ዘሚክያስ ነቢይ 4

ወይከውን ፡ በደኃሪ ፡ መዋዕል ፡ ያስተርኢ ፡ ደብረ ፡ እግዚአብሔር ፡ ድልወ ፡ ውስተ ፡ አርእስተ ፡ አድባር ፡ ወይትሌዐል ፡ መልዕልተ ፡ አውግር ፡ ወይረውጹ ፡ ኀቤሁ ፡ አሕዛብ ። ወየሐውሩ ፡ ብዙኃን ፡ አሕዛብ ፡ ወይቤሉ ፡ ንዑ ፡ ንዕርግ ፡ ደብረ ፡ እግዚአብሔር ፡ ወውስተ ፡ ቤተ ፡ አምላከ ፡ ያዕቆብ ፤ ያርእዩነ ፡ ፍኖቶ ፡ ወንሖር ፡ በአሠሩ ፡ እስመ ፡ እምጽዮን ፡ ይወፅእ ፡ ሕግ ፡ ወቃለ ፡ እግዚአብሔር ፡ እምኢየሩሳሌም ። ወይኴንን ፡ ማእከለ ፡ ብዙኃን ፡ አሕዛብ ፡ ወይዛለፎሙ ፡ ለአሕዛብ ፡ ጽኑዓን ፡ እስከ ፡ ነዋኅ ፡ ብሔር ፡ ወይመትሩ ፡ ኰያንዊሆሙ ፡ ለማሕረስ ፡ ወአስይፍቲሆሙ ፡ ለማዕፀድ ፡ ወኢያነሥኡ ፡ እንከ ፡ ኲናተ ፡ ሕዝብ ፡ ላዕለ ፡ ሕዝብ ፡ ወኢይትሜሀሩ ፡ እንከ ፡ ቀትለ ። ወያዐርፉ ፡ ኵሎሙ ፡ ታሕተ ፡ ወይኖሙ ፡ ወታሕተ ፡ በለሶሙ ፡ ወአልቦ ፡ ዘይጌርሞሙ ፡ እስመ ፡ አፉሁ ፡ ለእግዚአብሔር ፡ ዘኵሎ ፡ ይመልክ ፡ ነበበ ፡ ከመዝ ። እስመ ፡ ኵሎሙ ፡ አሕዛብ ፡ የሐውሩ ፡ በፍኖቶሙ ፡ ወንሕነሰ ፡ ነሐውር ፡ በስመ ፡ እግዚአብሔር ፡ አምላክነ ፡ ለዓለም ፡ ወዓዲ ። ይእተ ፡ አሚረ ፡ ይቤ ፡ እግዚአብሔር ፡ አስተጋብኣ ፡ ለቅጥቅጥ ፡ ወእትዌከፋ ፡ ለግድፍት ፡ ለእንተ ፡ አርሐቅዋ ። ወእሬስያ ፡ ለቅጥቅጥ ፡ ትርፍተ ፡ ወለግድፍት ፡ ሕዝበ ፡ ጽንዕተ ፡ ወይነግሥ ፡ ሎሙ ፡ እግዚአብሔር ፡ በደብረ ፡ ጽዮን ፡ እምይእዜ ፡ ወእስከ ፡ ለዓለም ። ወአንቲሂ ፡ ማኅፈደ ፡ ኖሎት ፡ ከመ ፡ ጸበል ፡ ወትመጽእ ፡ ወለተ ፡ ጽዮን ፡ ውስቴትኪ ፡ ወትቀድም ፡ በዊአ ፡ ቀዳሚት ፡ መንግሥት ፡ እምባቢሎን ፡ ወለተ ፡ ኢየሩሳሌም ። ወይእዜኒ ፡ ለምንት ፡ መከርኪ ፡ እኩየ ፡ ንጉሥኑ ፡ አልብኪ ፡ ጠፍአኑ ፡ ልብኪ ፡ ከመ ፡ የአኀዝኪ ፡ ማሕምም ፡ ከመ ፡ እንተ ፡ ትወልድ ። ሐመምኪሂ ፡ ወተዐገስኪ ፡ (ወቅረቢ ፡) ወለተ ፡ ጽዮን ፡ ከመ ፡ እንተ ፡ ትወልድ ፡ እስመ ፡ ናሁ ፡ ይእዜ ፡ ትወፅኢ ፡ እምሀገር ፡ ወተኀድሪ ፡ ውስተ ፡ ገዳም ፡ ወትበጽሒ ፡ እስከ ፡ ባቢሎን ፡ ወበህየ ፡ ያድኅነኪ ፡ ወበህየ ፡ ያነግፈኪ ፡ እግዚአብሔር ፡ አምላክኪ ፡ እምእደ ፡ ፀርኪ ። ወናሁ ፡ ይእዜ ፡ ይትጋብኡ ፡ ብዙኃን ፡ አሕዛብ ፡ ላዕሌኪ ፡ እለ ፡ ይቤሉ ፡ ንትፈሣሕ ፡ ላዕሌኪ ፡ ወይሬእያ[ኪ፡ አዕይንቲነ ፡ ጽዮን ። ወእሙንቱሰ ፡ ኢያእመሩ ፡ ዘመከረ ፡ እግዚአብሔር ፡ ወኢያእመሩ ፡ ዘኀለየ ፡ እስመ ፡ አስተጋብኦሙ ፡ ከመ ፡ ክልስስት ፡ ውስተ ፡ ዐውደ ፡ እክል ። ተንሥኢ ፡ አኪድዮሙ ፡ ወለተ ፡ ጽዮን ፡ እስመ ፡ እሬስዮ ፡ ዘኀጺን ፡ ለአቅርንትኪ ፡ ወእሬስዮ ፡ ዘብርት ፡ ለወላትውኪ ፡ ወትመውእዮሙ ፡ ለብዙኃን ፡ አሕዛብ ፡ ወተሐርምዮሙ ፡ ለእግዚአብሔር ፡ ብዝኆሙ ፡ ወኀይሎሙኒ ፡ ለእግዚአብሔር ፡ በኵሎ ፡ ምድር ። ናሁ ፡ ይእዜ ፡ የዐግትዋ ፡ ለወለተ ፡ ጽዮን ፡ ወየሐርስዋ ፡ በበትር ፡ ይዘብጡክሙ ፡ ውስተ ፡ መላትሒክሙ ፡ ሕዝበ ፡ እስራኤል ።