መጽሐፈ ነገሥት ፬ 6

1 ወይቤልዎ ፡ ደቂቀ ፡ ነቢያት ፡ ለኤልሳዕ ፡ ናሁ ፡ ዝንቱ ፡ ማኅደርነ ፡ ኀበ ፡ ነኀድር ፡ ቅድሚከ ፡ ይጸብበነ ። 2 ንሖርኑ ፡ መንገለ ፡ ዮርዳኖስ ፡ ወንግዝም ፡ ለነ ፡ ፩ሠርዌ ፡ እምህየ ፡ ወንግበር ፡ ለነ ፡ ማኅደረዖ ፡ ህየ ፡ ኀበ ፡ ነኀድር ፡ ወይቤሎሙ ፡ ሖሩ ። 3 ወይቤሎ ፡ ፩እምውስቴቶሙ ፡ ነዓ ፡ አንተ ፡ ምስለ ፡ አግብርቲከ ፡ ወይቤሎ ፡ አሆ ፡ እመጽእ ፡ እነኒ ። 4 ወሖረ ፡ ምስሌሆሙ ፡ ወበጽሑ ፡ ተከዜ ፡ ዮርዳኖስ ፡ ወገዘሙ ፡ ዕፀወ ። 5 ወ፩እንዘ ፡ ይገዝም ፡ ሠርዌ ፡ ተነጽለ ፡ ማኅፄሁ ፡ ወወድቀ ፡ ውስተ ፡ ማይ ፡ ወአኀዘ ፡ ርእሶ ፡ ወጸርኀ ፡ ወይቤ ፡ እግዚኦ ፡ ወዝንቱኒ ፡ ሕቡይ ፡ ውእቱ ። 6 ወይቤሎ ፡ ብእሴ ፡ እግዚአብሔር ፡ አይቴ ፡ ወድቀ ፡ ወአርአዮ ፡ ኀበ ፡ ወድቀ ፡ ወነቀፈ ፡ ቅርፍተ ፡ ዕፅ ፡ ወወገረ ፡ ህየ ፡ ወጸለለ ፡ ዝክቱ ፡ ኀጺን ፡ ማኅጼ ። 7 ወይቤ ፡ ንሣእ ፡ ናሁ ፡ ንዋየከ ፡ ወአውረደ ፡ እዴሁ ፡ ወነሥኦ ። 8 ወጸብኦሙ ፡ ንጉሠ ፡ ሶርያ ፡ ለእስራኤል ፡ ወተማከረ ፡ ምስለ ፡ ደቁ ፡ ወይቤሎሙ ፡ ብሔረ ፡ ፌልሞን ፡ ነኀድር ። 9 ወለአከ ፡ ኤልሳዕ ፡ ኀበ ፡ ንጉሠ ፡ እስራኤል ፡ እንዘ ፡ ይብል ፡ ዑቅአ ፡ ኢትሖርአ ፡ ውስተአ ፡ ብሔርአ ፡ እስመአ ፡ ሀለዉአ ፡ ህየአ ፡ ሶርያአ ፡ ተኀብኡአ ። 10 ወለአከ ፡ ንጉሠ ፡ እስራኤል ፡ ይዕቀቡ ፡ ሎቱ ፡ ውእተ ፡ ብሔረ ፡ ኀበ ፡ ይቤሎ ፡ ኤልሳዕ ፡ ምዕረ ፡ ወካዕበ ። 11 ወረሐፀት ፡ ነፍሱ ፡ ለንጉሠ ፡ ሶርያ ፡ እንበይነ ፡ ዝንቱ ፡ ነገር ፡ ወጸውዖሙ ፡ ለደቁ ፡ ወይቤሎሙ ፡ ኢታየድዑኒኑ ፡ መኑ ፡ ይነግሮ ፡ ለንጉሠ ፡ እስራኤል ። 12 ወይቤሎ ፡ ፩እምውስተ ፡ ደቁ ፡ አኮኑ ፡ እግዚኦ ፡ ኤልሳዕ ፡ ነቢይ ፡ በውስተ ፡ እስራኤል ፡ ውእቱ ፡ ይነግሮ ፡ ለንጉሠ ፡ እስራኤል ፡ ኵሎ ፡ ቃለከ ፡ ወኵሎ ፡ ዘተናገርከ ፡ በውስተ ፡ ጽርሐ ፡ ቤትከ ። 13 ወይቤሎሙ ፡ ሖሩ ፡ አእሞሩ ፡ ኀበ ፡ ሀለወ ፡ ወእፈኑ ፡ ያምጽእዎ ፡ ወይቤልዎ ፡ ውስተ ፡ ዶታይን ። 14 ወፈነወ ፡ ህየ ፡ አፍራሰ ፡ ወሰረገላተ ፡ ወሰራዊተ ፡ ወበጽሑ ፡ ህየ ፡ ሌሊተ ፡ ወዐገትዋ ፡ ለይእቲ ፡ ሀገር ። 15 ወነቅሀ ፡ ቍልዔሁ ፡ ለኤልሳዕ ፡ ወተንሥአ ፡ ወወፅአ ፡ ወርእየ ፡ ሰራዊት ፡ የዐግትዋ ፡ ለሀገር ፡ አፍራስ ፡ ወሰረገላት ፡ ወይቤሎ ፡ ቍልዔሁ ፡ እግዚኦ ፡ ምንተ ፡ ንግበር ። 16 ወይቤሎ ፡ ኤልሳዕ ፡ ኢትፍራህ ፤ ይበዝኁ ፡ እለ ፡ ሀለዉ ፡ ምስሌነ ፡ እምኔሆሙ ። 17 ወጸለየ ፡ ኤልሳዕ ፡ ወይቤ ፡ እግዚኦ ፡ ክሥት ፡ አዕይንቲሁ ፡ ለዝ ፡ ወልድ ፡ ወይርአይ ፡ ወከሠቶ ፡ እግዚአብሔር ፡ አዕይንቲሁ ፡ ወርእየ ፡ ኵለንታሁ ፡ ደብረ ፡ አፍራስ ፡ ወሰረገላተ ፡ እሳት ፡ ሐጸሮ ፡ ላዕለ ፡ ኤልሳዕ ። 18 ወወረዱ ፡ ኀበ ፡ ኤልሳዕ ፡ ወጸለየ ፡ ኤልሳዕ ፡ ኀበ ፡ እግዚአብሔር ፡ ወይቤ ፡ እግዚኦ ፡ አዑሮሙ ፡ ለዝንቱ ፡ ሕዝብ ፡ ወአዖሮሙ ፡ በከመ ፡ ይቤ ፡ ኤልሳዕ ። 19 ወይቤሎሙ ፡ ኤልሳዕ ፡ አኮ ፡ ዝየ ፡ ሀገሩ ፡ ወአኮ ፡ ዝየ ፡ ፍኖቱ ፡ ንዑ ፡ ትልዉኒ ፡ ኀበ ፡ ውእቱ ፡ ብእሲ ፡ ዘተኀሥሡ ፡ አነ ፡ እወስደክሙ ፡ ወነሥኦሙ ፡ ወወሰዶሙ ፡ ሀገረ ፡ ሰማርያ ። 20 ወይቤ ፡ ኤልሳዕ ፡ ክሥቶሙ ፡ እግዚኦ ፡ አዕይንቲሆሙ ፡ ወይርአዩ ፡ ወከሠቶሙ ፡ አዕይንቲሆሙ ፡ ወርእዩ ፡ ወአእመሩ ፡ ከመ ፡ ማእከለ ፡ ሰማርያ ፡ ሀለዉ ። 21 ወይቤሎ ፡ ንጉሠ ፡ እስራኤል ፡ ለኤልሳዕ ፡ ሶበ ፡ ርእዮሙ ፡ እቅትሎሙኑ ፡ እባእ ። 22 ወይቤሎ ፡ ኢትቅትሎሙ ፡ ዘአኮ ፡ በኲናትከ ፡ ፄወውኮሙ ፡ ወዘአኮ ፡ በቀስትከ ፤ አላ ፡ በኲናትከ ፡ ወበቀስትከ ፡ ዘፄወውከ ፡ ኪያሆሙ ፡ ትቀትል ፤ ወአቅርብ ፡ ሎሙ ፡ እክለ ፡ ወማየ ፡ ቅድሜሆሙ ፡ ወይብልዑ ፡ ወይስተዩ ፡ ወይእተዉ ፡ ኀበ ፡ እግዚእሙ ። 23 ወአቅረበ ፡ ሎሙ ፡ ብዘመነ ፡ ወበልዑ ፡ ወሰትዩ ፡ ወፈነዎሙ ፡ ወአተዉ ፡ ኀበ ፡ እግዚኦሙ ፡ ወኢደገሙ ፡ እንከ ፡ ሶርያ ፡ ጸቢኦቶሙ ፡ ለብሔረ ፡ እስራኤል ። 24 ወእምዝ ፡ አስተጋብአ ፡ ወልደ ፡ አዴር ፡ ንጉሠ ፡ ሶርያ ፡ ኵሎ ፡ ተዓይኒሁ ፡ ወሖረ ፡ ወዐገታ ፡ ለሰማርያ ፡ ወነበረ ፡ ህየ ። 25 ወኮነ ፡ ዐቢይ ፡ ረኃብ ፡ ውስተ ፡ ሰማርያ ፡ ወነበሩ ፡ ሶርያ ፡ ላዕሌሆሙ ፡ እስከ ፡ ኮነ ፡ ርእሰ ፡ አድግ ፡ ፶ሰቅለ ፡ ብሩር ፡ ወራብዕተ ፡ እዴሃ ፡ ለመስፈርተ ፡ ቃቡ ፡ ኵስሐ ፡ ርግብ ፡ በ፶ሰቅለ ፡ ብሩር ። 26 ወንጉሠ ፡ እስራኤል ፡ እንዘ ፡ ያንሶሱ ፡ ውስተ ፡ ናሕስ ፡ ወሐወጸ ፡ እንተ ፡ ተድባብ ፡ ወጸርኀት ፡ አሐቲ ፡ ብእሲት ፡ ወትቤሎ ፡ አድኅን ፡ እግዚኦ ፡ ንጉሠ ፡ እስራኤል ። 27 ወይቤላ ፡ ኢያድኅነኪ ፡ እግዚአብሔር ፡ እምአይቴኑ ፡ ኣድኅነኪ ፡ እምነ ፡ ምክያደ ፡ ወይንኑ ፡ ወአው ፡ እምነ ፡ ዐጸደ ፡ እክልኑ ። 28 ወይቤላ ፡ ንጉሥ ፡ ምንተ ፡ ኮንኪ ፡ ወትቤሎ ፡ ትቤለኒ ፡ ዛቲ ፡ ብእሲት ፡ አምጽኢዮ ፡ ለወልድኪ ፡ ንብልዖ ፡ ዮም ። 29 ወአብሰልናሁ ፡ ለወልድየ ፡ ወበላዕናሁ ፡ ወእምዝ ፡ እቤላ ፡ በሳኒታ ፡ አምጽኢዩ ፡ ለወልድኪኒ ፡ ንብልዖ ፡ ወኀብአቶ ፡ ለወልዳ ። 30 ወሶበ ፡ ሰምዐ ፡ ንጉሥ ፡ በከመ ፡ ትቤሎ ፡ ይእቲ ፡ ብእሲት ፡ ሠጠጠ ፡ አልባሲሁ ፡ እንዘ ፡ የሐውር ፡ ውስተ ፡ ናሕስ ፡ መንገለ ፡ ተድባብ ፡ ወርእዩ ፡ ሕዝብ ፡ ሠቀ ፡ ዘይለብስ ፡ ንጉሥ ፡ ውስተ ፡ ሥጋሁ ፡ ውስጠ ። 31 ወይቤ ፡ ከመዝ ፡ ለይረስየኒ ፡ እግዚአብሔር ፡ ወከመዝ ፡ ለይቅትለኒ ፡ እመ ፡ ቤተ ፡ ርእሱ ፡ ለኤልሳዕ ፡ ውስተ ፡ ክሳዱ ፡ ዮም ። 32 ወኤልሳዕሰ ፡ ሀሎ ፡ ይነብር ፡ ውስተ ፡ ቤቱ ፡ ወሊቃውንት ፡ ይነብሩ ፡ ምስሌሁ ፡ ወፈነወ ፡ ንጉሥ ፡ ፩ብእሴ ፡ እምውስተ ፡ እለ ፡ ይቀውሙ ፡ ቅድሜሁ ፡ ወእንበለ ፡ ይብጻሕ ፡ ዝክቱ ፡ ዘለአከ ፡ ንጉሥ ፡ ኀቤሁ ፡ ወይቤሎሙ ፡ ኤልሳዕ ፡ ለሊቃናት ፡ ሶበ ፡ ታአምሩ ፡ ከመ ፡ ፈነወ ፡ ወልደ ፡ ቀታሊ ፡ ከመ ፡ ይምትሩ ፡ ርእስየ ፡ ዑቁ ፡ እምከመ ፡ በጽሐ ፡ ዕጽዉ ፡ ኆኅተ ፡ ወቀትሩ ፡ ወኅድግዎ ፡ ይቁም ፡ ኀበ ፡ ኆኅት ፡ እስመ ፡ ድምፀ ፡ እገሪሁ ፡ ለእግዚኤ ፡ ድኅሬሁ ። 33 ወእንዘ ፡ ይትናገር ፡ ምስሌሆሙ ፡ በጽሐ ፡ ዘለአከ ፡ ንጉሥ ፡ ወወረደ ፡ ኀቤሁ ፡ ወይቤ ፡ ኤልሳዕ ፡ ናሁ ፡ ዛቲ ፡ እኪት ፡ እምኀበ ፡ እግዚአብሔር ፡ መጽአተኒ ፡ ወምንት ፡ እንከ ፡ እጸንሖ ፡ ለእግዚአብሔር ።