መጽሐፈ ነገሥት ፩ 31

1 ወኢሎፍሊሰ ፡ ተቃተለ ፡ ምስለ ፡ እስራኤል ፡ ወጐዩ ፡ ሰብአ ፡ እስራኤል ፡ እምቅድመ ፡ ገጾሙ ፡ ለኢሎፍሊ ፡ ወቀተልዎሙ ፡ ወወድቁ ፡ በደብረ ፡ ጌላቡሄ ። 2 ወረከብዎሙ ፡ ኢሎፍሊ ፡ ለሳኦል ፡ ወለደቁ ፡ ወቅተልዎሙ ፡ ኢሎፍሊ ፡ ለዮናታን ፡ ወለአሚናዳብ ፡ ወለሜልኪስ፡ ወልደ ፡ ሳኦል ። 3 ወጸንዐ ፡ ቀትል ፡ ላዕለ ፡ ሳኦል ፡ ወረከብዎ ፡ ሰብአ ፡ ቀንጥስጤ ፡ ዕደው ፡ ነዳፍያን ፡ ወነደፍዎ ፡ ጸኮ ። 4 ወይቤሎ ፡ ሳኦል ፡ ለዘይጸውር ፡ ንዋየ ፡ ሐቅሉ ፡ ምላሕ ፡ ሰይፈከ ፡ ወርግዘኒ ፡ ቦቱ ፡ ከመ ፡ ኢይምጽኡ ፡ እሉ ፡ ቈላፋን ፡ ወኢይርግዙኒ ፡ ወኢይሳለቁ ፡ ላዕሌየ ፡ ወአበዮ ፡ ዝክቱ ፡ ዘይጸውር ፡ ንዋየ ፡ ሐቅሉ ፡ እስመ ፡ ፈርሀ ፡ ጥቅ ፡ ወነሥአ ፡ ሳኦል ፡ ሰይፎ ፡ ወተረግዘ ፡ ለሊሁ ፡ ቦቱ ። 5 ወሶበ ፡ ርእየ ፡ ዝኩ ፡ ዘይጸውር ፡ ንዋየ ፡ ሐቅሉ ፡ ከመ ፡ ሞተ ፡ ሳኦል ፡ ተረግዘ ፡ ውእቱኒ ፡ በሰይፉ ፡ ለሊሁ ፡ ወሞተ ፡ ምስሌሁ ። 6 ጠሞተ ፡ ሳኦልኒ ፡ ወ፫ደቂቁ ፡ ወዘይጸውር ፡ ንዋየ ፡ ሐቅሉ ፡ ይእተ ፡ አሚረ ፡ ኅቡረ ፡ ሞቱ ። 7 ወርእዩ ፡ ሰብአ ፡ እስራኤል ፡ እለ ፡ ውስተ ፡ ማዕዶተ ፡ ቈላ ፡ ወእለ ፡ ውስተ ፡ ማሰዶተ ፡ ዮርዳኖስ ፡ ከመ ፡ ጐዩ ፡ ሰብአ ፡ እስራኤል ፡ ወከመ ፡ ሞተ ፡ ሳኦል ፡ ወደቂቁ ፡ ወኀደጉ ፡ አህጉሪሆሙ ፡ ወጐዩ ፡ ወመጽኤ ፡ ኢሎፍሊ ፡ ወነበሩ ፡ ውስቴቱ ። 8 ወእምዝ ፡ በሳኒታ ፡ መጽኡ ፡ [ኢሎፍሊ ፡] ከመ ፡ ይስልብዎሙ ፡ ለእለ ፡ ሞቱ ፡ ወረከብዎሙ ፡ ለሳኦል ፡ ወለ[፫]ደቂቁ ፡ በኀበ ፡ ወድቁ ፡ በደብረ ፡ ጌላቡሄ ። 9 ወገፍትዕዎሙ ፡ ወሰለብዎሙ ፡ ወፈነዉ ፡ ይዜንዉ ፡ ውስተ ፡ ኢሎፍሊ ፡ ዘዐውዶሙ ፡ ወይዜንዉ ፡ ለአማልክቲሆሙ ፡ ወለአሕዛቢሆሙ ። 10 ወአንበሩ ፡ ንዋየ ፡ ሐቅሉ ፡ ውስተ ፡ አስጥርጥዮን ፡ ወበድኖሙሰ ፡ ሰቀሉ ፡ ውስተ ፡ አረፍተ ፡ ቤተ ፡ ሶም ። 11 ወሶበ ፡ ስምሁ ፡ እለ ፡ ይነብሩ ፡ ውስተ ፡ ኢያቢስ ፡ ዘገለዓድ ፡ ዘገብሩ ፡ ኢሎፍሊ ፡ ላዕለ ፡ ሳኦል ፤ 12 ተንሥኡ ፡ ኵሉ ፡ ዕደወ ፡ ኀይል ፡ ወሖሩ ፡ ኵላ ፡ ሌሊተ ፡ ወነሥኡ ፡ በድኖ ፡ ለሳኦል ፡ ወበድኖ ፡ ለዮናታን ፡ ወልዱ ፡ እምነ ፡ አረፍተ ፡ ቤተ ፡ ሶም ፡ ወአምጽእዎሙ ፡ ውስተ ፡ ኢያቢስ ፡ ወአውዐይዎሙ ፡ በህየ ። 13 ወነሥኡ ፡ አዕፅምቲሆሙ ፡ ወቅበርዎሙ ፡ መትሕት ፡ አሩራን ፡ እንተ ፡ ውስተ ፡ ኢያቢስ ፡ ወጾሙ ፡ ሰቡበ ፡ መዋዕለ ። 1 ወእምዝ ፡ እምድኅረ ፡ ሞተ ፡ ሳኦል ፡ ወዳዊትኒ ፡ አተወ ፡ እምኀበ ፡ ቅተሎሙ ፡ ለዐማሌቅ ፡ ወነበረ ፡ ዳዊት ፡ ውስተ ፡ ሴቄላቅ ፡ ሰኑየ ፡ መዋዕለ ።