መጽሐፈ ነገሥት ፫ 20

1 ወነገራ ፡ አካአብ ፡ ለኤልዛቤል ፡ ብአሲቱ ፡ ኵሎ ፡ ዘገብረ ፡ ኤልያስ ፡ ወዘከመ ፡ ቀተሎሙ ፡ ለነቢያተ ፡ ኀፍረት ። 2 ወለአከት ፡ ኤልዛቤል ፡ ኀበ ፡ ኤልያስ ፡ ወትቤሎ ፡ እመ ፡ አኮአ ፡ አንተአ ፡ ኤልያስአ ፡ ወእመ ፡ አኮአ ፡ አነአ ፡ ኤልዝቤልአ ፡ ከመዝአ ፡ ለይረስየኒ ፡ እግዚአብሔር ፡ ወከመዝአ ፡ ለይቅትለኒአ ፡ ከመአ ፡ ጌስምኣ ፡ ዘጊዜአ ፡ እሬስያአ ፡ ለነፍስከአ ፡ ከመ ፡ ነፍሰአ ፡ አሐዱአ ፡ እምኔሆሙ ። 3 ወፈርሀ ፡ ኤልያስ ፡ ወተንሥአ ፡ ወአምሰጠ ፡ በነፍሱ ፡ ወበጽሑ ፡ ውስተ ፡ ቤርሳቤሕ ፡ ውስተ ፡ ምድረ ፡ ይሁዳ ፡ ወኀደጎ ፡ ለቍልዔሁ ፡ ህየ ። 4 ወሖረ ፡ ውእቱ ፡ ውስተ ፡ ፍኖተ ፡ በድው ፡ ዕለተ ፡ ወበጺሖ ፡ [ነበረ ፡] ታሕተ ፡ ዕፀ ፡ ተርሜን ፡ ወሰአለ ፡ ትሙት ፡ ነፍሱ ፡ ወይቤ ፡ ኮንየ ፡ እንከሰ ፡ እምይእዜሰ ፡ ነፍስየ ፡ እግዚኦ ፡ ንሣእ ፡ እስመ ፡ ኢይኄይስ ፡ አነ ፡ እምነ ፡ አበውየ ። 5 ወእምዝ ፡ ሰከበ ፡ ወኖመ ፡ ህየ ፡ ታሕተ ፡ ዕፅ ፡ ወቦ ፡ ዘመጽአ ፡ ወገሰሶ ፡ ወይቤሎ ፡ ተንሥእ ፡ ወብላዕ ። 6 ወእምዝ ፡ ተንሥአ ፡ ኤልያስ ፡ ወረከበ ፡ ትርኣሲሁ ፡ ኅብስተ ፡ ጻፍንታ ፡ ወጸራይቀ ፡ ወግምዔ ፡ ማይ ፡ ወተንሥአ ፡ ወበልዐ ፡ ወሰትየ ፡ ወገብአ ፡ ወሰከበ ። 7 ወመጽአ ፡ መልአከ ፡ እግዚአብሔር ፡ ዳግመ ፡ ወገሰሶ ፡ ወይቤሎ ፡ ተንሥአ ፡ ወብላዕ ፡ እስመ ፡ ርኁቅ ፡ ውእቱ ፡ ፍኖትከ ። 8 ወተንሥአ ፡ ወበልዐ ፡ ወሰትየ ፡ ወሖረ ፡ በኀይለ ፡ ውእቱ ፡ እክል ፡ ዘበልዐ ፡ ፵ዕለተ ፡ ወ፵ሌሊተ ፡ እስከ ፡ ደብረ ፡ ኮሬብ ። 9 ወቦአ ፡ ህየ ፡ ውስተ ፡ በአት ፡ ወኀደረ ፡ ህየ ፡ ወመጽአ ፡ ቃለ ፡ እግዚአብሔር ፡ ኀቤሁ ፡ ወይቤሎ ፡ ምንተ ፡ መጻእከ ፡ ዝየ ፡ ኤልያስ ። 10 ወይቤሎ ፡ ቀኒአ ፡ ቀናእኩ ፡ ለእግዚአብሔር ፡ ዘኵሎ ፡ ይመልክ ፡ እስመ ፡ ኀደጉከ ፡ ደቂቀ ፡ እስራኤል ፡ ምሥዋዒከኒ ፡ ነሠቱ ፡ ወቀተሉ ፡ ነቢያቲከኒ ፡ በኲናት ፡ ወተረፍኩ ፡ አነ ፡ ባሕቲትየ ፡ ወየሐሥሥዋ ፡ ለነፍስየ ። 11 ወይቤሎ ፡ ፃእ ፡ ጌሰመ ፡ ወቁም ፡ ቅድመ ፡ እግዚአብሔር ፡ ውስተ ፡ ደብር ፡ ወየኀልፍ ፡ እግዚአብሔር ፤ ወይመጽእ ፡ ነፋስ ፡ ዐቢይ ፡ ወጽኑዕ ፡ ስ ፡ ዘይፈትሕ ፡ አድባረ ፡ ወይፌትቶ ፡ ለኰኵሕ ፡ ቅድመ ፡ እግዚአብሔር ፡ ወኢሀለወ ፡ እግዚአብሔር ፡ ውስተ ፡ ውእቱ ፡ ነፋስ ፡ ወእምድኅረ ፡ ውእቱ ፡ ነፋስ ፡ ይመጽእ ፡ ድልቅልቅ ፡ ወኢሀለወ ፡ እግዚአብሔር ፡ ውስተ ፡ ውእቱ ፡ ድልቅልቅ ። 12 ወእምድኅረ ፡ ውእቱ ፡ ድልቅልቅ ፡ ይመጽእ ፡ እሳት ፡ ወኢሀለወ ፡ እግዚአብሔር ፡ ውስተ ፡ ውእቱ ፡ እሳት ፡ ወእምድኅረ ፡ እሳት ፡ ይመጽእ ፡ ቃለ ፡ ቀጢን ፡ ከመ ፡ ዘይትፋጸይ ፡ ወህየ ፡ ሀለወ ፡ እግዚአብሔር ። 13 ወሶበ ፡ ሰምዐ ፡ ኤልያስ ፡ ከደነ ፡ ገጾ ፡ በሐሜላቱ ፡ ወእምዝ ፡ ወፅአ ፡ ወቆመ ፡ ታሕተ ፡ በአት ፡ ወመጽአ ፡ ቃል ፡ ኀቤሁ ፡ ወይቤሎ ፡ ምንተ ፡ መጻእከ ፡ ዝየ ፡ ኤልያስ ። 14 ወይቤ ፡ ቀኒአ ፡ ቀናእኩ ፡ ለእግዚአብሔር ፡ ዘኵሎ ፡ ይመልክ ፡ እስመ ፡ ኀደጉ ፡ ሕገከ ፡ ደቂቀ ፡ እስራኤል ፡ ወነሠቱ ፡ ምሥዋዒከኒ ፡ ወቀተሉ ፡ ነቢያቲከኒ ፡ በኲናት ፡ ወተረፍኩ ፡ አነ ፡ ባሕቲትየ ፡ ወየኀሥሥዋ ፡ ለነፍስየ ፡ ይንሥእዋ ። 15 ወይቤሎ ፡ እግዚአብሔር ፡ ግባእ ፡ ውስተ ፡ ፍኖትከ ፡ ወተኀልፍ ፡ እንተ ፡ ፍኖተ ፡ በድው ፡ በደማስቆ ፡ ወበጺሐከ ፡ ቀብኦ ፡ ለአዛሔል ፡ ይንግሥ ፡ ለሶርያ ። 16 ወለወልደ ፡ ኢዩ ፡ ወልደ ፡ ናሜሶ ፡ ቅብኦ ፡ ይንግሥ ፡ ለእስራኤል ፡ ወለኤልሳዕ ፡ ወልደ ፡ ሳፍጥ ፡ ዘእምነ ፡ አቤሌሜሁላ ፡ ቅብኦ ፡ ይኩን ፡ ነቢየ ፡ ህየንቴከ ። 17 ወዘአምሰጠ ፡ እምነ ፡ ኲናተ ፡ አዛሔል ፡ ይቅትሎ ፡ ኢዩ ፡ ወዘአምሰጠ ፡ እምነ ፡ ኲናተ ፡ ኢዩ ፡ ይቅትሎ ፡ ኤልሳዕ ። 18 ወታተርፍ ፡ ፸፻ብእሴ ፡ ኵሎ ፡ እለ ፡ ኢሰገዲ ፡ ለበዐል ፡ ወኵሉ ፡ አፍ ፡ ዘኢያመልኮ ። 19 ወሖረ ፡ ህየ ፡ ወረከቦ ፡ ለኤልሳዕ ፡ ወልደ ፡ ሳፍጥ ፡ እንዘ ፡ የሐርሱ ፡ ቅድሜሁ ፡ ፲ወ፪አልህምት ፡ ወውእቱ ፡ ላዕለ ፡ ኵሎሙ ፡ ወሖረ ፡ ወገደፈ ፡ ላዕሌሁ ፡ ሐሜላቶ ። 20 ወኀደገ ፡ ኤልሳዕ ፡ ጽምደ ፡ አልህምት ፡ ወሖረ ፡ ወተለዎ ፡ ለኤልያስ ፡ ወይቤሎ ፡ ኣፈቅረከ ፡ አቡየ ፡ ወእተሉ ፡ ድኅሬከ ፡ ወይቤሎ ፡ ኤልያስ ፡ ግባእ ፡ እስመ ፡ ወዓልየ ፡ ረሰይኩከ ። 21 ወገብአ ፡ እምኀበ ፡ ይተልዎ ፡ ወነሥአ ፡ ጽምደ ፡ አልህምቲሁ ፡ ወጠብሐ ፡ ወአብሰለ ፡ በጽህራት ፡ ዘአልህምተ ፡ ወአቅረበ ፡ ለሕዝብ ፡ ወበልዑ ፡ ወሖረ ፡ ወተለዎ ፡ ለኤልያስ ፡ ወኮኖ ፡ ወዓሌሁ ።