መጽሐፈ ነገሥት ፪ 5

1 ወመጽኡ ፡ ኵሉ ፡ ሕዝበ ፡ እስራኤል ፡ ኀበ ፡ ዳዊት ፡ ውስተ ፡ ኬብሮን ፡ ወይቤልዎ ፡ ናሁ ፡ ሥጋከ ፡ ወዐፅምከ ፡ ንሕነ ። 2 ወቀዲሙኒ ፡ እንዘ ፡ ሀለወ ፡ ሳኦል ፡ ይነግሥ ፡ ለነ ፡ አንተ ፡ ክመ ፡ ዘታወፅኦሙሰ ፡ ወታበውኦሙ ፡ ለእስራኤል ፡ ወይቤለከ ፡ እግዚአብሔር ፡ አንተ ፡ ትርዕዮሙ ፡ ለሕዝብየ ፡ እስራኤል ። 3 ወመጽኡ ፡ ኵሎሙ ፡ ሊቃናተ ፡ እስራኤል ፡ ኀበ ፡ ንጉሠ ፡ ኬብሮን ፡ ወተማሐለ ፡ ምስሌሆሙ ፡ ዳዊት ፡ መሐላ ፡ በኬብሮን ፡ በቅድመ ፡ እግዚአብሔር ፡ ወቀብእዎ ፡ ለዳዊት ፡ ይንግሥ ፡ ላዕለ ፡ ኵሉ ፡ እስራኤል ። 4 ወወልደ ፡ ፴ዓመት ፡ ውእቱ ፡ ዳዊት ፡ አመ ፡ ያነግሥዎ ፡ ወ፵ዓመተ ፡ ነግሠ ። 5 ወ፯ዓመተ ፡ ወ፮አውራኀ ፡ ነግሠ ፡ በኬብሮን ፡ ላዕለ ፡ ይሁዳ ፤ ፴ወ፫ዓመተ ፡ ነግሠ ፡ ላዕለ ፡ ኵሉ ፡ እስራኤል ፡ ወላዕለ ፡ ይሁዳ ፡ በኢየሩሳሌም ። 6 ወሖረ ፡ ዳዊት ፡ ወሰብኡ ፡ ውስተ ፡ ኢየሩሳሌም ፡ ኀበ ፡ ኢያቡሴዎን ፡ እለ ፡ ይነብሩ ፡ ውስተ ፡ ይእቲ ፡ ምድር ፡ ወይቤልዎ ፡ ለዳዊት ፡ ኢትበውእ ፡ ዝየ ፡ ወተቃወምዎ ፡ ዕውራን ፡ ወስቡራን ፡ ወይቤሉ ፡ ኢትበውእ ፡ ዝየ ፡ ዳዊት ። 7 ወአስተጋብአ ፡ ዳዊት ፡ ቅጽራ ፡ ለጽዮን ፡ እንተ ፡ ይእቲ ፡ ሀገረ ፡ ዳዊት ። 8 ወይቤ ፡ ዳዊት ፡ ይእተ ፡ አሚረ ፡ ኵሎ ፡ ዘይቀትሎሙ ፡ ለኢያቡሴዎን ፡ ለይርግዞሙ ፡ በኵናት ፡ ለዕውራን ፡ ወለስቡራን ፡ ወለእለ ፡ ይጻልእዋ ፡ ለነፍሰ ፡ ዳዊት ፡ ወበበይነ ፡ ዝንቱ ፡ ይቤሉ ፡ ዕውራን ፡ ወስቡራን ፡ ኢይባኡ ፡ ቤት ፡ እግዚአብሔር ። 9 ወነበረ ፡ ዳዊት ፡ ውስተ ፡ ቅጽር ፡ ወተሰምየት ፡ ይእቲ ፡ ሀገረ ፡ ዳዊት ፡ ወነደቀ ፡ ሀገረ ፡ እንተ ፡ ዐውዱ ፡ እምጽንፋ ፡ ወቤቶሂ ። 10 ወሖረ ፡ ዳዊት ፡ እንዘ ፡ የሐውር ፡ ወየዐቢ ፡ ወእግዚአብሔር ፡ ዘኵሎ ፡ ይመልክ ፡ ሀለወ ፡ ምስሌሁ ። 11 ወፈነወ ፡ ኪራም ፡ ንጉሠ ፡ ጢሮስ ፡ ሐዋርያተ ፡ ኀበ ፡ ዳዊት ፡ ወዕፀወ ፡ አርዝ ፡ ወጸረብተ ፡ ዕፅ ፡ ወወቀርተ ፡ እብን ፡ ወሐነጸ ፡ ቤተ ፡ ለዳዊት ። 12 ወአእመረ ፡ ዳዊት ፡ ከመ ፡ አስትዳለዎ ፡ እግዚአብሔር ፡ ይንግሥ ፡ ላዕለ ፡ እስራኤል ፡ ወከመ ፡ አልዐላ ፡ ለመንግሥቱ ፡ በእንተ ፡ ሕዝቡ ፡ እስራኤል ። 13 ወነሥአ ፡ ዳዊት ፡ ዓዲ ፡ እንስት ፡ ዕቁባት ፡ እምነ ፡ ኢየሩሳሌም ፡ ወእምድኅረ ፡ መጽአ ፡ ውስተ ፡ ኬብሮን ፡ ወእምዝ ፡ ትወልዱ ፡ ለዳዊት ፡ ዓዲ ፡ ደቂቅ ፡ ወአዋልድ ። 14 ወዝንቱ ፡ ውእቱ ፡ አስማቲሆሙ ፡ ለእለ ፡ ተወልዱ ፡ ሎቱ ፡ በኢየሩሳሌም ፡ ሶሙስ ፡ ወሰባብ ፡ ወናታን ፡ ወሰሎሞን ፤ 15 ወኢየቤሖር ፡ ወኢሊሱስ ፡ ወናፌቅ ፡ ወኢያፌሳ ፤ 16 ወኤልሶሚ ፡ ወኢያጴዳሔ ፡ ወኤሊፊት ፡ ወሶሜዔ ፡ ወኢየሰበቄ ፡ ወናታን ፡ ወገለማሔን ፡ ወኢየብሖር ፡ ወትሔሱስ ፡ ወኢለፋሌድ ፡ ወናጌድ ፡ ወናፌቅ ፡ ወእነትሕልያ ፡ ወሳሚስ ፡ ወበዓሊ ፡ ወቦተ ፡ ወኢሊፋለት ። 17 ወሰምዑ ፡ ኢሎፍሊ ፡ ከመ ፡ ቀብእዎ ፡ ለዳዊት ፡ ወአንገሥዎ ፡ ላዕለ ፡ እስራኤል ፡ ወዐርጉ ፡ ኵሎሙ ፡ ኢሎፍሊ ፡ ይኀሥሥዎ ፡ ለዳዊት ፡ ወወረደ ፡ ውስተ ፡ ቅጽር ። 18 ወበጽሑ ፡ ኢሎፍሊ ፡ ወወረዱ ፡ ውስተ ፡ ቈላተ ፡ ጢጣኖስ ። 19 ወተስእለ ፡ ዳዊት ፡ ቃለ ፡ እግዚአብሔር ፡ ወይቤ ፡ እዕርግኑ ፡ ኀበ ፡ ኢሎፍሊ ፡ ወታገብኦሙ ፡ ውስተ ፡ እዴየ ፡ ወይቤሎ ፡ እግዚአብሔር ፡ ለዳዊት ፡ ዕርግ ፡ ወአግብኦ ፡ ኣገብኦሙ ፡ ውስተ ፡ እዴከ ፡ ለኢሎፍሊ ። 20 ወመጽኦሙ ፡ ዳዊት ፡ እምነ ፡ መልዕልተ ፡ ምቅታል ፡ ወቀተሎሙ ፡ ለኢሎፍሊ ፡ በህየ ፡ ወይቤ ፡ ዳዊት ፡ ቀተሎሙ ፡ እግዚአብሔር ፡ ለፀርየ ፡ ለኢሎፍሊ ፡ በቅድሜየ ፡ ከመ ፡ ክዕወተ ፡ ማይ ፡ ወበበይነ ፡ ዝንቱ ፡ ተሰምየ ፡ ስሙ ፡ ለውእቱ ፡ መካን ፡ መልዕልተ ፡ ምቅታል ። 21 ወኀደጉ ፡ በህየ ፡ አማልክቲሆሙ ፡ ወነሥኦሙ ፡ ዳዊት ፡ ወሰብእ ፡ እለ ፡ ምስሌሁ ። 22 ወደገሙ ፡ ዓዲ ፡ ኢሎፍሊ ፡ ዐሪገ ፡ ወወረዱ ፡ ውስተ ፡ ቄላተ ፡ ጢጣኖስ ። 23 ወተስእለ ፡ ዳዊት ፡ ቃለ ፡ እግዚአብሔር ፡ ወይቤሎ ፡ እግዚአብሔር ፡ ዕርግ ፡ ተቀበሎሙ ፡ ወጕየይ ፡ እምኔሆሙ ፡ እስከ ፡ ይበጽሑ ፡ በገቦሁ ፡ ለቀለውትሞኖስ ። 24 ይእት ፡ ጊዜ ፡ ረድ ፡ ላዕሌሆሙ ፡ እስመ ፡ ይወፅእ ፡ እግዚአብሔር ፡ ይእተ ፡ ጊዜ ፡ ቅድሜከ ፡ ከመ ፡ ይቅትሎሙ ፡ ለኢሎፍሊ ፡ በውስተ ፡ ቀትል ። 25 ወገብረ ፡ ዳዊት ፡ በከመ ፡ አዘዞ ፡ እግዚአብሔር ፡ ወቀተሎሙ ፡ ለኢሎፍሊ ፡ እምነ ፡ ገባኦን ፡ እስከ ፡ ምድረ ፡ ጌሴራ ።