መጽሐፈ ነገሥት ፩ 26

1 ወመጽኡ ፡ ሰብአ ፡ ዚፋውያን ፡ እምነ ፡ ኦውክሞዴስ ፡ ኀበ ፡ ሳኦል ፡ ውስተ ፡ ወግር ፡ ወይቤልዎ ፡ ናሁ ፡ ዳዊት ፡ ሀሎ ፡ ምስሌነ ፡ የኀድር ፡ ውስተ ፡ ወግር ፡ ዘኬልሜንቴ ፡ ዘመንገለ ፡ ገጸ ፡ ኢያሴሙ ። 2 ወተንሥአ ፡ ሳኦል ፡ ወወረደ ፡ ውስተ ፡ ሐቅለ ፡ ዚፋ ፡ ወ፴፻ብእሲ ፡ ምስሌሁ ፡ ኅሩያን ፡ እምነ ፡ እስራኤል ፡ ከመ ፡ ይኅሥሦ ፡ ለዳዊት ፡ ውስተ ፡ ሐቅለ ፡ ዚፋ ። 3 ወኀደረ ፡ ሳኦል ፡ ውስተ ፡ ወግረ ፡ ኤኬላ ፡ ዘመንገለ ፡ ገጸ ፡ ኢያሴሙ ፡ ዘኀበ ፡ ፍኖት ፡ ወዳዊትሰ ፡ ይነብር ፡ ውስተ ፡ ሐቅል ፡ ወአእመረ ፡ ዳዊት ፡ ከመ ፡ መጽእ ፡ ሳኦል ፡ ይኅሥሦ ፡ ውስተ ፡ ሐቅል ። 4 ወፈነወ ፡ ዳዊት ፡ አዕይንተ ፡ ወሰምባ ፡ ከመ ፡ መጽእ ፡ ሳኦል ፡ ተደሊዎ ፡ ውስተ ፡ ቄአላ ። 5 ወተንሥአ ፡ ዳዊት ፡ ጽምሚተ ፡ ወቦአ ፡ ውስተ ፡ መካን ፡ ኀበ ፡ ይነውም ፡ ህየ ፡ ሳኦል ፡ በሌሊት ፡ ወሀሎ ፡ ህየ ፡ አቤኔር ፡ ወልደ ፡ ኔር ፡ መልአከ ፡ ኀይሉ ፡ ለሳኦል ፡ ወሳኦልሰ ፡ ይነውም ፡ ውስተ ፡ ለምጴኔ ፡ ወአሕዛቢሁኒ ፡ ተዐየኑ ፡ ዐውዶ ። 6 ወነበቦ ፡ ዳዊት ፡ ለአኪሜሌክ ፡ ኬጥያዊ ፡ ወይቤሎ ፡ ሎቱ ፡ ወለአቢሳ ፡ ወልደ ፡ ሰሮህያ ፡ እኁሁ ፡ ለኢዮአብ ፡ ወይቤሎሙ ፡ መኑ ፡ ይበውእ ፡ ምስሌየ ፡ ኀበ ፡ ሳኦል ፡ ውስተ ፡ ትዕይንት ፡ ወይቤሎ ፡ አቢሳ ፡ አነ ፡ እበውእ ፡ ምስሌከ ። 7 ወቦኡ ፡ ዳዊት ፡ ወአቢሳ ፡ ውስተ ፡ ሕዝብ ፡ በሌሊት ፡ ወሳኦልሰ ፡ ይነውም ፡ ውስተ ፡ ለምጴኔ ፡ ወኲናቱ ፡ ትክልት ፡ ውስተ ፡ ምድር ፡ መንገለ ፡ ትርኣሲሁ ፡ ወአበኔርስ ፡ ወሕዝብ ፡ ይነውሙ ፡ በውዶ ። 8 ወይቤሎ ፡ አቢሳ ፡ ለዳዊት ፡ ናሁ ፡ ዐጸዎ ፡ እግዚአብሔር ፡ ዮምኒ ፡ ለፀርከ ፡ ውስተ ፡ እዴከ ፡ ወይእዜኒ ፡ እርግዞ ፡ በኲናት ፡ ወእፀምሮ ፡ በምድር ፡ በምዕር ፡ ወኢይደግሞ ። 9 ወይቤሎ ፡ ዳዊት ፡ ለአቢሳ ፡ ኢትቅትሎ ፡ እስመ ፡ ዘአውረደ ፡ እዴሁ ፡ ላዕለ ፡ መሲሐ ፡ እግዚአብሔር ፡ ኢይነጽሕ ። 10 ወይቤሎ ፡ ዳዊት ፡ ሕያው ፡ እግዚአብሔር ፡ ከመ ፡ እመ ፡ እግዚአብሔር ፡ ኢቀተሎ ፡ ወዕለቱ ፡ ኢበጽሐት ፡ ወይሙት ፡ ወእመ ፡ እኮ ፡ ውስተ ፡ ፀብእ ፡ ይረድ ፡ ወበህየ ፡ ይሙት ። 11 ኢያምጽእ ፡ ሊተ ፡ እግዚአብሔር ፡ ከመ ፡ አውርድ ፡ እዴየ ፡ ላዕለ ፡ መሲሑ ፡ ለእግዚአብሔር ፡ ወይእዜኒ ፡ ንሣእ ፡ ኲናቶ ፡ እምነ ፡ ትርኣሲሁ ፡ ወጸፈነ ፡ ማይ ፡ ወመልዕ ፡ ንሖር ፡ ንእቱ ። 12 ወነሥአ ፡ ዳዊት ፡ ኲናቶ ፡ ወጸፈነ ፡ ማይ ፡ እምነ ፡ ትርኣሲሁ ፡ ወሖሩ ፡ ወኣተዉ ፡ ወአልቦ ፡ ዘርእዮሙ ፡ወአልቦ ፡ ዘአእመሮሙ ፡ ወአልቦ ፡ ዘእንገፎሙ ፡ እስመ ፡ ኵሎሙ ፡ ይነውሙ ፡ እስመ ፡ ድንጋፄ ፡ እምኀበ ፡ እግዚአብሔር ፡ ወድቀ ፡ ላዕሌሆሙ ። 13 ወዐደወ ፡ ዳዊት ፡ ውስተ ፡ ማዕዶት ፡ ወቆመ ፡ ውስተ ፡ ርእስ ፡ ደብር ፡ እምርኁቅ ፡ ወርኁቅ ፡ ፍኖት ፡ ማእከሎሙ ። 14 ወጸውዖሙ ፡ ዳዊት ፡ ለሕዝብ ፡ ወለአበኔር ፡ ወይቤሎሙ ፡ ኢታወሥእኑ ፡ አበኔር ፡ ወኦውሥእ ፡ አበኔር ፡ ወይቤሎ ፡ መኑ ፡ አንተ ፡ ዘትጼውዐኒ ። 15 ወይቤሎ ፡ ዳዊት ፡ ለአበኔር ፡ ኢኮንከ ፡ ብእሴ ፡ አንተሰ ፡ ወመኑ ፡ ከማከ ፡ በውስተ ፡ እስራኤል ፡ ወለምንት ፡ ኢተዐቅበ ፡ ለእግዚእከ ፡ ንጉሥ ፡ እስመ ፡ ቦኦ ፡ አሐዱ ፡ እምውስተ ፡ ሕዝብ ፡ ከመ ፡ ይቅትሎ ፡ ለእግዚእከ ፡ ንጉሥ ። 16 ወኢኮነ ፡ ሠናየ ፡ ዝንቱ ፡ ነገር ፡ ዘገበርከ ፤ ሕያው ፡ እግዚአብሔር ፡ ከመ ፡ ደቀ ፡ ሞት ፡ አንትሙ ፡ ኵልክሙ ፡ እለ ፡ ተዐቅብዎ ፡ ለንጉሥ ፡ ለእግዚእክሙ ፡ መሲሑ ፡ ለእግዚአብሔር ፤ ወይእዜኒ ፡ ኅሥሥ ፡ ኲናቶ ፡ ለንጉሥ ፡ ወጸፈነ ፡ ማይ ፡ አይቴ ፡ ሀሎ ፡ ዘኀበ ፡ ትርኣሲሁ ። 17 ወአእመረ ፡ ሳኦል ፡ ቃሎ ፡ ለዳዊት ፡ ወይቤሎ ፡ ቃልከኑ ፡ ዝንቱ ፡ ወልድየ ፡ ዳዊት ፡ ወይቤሎ ፡ ዳዊት ፡ አነ ፡ ገብርከ ፡ እግዚእየ ፡ ንጉሥ ። 18 ወይቤሎ ፡ ለምንት ፡ ከመዝ ፡ ይዴግኖ ፡ እግዚእየ ፡ ለገብሩ ፡ ወምንተ ፡ አበስኩ ፡ ዘተረክበ ፡ ሳዕሌየ ፡ ጌጋይ ። 19 ወይእዜኒ ፡ ስማዕ ፡ እግዚእየ ፡ ቃለ ፡ ገብርከ ፡ ለእመ ፡ እግዚአብሔር ፡ አምጽአከ ፡ ላዕሌየ ፡ ለይትቀበል ፡ ቍርባንከ ፡ ወእሉሰ ፡ እጓለ ፡ እመሕያው ፡ ርጉማን ፡ እሙንቱ ፡ በቅድመ ፡ እግዚአብሔር ፡ እስመ ፡ አውጽኡኒ ፡ ዮም ፡ ከመ ፡ ኢይጽናዕ ፡ ውስተ ፡ ርስተ ፡ እግዚአብሔር ፡ እንዘ ፡ ይብሉ ፡ ሖር ፡ ተቀነይ ፡ ለባዕዳን ፡ አማልክት ። 20 ወይእዜኒ ፡ ኢይደቅ ፡ ደምየ ፡ ውስተ ፡ ምድር ፡ ቅድመ ፡ ገጹ ፡ ለእግዚአብሔር ፡ እስመ ፡ ወጽአ ፡ ንጉሠ ፡ እስራኤል ፡ ይኅሥሣ ፡ ለነፍስየ ፡ ከመ ፡ ጕጓ ፡ ሶበ ፡ ይስርር ፡ ውስተ ፡ አድባር ። 21 ወይቤሎ ፡ ሳኦል ፡ አበስኩ ፤ ተመየጥ ፡ እንከሰ ፡ ወልድየ ፡ ዳዊት ፡ እስመ ፡ ኢይገብር ፡ እኩየ ፡ ላዕሌከ ፡ በከመ ፡ ከብረት ፡ ነፍስየ ፡ ቅድሜከ ፡ ዮም ፡ ውስተ ፡ አዕይንቲከ ፤ አእመርኩ ፡ እንከሰ ፡ ከመ ፡ ብዙኅ ፡ ከንቱ ፡ ዘገበርኩ ፡ ጥቀ ። 22 ወአውሥእ ፡ ዳዊት ፡ ወይቤ ፡ ናሁ ፡ ኲናቱ ፡ ለንጉሥ ፤ ለይምጻእ ፡ አሐዱ ፡ እምውስተ ፡ ደቅ ፡ ወይንሣእ ። 23 ወእግዚአብሔር ፡ እንከሰ ፡ ይፍድዮ ፡ ለለአሐዱ ፡ በከመ ፡ ጽድቁ ፡ ወበከመ ፡ ሃይማኖቱ ፡ በከመ ፡ ኦግብኦከ ፡ እግዚአብሔር ፡ ውስተ ፡ እዴየ ፡ ዮም ፡ ወኢፈቀድኩ ፡ እውርድ ፡ እዴየ ፡ ላዕለ ፡ መሲሑ ፡ ለእግዚአብሔር ። 24 ወበከመ ፡ ዐብየት ፡ ነፍስከ ፡ ቅድሜየ ፡ ዮም ፡ ከማሁ ፡ ትዕበይ ፡ ነፍስየ ፡ ቅድመ ፡ እግዚአብሔር ፡ ወይሰውረኒ ፡ ወያድኅነኒ ፡ እምኵሉ ፡ ምንዳቤ ። 25 ወይቤሎ ፡ ሳኦል ፡ ለዳዊት ፡ ቡሩክ ፡ አንተ ፡ ወልድየ ፡ ወገቢረኒ ፡ ትገብር ፡ ወክሂለኒ ፡ ትክህል ፤ ወገብአ ፡ ዳዊት ፡ ውስተ ፡ ፍኖቱ ፡ [ወሳኦልኒ ፡ ተመይጠ ፡ ውስተ ፡ መካኑ ፡]፡