መጽሐፈ ነገሥት ፩ 13

2 ወኀረየ ፡ ሎቱ ፡ ሳኦል ፡ ሠላሳ ፡ ምእተ ፡ ብእሴ ፡ ወነበሩ ፡ ምስለ ፡ ሳኦል ፡ ዕሥራ ፡ ምእት ፡ ብእሲ ፡ ውስተ ፡ መኬማስ ፡ ወውስተ ፡ ደብረ ፡ ቤቴል ፡ ወዐሠርቱ ፡ ምእት ፡ ብእሲ ፡ ምስለ ፡ ዮናታን ፡ ውስተ ፡ ገባኦን ፡ ዘብንያም ፡ ወለእለስ ፡ ተርፉ ፡ ሕዝብ ፡ ፈነዎሙ ፡ ይእትዉ ፡ ውስተ ፡ አብያቲሆሙ ፡ ለኵሎሙ ። 3 ወቀተሎሙ ፡ ዮናታን ፡ ለናሴብ ፡ ለኢሎፍሊ ፡ እለ ፡ ውስተ ፡ ወግር ፡ ወሰምዑ ፡ ኢሎፍሊ ፡ ወአንፍሐ ፡ ቀርነ ፡ ሳኦል ፡ ውስተ ፡ ኵሉ ፡ ምድር ፡ እንዘ ፡ ይብል ፡ ዐለዉነ ፡ አግብርቲነ ። 4 ወሰምዑ ፡ ኵሎሙ ፡ እስራኤል ፡ እንዘ ፡ ይብሉ ፡ ቀተሎሙአ ፡ ሳኦልአ ፡ ለናሴብአ ፡ ለኢሎፍሊአ ፡ ወጸንዑ ፡ እስራኤል ፡ ላዕለ ፡ ኢሎፍሊ ፡ ወወውዑ ፡ ሕዝብ ፡ በገልገላ ፡ ወተለውዎ ፡ ለሳኦል ። 5 ወኢሎፍሊኒ ፡ ተጋብኡ ፡ ወፀብእዎሙ ፡ ለእስራኤል ፡ ፫፼ሰረገላት ፡ ወ፷፻መስተፅዕናነ ፡ አፍራስ ፡ ወኵሉ ፡ ሕዝብ ፡ ከመ ፡ ኆፃ ፡ ባሕር ፡ ብዝኆሙ ፤ ወዐርጉ ፡ ወተዐየኑ ፡ ውስተ ፡ መኬማስ ፡ ቅድመ ፡ ቤቶሮን ፡ እመንገለ ፡ አዜብ ። 6 ወሶበ ፡ ርእዩ ፡ ሰብአ ፡ እስራኤል ፡ ከመ ፡ የዐጽቦሙ ፡ ሐዊረ ፡ ኀቤሆሙ ፡ ተኀብኡ ፡ ሕዝብ ፡ ውስተ ፡ በአታት ፡ ወውስተ ፡ ሕዝአታት ፡ ወታሕተ ፡ ጾላዕት ፡ ወውስተ ፡ ግበብ ፡ ወውስተ ፡ ዐዘቅታት ። 7 ወቦ ፡ እለ ፡ ዐደዉ ፡ ዮርዳኖስ ፡ ውስተ ፡ ምድረ ፡ ጋድ ፡ ወገለዓድ ፡ ወሳኦልሰ ፡ ዓዲሁ ፡ ሀለወ ፡ ውስተ ፡ ገልገላ ፡ ወኵሉ ፡ ሕዝብ ፡ ኀደጉ ፡ ተሊዎቶ ። 8 ወኀለፉ ፡ እልክቱ ፡ ሰሱዕ ፡ መዋዕል ፡ ዘይቤሎ ፡ ሳሙኤል ፡ ዘአስምዐ ፡ ሳዕሌሁ ፡ ወኢመጽአ ፡ ሳሙኤል ፡ ውስተ ፡ ገልገላ ፡ ወተዘርዉ ፡ ኵሉ ፡ ሕዝብ ፡ እምኔሁ ። 9 ወይቤ ፡ ሳኦል ፡ አምጽኡ ፡ ሊተ ፡ ዘእገብር ፡ መሥዋዕተ ፡ ሰላም ። 10 ወእምዝ ፡ ሶበ ፡ ፈጸመ ፡ ገቢረ ፡ መሥዋዕት ፡ ናሁ ፡ መጽአ ፡ ሳሙኤል ፡ ወወፅአ ፡ ሳኦል ፡ ወተቀበሎ ፡ ከመ ፡ ይባርኮ ። 11 ወይቤሎ ፡ ሳሙኤል ፡ ምንተ ፡ ገበርከ ፡ ወይቤሎ ፡ ሳኦል ፡ እስመ ፡ ርኢኩ ፡ ከመ ፡ ተዘርወ ፡ ሕዝብ ፡ እምኔየ ፡ ወአንተኒ ፡ ኢመጻእከ ፡ በከመ ፡ ትቤለኒ ፡ ዘአስማዕከ ፡ ላዕሌየ ፡ በእንተ ፡ መዋዕል ፡ ወኢሎፍሊኒ ፡ ተጋብኡ ፡ ውስተ ፡ መኬማስ ፤ 12 ወእቤ ፡ ይእዜ ፡ ይወርዱ ፡ ኢሎፍሊ ፡ ኀቤየ ፡ ውስተ ፡ ገልገላ ፡ ወገጸ ፡ እግዚአብሔርኒ ፡ ኢሰአልኩ ፡ ወተዐጊሥየ ፡ ገበርኩ ፡ መሥዋዕተ ። 13 ወይቤሎ ፡ ሳሙኤል ፡ ለሳኦል ፡ አበስከ ፡ ዘኢዐቀብከ ፡ ትእዛዝየ ፡ ዘአዘዘከ ፡ እግዚአብሔር ፡ በከመ ፡ ይእዜ ፡ አስተዳለወ ፡ እግዚአብሔር ፡ ለዓለም ፡ መንግሥተከ ፡ ለእስራኤል ። 14 ወይእዜኒ ፡ ኢትቀውም ፡ መንግሥትከ ፡ ወየኀሥሥ ፡ ሎቱ ፡ እግዚአብሔር ፡ ብእሴ ፡ ዘከመ ፡ ልቡ ፡ ወይሠይሞ ፡ እግዚአብሔር ፡ ንጉሠ ፡ ላዕለ ፡ ሕዝቡ ፡ እስመ ፡ ኢዐቀብከ ፡ ኵሎ ፡ ዘአዘዘከ ፡ እግዚአብሔር ። 15 ወተንሥአ ፡ ሳሙኤል ፡ ይሖር ፡ ፍኖቶ ፡ ውስተ ፡ ገልገላ ፡ ወእለ ፡ ተርፉ ፡ ሕዝብ ፡ ዐርጉ ፡ ወተለውዎ ፡ ለሳኦል ፡ ወኀለፉ ፡ ይትቀበልዎሙ ፡ ለሕዝብ ፡ እለ ፡ ሖሩ ፡ ይትቃተሉ ፡ ሎሙ ፡ ወበጽሑ ፡ ውስተ ፡ ገልገላ ፡ ዘብንያም ፡ ውስተ ፡ ገባኦን ፡ ወኈለቆሙ ፡ ሳኦል ፡ ለሕዝብ ፡ እለ ፡ ተረከቡ ፡ ምስሌሁ ፡ ወኮኑ ፡ ስድስተ ፡ ምእተ ፡ ብእሴ ። 16 ወሳኦልኒ ፡ ወዮናታን ፡ ወልዱ ፡ ወሕዝብኒ ፡ እለ ፡ ተረክቡ ፡ ምስሌሁ ፡ ነበሩ ፡ ውስተ ፡ ገባኦን ፡ ዘብንያም ፡ ወበከዩ ፡ ወኢሎፍሊኒ ፡ ተዐየኑ ፡ ውስተ ፡ መኬማስ ። 17 ወወፅኡ ፡ መስተቃትላን ፡ እምነ ፡ ሐቅለ ፡ ኢሎፍሊ ፡ ሠለስቱ ፡ ሰራዊት ፡ ወሖረ ፡ አሐዱ ፡ ሰርዌ ፡ ላዕለ ፡ ፍኖት ፡ እንተ ፡ ትኔጽር ፡ መንገለ ፡ ጎፌር ፡ ዘኀበ ፡ ሶጋክ ። 18 ወአሐዱ ፡ ሰርዌ ፡ ላዕለ ፡ ፍኖት ፡ እንተ ፡ ትኔጽር ፡ ዲበ ፡ ቤቶሮን ፤ ወአሐዱ ፡ ሰርዌ ፡ ዲበ ፡ ፍኖት ፡ እንተ ፡ ትኔጽር ፡ ላዕለ ፡ ገባኦን ፡ ወትነሔውጽ ፡ ዲበ ፡ ጋይ ፡ ዘሳቢ ። 19 ወአልቦ ፡ ነሃቤ ፡ ሐፂን ፡ ውስተ ፡ ኵሉ ፡ ምድረ ፡ እስራኤል ፡ እስመ ፡ ይቤሉ ፡ ኢሎፍሊ ፡ ኢይግበሩ ፡ ሎሙ ፡ ለዕብራውያን ፡ ሰይፈ ፡ ወኲናተ ። 20 ወይወርዱ ፡ ኵሎሙ ፡ እስራኤል ፡ ውስተ ፡ ምድረ ፡ ኢሎፍሊ ፡ ከመ ፡ ይንሀቡ ፡ ሎሙ ፡ ንዋየ ፡ ሐቅሎሙ ፡ ወጕድቦሙ ፡ ወማዕፀዶሙ ። 21 ወማእረርሰ ፡ በጽሐ ፡ ለዐፂድ ፡ ወሠለስቱ ፡ ሰቅል ፡ ሤጡ ፡ ለማዕበሉ ፡ ወለጕድብኒ ፡ ወለማዕፀድኒ ፡ ከማሁ ፡ ሤጡ ። 22 ወይእተ ፡ አሚረ ፡ አመ ፡ ፀብአ ፡ መኬማስ ፡ አልቦ ፡ ዘተረክበ ፡ ሰይፍ ፡ ወኲናት ፡ ውስተ ፡ እደዊሆሙ ፡ ለኵሉ ፡ ሕዝብ ፡ እለ ፡ ምስለ ፡ ሳኦል ፡ ወዮናታን ፡ ወተረክበ ፡ ለሳኦል ፡ ወለዮናታን ፡ ወልዱ ። 23 ወሖረ ፡ ውስተ ፡ ደወለ ፡ ኢሎፍሊ ፡ ዘማዕዶተ ፡ መኬማስ ፡ ወኢነገሮ ፡ ለአቡሁ ።