መጽሐፈ ኩፋሌ 2

2 1 ወይቤ ፡ መልአከ ፡ ገጽ ፡ ለሙሴ ፡ በቃለ ፡ እግዚአብሔር ፡ እንዘ ፡ ይብል ፡ ጸሐፍ ፡ ኵሎ ፡ ነገረ ፡ ፍጥረት ፡ ከመ ፡ በሰዱስ ፡ ዕለት ፡ ፈጸመ ፡ እግዚአብሔር ፡ አምላክ ፡ ኵሎ ፡ ግብሮ ፡ ወኵሎ ፡ ዘፈጠረ ፡ ወአሰንበተ ፡ በዕለተ ፡ ሳብዕት ፡ ወቀደሳ ፡ ለኵሉ ፡ ዓለማት ፡ ወአንበራ ፡ ትእምርተ ፡ ለኵሉ ፡ ግብሩ ። 2 እስመ ፡ በዕለት ፡ ቀዳሚት ፡ ፈጠረ ፡ ሰማያተ ፡ እለ ፡ መልዕልት ፡ ወምድረ ፡ ወማያተ ፡ ወኵሉ ፡ መንፈስ ፡ ዘይትለአክ ፡ ቅድሜሁ ፡ ወመላእክተ ፡ ገጽኒ ፡ ወመላእክተ ፡ ቅዳሴ ፡ ወመላእክተ ፡ መንፈሰ ፡ እሳት ፡ ወመላእክተ ፡ መንፈሰ ፡ እስትንፋስ ፡ ወመላእክተ ፡ መንፈሰ ፡ ደመናት ፡ ለጽልመት ፡ ወለኵሉ ፡ ወለበረድ ፡ ወለአስሐትያ ፡ ወመላእክተ ፡ ቃላት ፡ ወነጐድጓዳት ፡ ወለመባርቅት ፡ ወመላእክተ ፡ መናፍስት ፡ ለቍር ፡ ወለመርቄ ፡ ወለክረምት ፡ ወለመጸው ፡ ወለማእረር ፡ ወለሐጋይ ፡ ወለኵሉ ፡ መናፍስተ ፡ ተግባሩ ፡ ዘበሰማያት ፡ ወዘበምድር ፡ ወዘበኵሉ ፡ ቀላያት ፡ ወጽልመት ፡ ወብርሃን ፡ ወጎሕ ፡ ወምሴት ፡ ዘአስተዳለወ ፡ በአእምሮ ፡ ልቡ ። 3 ወአሜሃ ፡ ርኢነ ፡ ምግባሮ ፡ ወባረክናሁ ፡ ወሰባሕነ ፡ ቅድሜሁ ፡ በእንተ ፡ ኵሉ ፡ ምግባሩ ፡ እስመ ፡ ሰብዓተ ፡ ግብረ ፡ ዐበይተ ፡ ገብረ ፡ በቀዳሚት ፡ ዕለት ። 4 ወበዕለተ ፡ ሳኒታ ፡ ገብረ ፡ ምጽናዓተ ፡ ማእከለ ፡ ማይ ፡ ወተከፍለ ፡ ማያት ፡ በይእቲ ፡ ዕለት ፡ መንፈቆሙ ፡ ዐርጉ ፡ ላዕለ ፡ ወመንፈቆሙ ፡ ወረዱ ፡ መትሕተ ፡ ምጽናዓት ፡ ማእከለ ፡ ዲበ ፡ ገጻ ፡ ለኵላ ፡ ምድር ፡ ወዘንተ ፡ ባሕቲቶ ፡ ግብረ ፡ ገብረ ፡ በሳኒታ ፡ ዕለት ። 5 ወበሣልስት ፡ ዕለት ፡ ገብረ ፡ በከመ ፡ ይቤ ፡ ለማያት ፡ ይኅልፉ ፡ እምቅድመ ፡ ገጻ ፡ ለኵላ ፡ ምድር ፡ ውስተ ፡ መካን ፡ አሐዱ ፡ ወያስተርኢ ፡ የብስ ። 6 ወገብሩ ፡ ከማሁ ፡ ማያት ፡ በከመ ፡ ይቤሎሙ ፡ ወተግሕሡ ፡ እምዲበ ፡ ገጻ ፡ ለምድር ፡ ውስተ ፡ መካን ፡ አሐዱ ፡ አፍአ ፡ እምጽናዓተዝ ፡ ወአስተርአየት ፡ የብስ ። 7 ወበይእቲ ፡ ዕለት ፡ ፈጠረ ፡ ላቲ ፡ ኵሎ ፡ አብሕርተ ፡ በበ ፡ ምጉባኢሆሙ ፡ ወኵሎሙ ፡ አፍላግ ፡ ወምጉባኢሆሙ ፡ ለማያት ፡ ውስተ ፡ አድባር ፡ ወውስተ ፡ ኵሉ ፡ ምድር ። ወኵሎሙ ፡ ምዕቃላተ ፡ ወኵሎ ፡ ጠለ ፡ ምድር ፡ ወዘርእ ፡ ዘይዘራእ ፡ ዘርኡ ፡ ወኵሎ ፡ ዘይትበላዕ ፡ ወዕፀው ፡ እለ ፡ ይፈርዩ ፡ ወኦማተ ፡ ወገነተ ፡ ኤዶም ፡ በኤዶም ፡ ለተድላ ፡ ወለኵሉ ። ወአርባዕተ ፡ ዘንተ ፡ ዐበይተ ፡ ትውልደ ፡ ገብረ ፡ በዕለተ ፡ ሣልስት ። 8 ወበዕለተ ፡ ራብዕት ፡ ገብረ ፡ እግዚአብሔር ፡ ፀሐየ ፡ ወወርኀ ፡ ወከዋክብተ ፡ ወአንበሮሙ ፡ ውስተ ፡ ምጽናዓተ ፡ ሰማይ ፡ ከመ ፡ ያብርሁ ፡ ውስተ ፡ ኵሉ ፡ ምድር ። ወለኰንኖ ፡ መዓልተ ፡ ወሌሊተ ፡ ወለፈሊጥ ፡ ማእከለ ፡ ብርሃን ፡ ወጽልመት ። 9 ወወሀበ ፡ እግዚአብሔር ፡ ፀሐየ ፡ ለትእምርት ፡ ዐቢይ ፡ ዲበ ፡ ምድር ፡ ለመዋዕል ፡ ወለሰንበት ፡ ወለአውራኅ ፡ ወለበዓላት ፡ ወለዓመታት ፡ ወለሰንበታተ ፡ ዓመታት ፡ ወለኢዮቤልዉሳት ፡ ወለኵሉ ፡ ጊዜ ፡ ለዓመታት ። 10 ወይፈልጥ ፡ ማእከለ ፡ ብርሃን ፡ ወማእከለ ፡ ጽልመት ፡ ወለጥዕዮ ፡ ከመ ፡ ይጥዒ ፡ ኵሉ ፡ ዘይሠርፅ ፡ ወይልህቅ ፡ ዲበ ፡ ምድር ። ሠለስተ ፡ ዘንተ ፡ ዘመደ ፡ ገብረ ፡ በዕለተ ፡ ራብዕት ። 11 ወበዕለተ ፡ ኃምስት ፡ ፈጠረ ፡ ዐናብርተ ፡ ዐበይተ ፡ ማእከለ ፡ ቀላያተ ፡ ማያት ፡ እስመ ፡ ዝንቱ ፡ ተገብረ ፡ ቀዳሚ ፡ በእደዊሁ ፡ ዘሥጋ ፡ ወኵሉ ፡ ዘይትሐወስ ፡ ውስተ ፡ ማያት ፡ ዓሣት ፡ ወኵሉ ፡ ዘይሰርር ፡ አዕዋፈ ፡ ወኵሎ ፡ ዘመዶሙ ፡ 12 ወሠረቀ ፡ ፀሐይ ፡ ላዕሌሆሙ ፡ ለጥዒና ፡ ወላዕለ ፡ ኵሉ ፡ ዘሀሎ ፡ ውስተ ፡ ምድር ። ኵሎ ፡ ዘይሠርፅ ፡ እምድር ፡ ወኵሉ ፡ ዕፀው ፡ ዘይፈሪ ፡ ወኵሉ ፡ ዘሥጋ ፡ ዘንተ ፡ ሠለስተ ፡ ዘመደ ፡ ገብረ ፡ አመ ፡ ዕለተ ፡ ኃምስት ። 13 ወበዕለተ ፡ ሳድስት ፡ ገብረ ፡ ኵሎ ፡ አራዊተ ፡ ምድር ፡ ወኵሎ ፡ እንስሳ ፡ ወኵሎ ፡ ዘይትሐወስ ፡ ዲበ ፡ ምድር ። 14 ወእምድኅረ ፡ ዝኵሉ ፡ ገብረ ፡ ሰብአ ፡ አሐደ ፡ ብእሴ ፡ ወብእሲተ ፡ ገብሮሙ ፡ ወአስለጦ ፡ ለኵሉ ፡ ዘዲበ ፡ ምድር ፡ ወዘውስተ ፡ አብሕርት ፡ ወዲበ ፡ ዘይሰርር ፡ ወዲበ ፡ አራዊት ፡ ወዲበ ፡ እንስሳ ፡ ወዲበ ፡ ኵሉ ፡ ዘይትሐወስ ፡ ዲበ ፡ ምድር ፡ ወላዕለ ፡ ኵሉ ፡ ምድር ፡ ወዲበ ፡ ዝኵሉ ፡ አስለጦ ። ወአርባዕተ ፡ ዘንተ ፡ ዘመደ ፡ ገብረ ፡ በዕለተ ፡ ሳድስት ። 15 ወኮነ ፡ ኵሉ ፡ ዕሥራ ፡ ወክልኤቱ ፡ ዘመድ ። 16 ወፈጸመ ፡ ኵሎ ፡ ግብሮ ፡ በዕለተ ፡ ሳድስት ፡ ኵሎ ፡ ዘበሰማይ ፡ ወዘበምድር ፡ ወውስተ ፡ አብሕርት ፡ ወውስተ ፡ ቀላያት ፡ ወውስተ ፡ ብርሃን ፡ ወውስተ ፡ ጽልመት ፡ ወውስተ ፡ ኵሉ ። 17 ወወሀበነ ፡ ትእምርተ ፡ ዐቢየ ፡ ዕለተ ፡ ሰንበታት ፡ ከመ ፡ ንኩን ፡ እንዘ ፡ ንገብር ፡ ሰዱሰ ፡ ዕለተ ፡ ግብረ ፡ ወናሰንብት ፡ አመ ፡ ዕለተ ፡ ሳብዕት ፡ እምኵሉ ፡ ግብር ። 18 ኵሎሙ ፡ መላእክተ ፡ ገጽ ፡ ወኵሎሙ ፡ መላእክተ ፡ ቅድሳት ፡ ክልኤተ ፡ ዘመደ ፡ ዐበይተ ፡ ዘንተ ፡ ይቤለነ ፡ ናሰንብት ፡ ምስሌሁ ፡ በሰማይ ፡ ወበምድር ። 19 ወይቤለነ ፡ ናሁ ፡ አነ ፡ እፈልጥ ፡ ሊተ ፡ ሕዝበ ፡ እማእከለ ፡ አሕዛብየ ፡ ወያሰነብቱ ፡ እሙንቱኒ ፡ ወእቄድሶ ፡ ሊተ ፡ ለሕዝብ ፡ ወእባርኮ ፡ በከመ ፡ ቀደስክዋ ፡ ለዕለተ ፡ ሰንበት ፡ ወእቄድሶ ፡ ሊተ ፡ ወከመዝ ፡ እባርኮ ፡ ወይከውኑኒ ፡ ሕዝብየ ፡ ወአነ ፡ እከውኖሙ ፡ አምላከ ። 20 ወኀረይኩ ፡ በዘርአ ፡ ያዕቆብ ፡ በኵሉ ፡ እምዘርኢኩ ፡ ወጸሐፍክዎ ፡ ሊተ ፡ ወልደ ፡ በኵረ ፡ ወቀደስክዎ ፡ ሊተ ፡ ለዓለመ ፡ ዓለም ። ወዕለታተ ፡ ሰንበታት ፡ እኤምሮሙ ፡ ከመ ፡ ያሰንብቱ ፡ ባቲ ፡ እምኵሉ ፡ ግብር ፡ 21 ወግብረ ፡ ቦቱ ፡ ትእምርተ ፡ ከማሁ ፡ በዘ ፡ ያሰነብቱ ፡ እሙንቱኒ ፡ ምስሌነ ፡ በዕለተ ፡ ሳብዕት ፡ ለበሊዕ ፡ ወለሰቲይ ፡ ወለባርኮ ፡ ዘፈጠረ ፡ ኵሎ ፡ በከመ ፡ ባረኮ ፡ ወቀደሶ ፡ ሎቱ ፡ ሕዝበ ፡ ዘያስተርኢ ፡ እምኵሉ ፡ አሕዛብ ፡ ወከመ ፡ ያሰንብቱ ፡ ኅቡረ ፡ ምስሌነ ። 22 ወገብረ ፡ ፈቃዳቲሁ ፡ ይዕርግ ፡ መዓዛ ፡ ሠናይ ፡ ዘይትወከፍ ፡ ቅድሜሁ ፡ ኵሎ ፡ መዋዕለ ። 23 ዕሥራ ፡ ወክልኤ ፡ አርእስተ ፡ ሰብእ ፡ እምአዳም ፡ እስከኔሁ ። ወዕሥራ ፡ ወክልኤ ፡ ዘመደ ፡ ግብር ፡ ተገብረ ፡ እስከ ፡ ዕለተ ፡ ሳብዕት ፡ ዝንቱ ፡ ቡሩክ ፡ ወቅዱስ ፡ ወውእቱኒ ፡ ቡሩክ ፡ ወቅዱስ ፡ ወዝንቱ ፡ ምስለ ፡ ዝንቱ ፡ ኮነ ፡ ለቅዳሴ ፡ ወለበረከት ፡ 24 ወተውህበ ፡ ለዝንቱ ፡ ከመ ፡ ይኩኑ ፡ ኵሎ ፡ መዋዕለ ፡ ቡሩካነ ፡ ወቅዱሳነ ። ዘስምዕ ፡ ወሕግ ፡ ቀዳሚ ፡ በከመ ፡ ተቀደሰ ፡ ወተባረከ ፡ በዕለተ ፡ ሳብዕት ። 25 ፈጠረ ፡ ሰማየ ፡ ወምድረ ፡ ወኵሎ ፡ ዘተፈጥረ ፡ በሰዱስ ፡ ዕለት ። ወወሀበ ፡ እግዚአብሔር ፡ ዕለተ ፡ በዓል ፡ ቅድስተ ፡ ለኵሉ ፡ ምግባሩ ፡ በእንተዝ ፡ አዘዘ ፡ በእንቲአሃ ፡ ኵሉ ፡ ዘይገብር ፡ ባቲ ፡ ኵሎ ፡ ግብረ ፡ ይሙት ፡ ወዘኒ ፡ ያረኵሳ ፡ ሞተ ፡ ለይሙት ። 26 ወአንተ ፡ አዝዝ ፡ ለደቂቀ ፡ እስራኤል ፡ ወይዕቀቡ ፡ ዕለተ ፡ ዛቲ ፡ ይቀድስዋ ፡ ወከመ ፡ ኢይግበሩ ፡ ባቲ ፡ ኵሎ ፡ ግብረ ፡ ወከመ ፡ ኢያርኵስዋ ፡ እስመ ፡ ቅድስት ፡ ይእቲ ፡ እምኵሉ ፡ መዋዕል ። 27 ኵሉ ፡ ዘያጌምና ፡ ሞተ ፡ ይሙት ፡ ወኵሉ ፡ ዘይገብር ፡ ባቲ ፡ ኵሎ ፡ ግብረ ፡ ሞተ ፡ ይሙት ፡ ለዓለም ። ከመ ፡ ይዕቀቡ ፡ ደቂቀ ፡ እስራኤል ፡ ዛተ ፡ ዕለተ ፡ በትውልዶሙ ፡ ወኢይሠረዉ ፡ እምድር ፡ እስመ ፡ ዕለት ፡ ቅድስት ፡ ይእቲ ፡ ወዕለት ፡ ቡርክት ፡ ይእቲ ፡ 28 ወኵሉ ፡ ሰብእ ፡ ዘየዐቅብ ፡ ወያሰነብት ፡ ባቲ ፡ እምኵሉ ፡ ግብሩ ፡ ቅዱሰ ፡ ወቡሩከ ፡ ይከውን ፡ በኵሉ ፡ መዋዕል ፡ ከማነ ። 29 አይድዕ ፡ ወንግር ፡ ለደቂቀ ፡ እስራኤል ፡ ኵነኔሃ ፡ ለዛቲ ፡ ዕለት ፡ ወያሰንብቱ ፡ ባቲ ፡ ወኢይኅድግዋ ፡ በስሕተተ ፡ ልቦሙ ፡ ከመ ፡ ኢይኩኑ ፡ ለገቢረ ፡ ግብር ፡ ባቲ ፡ ዘኢይከውን ፡ ዘያስተርኢ ፡ ለገቢረ ፡ ባቲ ፡ ፈቃዶሙ ። ወከመ ፡ ያስተዳልዉ ፡ ባቲ ፡ ኵሎ ፡ ዘይትበላዕ ፡ ወዘይሰተይ ፡ ወለቀዲሐ ፡ ማይ ፡ ወለአብኦ ፡ ባቲ ፡ ኵሎ ፡ ዘይጸውር ፡ በአናቅጺሆሙ ፡ ዘኢያስተዳለዉ ፡ ሎሙ ፡ እሙንቱ ፡ በሰዱስ ፡ ዕለት ፡ ግብረ ፡ ውስተ ፡ መኃድሪሆሙ ፡ 30 ወኢያውፅኡ ፡ ወኢያብኡ ፡ እምቤት ፡ ቤተ ፡ በዛቲ ፡ ዕለት ፡ እስመ ፡ ቅድስት ፡ ይእቲ ፡ ወቡርክት ፡ ይእቲ ፡ እምኵሉ ፡ ዕለተ ፡ ኢዮቤል ፡ ዘኢዮቤልዉሳት ፡ ባቲ ፡ አሰንበትነ ፡ በሰማያት ፡ ዘእንበለ ፡ ይትአመር ፡ ለኵሉ ፡ ዘሥጋ ፡ ለአሰንብቶ ፡ ባቲ ፡ በምድር ፡ 31 ወባረከ ፡ ፈጣሬ ፡ ኵሉ ፡ ወኢቀደሰ ፡ ኵሎ ፡ ሕዝበ ፡ ወአሕዛበ ፡ ለአሰንብቶ ፡ ባቲ ፡ ዘእንበለ ፡ እስራኤልሃ ፡ ባሕቲቶ ፡ ሎቱ ፡ ለባሕቲቱ ፡ ወሀቦ ፡ ይብልዑ ፡ ወይስተዩ ፡ ወለአሰንብቶ ፡ ባቲ ፡ ዲበ ፡ ምድር ። 32 ወባረካ ፡ ፈጣሬ ፡ ኵሉ ፡ ዘፈጠረ ፡ ዛተ ፡ ዕለተ ፡ ለበረከት ፡ ወለቅድሳት ፡ ወለስብሐት ፡ እምኵሉ ፡ መዋዕል ። 33 ዝንቱ ፡ ሕግ ፡ ወስምዕ ፡ ተውህበ ፡ ለደቂቀ ፡ እስራኤል ፡ ሕግ ፡ ዘለዓለም ፡ ለትውልዶሙ ።