መጽሐፈ ኩፋሌ 14

14 1 ወእምድኅረ ፡ ዝነገር ፡ በራብዕ ፡ ዓመት ፡ ዘዝ ፡ ሱባዔ ፡ በሠርቀ ፡ ሣልስ ፡ ወርኅ ፡ ኮነ ፡ ቃለ ፡ እግዚአብሔር ፡ ኀበ ፡ አብራም ፡ በሕልም ፡ እንዘ ፡ ይብል ፡ ኢትፍራህ ፡ አብራም ፡ አነ ፡ ውእቱ ፡ ቃውምከ ፡ ወዐስብከ ፡ ይፈደፍድ ፡ ጥቀ ። 2 ወይቤ ፡ እግዚኦ ፡ እግዚኦ ፡ ምንተ ፡ ትሁበኒ ፡ ወአንሰ ፡ አሐውር ፡ ዘእንበለ ፡ ውሉድ ፡ ወወልደ ፡ ማሴቅ ፡ አመትየ ፡ ውእቱ ፡ ደማስቆስ ፡ ኤሌኤዜር ፡ ውእቱ ፡ ይወርሰኒ ፡ ወሊተ ፡ ኢወሀብከኒ ፡ ዘርአ ፡ ሀበኒ ፡ ዘርአ ። 3 2 ወይቤሎ ፡ ኢይወርሰከዝ ፡ ዘእንበለ ፡ ዘይወፅእ ፡ እምከርሥከ ፡ ውእቱ ፡ ይወርሰከ ። 4 ወአውፅኦ ፡ አፍአ ፡ ወይቤሎ ፡ ነጽር ፡ ውስተ ፡ ሰማይ ፡ ወኆልቍ ፡ ከዋክብተ ፡ እመ ፡ ትክል ፡ ኆልቆቶሙ ፡ 5 ወነጸረ ፡ ሰማየ ፡ ወርእየ ፡ ከዋክብተ ፡ ወይቤሎ ፡ ከመዝ ፡ ይከውን ፡ ዘርእከ ፡ 6 ወአምኖ ፡ ለእግዚአብሔር ፡ ወተኆለቆ ፡ ጽድቀ ። 7 ወይቤሎ ፡ አነ ፡ እግዚአብሔር ፡ ዘአውፃእኩከ ፡ እምነ ፡ ኡር ፡ ዘከለዳዊያን ፡ ከመ ፡ አሀብከ ፡ ምድረ ፡ ከነናዊያን ፡ ለእኂዝ ፡ ለዓለም ፡ ወለከዊነ ፡ ለከ ፡ አምላከ ፡ ወለዘርእከ ፡ እምድኅሬከ ፡ 8 ወይቤ ፡ እግዚኦ ፡ እግዚኦ ፡ በምንት ፡ አአምር ፡ ከመ ፡ እወርስ ። 9 ወይቤሎ ፡ ንሣእ ፡ ሊተ ፡ ጠዕዋ ፡ ዘሠለስቱ ፡ ዓመት ፡ ወጠሌ ፡ ዘሠለስቱ ፡ ዓመት ፡ ወበግዐ ፡ ዘሠለስቱ ፡ ዓመት ፡ ወመንጤተ ፡ ወርግበ ። 10 ወነሥአ ፡ ዘንተ ፡ ኵሎ ፡ በመንፈቀ ፡ ወርኅ ፡ ወውእቱ ፡ ይነብር ፡ ኀበ ፡ ድራይ ፡ ዘማምሪ ፡ እንተ ፡ ይእቲ ፡ ቅሩበ ፡ ኬብሮን ፡ 11 ወሐነጸ ፡ ምሥዋዐ ፡ ህየ ፡ ወዘብሐ ፡ ዘንተ ፡ ኵሎ ፡ ወከዐወ ፡ ደሞሙ ፡ ውስተ ፡ ምሥዋዕ ፡ ወነፈቆሙ ፡ እማእከል ፡ ወአንበሮሙ ፡ አንጸራቲሆሙ ፡ በበ ፡ ገጾሙ ፡ ወአዕዋፍሰ ፡ ኢነተፈ ፡ 12 ወይወርዱ ፡ አዕዋፍ ፡ ዲበ ፡ ስፍሕ ፡ ወይከልኦሙ ፡ አብራም ፡ ወኢየኀድግ ፡ አዕዋፍ ፡ ይልክፍዎን ። 13 ወኮነ ፡ ሶበ ፡ ዕርበተ ፡ ፀሐይ ፡ ድንጋፄ ፡ ወድቀ ፡ ላዕለ ፡ አብራም ፡ ወናሁ ፡ ግርማ ፡ ዐቢይ ፡ ጽልመት ፡ ወድቀ ፡ ላዕሌሁ ፡ ወተብህለ ፡ ለአብራም ፡ አእምሮ ፡ አእምር ፡ ከመ ፡ ፈላሴ ፡ ይከውን ፡ ዘርእከ ፡ ውስተ ፡ ምድረ ፡ ነኪር ፡ ወይቀንይዎሙ ፡ ወያሐምምዎሙ ፡ አርባዕተ ፡ ምእተ ፡ ዓመተ ፡ 14 ወለሕዝብኒ ፡ እለ ፡ ይትቀነዩ ፡ አነ ፡ እፈትሕ ፡ ሎሙ ። ወእምድኅረዝ ፡ ይወፅኡ ፡ እምህየ ፡ ጥሪት ፡ ብዙኅ ፡ 15 ወአንተ ፡ ተሐውር ፡ ኀበ ፡ አበዊከ ፡ በሰላም ፡ ወትትቀበር ፡ በርስእ ፡ ሠናይ ። 16 ወበትውልድ ፡ ራብዕ ፡ ይትመየጡ ፡ ዝየ ፡ እስመ ፡ ኢተፈጸመ ፡ ኃጢአቶሙ ፡ ለአሞሬዎን ፡ እስከ ፡ ይእዜ ። 17 ወነቅህ ፡ እምንዋም ፡ ወተንሥአ ፡ ወፀሐይ ፡ ዐረበ ፡ ወነድ ፡ ኮነ ፡ ወናሁ ፡ እቶን ፡ ይጠይስ ፡ ወነበልባለ ፡ እሳት ፡ ኀለፈ ፡ ማእከለ ፡ ስፋሔ ። 18 ወበይእቲ ፡ ዕለት ፡ ተካየደ ፡ ኪዳነ ፡ እግዚአብሔር ፡ ምስለ ፡ አብራም ፡ እንዘ ፡ ይብል ፡ ለዘርእከ ፡ እሁብ ፡ ዛተ ፡ ምድረ ፡ እምፈለገ ፡ ግብጽ ፡ እስከ ፡ ፈለገ ፡ ዐቢይ ፡ ፈለገ ፡ ኤውፍራጢስ ፡ ለቄኔውስ ፡ ወለቄኔዜውስ ፡ ወለቅድሞኔውስ ፡ ወለፌሬዜውስ ፡ ወለረፌእያን ፡ ወለፈከሬውስ ፡ ወለኤዌውስ ። ወለአሞሬውስ ። ወለከናኔውስ ፡ ወለጌርጌሴውስ ፡ ወለኢየቡሴው ። 19 ወኀለፈ ፡ ወአዕረገ ። አብራም ፡ ስፍሐተ ፡ ወአዕዋፈ ፡ ወመሥዋዕቶሙ ፡ ወሞጻሕቶሙ ፡ ወበልዖ ፡ እሳት ። 20 ወበዛቲ ፡ ሌሊት ፡ ተካየድነ ፡ ኪዳነ ፡ ምስለ ፡ አብራም ፡ በከመ ፡ ኪዳን ፡ ዘተካየድነ ፡ በዛቲ ፡ ወርኅ ፡ ምስለ ፡ ኖኅ ። ወአብራም ፡ ሐደሳ ፡ ለበዓል ፡ ወለሥርዓት ፡ ሎቱ ፡ እስከ ፡ ለዓለም ። 21 ወተፈሥሐ ፡ አብራም ፡ ወአይድዐ ፡ ዘንተ ፡ ኵሎ ፡ ለሰራይ ፡ ብእሲቱ ። ወአምነ ፡ ከመ ፡ ይከውኖ ፡ ዘርእ ፡ ወይእቲሰ ፡ ኢትወልድ ። 22 ወአምከረቶ ፡ ሰራይ ፡ ለአብራም ፡ ምታ ፡ ወትቤሎ ፡ ባእ ፡ ኀበ ፡ አጋር ፡ ልእክትየ ፡ ግብጻዊት ፡ እመቦ ፡ ከመ ፡ አሐንጽ ፡ ለከ ፡ እምኔሃ ፡ ዘርአ ፡ 23 ወስምዐ ፡ አብራም ፡ ቃለ ፡ ሰራይ ፡ ብእሲቱ ፡ ወይቤላ ፡ ግበሪ ። ወነሥአት ፡ ሰራይ ፡ አጋርሃ ፡ ለአኪታ ፡ ግብጻዊት ፡ ወወሀበታ ፡ ለአብራም ፡ ለምታ ፡ ትኩኖ ፡ ብእሲተ ። 24 ወቦአ ፡ ኀቤሃ ፡ ወፀንሰት ፡ ወወለደት ፡ ወልደ ። ወጸውዐ ፡ ስሞ ፡ ይስማዔል ፡ በዓመት ፡ ኃምስ ፡ ዘዝ ፡ ሱባዔ ፡ ወውእቱ ፡ ዓመት ፡ ሰማንያ ፡ ወስድስቱ ፡ ዓም ፡ በሕይወተ ፡ አብራም ።