መጽሐፈ ነገሥት ፩ 9

1 ወሀሎ ፡ ብእሲ ፡ አምደቂቀ ፡ ብንያም ፡ ወስሙ ፡ ቂስ ፡ ወልደ ፡ አቤሄል ፡ ወልደ ፡ አዴል ፡ ወልደ ፡ የአኪ ፡ ወልደ ፡ ሳፌቅ ፡ ወልደ ፡ ብእሲ ፡ ኢያሜንዩ ፡ ብእሲ ፡ ጽኑዕ ። 2 ወቦ ፡ ውእቱ ፡ ወልደ ፡ ወስሙ ፡ ሳኦል ፡ ወሠናይ ፡ ቆሙ ፡ ወጽኑዕ ፡ ብእሲ ፡ ወኀያል ፡ ወአልቦ ፡ ከማሁ ፡ በውስተ ፡ ኵሉ ፡ ደቂቀ ፡ እስራኤል ፡ ዘይመስሎ ፡ ቆመ ፡ ወኑኀ ፡ እምኵሉ ፡ እለ ፡ ውስተ ፡ ምድር ። 3 ወተገድፋ ፡ አእዱጊሁ ፡ ለቂስ ፡ አቡሁ ፡ ለሳኦል ፡ ወይቤሎ ፡ ቂስ ፡ ለሳኦል ፡ ወልዱ ፡ ንሣአ ፡ ምስሌከ ፡ አሐደ ፡ እምውስተ ፡ ደቅነ ፡ ወተንሥኡ ፡ ወሑሩ ፡ ወኅሡ ፡ አእዱጊነ ። 4 ወኀለፉ ፡ እንተ ፡ ደወለ ፡ ኤፍሬም ፡ ወኀለፉ ፡ እንተ ፡ ምድረ ፡ ኤኮል ፡ ወኢረከቡ ፡ ወኀለፉ ፡ እንተ ፡ ምድረ ፡ ፋስቂም ፡ ወአልቦ ፡ ወኀለፉ ፡ እንተ ፡ ምድረ ፡ ኢያሚን ፡ ወኢረከብዎሙ ። 5 ወሶበ ፡ በጽሑ ፡ ውስተ ፡ መሴፋ ፡ ይቤሎ ፡ ሳኦል ፡ ለወልድ ፡ ዘምስሌሁ ፡ ነዓ ፡ ንእቱ ፡ ዮጊ ፡ ኀደጎ ፡ ለአቡየ ፡ ትካዘ ፡ አእዱግ ፡ ወይቴክዝ ፡ ይእዜ ፡ በእንቲአነ ። 6 ወይቤሎ ፡ ውእቱ ፡ ወልድ ፡ ናሁ ፡ ብእሴ ፡ እግዚአብሔር ፡ ሀሎ ፡ ውስተ ፡ ዛቲ ፡ ሀገር ፡ ወክቡር ፡ ብእሲሁ ፡ ወኵሉ ፡ ዘነበበ ፡ ይከውን ፡ በጊዜሃ ፡ ወይእዜኒ ፡ ንሖር ፡ ህየ ፡ ከመ ፡ ያይድዐነ ፡ በአይ ፡ ፍኖት ፡ ንሖር ። 7 ወይቤሎ ፡ ሳኦል ፡ ለወልድ ፡ ዘምስሌሁ ፡ ናሁ ፡ ነሐውር ፡ ምንተ ፡ እንከ ፡ ንወስድ ፡ ለብእሴ ፡ እግዚአብሔር ፡ እስመ ፡ ኅብስትነሂ ፡ ኀልቀ ፡ እምውስተ ፡ መሳንቂነ ፡ ወአልብነ ፡ ምንተኒ ፡ ዘተርፈነ ፡ ዘንወስድ ፡ ለብእሴ ፡ እግዚአብሔር ። 8 ወይቤሎ ፡ ዳግመ ፡ ዝክቱ ፡ ወልድ ፡ ለሳኦል ፡ ናሁ ፡ ብየ ፡ ኀቤየ ፡ ራብዕተ ፡ እዴሃ ፡ ለሰቅለ ፡ ብሩር ፡ ወትሁቦ ፡ ለብእሴ ፡ እግዚአብሔር ፡ ወይነግረነ ፡ ፍኖተነ ። 9 ወቀዲሙኒ ፡ ይነግሮሙ ፡ ለኵሎሙ ፡ እስራኤል ፡ እለ ፡ ሖሩ ፡ ኀቤሁ ፡ ከመ ፡ ይስአልዎ ፡ ለእግዚአብሔር ፡ ነዓ ፡ እንከሰ ፡ ንሖር ፡ ኀበ ፡ ራእይ ፡ እስመ ፡ ራእየ ፡ ይቤልዎ ፡ ሕዝብ ፡ ለነመቢይ ፡ ትካት ። 10 ወይቤሎ ፡ ሳኦል ፡ ለወልድ ፡ ነዓ ፡ ንሖር ፤ ሠናየ ፡ ትቤ ፤ ወሖሩ ፡ ውስተ ፡ ሀገር ፡ ኀበ ፡ ሀሎ ፡ ብእሴ ፡ እግዚአብሔር ። 11 ወሶበ ፡ ዐርጉ ፡ ውስተ ፡ መዓርግ ፡ ለበዊአ ፡ ሀገር ፡ ወረከቡ ፡ እዋልደ ፡ ይወጽኣ ፡ ሐዋርያት ፡ ማይ ፡ ወይቤልዎን ፡ ቦኑ ፡ ራእይ ፡ ዝየ ። 12 ወአውሥኣሆሙ ፡ እማንቱ ፡ አዋልድ ፡ ወይቤላሆሙ ፡ እወ ፡ ቦ ፡ ወነዋ ፡ ቅድሜክሙ ፡ ሀሎ ፡ ይእዜ ፡ በበይነ ፡ ዕለት ፡ መጽአ ፡ ውስተ ፡ ሀገር ፡ እስመ ፡ መሥዋዕተ ፡ ቦሙ ፡ ለሕዝብ ፡ ዮም ፡ በባማ ። 13 ወሶበ ፡ ቦእክሙ ፡ ውስተ ፡ ሀገር ፡ ትረክብዎ ፡ በውስተ ፡ ሀገር ፡ ዘእንበለ ፡ ይዕርግ ፡ ውስተ ፡ ባማ ፡ ለበሊዕ ፡ እስመ ፡ ኢይበልዑ ፡ ሕዝብ ፡ ዘእንበለ ፡ ይባእ ፡ ውእቱ ፡ (ውስተ ፡ ሀገር ፡) እስመ ፡ ውእቱ ፡ ይባርክ ፡ መሥዋዕቶሙ ፡ ወእምድኅረ ፡ ዝንቱ ፡ ይበልዑ ፡ እንግዳሂ ፤ ወይእዜኒ ፡ ዕርጉ ፡ እስመ ፡ በበይነ ፡ ዕለት ፡ ትረክብዎ ። 14 ወዐርጉ ፡ ወሶበ ፡ ቦኡ ፡ ማእከለ ፡ ሀገር ፡ ናሁ ፡ ሳሙኤል ፡ ወፅአ ፡ ቅድሜሆሙ ፡ ከመ ፡ ይዕርግ ፡ ውስተ ፡ ባማ ። 15 ወከሠቶ ፡ እግዚአብሔር ፡ እዝኖ ፡ ለሳሙኤል ፡ እምቅድመ ፡ አሐቲ ፡ ዕለት ፡ ዘይመጽእ ፡ ሳኦል ፡ 16 ወይቤሎ ፡ ጌሠመ ፡ ዘጊዜ ፡ እፌኑ ፡ ኀቤከ ፡ ብእሴ ፡ እምነ ፡ ምድረ ፡ ብንያም ፡ ወቅብኦ ፡ ወአንግሦ ፡ ላዕለ ፡ እስራኤል ፡ ወያድኅኖሙ ፡ ለሕዝብየ ፡ እምእዴሆሙ ፡ ለኢሎፍሊ ፡ እስመ ፡ ርኢኩ ፡ ሕማሞሙ ፡ ለሕዝብየ ፡ እስመ ፡ በጽሐ ፡ ገዓሮሙ ፡ ኀቤየ ። 17 ወሶበ ፡ ርእዮ ፡ ሳሙኤል ፡ ለሳኦል ፡ ይቤሎ ፡ እግዚአብሔር ፡ ለሳሙኤል ፡ ነዋ ፡ ዝኩ ፡ ብእሲ ፡ ዘእቤለከ ፡ ናሁ ፡ ዝንቱ ፡ ይነግሥ ፡ ለሕዝብየ ። 18 ወመጽአ ፡ ሳኦል ፡ ኀበ ፡ ሳሙኤል ፡ ወይቤሎ ፡ አይድዐኒ ፡ አይቴ ፡ ቤቱ ፡ ለራእይ ። 19 ወአውሥአ ፡ ሳሙኤል ፡ ወይቤሎ ፡ አነ ፡ ውእቱ ፤ ዕርግ ፡ ምስሌየ ፡ ውስተ ፡ ባማ ፡ ወምሳሕ ፡ ምስሌየ ፡ ዮም ፡ ወእፌንወከ ፡ ጌሠመ ፡ በጽባሕ ፡ ወእነግረከ ፡ ኵሎ ፡ ዘውስተ ፡ ልብየ ። 20 ወበበይነ ፡ አእዱጊከኒ ፡ እለ ፡ ተገድፉ ፡ ሠለስቱ ፡ ኢታሕምም ፡ ልበከ ፡ እስመ ፡ ተረክቡ ፤ አኮኑ ፡ ለከ ፡ ውእቱ ፡ ኵሉ ፡ ደወሎሙ ፡ ለእስራኤል ፡ ወለቤተ ፡ አቡከ ። 21 ወተሠጥዎ ፡ ሳኦል ፡ ወይቤሎ ፡ ለምንት ፡ ትብለኒ ፡ ከመዝ ፤ እኮኑ ፡ ብእሲ ፡ ኢያሜናዊ ፡ አነ ፡ እምእንተ ፡ ትንእስ ፡ በትረ ፡ ነገዶሙ ፡ ለእስራኤል ፡ ወእምሕዝብ ፡ ዘይቴሐት ፡ እምኵሉ ፡ በትረ ፡ ብንያም ፤ ለምንት ፡ ትብለኒ ፡ ዘንተ ፡ ነገረ ። 22 ወነሥኦሙ ፡ ሳሙኤል ፡ ለሳኦል ፡ ወለወልዱ ፡ ወአዕረጎሙ ፡ ውስተ ፡ ማኅደሩ ፡ ወአርፈቆሙ ፡ ውስተ ፡ ርእሰ ፡ ምርፋቅ ፡ ኀበ ፡ ይመስሑ ፡ ፸ብእሲ ። 23 ወይቤሎ ፡ ሳሙኤል ፡ ለመበስል ፡ ሀብ ፡ ክፍለ ፡ ዘእቤለክ ፡ አንብር ፡ ሊተ ፡ ኀቤከ ። 24 ወአምጽአ ፡ ውእቱ ፡ መበስል ፡ ዝኰ ፡ ክፍለ ፡ ወአንበረ ፡ ቅድሜሁ ፡ ለሳኦል ፡ ወይቤሎ ፡ ሳሙኤል ፡ ለሳኦል ፡ ናሁ ፡ እምውስተ ፡ ዘተርፈከ ፡ እንብር ፡ ቅድሜከ ፡ ወብላዕ ፡ እስመ ፡ ለስምዕ ፡ ተሠይመ ፡ ለከ ፡ እምነ ፡ ቢጽከ ፡ ወብላዕ ፡ መብልዐ ፡ ወበልዐ ፡ ሳኦል ፡ ምስለ ፡ ሳሙኤል ፡ በይእቲ ፡ ዕለት ። 25 ወወረደ ፡ እምነ ፡ ባማ ፡ ውስተ ፡ ሀገር ፡ ወነጸፈ ፡ ሎቱ ፡ ለሳኦል ፡ ውስተ ፡ ናሕስ ፡ ወቤተ ። 26 ወሶበ ፡ ጎሐ ፡ ጸውዖ ፡ ሳሙኤል ፡ ለሳኦል ፡ እምነ ፡ ናሕስ ፡ ወይቤሎ ፡ ተንሥእ ፡ እፈኑከ ፡ ወተንሥአ ፡ ሳኦል ፡ ወወፅኡ ፡ ክልኤሆሙ ፡ ውእቱ ፡ ወሳሙኤል ፡ እስከ ፡ አፍአ ። 27 ወሶበ ፡ ወረዱ ፡ ውስተ ፡ አሐዱ ፡ ኅብረ ፡ ሀገር ፡ ወይቤሎ ፡ ሳሙኤል ፡ ለሳኦል ፡ በሎ ፡ ለወልድከ ፡ ይሑር ፡ ይቅድም ፡ እምኔነ ፡ ወአንተስ ፡ ቁም ፡ ምስሌየ ፡ ወስማዕ ፡ ቃለ ፡ እግዚአብሔር ፡ (እስመ ፡ አንተ ፡ ትነግሥ ፡ ላዕለ ፡ ሕዝበ ፡ እግዚአብሔር ፡) ።