መጽሐፈ ነገሥት ፩ 21

1 ወሖረ ፡ ዳዊት ፡ ኀበ ፡ አኪሜሌከ ፡ ካህን ፡ ውስተ ፡ ኖባማ ፡ ወደንገፀ ፡ አኪሜሌክ ፡ እስመ ፡ መጽአ ፡ ኀቤሁ ፡ ወይቤሎ ፡ ምንተ ፡ መጻእከ ፡ ባሕቲትከ ፡ ወአልቦ ፡ ዘሀሎ ፡ ምስሌከ ። 2 ወይቤሎ ፡ ዳዊት ፡ ለካህን ፡ ንጉሥ ፡ አዘዘኒ ፡ ቃለ ፡ ዮም ፡ ወይቤለኒ ፡ አልቦ ፡ ዘያአምር ፡ ዘንተ ፡ ነገረ ፡ ዘአነ ፡ እልእከከ ፡ ወዘእኤዝዘከ ፡ ወለደቂቅከኒ ፡ እኤዝዞሙ ፡ በውስተ ፡ መካን ፡ ዘስሙ ፡ ሃይማኖተ ፡ እግዚአብሔር ፡ ፌለኔሞኔሞንም ። 3 ወይእዜኒ ፡ እመቦ ፡ ዘብከ ፡ ኅብስተ ፡ ሀበኒ ፡ እምውስተ ፡ ዘሀሎ ፡ ኀቤከ ። 4 ወአውሥኦ ፡ ዝክቱ ፡ ካህን ፡ ለዳዊት ፡ ወይቤሎ ፡ አልብየ ፡ ኀቤየ ፡ ኅብስት ፡ ዘኢኮነ ፡ ቅዱሰ ፡ ዘእንበለ ፡ ኅብስት ፡ ቅዱስ ፡ ወእመሰ ፡ ንጹሓን ፡ ደቅከ ፡ እምአንስት ፡ ለይብልዑ ። 5 ወአውሥኦ ፡ ዳዊት ፡ ለካህን ፡ ወይቤሎ ፡ ሠሉስነ ፡ ዮም ፡ እምዘ ፡ ወፃእነ ፡ እምኀበ ፡ አንስት ፡ እምዘ ፡ ወጻእኩ ፡ ውስተ ፡ ፍኖት ፡ ወኵሎሙ ፡ ደቅየ ፡ ንጹሓን ፡ እሙንቱ ፡ ወዛቲ ፡ ፍኖት ፡ ኢኮነት ፡ ንጽሕተ ፡ ወበእንተ ፡ ንዋይየ ፡ ተቀደሰት ፡ ዮም ። 6 ወወሀቦ ፡ አኪሜሌክ ፡ ኅብስተ ፡ ቍርባን ፡ እስመ ፡ አልቦ ፡ ኅብስተ ፡ ህየ ፡ ዘእንበለ ፡ ኅብስት ፡ ዘቅድመ ፡ እግዚአብሔር ፡ ዘያቄርቡ ፡ ምዉቀ ፡ ዘይትገበር ፡ ኵሎ ፡ አሚረ ። 7 ወሀሎ ፡ ህየ ፡ ፩ወልድ ፡ እምነ ፡ እለ ፡ ሳኦል ፡ ቅሩበ ፡ ውስተ ፡ ኔሴራ ፡ ቅድመ ፡ እግዚአብሔር ፡ ወስሙ ፡ ዶይቅ ፡ ሶርያዊ ፡ ውእቱ ፡ ይርዒ ፡ ኦብቅሊሁ ፡ ለሳኦል ። 8 ወይቤሎ ፡ ዳዊት ፡ ለአኪሜሌክ ፡ ርኢ ፡ ሊተ ፡ ዝየ ፡ እመቦ ፡ ዘብከ ፡ ኵናተ ፡ አው ፡ ሰይፈ ፡ እስመ ፡ ሰይፍየ ፡ ወንዋየ ፡ ሐቅልየ ፡ ኢያምጻእኩ ፡ ምስሌየ ፡ እስመ ፡ ጐጓእኩ ፡ በእንተ ፡ ትእዛዘ ፡ ንጉሥ ። 9 ወይቤሎ ፡ ዝክቱ ፡ ካህን ፡ ናሁ ፡ ሰይፉ ፡ ለጎልያድ ፡ ኢሎፍላዊ ፡ ዘቀተልኮ ፡ በቄላተ ፡ ኤላ ፡ ወሀለወት ፡ ጥብልልታ ፡ በልብስ ፡ ወእመሰ ፡ ትነሥእ ፡ ኪያሃ ፡ ንሣእ ፡ እስመ ፡ አልቦ ፡ ባዕደ ፡ ዘእንበሌሃ ፡ ዝየ ፡ ወይቤሎ ፡ ዳዊት ፡ እመሰ ፡ አልቦ ፡ ባዕደ ፡ እንበሌሃ ፡ ሀበኒ ፡ ኪያሃ ። 10 ወወሀቦ ፡ ኪያሃ ፡ ወተንሥአ ፡ ዳዊት ፡ ወአምሰጠ ፡ በይእቲ ፡ ዕለት ፡ እምገጸ ፡ ሳኦል ፡ ወመጽአ ፡ ዳዊት ፡ ኀበ ፡ አንኩስ ፡ ንጉሠ ፡ ጌት ። 11 ወይቤልዎ ፡ ደቁ ፡ ለአንኩስ ፡ ነዋ ፡ ዳዊት ፡ ንጉሠ ፡ ብሔር ፤ አኮኑ ፡ በእንቲአሁ ፡ ወፅአ ፡ ሐላይያት ፡ ወይቤላ ፡ ቀተለ ፡ ዳዊት ፡ እልፈ ፡ ወሳኦል ፡ ፲፻ ። 12 ወዐቀቦ ፡ ዳዊት ፡ ለዝንቱ ፡ ነገር ፡ በልቡ ፡ ወፈርሀ ፡ ጥቀ ፡ እምቅድመ ፡ ገጸ ፡ አንኩስ ፡ ንጉሠ ፡ ጌት ። 13 ወሜጠ ፡ ገጾ ፡ እምኔሁ ፡ ወአምሰጠ ፡ በይእቲ ፡ ዕለት ፡ ወዘበጠ ፡ ከበሮ ፡ በኀበ ፡ አንቀጸ ፡ ሀገር ፡ ወጾረ ፡ በእደዊሁ ፡ ወሮጸ ፡ ኀበ ፡ አንቀጽ ፡ ወሐፉ ፡ ይውሕዝ ፡ ውስተ ፡ ጽሕሙ ። 14 ወይቤሎሙ ፡ አንኩስ ፡ ለደቁ ፡ ናሁ ፡ ረከብክሙ ፡ ብእሴ ፡ ጊጉየ ፡ ለምንት ፡ ኢያምጻእከምዎ ፡ ኀቤየ ። 15 ወርቱዕሰ ፡ ኢያብእዎ ፡ ውስተ ፡ ቤት ።