መጽሐፈ ኩፋሌ 8

8 1 ወበዕሥራ ፡ ወተስዐቱ ፡ ኢዮቤልዉ ፡ በሱባዐዔ ፡ ቀዳሚ ፡ በቀዳሚሁ ፡ ነሥአ ፡ ሎቱ ፡ አርፋክስድ ፡ ብእሲተ ፡ ወስማ ፡ ራሱእያ ፡ ወለተ ፡ ሱሰን ፡ ወለተ ፡ ኤላም ፡ ሎቱ ፡ ብእሲተ ፡ ወወለደት ፡ ሎቱ ፡ ወልደ ፡ በዓመት ፡ ሣልስ ፡ ዘሱባዔ ፡ ዝንቱ ፡ ወጸውዐ ፡ ስሞ ፡ ቃይናም ። 2 ወልህቀ ፡ ወልድ ፡ ወመሀሮ ፡ አቡሁ ፡ መጽሐፈ ፡ ወሖረ ፡ ይኅሥሥ ፡ ሎቱ ፡ መካነ ፡ ኀበ ፡ ይእኅዝ ፡ ሎቱ ፡ ሀገረ ። 3 ወረከበ ፡ መጽሐፈ ፡ ዘቈረፁ ፡ ቀደምት ፡ ውስተ ፡ ኰኩሕ ፡ ወአንበበ ፡ ዘውስቴታ ፡ ወአዕለዋ ፡ ወረስዐ ፡ እምውስቴታ ፡ ከመ ፡ ሀሎ ፡ ውስቴታ ፡ ትምህርት ፡ ዘትጉሃን ፡ በዘ ፡ ይሬእዩ ፡ ሰገለ ፡ ፀሓይ ፡ ወወርኅ ፡ ወከዋክብት ፡ ወውስተ ፡ ኵሉ ፡ ተአምረ ፡ ሰማይ ። 4 ወጸሐፈ ፡ ወኢነገረ ፡ በእንቲአሃ ፡ እስመ ፡ ይፈርሆ ፡ ለኖኅ ፡ ነጊረ ፡ በእንቲአሃ ፡ ከመ ፡ ኢይትመዓዕ ፡ ላዕሌሁ ፡ በእንቲአሃ ። 5 ወአመ ፡ ሠላሳ ፡ ኢዮቤልዉ ፡ በሱባዔ ፡ ካልእ ፡ በቀዳሚ ፡ ዓመቱ ፡ ነሥአ ፡ ሎቱ ፡ ብእሲተ ፡ ወስማ ፡ ሜልካ ፡ ወለተ ፡ አበዳይ ፡ ወልደ ፡ ያፌት ። ወበዓመት ፡ ራብዑ ፡ ሎቱ ፡ ወለደ ፡ ወልደ ፡ ወጸውዐ ፡ ስሞ ፡ ሳላ ፡ እስመ ፡ ይቤ ፡ ተፈንዎ ፡ ተፈነውኩ ። 6 ወበዓመት ፡ ራብዕ ፡ ተወልደ ፡ ወልህቀ ፡ ሳላ ፡ ወነሥአ ፡ ሎቱ ፡ ብእሲተ ፡ ወስማ ፡ ሙአክ ፡ ወለተ ፡ ኬሴድ ፡ እኅወ ፡ አቡሁ ፡ ሎቱ ፡ ብእሲተ ። በዓመት ፡ ወበሠላሳ ፡ ኢዮቤልዉ ፡ በሱባዔ ፡ ኃምስ ፡ በቀዳሚ ፡ ዓመቱ ፡ 7 ወለደት ፡ ሎቱ ፡ ወልደ ፡ በኃምስ ፡ ዓመቱ ፡ ወጸውዐ ፡ ስሞ ፡ ኤቤር ። ወነሥአ ፡ ሎቱ ፡ ብእሲተ ፡ ወስማ ፡ አዙራድ ፡ ወለተ ፡ ኔብሮድ ። በሠላሳ ፡ ወክልኤቱ ፡ ኢዮቤልዉ ፡ በሱባዔ ፡ ሳብዕ ፡ በሣልስ ፡ ዓመቱ ። 8 ወበሳድስ ፡ ዓመት ፡ ወለደት ፡ ሎቱ ፡ ወልደ ፡ ወጸውዐ ፡ ስሞ ፡ ፋሌክ ። እስመ ፡ በመዋዕል ፡ ዘተወልደ ፡ አኀዙ ፡ ደቂቀ ፡ ኖኅ ፡ ይትካፈሉ ፡ ሎሙ ፡ ምድረ ፡ ወበእንተዝ ፡ ጸውዐ ፡ ስሞ ፡ ፋሌክ ፡ 9 ወተካፈሉ ፡ በእኩይ ፡ በበይናቲሆሙ ፡ ወነገርዎ ፡ ለኖኅ ፡ 10 ወኮነ ፡ በቀዳሚሁ ፡ ለሠላሳ ፡ ወሠለስቱ ፡ ኢዮቤልዉ ፡ ወከፈልዋ ፡ ለምድር ፡ ሠለስተ ፡ መክፈልተ ፡ ለሴም ፡ ወለካም ፡ ወለያፌት ፡ በበ ፡ ርስቱ ። በቀዳሚ ፡ ዓመት ፡ ዘአሐዱ ፡ ሱባዔ ፡ እንዘ ፡ ይነብር ፡ አሐዱ ፡ እምኔነ ፡ እለ ፡ ተፈኖነ ፡ ኀቤሆሙ ። 11 ወጸውዐ ፡ ደቂቆ ፡ ወቀርቡ ፡ ኀቤሁ ፡ እሙንቱ ፡ ወውሉዶሙ ፡ ወከፈለ ፡ ምድረ ፡ በዑፃዌ ፡ ዘይእኅዙ ፡ ሠለስቲሆሙ ፡ ውሉዱ ። ወሰፍሑ ፡ እደዊሆሙ ፡ ወነሥኡ ፡ መጽሐፈ ፡ እምሕፅነ ፡ ኖኅ ፡ አቡሆሙ ። 12 ወወፅአ ፡ በመጽሐፍ ፡ ዕፃሁ ፡ ለሴም ፡ ማእከለ ፡ ምድር ፡ ዘይእኅዝ ፡ ለርስቱ ፡ ወለውሉዱ ፡ ለትውልድ ፡ ዘለዓለም ። እማእከለ ፡ ደብረ ፡ ራፋ ፡ እሙፃአ ፡ ማይ ፡ እምፈለገ ፡ ጢና ፡ ወየሐውር ፡ መክፈልቱ ፡ መንገለ ፡ ዐረብ ፡ እንተ ፡ ማእከሉ ፡ ለዝ ፡ ፈለግ ። ወየሐውሩ ፡ እስከ ፡ ሶበ ፡ ይቀርቡ ፡ ኀበ ፡ ማየ ፡ ቀላያት ፡ እምኀበ ፡ ይወፅእ ፡ ዝንቱ ፡ ፈለግ ፡ እምኔሃ ። ይወፅእ ፡ ዝንቱ ፡ ፈለግ ፡ ወይክዑ ፡ ማያቲሁ ፡ ውስተ ፡ ባሕረ ፡ ሜአት ፡ ወየሐውር ፡ ዝንቱ ፡ ፈለግ ፡ እስከ ፡ ባሐር ፡ ዐቢይ ። ወኵሉ ፡ ዘመንገለ ፡ ደቡብ ፡ ለያፌት ። ወኵሉ ፡ ዘመንገለ ፡ ገጸ ፡ ሰሜን ፡ ለሴም ። 13 ወየሐውር ፡ እስከ ፡ ሶበ ፡ ይቀርብ ፡ ካራስ ፡ ዝውእቱ ፡ ውስተ ፡ ሕፅነ ፡ ልሳን ፡ እንተ ፡ ትኔጽር ፡ መንገለ ፡ ሰሜን ፡ 14 ወየሐውር ፡ መክፈልቱ ፡ እንተ ፡ መንገለ ፡ ባሕር ፡ ዐቢይ ፡ ወየሐውር ፡ ርቱዐ ፡ እስከ ፡ ይቀርብ ፡ መንገለ ፡ ዐረቢሃ ፡ ለልሳን ፡ እንተ ፡ ትኔጽር ፡ መንገለ ፡ ሰሜን ። እስመ ፡ ዛቲ ፡ ባሕር ፡ ስማ ፡ ልሳነ ፡ ባሕረ ፡ ግብጽ ፡ 15 ወትገምጽ ፡ እምህየ ፡ መንገለ ፡ ሰሜን ፡ መንገለ ፡ አፉሃ ፡ ለባሕር ፡ ዐቢይ ፡ ውስተ ፡ ከናፍረ ፡ ማያት ። ወተሐውር ፡ መንገለ ፡ ዐረብ ፡ ዐፍራ ፡ ወተሐውር ፡ እስከ ፡ ትቀርብ ፡ ኀበ ፡ ማየ ፡ ግዮን ፡ ፈለግ ። ወመንገለ ፡ ሰሜኑ ፡ ለማየ ፡ ግዮን ፡ መንገለ ፡ ድንጋጉ ፡ ለዝ ፡ ፈለግ ። 16 ወተሐውር ፡ መንገለ ፡ ጽባሕ ፡ እስከ ፡ ሶበ ፡ ይቀርብ ፡ ኀበ ፡ ገነተ ፡ ኤዶም ፡ መንገለ ፡ ሰሜኑ ፡ ለሰሜን ። ወእምጽባሒሃ ፡ ለኵላ ፡ ምድረ ፡ ኤዶም ፡ ወለኵሉ ፡ ጽባሕ ። ወይትመየጥ ፡ ውስተ ፡ ጽባሕ ፡ ወይመጽእ ፡ እስከ ፡ ይቀርብ ፡ መንገለ ፡ ጽባሒሁ ፡ ለደብር ፡ ዘስሙ ፡ ራፋ ፡ ወይወርድ ፡ መንገለ ፡ ጽንፉ ፡ ለሙፃአ ፡ ጢና ፡ ፈለግ ። 17 ዛቲ ፡ መክፈልት ፡ ወፅአት ፡ በዕፁ ፡ ለሴም ፡ ወለውሉዱ ፡ ለእኂዞታ ፡ ለዓለም ፡ ለትውልዱ ፡ እስከ ፡ ለዓለም ። 18 ወተፈሥሐ ፡ ኖኅ ፡ እስመ ፡ ወፅአ ፡ ዝንቱ ፡ መክፈልት ፡ ለሴም ፡ ወለውሉዱ ። ወተዘከረ ፡ ኵሎ ፡ ዘነበበ ፡ በአፉሁ ፡ በትንቢት ፡ እስመ ፡ ይቤ ፡ ይትባረክ ፡ እግዚአብሔር ፡ አምላከ ፡ ሴም ፡ ወይኅድር ፡ እግዚአብሔር ፡ ውስተ ፡ መኃድሪሁ ፡ ለሴም ፡ 19 ወአእመረ ፡ ከመ ፡ ገነተ ፡ ኤዶም ፡ ቅድስተ ፡ ቅዱሳን ፡ ወማኅደሩ ፡ ለእግዚአብሔር ፡ ውእቱ ፡ ወደብረ ፡ ሲና ፡ ማእከላ ፡ ለገዳም ፡ ወደብረ ፡ ጽዮን ፡ ማእከለ ፡ ሕንብርታ ፡ ለምድር ። ሠለስቲሆሙ ፡ ዝንቱ ፡ መንጸረ ፡ ዝንቱ ፡ ለቅድስት ፡ ተፈጥሩ ። 20 ወባረኮ ፡ ለአምላከ ፡ አማልክት ፡ ዘወደየ ፡ ውስተ ፡ አፉሁ ፡ ንባበ ፡ እግዚአብሔር ፡ ወእግዚአብሔር ፡ እስከ ፡ ለዓለም ። 21 ወአእመረ ፡ ከመ ፡ መክፈልተ ፡ በረከት ፡ ወቡሩክ ፡ በጽሐ ፡ ለሴም ፡ ወለውሉዱ ፡ ለትውልድ ፡ ዘለዓለም ፡ ኵላ ፡ ምድረ ፡ ኤዶም ፡ ወኵላ ፡ ምድረ ፡ ባሕረ ፡ ኤርትራ ፡ ወኵላ ፡ ምድረ ፡ ጽባሕ ፡ ወእንደኬ ፡ ወበኤርትራ ፡ ወአድባሪሁ ፡ ወኵላ ፡ ምድረ ፡ ባሳ ፡ ወኵላ ፡ ምድረ ፡ ሊባኖስ ፡ ወደሰያተ ፡ ክብቱር ። ወኵሎ ፡ ደብረ ፡ ሳኒር ፡ ወአማና ፡ ወደብረ ፡ አሱር ፡ ዘደቡብ ፡ ወኵላ ፡ ምድረ ፡ ኤላም ፡ አሱር ፡ ወባቤል ፡ ወሱሳን ፡ ወማዕዳይ ፡ ወኵላ ፡ አድባረ ፡ አራራት ፡ ወኵሎ ፡ ማዕዶተ ፡ ባሕር ፡ ዘማዕዶተ ፡ ደብረ ፡ አሱር ፡ ዘመንገለ ፡ ደቡብ ፡ ምድር ፡ ቡርክት ፡ ወስፍሕት ፡ ወኵሉ ፡ ውስቴታ ፡ ጥቀ ፡ ሠናይት ። 22 ወለካም ፡ ወፅአ ፡ መክፈልት ፡ ዘዳግም ፡ መንገለ ፡ ማዕዶተ ፡ ግዮን ፡ መንገለ ፡ ሰሜን ፡ በየማነ ፡ ገነት ፡ ወየሐውር ፡ መንገለ ፡ ሰሜን ፡ ወየሐውር ፡ ኵሎ ፡ አድባረ ፡ እሳት ። ወየሐውር ፡ መንገለ ፡ ዐረብ ፡ መንገለ ፡ ባሕረ ፡ አጤል ፡ ወየሐውር ፡ ዐረብ ፡ እስከ ፡ ይቀርብ ፡ ኀበ ፡ ባሕረ ፡ ማኡክ ፡ እንተ ፡ ይእቲ ፡ ዘኵሉ ፡ ይወርድ ፡ ውስቴታ ፡ ዘኢይትሐጐል ። 23 ወይመጽእ ፡ ውስተ ፡ ደቡብ ፡ ውስተ ፡ ጽንፈ ፡ ጋዲር ፡ ወይመጽእ ፡ ውስተ ፡ ከንፈረ ፡ ማየ ፡ ባሕር ፡ ውስተ ፡ ማያተ ፡ ባሕር ፡ ዐቢይ ፡ እስከ ፡ ሶበ ፡ ይቀርብ ፡ ፈለገ ፡ ግዮን ፡ ወየሐውር ፡ ግዮን ፡ ፈለግ ፡ እስከ ፡ ሶበ ፡ ይቀርብ ፡ በየማነ ፡ ገነተ ፡ ኤዶም ። 24 ወዛቲ ፡ ምድር ፡ እንተ ፡ ወፅአት ፡ ለካም ፡ በመክፈልት ፡ ዘይእኅዝ ፡ ለዓለም ፡ ሎቱ ፡ ወለውሉዱ ፡ ለትዝምዶሙ ፡ እስከ ፡ ለዓለም ። 25 ወለያፌት ፡ ወፅአ ፡ መክፈልት ፡ ሣልስ ፡ ማዕዶተ ፡ ጢና ፡ ፈለግ ፡ መንገለ ፡ ደቡባቲሁ ፡ ለሙፃአ ፡ ማያቲሁ ፡ ወየሐውር ፡ መንገለ ፡ ጽባሕ ፡ ደቡብ ፡ ኵሎ ፡ ደወለ ፡ ጎግ ፡ ወኵሎ ፡ ጽባሓቲሆሙ ፡ 26 ወየሐውር ፡ መንገለ ፡ ደቡብ ፡ ለደቡብ ፡ ወየሐውር ፡ መንገለ ፡ አድባረ ፡ ቄልጥ ፡ መንገለ ፡ ደቡብ ፡ ወመንገለ ፡ ባሕረ ፡ ማኡቅ ፡ ወይመጽእ ፡ መንገለ ፡ ጽባሑ ፡ ለጋዲር ፡ እስከ ፡ መንገለ ፡ እደ ፡ ማየ ፡ ባሕር ፡ 27 ወየሐውር ፡ እስከ ፡ ሶበ ፡ ይቀርብ ፡ መንገለ ፡ ዐረበ ፡ ፋራ ። ወይገብእ ፡ መንገለ ፡ አፌራግ ፡ ወየሐውር ፡ መንገለ ፡ ጽባሕ ፡ መንገለ ፡ ማየ ፡ ባሕረ ፡ ሜአት ፡ 28 ወየሐውር ፡ መንገለ ፡ እደ ፡ ጢና ፡ ፈለግ ፡ መንገለ ፡ ጽባሐ ፡ ደቡብ ፡ እስከ ፡ ሶበ ፡ ይቀርብ ፡ እስከ ፡ ጽንፈ ፡ ማያቲሁ ፡ መንገለ ፡ ደብረ ፡ ራፋ ፡ ወየአውዳ ፡ ለደቡብ ። 29 ዛቲ ፡ ምድር ፡ እንተ ፡ ወፅአት ፡ ለያፌት ፡ ወለውሉዱ ፡ በመክፈልተ ፡ ርስቱ ፡ ዘይእኅዝ ፡ ሎቱ ፡ ወለውሉዱ ፡ ለትዝምዶሙ ፡ እስከ ፡ ለዓለም ። ደሰያት ፡ ዐበይት ፡ ኃምስቱ ፡ ወምድር ፡ ዐባይ ፡ በደቡብ ፡ 30 ወባሕቱ ፡ ቍሩር ፡ ይእቲ ፡ ወምድረ ፡ ካም ፡ መርቄ ፡ ይእቲ ፡ ወምድረ ፡ ሴምሰ ፡ ኢመርቄ ፡ ወኢደደክ ፡ እስመ ፡ ቱስሕት ፡ ይእቲ ፡ በቍር ፡ ወበሞቅ ።