ ፡ ለእሙ ። ወገብርከኒ ፡ አቡነ ፡ ያፈቅሮ ፡ ወነፍሱኒ ፡ እስርት ፡ እምነፍዝ ፡ 12 ወይከውን ፡ እምከመ ፡ ሖርነ ፡ ኀበ ፡ ገብርከ ፡ አቡነ ፡ ወእምከመ ፡ ኢሀሎ ፡ ምስሌነ ፡ ወሬዛ ፡ ይመውት ፡ ወንቀጽዕ ፡ አባነ ፡ በሐዘን ፡ እስከ ፡ ለመዊት ፡ 13 ወእገብር ፡ አነ ፡ ባሕቱ ፡ ገብርከ ፡ ህየንቴሁ ፡ ለሕፃን ፡ ገብረ ፡ ለእግዚእየ ። ወይሖር ፡ ወሬዛ ፡ ምስለ ፡ አኀዊሁ ፡ እስመ ፡ ተሐበይክዎ ፡ እምእዴሁ ፡ ለገብርከ ፡ አቡነ ፡ ለነ ፡ ወለእመ ፡ ኢያግባእክዎ ፡ ይኤብስ ፡ ገበርከ ፡ ለአቡነ ፡ ኵሎን ፡ መዋዕለ ፡ 14 ወርእየ ፡ ዮሴፍ ፡ ከመ ፡ ልበ ፡ ኵሎሙ ፡ ዕሩይ ፡ ብእሲ ፡ ምስለ ፡ ካልኡ ፡ ለሠናይ ፡ ወስእነ ፡ ተዐግሦ ፡ ወነገሮሙ ፡ ከመ ፡ ውእቱ ፡ ዮሴፍ ፡ 15 ወተናገረ ፡ ምስሌሆሙ ፡ በከመ ፡ ልሳነ ፡ ዕብራይስጥ ። ወሐቀፈ ፡ ክሳውዲሆሙ ፡ ወበከየ ፡ ወእሙንቱሰ ፡ ኢያእመርዎ ፡ ወአኀዙ ፡ ይብክዩ ። 16 ወይቤሎሙ ፡ ኢትብክዩ ፡ ላዕሌየ ፡ አፍጥኑ ፡ ወአምጽእዎ ፡ ለአቡየ ፡ ኀቤየ ፡ ወእርአዮ ፡ ዘእንበለ ፡ እሙት ፡ ወአዕይንቲሁኒ ፡ ለእኁየ ፡ ብንያም ፡ እንዘ ፡ ይሬእያ ። 17 እስመ ፡ ናሁ ፡ ዝንቱ ፡ ካልእ ፡ ዓም ፡ ዘዐባር ፡ ወዓዲ ፡ ኀምስቱ ፡ ዓመት ፡ ሀሎ ፡ ወአልቦ ፡ ማእረረ ፡ ወአልቦ ፡ ፍሬ ፡ ዕፅ ፡ ወአልቦ ፡ ሐሪሰ ፡ 18 ፍጡነ ፡ ረዱ ፡ አንትሙ ፡ ወአብያቲክሙ ፡ ወኢትትሐጐሉ ፡ በዐባር ፡ ወኢትተክዙ ፡ በእንተ ፡ ጥሪትክሙ ፡ እስመ ፡ ለሠሪዕ ፡ አቅደመ ፡ ፈንዎትየ ፡ እግዚአብሔር ፡ ቅድሜክሙ ፡ ከመ ፡ ይሕየዉ ፡ ሕዝብ ፡ ብዙኃን ። 19 ወዜንውዎ ፡ ለአቡየ ፡ ከመ ፡ ዓዲ ፡ ሕያው ፡ አነ ፡ ወአንትሙኒ ፡ ናሁ ፡ ትሬእዩ ፡ ከመ ፡ ሠርዐኒ ፡ እግዚአብሔር ፡ ከመ ፡ እንተ ፡ አቡሁ ፡ ለፈርዖን ፡ ወከመ ፡ እመብል ፡ ውስተ ፡ ቤቱ ፡ ወዲበ ፡ ኵሉ ፡ ምድረ ፡ ግብጽ ፡ 20 ወዜንውዎ ፡ ለአቡየ ፡ ኵሎ ፡ ክብርየ ፡ ወኵሎ ፡ ዘመጠነ ፡ ወሀበኒ ፡ እግዚአብሔር ፡ ብዕለ ፡ ወክብረ ። 21 ወወሀቦሙ ፡ በቃለ ፡ አፈ ፡ ፈርዖን ፡ ሰረገላተ ፡ ወሥንቀ ፡ ለፍኖት ፡ ወወሀቦሙ ፡ ለኵሎሙ ፡ አልባሰ ፡ ሕብር ፡ ወብሩረ ። 22 ወለአቡሆሙኒ ፡ ፈነወ ፡ አልባሰ ፡ ወብሩረ ፡ ወዐሠርተ ፡ አእዱገ ፡ ዘይወስዱ ፡ ስርናየ ፡ ወፈነዎሙ ፡ 23 ወዐርጉ ፡ ወዜነዉ ፡ ለአቡሆሙ ። ከመ ፡ ዮሴፍ ፡ ሕያው ፡ ወከመ ፡ ውእቱ ፡ ያሰፍር ፡ ስርናየ ፡ ለኵሉ ፡ አሕዛበ ፡ ምድር ፡ ወይሜብል ፡ ዲበ ፡ ኵሉ ፡ ምድረ ፡ ግብጽ ። 24 ወኢአምነ ፡ አቡሆሙ ፡ እስመ ፡ ደንገፀ ፡ በኅሊናሁ ። ወእምዝ ፡ ርእየ ፡ ሰረገላተ ፡ ዘፈነወ ፡ ዮሴፍ ፡ ወተሐደሰት ፡ ወሐይወት ፡ መንፈሱ ፡ ወይቤ ፡ ዐቢይ ፡ ውእቱ ፡ ሊተ ፡ እስመ ፡ ዮሴፍ ፡ ሕያው ፡ እረድ ፡ ወእርአዮ ፡ ዘእንበለ ፡ እሙት ።