ጥበበ ሲራክ 37

1 ኵሉ ፡ ዘተዓረኮ ፡ ይብል ፡ ተዓረኩ ፡ አነኒ ፤ ባሕቱ ፡ ቦቱ ፡ ዐርከ ፡ ለስም ፡ በከ ፡ ዘይትዓረክ ። 2 ወሐዘንሰ ፡ ይነብር ፡ (ውስተ ፡ ልብ ፡) እስከ ፡ አመ ፡ ዕለተ ፡ ሞት ፤ (ወቦ ፡) ዐርክ ፡ ዘይከውነከ ፡ ጸላኤ ። 3 እኪት ፡ ፍትወት ፡ እምአይቴኑ ፡ አንኰርኰርኪ ፤ ወመላእኪ ፡ ውስተ ፡ ብሔር ፡ ኀጢአተ ። 4 ወቦ ፡ ዐርክ ፡ ዘይቀርበከ ፡ አመ ፡ ትፍሥሕትከ ፤ ወእምከመ ፡ ተመንደብከ ፡ ውእቱ ፡ ይከውነከ ፡ ፀረከ ። 5 ወቦ ፡ ዐርክ ፡ ዘእንበይነ ፡ ከርሠ ፡ ይቴክዝ ፡ ለከ ፡ ሕማመከ ፤ ወእምከመርቦ ፡ ዘዐለወከ ፡ ውእቱ ፡ ይቀድም ፡ ይትቃተለከ ። 6 ኢትርሳዕ ፡ ዐርከከ ፡ እምከመ ፡ ተደሎከ ፤ ወኢትኅድጎ ፡ ለእምከመ ፡ ንዋየ ፡ ረከብከ ። 7 ኵሉ ፡ መምክር ፡ ያመክር ፡ ምክረ ፤ ወቦ ፡ ዘያመክር ፡ ዘይበቍዕ ፡ ለርእሱ ። 8 ዕቀብ ፡ ልበከ ፡ እምነ ፡ ዘያመክረከ ፤ ቅድም ፡ አእምር ፡ ትካዞ ፡ በዘይፈቅደከ ፤ እስመ ፡ እንበይነ ፡ ርእሱ ፡ ያመክረከ ፤ 9 ወይብለከ ፡ ሠናየ ፡ ገበርከ ፤ ወያመጽእ ፡ ለከ ፡ በዘ ፡ ያሀጕለከ ፡ ንዋየከ ፤ ወእምከመ ፡ ተጸነስከ ፡ ይኔጽረከ ፡ ወይሥሕቅ ፡ ላዕሌከ ። 10 ኢትትማከር ፡ ምስለ ፡ ዘይትዐቀበከ ፤ ወኅባእ ፡ ቃለከ ፡ እምነ ፡ ዘይትኃሠሠከ ። 11 ኢትትናገር ፡ ምስለ ፡ ብእሲት ፡ በዘታቀንኣ ፤ ወኢትትማከር ፡ ምስለ ፡ ፈራህ ፡ እንበይነ ፡ ፀብእ ፤ ኢትትማከር ፡ እንበይነ ፡ ረባሕ ፡ ምስለ ፡ ሠያጢ ፤ ወኢትትማከር ፡ ምስለ ፡ ነጋዲ ፡ እንበይነ ፡ ተግባር ፤ ወኢትትማከር ፡ ምስለ ፡ ደንጻዊ ፡ ለውሂበ ፡ ምጽዋት ፤ ወኢትትማከር ፡ ምስለ ፡ ዐላዊ ፡ ለአግብኦ ፡ ዕሴት ፤ ወኢትትማከር ፡ ምስለ ፡ ሀካይ ፡ በእንተ ፡ ግብር ፤ ወኢትትማከር ፡ ምስለ ፡ ዐሳብ ፡ እንበይነ ፡ ጥብዖት ፤ ወኢትትማከር ፡ ምስለ ፡ አብድ ፡ እንበይነ ፡ ኪን ፤ (ቅኒ ፡ ነባሬከ ፤ ወኢታንብሮ ፡ ፅሩዐ ፤) ወምስለዝ ፡ ኵሉ ፡ አልቦ ፡ ዘትትማከሮሙ ፡ እንበይነ ፡ ዝነገር ፡ 12 ምስለ ፤ ብእሲ ፤ ጻድቅ ፡ ዘልፈ ፡ ተናገር ፡ ምክረከ ፤ ዘታአምር ፡ ከመቦ ፡ ሃይማናተ ፡ ወይፈርህ ፡ እግዚአብሔር ፤ ዘከመ ፡ ልብከ ፡ ልቡ ፤ ወእመኒ ፡ ተከዝከ ፡ የሐምም ፡ ሕማመከ ። 13 ወአቅም ፡ ምክረ ፡ ነፍስከ ፤ እስመ ፡ ይእቲ ፡ እምኵሉ ፡ ምእመንከ ። 14 እስመ ፡ ነፍሱ ፡ ለሰብእ ፡ እንተ ፡ ትረክቦ ፡ ታሐዝቦ ፤ ፈድፋደ ፡ እምነ ፡ ፯ቱ ፡ አስባብ ፡ ሰብአ ፡ ዐይን ። 15 ምስለ ፡ ዝንቱ ፡ ኵሉ ፡ ጸሊ ፡ ኀበ ፡ ልዑል ፤ ከመ ፡ ያርትዓ ፡ በንጹሕ ፡ (በጽድቅ ፡) ለፍኖትክ ። 16 ቀዳሜ ፡ ኵሉ ፡ ትክዝ ፡ ነገር ፤ ወቀዳሜ ፡ ኵሉ ፡ ግብር ፡ ምክር ። 17 አሠረ ፡ ልቡ ፡ ለብእሲ ፡ መርብዕተ ፡ ያስተርኢ ፡ 18 ለእመሂ ፡ ለሐዘን ፡ ወለእመኒ ፡ ለትፍሥሕት ፤ እመኒ ፡ ለሞት ፡ ወእመኒ ፡ ለሕይወት ፤ ወልሳን ፡ ያመጽኦሙ ፡ ለኵሎሙ ። 19 ወቦ ፡ ሰብእ ፡ ዘበኵሉ ፡ ይትሜየን ፡ ወብዙኀ ፡ ያአምር ፤ ወኢይክል ፡ በቍዖታ ፡ ለነፍሱ ። 20 ወቦ ፡ ዘይጠብብ ፡ በነገር ፡ ወያጸልእ ፡ ርእሶ ፤ ወለዘ ፡ ከመዝ ፡ የኀልፎ ፡ ኵሉ ፡ ረባሕ ። 21 እስመ ፡ ኢይሁቦ ፡ [እግዚአብሔር ፡] ሞገሰ ፤ ወወጽአ ፡ እምኵሉ ፡ ጥበብ ። 22 ሀሎ ፡ ዘይጠብብ ፡ ለነፍሱ ፡ ወይዬውህ ፡ በቃሉ ። 23 ብእሲ ፡ ጠቢብ ፡ ይጌሥጾሙ ፡ ለሕዝቡ ፤ ወይሜህሮሙ ፡ ጥበበ ፡ ለሰብኡ ። 24 ብእሲ ፡ ጠቢብ ፡ ይጸግብ ፡ እምበረከቱ ፤ ወያስተበፅዕዎ ፡ ኵሎሙ ፡ እለ ፡ ይሬእይዎ ። 25 መዋዕሊሁ ፡ ለእጓለ ፡ እመሕያው ፡ በኈልቅ ፤ ወመዋዕሊሆሙ ፡ ለእስራኤል ፡ ዘኢይትኌለቍ ። 26 ዘጠበበ ፡ በሕዝቡ ፡ ይረክብ ፡ ዕሴቶ ፤ ወይነብር ፡ ስሙ ፡ ለዝላፉ ። 27 ወልድየ ፡ እንዘ ፡ ሕያው ፡ አንተ ፡ ልአመክራ ፡ ለነፍስከ ፤ አእምር ፡ ዘይብእሳ ፡ ወኢተሀባ ። 28 እስመ ፡ አኮ ፡ ኵሉ ፡ ዘይደልዋ ፤ ወአኮ ፡ ኵሉ ፡ ዘታስተአድም ፡ ኵሉ ፡ ነፍስ ። 29 ወኢትሠሥዕ ፡ ለኵሉ ፡ መብልዕ ፤ ወኢተሐሢ ፡ ለኵሉ ፡ እክል ፡ ዘርኢክ ። 30 እስመ ፡ ያደዊ ፡ ብዙኀ ፡ በሊዕ ፤ ወያበዝኖ ፡ ለገብጥ ፡ ሥሥዕት ። 31 ወብዙኃን ፡ እለ ፡ ቀተሎሙ ፡ ሥሥዕት ፤ ወዘሰ ፡ በዐቅሙ ፡ ይበልዕ ፡ ጥዑይ ፡ ነፍሱ ።