ጥበበ ሲራክ 49

1 ዝክሩ ፡ ለኢዮስያስ ፡ ሠናይ ፡ ዝክረ ፡ ጥበብ ፤ ከመ ፡ ዕፍረት ፡ ዘቅድው ፡ መዐዛሁ ፤ ወጥዑም ፡ ከመ ፡ መዓር ፡ ውስተ ፡ ኵሉ ፡ አፍ ፤ ወከመ ፡ ማሕሌት ፡ ውስተ ፡ ስታይ ። 2 ወውእቱ ፡ ረትዐ ፡ ወሜጦሙ ፡ ለሕዝብ ፤ ወአእተተ ፡ ኵሎ ፡ ኀጢአተ ፡ ርኵስ ። 3 ወአርትዐ ፡ ልቦ ፡ ኀበ ፡ እግዚአብሔር ፤ ወበመዋዕለ ፡ ኃጥኣን ፡ አጽንዓ ፡ ለጽድቅ ፤ 4 ዳዊት ፡ ዳእሙ ፡ ወሕዝቅያስ ፡ ወኢዮስያስ ፤ ወኵሎሙ ፡ እልክቱሰ ፡ አበሱ ፡ ወጌገዬ ፤ ወኀደጉ ፡ ሕጎ ፡ ለልዑል ፤ ወኀልቁ ፡ ነገሥተ ፡ ይሁዳ ። 5 እስመ ፡ አግብኡ ፡ ቀርኖሙ ፡ ለበዕድ ፤ ወክብሮሙኒ ፡ ለካልእ ፡ ሕዝብ ። 6 ወአውዐይዋ ፡ ለሀገር ፡ ኅሪት ፡ ወቅድስት ፤ ወአጥፍኡ ፡ ፍናዊሃ ፡ በእደ ፡ ኤርምያስ ። 7 እስመ ፡ ሣቀይዎ ፤ ወውእቱሰ ፡ እምከርሠ ፡ እሙ ፡ ተቀደሰ ፡ ይኩን ፡ ነቢየ ፤ ከመ ፡ ይሠሩ ፡ ወከመ ፡ ያጥፍእ ፤ ወከማሁ ፡ ከመ ፡ ይትክል ፡ ወከመ ፡ ይሕንጽ ። 8 ወሕዝቅኤልኒ ፡ ዘርእየ ፡ ርእየተ ፡ ስብሐቲሁ ፤ ወርእዮ ፡ ላዕለ ፡ ሰረገላ ፡ ዘኪሩቤል ። 9 ወዘከሮሙ ፤ በመዐት ፡ ለፀር ፤ ወበሠናይ ፡ አርትዐ ፡ ፍናዎሙ ፡ ለጻድቃን ። 10 ወሠረጸ ፡ አዕጽምቲሆሙ ፡ ለዐሠርቱ ፡ ወክልኤቱ ፡ ነቢያት ፡ በመካኖሙ ። ወአስተፍሥሖ ፡ ለያዕቆብ ፤ ወቤዘዎሙ ፡ በሃይማኖተ ፡ ተስፋሆሙ ። 11 እፎኑ ፡ እንጋ ፡ ናዐብዮ ፡ ለዘሩባቤል ፤ ወውእቱሰ ፡ ከመ ፡ ሕልቀተ ፡ ማዕተብ ፡ ውስተ ፡ እደ ፡ የማን ፤ 12 ወኢዮሴዕኒ ፡ ወልደ ፡ ዮሴዴቅ ፤ እለ ፡ ሐነጹ ፡ ቤተ ፡ በመዋዕሊሆሙ ፤ ወአዕበይዎ ፡ [ለሕዝበ ፡] እግዚአብሔር ፤ ዘድልው ፡ ለክብር ፡ ዘለዓለም ። 13 ወለነሐምያን ፡ ብዙኅ ፡ ዝክሩ ፤ [ዘ]አንሥአ ፡ ለነ ፡ አረፍተ ፡ ውድቅተ ፤ ወአቀመ ፡ ኆኅተ ፡ ወገብረ ፡ መናሥግተ ፤ ወሐነጸ ፡ ለነ ፡ አብያቲነ ። 14 ወአልቦ ፡ ዘተፈጥረ ፡ ውስተ ፡ ምድር ፡ ዘከመ ፡ ሄኖክ ፤ ወሎቱኒ ፡ ነሥእዎ ፡ እምነ ፡ ብሔር ። 15 ወኢተወልደ ፡ ሰብእ ፡ ዘከመ ፡ ዮሴፍ ፤ መልአከ ፡ ኮነ ፡ ለአኅዊሁ ፤ ወኀይለ ፡ ኮነ ፡ ለሕዝቡ ፤ ወሣህለ ፡ ረከበ ፡ ለአዕፅምቲሁ ። 16 ሴም ፡ ወሴት ፡ ከብሩ ፡ እምእጓለ ፡ እመሕያው ፤ ወአዳምኒ ፡ እምኵሉ ፡ ሕያው ፡ ዘተፈጥረ ።