መጽሐፈ ነገሥት ፩ 16

1 ወይቤሎ ፡ እግዚአብሔር ፡ ለሳሙኤል ፡ እስከ ፡ ማእዜኑ ፡ ትላሕዎ ፡ አንተ ፡ ለሳኦል ፡ ወአንሰ ፡ መነንክዎ ፡ ከመ ፡ ኢይንግሥ ፡ ላዕለ ፡ እስራኤል ፤ ምላእ ፡ ቀርነ ፡ ቅብእ ፡ ወነዓ ፡ እፈኑከ ፡ ኀበ ፡ እሴይ ፡ ውስተ ፡ ቤተ ፡ ልሔም ፡ እስመ ፡ ርኢኩ ፡ እምውስተ ፡ ደቂቁ ፡ ዘይነግሥ ፡ ሊተ ። 2 ወይቤ ፡ ሳሙኤል ፡ ወእፎ ፡ አሐውር ፡ ወእመ ፡ ሰምዐ ፡ ሳኦል ፡ ይቀትለኒ ፡ ወይቤሎ ፡ እግዚአብሔር ፡ ንሣእ ፡ ምስሌከ ፡ እጉ፡ልተ ፡ እምውስተ ፡ አልህምት ፡ ወትብል ፡ እሡዕ ፡ መጻእኩ ፡ ለእግዚአብሔር ። 3 ወጸውዖ ፡ ለእሴይ ፡ ወለደቂቁ ፡ ውስተ ፡ መሥዋዕት ፡ ወእነግረከ ፡ ዘከመ ፡ ትገብር ፡ ወትቀብእ ፡ ዘአነ ፡ እሌለከ ። 4 ወገብረ ፡ ሳሙኤል ፡ ኵሎ ፡ ዘከመ ፡ ይቤሎ ፡ እግዚአብሔር ፡ ወሶበ ፡ በጽሐ ፡ ውስተ ፡ ቤተ ፡ ልሔም ፡ ደንገፁ ፡ ሊቃናተ ፡ ሀገር ፡ እስመ ፡ መጽአ ፡ ወይቤልዎ ፡ ሰላም ፡ ለምጽአትከ ፡ ራእይ ። 5 ወይቤሎሙ ፡ ሰላም ፡ ለክሙ ፤ እሡዕ ፡ ለእግዚአብሔር ፡ መጸእኩ ፤ ተቀደሱ ፡ ወተፈሥሑ ፡ ምስሌየ ፡ ዮም ፤ ወቀደሶሙ ፡ ለእሴይ ፡ ወለደቂቁ ፡ ወጸውዖሙ ፡ ውስተ ፡ መሥዋዕት ። 6 ወእምዝ ፡ ሶበ ፡ መጽአ ፡ ወርእዮ ፡ ለኤልያብ ፡ ይቤ ፡ ቅድመ ፡ እግዚአብሔር ፡ መሲሑ ፡ ውእቱ ። 7 ወይቤሎ ፡ እግዚአብሔር ፡ ለሳሙኤል ፡ ኢትነጽር ፡ ገጾ ፡ ወኢትርአይ ፡ ግርማ ፡ ርእየቱ ፡ እስመ ፡ መነንክዎ ፡ እስመ ፡ አኮ ፡ ከመ ፡ ይሬኢ ፡ ሰብእ ፡ ዘይሬኢ ፡ እግዚአብሔር ፡ እስመ ፡ ሰብእሰ ፡ ገጸ ፡ ይሬኢ ፡ ወእግዚአብሔርሰ ፡ ልበ ፡ ይሬኢ ። 8 ወጸውዖ ፡ እሴይ ፡ ለአሚናዳብ ፡ ወመጽአ ፡ ቅድሜሁ ፡ ለሳሙኤል ፡ ወይቤ ፡ ለዝንቱኒ ፡ ኢኀረዮ ፡ እግዚአብሔር ። 9 ወአምጽኦ ፡ እሴይ ፡ ለሳባዕ ፡ ወይቤ ፡ ለዝንቱኒ ፡ ኢኀረዮ ፡ እግዚአብሔር ። 10 ወአምጽኦሙ ፡ እሴይ ፡ ለሰብዕቲሆሙ ፡ ደቂቁ ፡ ቅድሜሁ ፡ ለሳሙኤል ፡ ወይቤሎ ፡ ሳሙኤል ፡ ለእሴይ ፡ [ለእሉኒ ፡ ኢኀረዮሙ ፡ እግዚአብሔር ። 11 ወይቤሎ ፡ ሳሙኤል ፡ ለእሴይ ፡] እሉኑ ፡ ዳእሙ ፡ ደቂቅከ ፡ ወይቤ ፡ ሀለወ ፡ ዘይንእስ ፡ ውስተ ፡ መራዕይ ፡ ይርዒ ፡ ወይቤሎ ፡ ሳሙኤል ፡ ለእሴይ ፡ ለአክ ፡ ያምጽእዎ ፡ እስመ ፡ ኢይመስሕ ፡ ዘእንበለ ፡ ይምጻእ ፡ ውእቱ ። 12 ወለአከ ፡ ወአምጽእዎ ፡ ወቀይሕ ፡ ውእቱ ፡ ወላሕይ ፡ አዕይንቲሁ ፡ ወሠናይ ፡ ራእዩ ፡ ለእግዚአብሔር ፡ ወይቤሎ ፡ እግዚአብሔር ፡ ለሳሙኤል ፡ ተንሥእ ፡ ወቅብኦ ፡ ለዳዊት ፡ እስመ ፡ ውእቱ ፡ ይኄይሶሙ ። 13 ወነሥአ ፡ ሳሙኤል ፡ ቀርነ ፡ ቅብእ ፡ ወቀብኦ ፡ በማእከለ ፡ አኀዊሁ ፡ ወመጽአ ፡ መንፈሰ ፡ እግዚአብሔር ፡ ላዕለ ፡ ዳዊት ፡ እምይእቲ ፡ አሚር ፡ ወለዝላፉ ፡ ወተንሥአ ፡ ሳሙኤል ፡ ወአተወ ፡ ውስተ ፡ አርማቴም ። 14 ወኀደጎ ፡ መንፈሰ ፡ እግዚአብሔር ፡ ለሳኦል ፡ ወኀነቆ ፡ መንፈስ ፡ እኩይ ፡ እምኀበ ፡ እግዚአብሔር ። 15 ወይቤልዎ ፡ ደቁ ፡ ለሳኦል ፡ ናሁ ፡ መንፈስ ፡ እኩይ ፡ የኀንቀከ ፡ እምኀበ ፡ እግዚአብሔር ። 16 ይንግሩ ፡ አግብርቲከ ፡ ቅደሜከ ፡ ወየሐይወ ፡ እግዚኦሙ ፤ ርኢነ ፡ ብእሴ ፡ ዘይዜምር ፡ በመሰንቆ ፡ ወእምከመ ፡ መጽአ ፡ ላዕሌከ ፡ ዝንቱ ፡ መንፈስ ፡ እኩይ ፡ ወይዜምር ፡ ውእቱ ፡ በመሰንቆ ፡ ወያዐርፈከ ። 17 ወይቤሎሙ ፡ ሳኦል ፡ ለደቁ ፡ ርእዩ ፡ ሊተ ፡ ብእሴ ፡ ዘሠናየ ፡ ይዜምር ፡ ወአምጽእዎ ፡ ሊተ ። 18 ወአውሥአ ፡ አሐዱ ፡ እምውስተ ፡ ደቁ ፡ ወይዜ ፡ ርኢኩ ፡ ወልደ ፡ እሴይ ፡ ዘቤተ ፡ ልሔም ፡ እንዘ ፡ ይዜምር ፡ ወጠቢብ ፡ ብእሲሁ ፡ ወመስተቃትል ፡ ውእቱ ፡ ወለባዊ ፡ በቃሉ ፡ ወሠናይ ፡ ራእዩ ፡ ብእሲሁ ፡ ወእግዚአብሔር ፡ ምስሌሁ ። 19 ወለአከ ፡ ሳኦል ፡ ሐዋርያተ ፡ ኀበ ፡ እሴይ ፡ እንዘ ፡ ይብል ፡ ፈንዎአ ፡ ሊተአ ፡ ለወልድከአ ፡ ዳዊትአ ፡ ዘውስተ ፡ መራዕይከአ ። 20 ወነሥአ ፡ እሴይ ፡ መሳንቅተ ፡ ኅብስት ፡ ወዝቀ ፡ ወይን ፡ ወአሐደ ፡ ማሕስአ ፡ ጠሊ ፡ ወፈነወ ፡ ምስለ ፡ ዳዊት ፡ ወልዱ ፡ ኀበ ፡ ሳኦል ። 21 ወቦአ ፡ ዳዊት ፡ ኀበ ፡ ሳኦል ፡ ወቆመ ፡ ቅድሜሁ ፡ ወአፍቀሮ ፡ ጥቀ ፡ ወረሰዮ ፡ ሎቱ ፡ ዘይጸውር ፡ ንዋየ ፡ ሐቅሉ ። 22 ወለአከ ፡ ሳኦል ፡ ኀበ ፡ እሴይ ፡ እንዘ ፡ ይብል ፡ ለይንበርአ ፡ ዳዊትአ ፡ ኀቤየአ ፡ ወይቁምአ ፡ ቅድሜየአ ፡ እስመ ፡ ረከበአ ፡ ሞገሰአ ፡ ቅድመ ፡ አዕይንትየአ ። 23 ወእምዝ ፡ ሶበ ፡ ይመጽእ ፡ ዝክቱ ፡ መንፈስ ፡ እኩይ ፡ ላዕለ ፡ ሳኦል ፡ ይነሥእ ፡ ዳዊት ፡ መሰንቆሁ ፡ ወይዜምር ፡ በቅድሜሁ ፡ ወያዕርፍ ፡ ሳኦል ፡ ወይኤድሞ ፡ ወየኀደጎ ፡ ዝክቱ ፡ መንፈስ ፡ እኩይ ።