ጥበበ ሲራክ 12

1 እመ ፡ ትገብር ፡ ሠናየ ፡ አእምር ፡ ለዘትገብር ፤ በዘትረክብ ፡ ዕሴተ ፡ ሠናይትከ ። 2 ግበር ፡ ለጻድቅ ፡ ወትረክብ ፡ ዕሴተክ ፤ ወእመ ፡ ኢረከብከ ፡ በኀቤሁ ፡ ትረክብ ፡ በኀበ ፡ ፈጣሪሁ ። 3 አልቦ ፡ ሠናይት ፡ በኀበ ፡ ዘይትጌበራ ፡ ለእኪት ፤ ወበኀበ ፡ ዘኢይገብር ፡ ምጽዋተ ። 4 ሀብ ፡ ለጻድቅ ፡ ከመ ፡ ኢይንሣእ ፡ ኃጥእ ። 5 አሠኒ ፡ ለነዳይ ፡ ወኢተሀብ ፡ ለእኩይ ፤ ወአፅርዕ ፡ እክለከ ፡ ከመ ፡ ኢይንሣእ ፡ ውእቱ ፤ ከመ ፡ ኢይማእከ ፡ በንዋይከ ፤ እስመ ፡ ካዕበተ ፡ ትረክባ ፡ ለእኪት ፡ በኀቤሁ ፤ ዕሴተ ፡ ኵሉ ፡ ሠናይት ፡ እንተ ፡ ገበርከ ፡ ሎቱ ። 6 እስመ ፡ እግዚአብሔር ፡ ጸልኦሙ ፡ ለኃጥኣን ፤ ወይትቤቀሎሙ ፡ ለእኩያን ። 7 ሀብ ፡ ለጸድቅ ፡ እምተሀብ ፡ ለኃጥእ ። 8 ኢያምሥጥከ ፡ ዐርክከ ፡ አመ ፡ ትፍሥሕትከ ፤ ወኢይትኀባእከ ፡ ጸላኢከ ፡ አመ ፡ ምንዳቤከ ። 9 ትፍሥሕትከ ፡ ያቈስሎሙ ፡ ለጸላእትከ ፤ ወተጽናስከ ፡ ይሰዶሙ ፡ ለአዕርክቲከ ። 10 ኢትትአመኖ ፡ ለጸላኢከ ፡ ለዝሉፉ ፤ እስመ ፡ ከመ ፡ ዛሕለ ፡ ብርት ፡ እከየ ፡ ልቡ ። 11 ወእመኒ ፡ ትጼነስ ፡ ይፀመደከ ፡ እንዘ ፡ ኢይንእደከ ፤ አጽንዓ ፡ ለነፍስከ ፡ ወተዐቀቦ ፤ ወትከውኖ ፡ ከመ ፡ መጽሔት ፡ ዝሕልት ፤ ወኢይክለከ ፡ ለዝሉፉ ። 12 ወኢታቅሞ ፡ መንገሌከ ፤ ከመ ፡ ኢይጕዳእከ ፡ ወኢይቁም ፡ ውስተ ፡ መካንከ ፤ ወኢታንብሮ ፡ መንገለ ፡ የማንከ ፤ ከመ ፡ ኢይንሣእከ ፡ ሢመተከ ፤ ወበደኃሪት ፡ ሀለወከ ፡ ታእምሮ ፡ ለቃልየ ፤ ወትዜከሮ ፡ ለተግሣጽየ ። 13 መኑ ፡ ያስተምሕሮ ፡ ለአርዌ ፡ ምድር ፤ ወለኵሉ ፡ አርዌ ፡ እኩይ ፤ 14 ከማሁ ፡ ለዘየሐውርኒ ፡ ምስለ ፡ ብእሲ ፡ ኃጥእ ፤ ወይዴመር ፡ ምስለ ፤ ኀጢአቱ ። 15 እንተ ፡ ምዕር ፡ ይቀውም ፡ ምስሌከ ፤ ወእስከ ፡ ትትመየጥ ፡ (ኢትሬእዮ ፡ እንከ ፡ ወ)ኢይትዔገሥ ፡ ምስሴከ ። 16 በከናፍሪሁሰ ፡ ያስተጥዕም ፡ ለከ ፡ (ቃሎ ፡) ጸላኢከ ፤ ወበልቡ ፡ ይመክር ፡ ውስተ ፡ ግብ ፤ ያውድቀ ፤ ወዐይኖሂ ፡ ያነብዕ ፡ ለከ ፡ ጸላኢከ ፤ ወእምከመ ፡ አስሐተከ ፡ ኢይጸግብ ፡ እምደምከ ። 17 ወእመኒ ፡ ተመንደብከ ፡ ቀዳሜ ፡ ኵሉ ፡ ትረክቦ ፡ ቅድመ ፡ ገጽከ ፤ ወከመ ፡ ዘይረድአከ ፡ ያቴሕት ፡ ርእሶ ፡ ታሕተ ፡ ሰኰናከ ፤ 18 ወይጠፍሕ ፡ በእደዊሁ ፡ ወየሐውስ ፡ ርእሶ ፤ ወእምዝ ፡ ይመይጥ ፡ ገጾ ፡ ወይትቄጸበከ ።