መጽሐፈ ኩፋሌ 1

መጽሐፈ ፡ ኩፋሌ ። ዝንቱ ፡ ነገረ ፡ ኩፋሌ ፡ መዋዕላተ ፡ ሕግ ፡ ወለስምዕ ፡ ለግብረ ፡ ዓመታት ፡ ለተሳብዖቶሙ ፡ ለኢዮቤልውሳቲሆሙ ፡ ውስተ ፡ ኵሉ ፡ ዓመታተ ፡ ዓለም ፡ በከመ ፡ ተናገሮ ፡ ለሙሴ ፡ በደብረ ፡ ሲና ፡ አመ ፡ ዐርገ ፡ ይንሣእ ፡ ጽላተ ፡ እብን ፡ ሕግ ፡ ወትእዛዝ ፡ በቃለ ፡ እግዚአብሔር ፡ በከመ ፡ ይቤሎ ፡ ይዕርግ ፡ ውስተ ፡ ርእሰ ፡ ደብር ። 1 1 ወኮነ ፡ በቀዳሚ ፡ ዓመት ፡ በፀአቶሙ ፡ ለደቂቀ ፡ እስራኤል ፡ እምነ ፡ ግብጽ ፡ በወርኅ ፡ ሣልስ ፡ አመ ፡ ዐሡሩ ፡ ወሰዱሱ ፡ ለውእቱ ፡ ወርኅ ፡ ተናገሮ ፡ እግዚአብሔር ፡ ለሙሴ ፡ እንዘ ፡ ይብል ፡ ዕርግ ፡ ኀቤየ ፡ ውስተ ፡ ደብር ፡ ወእሁበከ ፡ ክልኤ ፡ ጽላተ ፡ እብን ፡ ዘሕግ ፡ ወዘትእዛዝ ፡ ዘመጠነ ፡ ጸሐፍኩ ፡ ታለብዎሙ ። 2 ወዐርገ ፡ ሙሴ ፡ ውስተ ፡ ደብረ ፡ እግዚአብሔር ፡ ወኀደረ ፡ ስብሐተ ፡ እግዚአብሔር ፡ ውስተ ፡ ደብረ ፡ ሲና ፡ ወጸለሎ ፡ ደመና ፡ ሰዱሰ ፡ ዕለተ ። 3 ወጸውዖ ፡ ለሙሴ ፡ በዕለተ ፡ ሳብዕት ፡ በማእከለ ፡ ደመና ፡ ወርእየ ፡ ስብሐተ ፡ እግዚአብሔር ፡ ከመ ፡ እሳት ፡ ዘይነድድ ፡ ውስተ ፡ ርእሰ ፡ ደብር ። 4 ወሀሎ ፡ ሙሴ ፡ ውስተ ፡ ደብር ፡ አርብዓ ፡ ዕለተ ፡ ወአርብዓ ፡ ሌሊተ ። ወአመሮ ፡ እግዚአብሔር ፡ ዘቀዳሚ ፡ ወዘኒ ፡ ይመጽእ ፡ ነገሮ ፡ ኩፋሌ ፡ ኵሉ ፡ መዋዕላት ። ወለሕግ ፡ ወለስምዕ ፡ 5 ወይቤሎ ፡ አንብር ፡ ልበከ ፡ ውስተ ፡ ኵሉ ፡ ነገር ፡ ዘአነ ፡ እነግረከ ፡ በዝንቱ ፡ ደብር ፡ ወጸሐፍ ፡ ውስተ ፡ መጽሐፍ ፡ ከመ ፡ ይርአዩ ፡ ትውልዶሙ ፡ ከመ ፡ ኢኀደግዎሙ ፡ በእንተ ፡ ኵሉ ፡ እኩይ ፡ ዘገብሩ ፡ ለአስሕቶ ፡ ሥርዓት ፡ ዘአነ ፡ እሠርዕ ፡ ማእከሌየ ፡ ወማእከሌከ ፡ ዮም ፡ ለትውልዶሙ ፡ በደብረ ፡ ሲና ። 6 ወይከውን ፡ ከመዝ ፡ አመ ፡ ይመጽእ ፡ ኵሉ ፡ ዝነገር ፡ ላዕሌሆሙ ፡ ወያአምሩ ፡ ከመ ፡ ጸደቁ ፡ እምኔሆሙ ፡ በኵሉ ፡ ፍትሖሙ ፡ ወበኵሉ ፡ ምግባሮሙ ፡ ወያአምሩ ፡ ከመ ፡ ህልወ ፡ ኮንኩ ፡ ምስሌሆሙ ። 7 ወአንተኒ ፡ ጸሐፍ ፡ ለከ ፡ ኵሎ ፡ ዘቃለ ፡ ዘአነ ፡ አየድዐከ ፡ ዮም ፡ እስመ ፡ አአምር ፡ ምረቶሙ ፡ ወክሳዶሙ ፡ ይቡሰ ፡ ዘእንበለ ፡ አብኦሙ ፡ ውስተ ፡ ምድር ፡ እንተ ፡ መሐልኩ ፡ ለአብርሃም ፡ ወለይስሐቅ ፡ ወለያዕቆብ ፡ እንዘ ፡ እብል ፡ ለዘርእክሙ ፡ እሁብ ፡ ምድረ ፡ እንተ ፡ ትውሕዝ ፡ ሐሊበ ፡ ወመዓረ ። ወይበልዑ ፡ ወይጸግቡ ፡ 8 ወይትመየጡ ፡ ኀበ ፡ አምላክ ፡ ነኪር ፡ ኀበ ፡ እለ ፡ ኢያድኅንዎሙ ፡ እምኵሉ ፡ ምንዳቤሆሙ ። ወትስማዕ ፡ ዛቲ ፡ ስምዕ ፡ ለስምዕ ፡ 9 እስመ ፡ ይረስዑ ፡ ኵሎ ፡ ትእዛዝየ ፡ ኵሎ ፡ ዘአነ ፡ እኤዝዞሙ ፡ ወየሐውሩ ፡ ድኅረ ፡ አሕዛብ ፡ ወድኅረ ፡ ርኵሶሙ ፡ ወድኅረ ፡ ኀሳሮሙ ፡ ወይትቀነዩ ፡ ለአማልክቲሆሙ ፡ ወይከውንዎሙ ፡ ማዕቀፈ ፡ ወለምንዳቤ ፡ ወለፃዕር ፡ ወለመሥገርት ፡ 10 ወይትሐጐሉ ፡ ብዙኃን ፡ ወይትአኀዙ ፡ ወይወድቁ ፡ ውስተ ፡ እደ ፡ ፀር ፡ እስመ ፡ ኀደጉ ፡ ሥርዓትየ ፡ ወትእዛዝየ ፡ ወበዓላተ ፡ ኪዳንየ ፡ ወሰንበታትየ ፡ ወቅድሳትየ ፡ ዘቀደስኩ ፡ ሊተ ፡ በማእከሎሙ ። ወደብተራየ ፡ ወመቅደስየ ፡ ዘቀደስኩ ፡ ሊተ ፡ በማእከለ ፡ ምድር ፡ ከመ ፡ እሢም ፡ ስምየ ፡ ላዕሌሁ ፡ ወይኅድር ። 11 ወገብሩ ፡ ሎሙ ፡ ፍሥሐታተ ፡ ወኦመ ፡ ወግልፎ ፡ ወሰገዱ ፡ ዘዘ ፡ ዚአሆሙ ፡ ለስሒት ፡ ወይዘብሑ ፡ ውሉዶሙ ፡ ለአጋንንት ፡ ወለኵሉ ፡ ግብረ ፡ ስሕተተ ፡ ልቦሙ ። 12 ወእፌኑ ፡ ኀቤሆሙ ፡ ሰማዕተ ፡ ከመ ፡ አስምዕ ፡ ሎሙ ፡ ወኢይሰምዑ ፡ ወሰማዕተኒ ፡ ይቀትሉ ፡ ወለእለሂ ፡ የኀሥሡ ፡ ሕገ ፡ ይሰደድዎሙ ፡ ወኵሎ ፡ ያፀርዑ ፡ ወይዌጥኑ ፡ ለገቢረ ፡ እኩይ ፡ በቅድመ ፡ አዕይንትየ ፡ 13 ወአኀብእ ፡ ገጽየ ፡ እምኔሆሙ ፡ ወእሜጥዎሙ ፡ ውስተ ፡ እደ ፡ አሕዛብ ፡ ለፂዋዌ ፡ ወለሕብል ፡ ወለተበልዖ ። ወአሴስሎሙ ፡ እማእከለ ፡ ምድር ፡ ወእዘርዎሙ ፡ ማእከለ ፡ አሕዛብ ፡ 14 ወይረስዑ ፡ ኵሎ ፡ ሕግየ ፡ ወኵሎ ፡ ትእዛዝየ ፡ ወኵሎ ፡ ፍትሕየ ፡ ወይስሕቱ ፡ ሠርቀ ፡ ወሰንበተ ፡ ወበዓለ ፡ ወኢዮቤለ ፡ ወሥርዓተ ። 15 ወእምዝ ፡ ይትመየጡ ፡ ኀቤየ ፡ እማእከለ ፡ አሕዛብ ፡ በኵሉ ፡ ልቦሙ ፡ ወበኵሉ ፡ ነፍሶሙ ፡ ወበኵሉ ፡ ኀይሎሙ ፡ ወአስተጋብኦሙ ፡ እማእከለ ፡ ኵሉ ፡ አሕዛብ ፡ ወየኀሥሡኒ ፡ ከመ ፡ እትራከቦሙ ፡ ሶበ ፡ ኀሠሡኒ ፡ በኵሉ ፡ ልቦሙ ፡ ወበኵሉ ፡ ነፍሶሙ ፡ ወእከሥት ፡ ሎሙ ፡ ብዙኀ ፡ ሰላመ ፡ በጽድቅ ፡ 16 ወአፈልሶሙ ፡ ተክለ ፡ ርትዕ ፡ በኵሉ ፡ ልብየ ፡ ወበኵሉ ፡ ነፍስየ ፡ ወይከውኑ ፡ ለበረከት ፡ ወአኮ ፡ ለመርገም ፡ ወይከውኑ ፡ ርእሰ ፡ ወአኮ ፡ ዘነበ ። 17 ወአሐንጽ ፡ መቅደስየ ፡ ማእከሎሙ ፡ ወአኀድር ፡ ምስሌሆሙ ፡ ወእከውኖሙ ፡ አምላከ ፡ ወእሙንቱኒ ፡ ይከውኑኒ ፡ ሕዝብየ ፡ ዘበአማን ፡ ወዘበጽድቅ ፡ 18 ወኢየኀድጎሙ ፡ ወኢይትናከሮሙ ፡ እስመ ፡ አነ ፡ እግዚአብሔር ፡ አምላኮሙ ። 19 ወወድቀ ፡ ሙሴ ፡ በገጹ ፡ ወጸለየ ፡ ወይቤ ፡ እግዚኦ ፡ አምላኪየ ፡ ኢትኅድግ ፡ ሕዝበከ ፡ ወርስተከ ፡ ለሐዊር ፡ በስሕተተ ፡ ልቦሙ ፡ ወኢትመጥዎሙ ፡ ውስተ ፡ እደ ፡ አሕዛብ ፡ ከመ ፡ ይኰንንዎሙ ፡ ወከመ ፡ ኢይግበርዎሙ ፡ ከመ ፡ ይኅጥኡ ፡ ለከ ። 20 ይትለዐል ፡ እግዚኦ ፡ ምሕረትከ ፡ ላዕለ ፡ ሕዝብከ ፡ ወፍጥር ፡ ሎሙ ፡ መንፈሰ ፡ ርቱዐ ፡ ወኢይኰንኖሙ ፡ መንፈሰ ፡ ቤልሖር ፡ ለአስተዋድዮቶሙ ፡ ቅድሜከ ፡ ወለአዕቅጾቶሙ ፡ እምኵሉ ፡ ፍኖተ ፡ ጽድቅ ፡ ከመ ፡ ይትሐጐሉ ፡ እምቅድመ ፡ ገጽከ ። 21 ወእሙንቱ ፡ ሕዝብከ ፡ ወርስትከ ፡ ዘባላሕከ ፡ በኀይልከ ፡ ዐቢይ ፡ እምእደ ፡ ግብጽ ። ፍጥር ፡ ሎሙ ፡ ልበ ፡ ንጹሐ ፡ ወመንፈሰ ፡ ቅዱሰ ፡ ወኢይትዐቀጹ ፡ በኃጢአቶሙ ፡ እምይእዜ ፡ ወእስከ ፡ ለዓለም ። 22 ወይቤሎ ፡ እግዚአብሔር ፡ ለሙሴ ፡ አነ ፡ አአምር ፡ ተዋሥኦቶሙ ፡ ወኅሊናሆሙ ፡ ወይቡሰ ፡ ክሳዶሙ ፡ ወኢይሰምዑ ፡ እስከ ፡ ሶበ ፡ ያአምሩ ፡ ኃጢአቶሙ ፡ ወኃጣውአ ፡ አበዊሆሙ ። 23 ወእምድኅረ ፡ ዝንቱ ፡ ይትመየጡ ፡ ኀቤየ ፡ በኵሉ ፡ ርትዕ ፡ ወበኵሉ ፡ ልብ ፡ ወበኵሉ ፡ ነፍስ ። ወአወቂ ፡ ቍልፈተ ፡ ልቦሙ ፡ ወቍልፈተ ፡ ልበ ፡ ዘርኦሙ ፡ ወእፈጥር ፡ ሎሙ ፡ መንፈሰ ፡ ቅዱሰ ፡ ወአነጽሖሙ ፡ ከመ ፡ ኢይትመየጡ ፡ እምድኅሬየ ፡ እምይእቲ ፡ ዕለት ፡ እስከ ፡ ለዓለም ፡ 24 ወትተሉ ፡ ነፍሶሙ ፡ ኀቤየ ፡ ወበኵሉ ፡ ትእዛዝየ ፡ ወይገብሩ ፡ ሎሙ ፡ ትእዛዛትየ ፡ ወእከውኖሙ ፡ አበ ፡ ወእሙንቱ ፡ ይከውኑኒ ፡ ውሉደ ። 25 ወይሰመዩ ፡ ኵሎሙ ፡ ውሉደ ፡ አምላክ ፡ ሕያው ፡ ወየአምሮሙ ፡ ኵሉ ፡ መልአክ ፡ ወኵሉ ፡ መንፈስ ፡ ወያአምርዎሙ ፡ ከመ ፡ እሙንቱ ፡ ውሉድየ ፡ ወአነ ፡ አቡሆሙ ፡ በርትዕ ፡ ወበጽድቅ ፡ ወአፈቅሮሙ ። 26 ወአንተ ፡ ጸሐፍ ፡ ለከ ፡ ኵሎ ፡ ዘንተ ፡ ነገረ ፡ ዘአነ ፡ አየድዐከ ፡ በዝንቱ ፡ ደብር ፡ ዘቀዳሚ ፡ ወዘደኃሪ ፡ ወዘይመጽእ ፡ ሀሎ ፡ በኵሉ ፡ ኩፋሌ ፡ መዋዕል ፡ ዘበሕግ ፡ ወዘበስምዕ ፡ ወበሱባዔሆሙ ፡ ለኢዮቤልዎን ፡ እስከ ፡ ለዓለም ። እስከ ፡ ሶበ ፡ እወርድ ፡ ወአኀድር ፡ ምስሌሆሙ ፡ በኵሉ ፡ ዓለመ ፡ ዓለም ። 27 ወይቤሎ ፡ ለመልአከ ፡ ገጽ ፡ ጸሐፍ ፡ ለሙሴ ፡ እምቀዳሚ ፡ ፍጥረት ፡ እስከ ፡ አመ ፡ ይትሐነጽ ፡ መቅደስየ ፡ በማእከሎሙ ፡ ለዓለመ ፡ ዓለማት ። 28 ወያስተርኢ ፡ እግዚአብሔር ፡ ለዐይነ ፡ ኵሉ ፡ ወያአምር ፡ ኵሉ ፡ ከመ ፡ አነ ፡ አምላከ ፡ እስራኤል ፡ ወአብ ፡ ለኵሎሙ ፡ ደቂቀ ፡ ያዕቆብ ፡ ወንጉሥ ፡ በደብረ ፡ ጽዮን ፡ ለዓለመ ፡ ዓለም ፡ ወትከውን ፡ ጽዮን ፡ ወኢየሩሳሌም ፡ ቅድስት ። 29 ወነሥአ ፡ መልአከ ፡ ገጽ ፡ ዘየሐውር ፡ ቅድመ ፡ ተዓይኒሆሙ ፡ ለእስራኤል ፡ ጽላተ ፡ ዘኩፋሌ ፡ ዓመታት ፡ እምአመ ፡ ፍጥረተ ፡ ሕግ ፡ ወለስምዕ ፡ ለሱባዔሁ ፡ ለኢዮቤልዎን ፡ በበ ፡ ዓመት ፡ በኵሉ ፡ ኆልቆሙ ፡ ወኢዮቤልዎን ፡ እምዕለተ ፡ ፍጥረት ፡ ሐዳስ ፡ አመ ፡ ይትሐደስ ፡ ሰማያት ፡ ወምድር ፡ ወኵሉ ፡ ፍጥረቶሙ ፡ በከመ ፡ ኀይላቲሆሙ ፡ ለሰማይ ፡ ወበከመ ፡ ኵሉ ፡ ፍጥረተ ፡ ምድር ፡ እስከ ፡ አመ ፡ ይትፈጠር ፡ መቅደሰ ፡ እግዚአብሔር ፡ በኢየሩሳሌም ፡ በደብረ ፡ ጽዮን ። ወኵሉ ፡ ብርሃናት ፡ ይትሔደሱ ፡ ለፈውስ ፡ ወለሰላም ፡ ወለበረከት ፡ ለኵሎሙ ፡ ኅሩያነ ፡ እስራኤል ፡ ወከመ ፡ ይኩን ፡ ከማሁ ፡ እምይእቲ ፡ ዕለት ፡ ወእስከ ፡ ኵሉ ፡ መዋዕለ ፡ ምድር ።