መጽሐፈ ነገሥት ፩ 24

1 ወሖረ ፡ ዳዊት ፡ ወነበረ ፡ ውስተ ፡ መጽብብ ፡ ዘጋዲ ። 2 ወእምዝ ፡ ሶበ ፡ ገብአ ፡ ሳኦል ፡ እምድኅሬሆሙ ፡ ለኢሎፍሊ ፡ ወአይድዕዎ ፡ ወይቤልዎ ፡ ነዋ ፡ ዳዊት ፡ ሀለወ ፡ ውስተ ፡ ገዳም ፡ ዘጋዲ ። 3 ወነሥአ ፡ ምስሌሁ ፡ ሳኦል ፡ ፴፻ብእሴ ፡ ኅሩያነ ፡ እምነ ፡ ኵሉ ፡ እስራኤል ፡ ወሖረ ፡ ይኅሥሦ ፡ ለዳዊት ፡ ወለሰብኡ ፡ ኀበ ፡ ምንዓወ ፡ ህየላት ። 4 ወበጽሐ ፡ ኀበ ፡ መራዕየ ፡ ኖሎት ፡ እለ ፡ ውስተ ፡ ፍኖት ፡ ወቦ ፡ ህየ ፡ በአት ፡ ወቦአ ፡ ሳኦል ፡ ውስተ ፡ ይእቲ ፡ በአት ፡ ይትዋፈር ፡ ወሀለወ ፡ ህየ ፡ ዳዊት ፡ ወሰብኡ ፡ ውስጣ ፡ ለይእቲ ፡ በአት ፡ ይነብሩ ። 5 ወይቤልዎ ፡ ሰብኡ ። 6 ለዳዊት ፡ ናሁ ፡ ዛቲ ፡ ዕለት ፡ እንተ ፡ ይቤለከ ፡ እግዚአብሔር ፡ ኣገብኦ ፡ ለጸላኢከ ፡ ውስተ ፡ እዴከ ፡ ወግበሮ ፡ ዘከመ ፡ ይኤድመከ ፡ ቅድመ ፡ አዕይንቲከ ፡ ወተንሥአ ፡ ዳዊት ፡ ወመተረ ፡ ጽንፈ ፡ ልብሲ ፡ ጽምሚተ ። 7 ወእምዝ ፡ አውደቆ ፡ ልበ ፡ እስመ ፡ መተረ ፡ ጽንፈ ፡ ልብሱ ፡ ለሳኦል ። 8 ወይቤሎሙ ፡ ዳዊት ፡ ለሰብኡ ፡ ኢይሬሲ ፡ ሊተ ፡ እግዚአብሔር ፡ ከመ ፡ እግበሮ ፡ ለዝንቱ ፡ ነገር ፡ ወኣልዕል ፡ እዴየ ፡ ላዕለ ፡ እግዚእየ ፡ መሲሑ ፡ ለእግዚአብሔር ፡ እስመ ፡ መሲሑ ፡ ለእግዚአብሔር ፡ ውእቱ ። 9 ወከልኦሙ ፡ ዳዊት ፡ ለሰብኡ ፡ ወኢያብሖሙ ፡ ይትነሥኡ ፡ ይቅትልዎ ፡ ለሳኦል ፡ ወተንሥአ ፡ ሳኦል ፡ ወሖረ ፡ ፍኖቶ ፡ ወወረደ ። 10 ወተንሥአ ፡ ዳዊት ፡ እምድኅሬሁ ፡ እምውስተ ፡ በአት ፡ ወጸርኀ ፡ ዳዊት ፡ እምድኅሬሁ ፡ ለሳኦል ፡ ወይቤሎ ፡ እግዚእየ ፡ ንጉሥ ፡ ወነጸረ ፡ ሳኦል ፡ ድኅሬሁ ፡ ወሰገደ ፡ ሎቱ ፡ ዳዊት ፡ በገጹ ፡ ውስተ ፡ ምድር ። 11 ወይቤሎ ፡ ዳዊት ፡ ለሳኦል ፡ ለምንት ፡ ትሰምዕ ፡ ነገሮሙ ፡ ለሕዝብ ፡ እለ ፡ ይብሉከ ፡ ናሁ ፡ ዳዊት ፡ የኀሥሣ ፡ ለነፍስከ ። 12 ናሁ ፡ ዮም ፡ በዛቲ ፡ ዕለት ፡ ርእያ ፡ አዕይንቲከ ፡ እፎ ፡ አግብአከ ፡ እግዚአብሔር ፡ ውስተ ፡ እዴየ ፡ በውስተ ፡ በአት ፡ ወኢፈቀድኩ ፡ እቅትልከ ፡ ወመሐኩከ ፡ ወእቤ ፡ ኢያልዕል ፡ እዴየ ፡ ላዕለ ፡ እግዚእየ ፡ እስመ ፡ መሲሑ ፡ ለእግዚአብሔር ፡ ውእቱ ። 13 ወናሁ ፡ ጽንፈ ፡ ልብስከ ፡ ውስተ ፡ እዴየ ፡ ወመተርኩ ፡ ጽንፈ ፡ ልብስከ ፡ ወኢቅተልኩከ ፡ ወርኢ ፡ እንከ ፡ ወአእምር ፡ ከመ ፡ አልቦ ፡ እኪት ፡ ውስተ ፡ እዴየ ፡ ዮም ፡ ወኢዐመፃ ፡ ወኢዐሊው ፡ ወኢአበስኩ ፡ ላዕሌከ ፡ ወአንተስ ፡ ትቄ ፡ ጽር ፡ በዘ ፡ ት [ትሜጠ] ዋ ፡ ለነፍስየ ። 14 ወይፍታሕ ፡ እግዚአብሔር ፡ ማእከሌየ ፡ ወማእከሌከ ፡ ወይኰንነኒ ፡ እምኔከ ፡ ወእዴየሰ ፡ ኢያወርድ ፡ ላዕሌከ ፤ በከመ ፡ ይብል ፡ አምሳለ ፡ ሰብእ ፡ ትካት ፡ እምነ ፡ መአብስ ፡ ትወጽእ ፡ ንስሓ ፤ ወእዴየሰ ፡ ኢትወርድ ፡ ላዕሌከ ። 15 ወይእዜኒ ፡ መነ ፡ ትዴግን ፡ ንጉሠ ፡ እስራኤል ፡ ወመነ ፡ ትትሉ ፡ ወፃእከ ፡ ከልበኑ ፡ ምዉተ ፡ ትዴግን ፡ አው ፡ ቍን [ጸኑ] ፡ ትትሉ ። 16 ይፍታሕ ፡ እግዚአብሔር ፡ ማእከሌየ ፡ ወማእከሌከ ፡ ወይኰንን ፡ ወይርአይ ፡ ሊተ ፡ እግዚአብሔር ፡ ወይፍታሕ ፡ ፍትሕየ ፡ ወይኰ ንነኒ ፡ እምእዴከ ። 17 ወእምዝ ፡ ሶበ ፡ አኅለቀ ፡ ዳዊት ፡ ዘንተ ፡ ነገረ ፡ ተናግሮቶ ፡ ለሳኦል ፡ ወይቤሎ ፡ ሳኦል ፡ ቃልከኑ ፡ ዝንቱ ፡ ወልድየ ፡ ዳዊት ፡ ወጸርኀ ፡ ሳኦል ፡ በቃሉ ፡ ወበከየ ። 18 ወይቤሎ ፡ ሳኦል ፡ ለዳዊት ፡ ጻድቅ ፡ አንተ ፡ እምኔየ ፡ እስመ ፡ አነ ፡ ፈደይኩከ ፡ እኩየ ፡ ወአንተስ ፡ ፈደይከኒ ፡ ሠናይተ ። 19 ወአንተ ፡ አይዳዕከኒ ፡ ዘገበርከ ፡ ሳዕሌየ ፡ ሠናይተ ፡ ዮም ፡ ዘከመ ፡ ዐጸወኒ ፡ እግዚአብሔር ፡ ዮም ፡ ውስተ ፡ እዴከ ፡ ወኢቀተልከኒ ። 20 ወመኑ ፡ ውእቱ ፡ ዘይረክቦ ፡ ለፀሩ ፡ ምንዱበ ፡ ወይፌንዎ ፡ በፍኖት ፡ ሠናይ ፡ ወእግዚአብሔር ፡ ባሕቱ ፡ ይፍዲከ ፡ በከመ ፡ ገበርከ ፡ አንተ ፡ ዮም ። 21 ወይእዜኒ ፡ ናሁ ፡ አእመርኩ ፡ አነ ፡ ከመ ፡ ነጊሠ ፡ ትነግሥ ፡ ወትቀውም ፡ በእዴከ ፡ መንግሥተ ፡ እስራኤል ። 22 ወይእዜኒ ፡ መሐል ፡ ሊተ ፡ በእግዚኣብሔር ፡ ከመ ፡ ኢትሠርዎ ፡ ለዘርእየ ፡ እምድኅሬየ ፡ ወኢታማስን ፡ ስምየ ፡ እምቤተ ፡ አቡየ ። 23 ወመሐለ ፡ ሎቱ ፡ ዳዊት ፡ ለሳኦል ፡ ወአተወ ፡ ሳኦል ፡ ብሔሮ ፡ ወዳዊትኒ ፡ ወስብኡ ፡ ዐርጉ ፡ ውስተ ፡ ሜስራ ፡ ዘመጽብብ ።