መጽሐፈ ኩፋሌ 15

15 1 ወበዓመት ፡ ኃምስ ፡ ዘሱባዔ ፡ ዘራብዑ ፡ ለኢዮቤልውን ፡ ዝንቱ ፡ በወርኅ ፡ ሣልስ ፡ በመንፈቀ ፡ ወርኅ ፡ ገብረ ፡ አብራም ፡ በዓለ ፡ ቀዳሜ ፡ ማእረረ ፡ ዘዘርአ ፡ ሥርናይ ፡ 2 ወአዕረገ ፡ መሥዋዕተ ፡ ሐዲስ ፡ ዲበ ፡ ምሥዋዕ ፡ ቀዳሜ ፡ እክል ፡ ለእግዚአብሔር ። ላህመ ፡ ወበሐኰ ፡ ወበግዐ ፡ ዲበ ፡ ምሥዋዕ ፡ ጽንሓሐ ፡ ለእግዚአብሔር ፡ ወመሥዋዕቶሙ ፡ ወሞጻሕቶሙ ፡ አዕረገ ፡ ኵሎ ፡ ዲበ ፡ ምሥዋዕ ፡ ምስለ ፡ ስኂን ። 3 ወአስተርአዮ ፡ እግዚአብሔር ፡ ወይቤሎ ፡ እግዚአብሔር ፡ ለአብራም ፡ አነ ፡ አምላከ ፡ ሰዳይ ፡ ወአሥምር ፡ በቅድሜየ ፡ ወኩን ፡ ፍጹመ ፡ 4 ወእሁብ ፡ ኪዳንየ ፡ ማእከሌየ ፡ ወማእከሌከ ፡ ወአልህቀከ ፡ ጥቀ ፡ 5 ወወድቀ ፡ አብራም ፡ በገጹ ፡ ወተናገሮ ፡ እግዚአብሔር ፡ ወይቤ ፡ 6 ናሁ ፡ ሥርዓትየ ፡ ምስሌከ ፡ ወእሬስየከ ፡ አበ ፡ ለብዙኃን ፡ አሕዛብ ። 7 ወኢይጼዋዕ ፡ እንከ ፡ ስምከ ፡ አብራም ፡ ወይኩን ፡ ስምከ ፡ እምይእዜ ፡ ወእስከ ፡ ለዓለም ፡ አብርሃም ፡ እስመ ፡ አበ ፡ ብዙኃን ፡ አሕዛብ ፡ ሤምኩከ ፡ 8 ወአዐብየከ ፡ ጥቀ ። ወእሁበከ ፡ ውስተ ፡ አሕዛብ ፡ ወነገሥት ፡ ይወፅኡ ፡ እምኔከ ፡ 9 ወእሁብ ፡ ኪዳንየ ፡ ማእከሌየ ፡ ወማእከሌከ ፡ ወማእከለ ፡ ዘርእከ ፡ እምድኅሬከ ፡ በትዝምዶሙ ፡ ወለሥርዓት ፡ ዘለዓለም ፡ ከመ ፡ እኩንከ ፡ አምላከ ፡ ወለዘርእከ ፡ እምድኅሬከ ፡ 10 [ወእሁብ ፡ ለከ ፡ ወለዘርእከ ፡ እምድኅሬከ] ፡ ምድረ ፡ ኀበ ፡ ፈለስከ ፡ ምድረ ፡ ከናአን ፡ ዘትኴንን ፡ ለዓለም ፡ ወእከውኖሙ ፡ አምላከ ። 11 ወይቤሎ ፡ እግዚአብሔር ፡ ለአብርሃም ፡ ወአንተኒ ፡ ኪዳንየ ፡ ዕቀብ ፡ አንተ ፡ ወዘርእከ ፡ እምድኅሬከ ፡ ተከሰቡ ፡ ኵሎ ፡ ሮስክሙ ፡ ወተከሰቡ ፡ ቍልፈተክሙ ፡ ወይከውን ፡ ትእምርተ ፡ ሥርዓትየ ፡ ዘለዓለም ፡ ማእከሌየ ፡ ወማእከሌክሙ ፡ 12 ወለወልድ ፡ አመ ፡ ሳምንት ፡ ዕለት ፡ ትከስብዎ ፡ ኵሎ ፡ ሮሰ ፡ በትዝምድክሙ ፡ ወልደ ፡ ቤት ። ወዘበወርቅ ፡ ተሣየጥክሙ ፡ እምኵሉ ፡ ውሉደ ፡ ነኪር ፡ ዘአጥረይክሙ ፡ ዘኢኮነ ፡ እምዘርእከ ፡ 13 ክስበተ ፡ ይትከሰብ ፡ ልደ ፡ ቤትከ ፡ ወዘበወርቅ ፡ ተሣየጥከ ፡ ይትከሰቡ ። ወይከውን ፡ ኪዳንየ ፡ ውስተ ፡ ሥጋክሙ ፡ ለሥርዓት ፡ ዘለዓለም ፡ 14 ወዘኢኮነ ፡ ክሱበ ፡ ሮስ ፡ ዘኢተከስበ ፡ ሥጋ ፡ ቍልፈቱ ፡ በዕለተ ፡ ሳምንት ፡ ትሤሮ ፡ ይእቲ ፡ ነፍስ ፡ እምዘመዳ ፡ እስመ ፡ ኪዳንየ ፡ ነሠተ ። 15 ወይቤሎ ፡ እግዚአብሔር ፡ ለአብርሃም ፡ ሶራ ፡ ብእሲትከ ፡ ኢትጸዋዕ ፡ እንከ ፡ ስማ ፡ ሶራ ፡ እስመ ፡ ሳራ ፡ ስማ ። 16 ወእባርካ ፡ ወእሁበከ ፡ እምኔሃ ፡ ወልደ ፡ ወእባርኮ ፡ ወይከውን ፡ ሕዝበ ፡ ወነገሥተ ፡ አሕዛብ ፡ እምኔሁ ፡ ይከውኑ ። 17 ወወድቀ ፡ አብርሃም ፡ በገጹ ፡ ወተፈሥሐ ፡ ወይቤ ፡ በልቡ ፡ እመ ፡ ለዘ ፡ ምእትኑ ፡ ዓመቱ ፡ ይትወለድ ፡ ወልድ ፡ ወሳራሂ ፡ እንተ ፡ ተስዓ ፡ ዓመታ ፡ ትወልድ ። 18 ወይቤሎ ፡ አብርሃም ፡ ለእግዚአብሔር ፡ መፍትው ፡ ይሕየው ፡ ይስማዔል ፡ ቅድሜከ ። 19 ወይቤ ፡ እግዚአብሔር ፡ ኦሆ ። ወሳራሂ ፡ ትወልድ ፡ ለከ ፡ ወልደ ፡ ወትጼውዕ ፡ ስሞ ፡ ይስሐቅ ። ወአቀውም ፡ ኪዳንየ ፡ ምስሌሁ ፡ ኪዳነ ፡ ዘለዓለም ፡ ወለዘርኡ ፡ እምድኅሬሁ ፡ 20 ወበእንተ ፡ ይስማዔልሂ ፡ ሰማዕኩከ ፡ ወናሁ ፡ እባርኮ ፡ ወአልህቆ ፡ ወአበዝኆ ፡ ጥቀ ። ወዓሠርተ ፡ ወክልኤተ ፡ መላእክተ ፡ ይወልድ ፡ ወእሰይሞ ፡ ውስተ ፡ ሕዝብ ፡ ዐቢይ ። 21 ወኪዳንየ ፡ አቀውም ፡ ምስለ ፡ ይስሐቅ ፡ ዘትውልድ ፡ ለከ ፡ ሳራ ፡ በዝ ፡ መዋዕል ፡ በዓመት ፡ ካልእ ። 22 ወፈጺሞ ፡ እንዘ ፡ ይትናገር ፡ ምስሌሁ ፡ ወዐርገ ፡ እግዚአብሔር ፡ እመልዕልተ ፡ አብርሃም ። 23 ወገብረ ፡ አብርሃም ፡ በከመ ፡ ይቤሎ ፡ እግዚአብሔር ፡ ወነሥአ ፡ ይስማዔልሃ ፡ ወልዶ ፡ ወኵሎ ፡ ልደ ፡ ቤቱ ፡ ወዘሂ ፡ በወርቅ ፡ ተሣየጠ ፡ ኵሎ ፡ ሮሰ ፡ ዘውስተ ፡ ቤቱ ፡ ወከሰበ ፡ ሥጋ ፡ ምክሳቦሙ ። 24 ወበጊዜ ፡ ዛቲ ፡ ዕለት ፡ ተከስበ ፡ አብርሃም ፡ [ወልደ ፡ ቤቱ] ፡ ወሰብአ ፡ ቤቱ ፡ ወኵሎሙ ፡ እለ ፡ በወርቅ ፡ ተሣየጠ ፡ ወእምውሉደ ፡ ነኪራንኒ ፡ ተከስቡ ፡ ምስሌሁ ። 25 ወዝሕግ ፡ ለኵሉ ፡ ትውልድ ፡ ዘለዓለም ፡ ወአልቦ ፡ ክስበተ ፡ መዋዕል ። ወአልቦ ፡ ተዐድዎ ፡ አሐተ ፡ ዕለተ ፡ እምሰማኒ ፡ መዋዕል ፡ እስመ ፡ ሥርዓት ፡ ዘለዓለም ፡ ውእቱ ፡ ሥሩዕ ፡ ወጽሑፍ ፡ ውስተ ፡ ጽላተ ፡ ሰማይ ። 26 ወኵሉ ፡ ዘትውልደ ፡ ዘኢተከስበ ፡ ሥጋ ፡ ነፍስቱ ፡ እስከ ፡ ሰሙን ፡ ዕለት ፡ ኢኮነ ፡ እምውሉደ ፡ ሥርዓት ፡ ዘትካየደ ፡ እግዚአብሔር ፡ ለአብርሃም ፡ እስመ ፡ እምነ ፡ ውሉደ ፡ ሙስና ። ወአልቦ ፡ እንከ ፡ ትእምርተ ፡ ላዕሌሁ ፡ ከመ ፡ ይኩን ፡ ለእግዚአብሔር ፡ እስመ ፡ ለአማስኖ ፡ ወለተሐጕሎ ፡ እምነ ፡ ምድር ፡ ወለተሠርዎ ፡ እምነ ፡ ምድር ፡ እስመ ፡ ኪዳኖ ፡ ለእግዚአብሔር ፡ አምላክነ ፡ ነሠተ ፡ 27 እስመ ፡ ኵሎሙ ፡ መላእክተ ፡ ገጽ ። ወኵሎሙ ፡ መላእክተ ፡ ቅዳሴ ፡ ከመዝ ፡ ፍጥረቶሙ ፡ እምዕለተ ፡ ፍጥረቶሙ ፡ ወአንጸሮሙ ፡ ለመላእክተ ፡ ገጽ ፡ ወለመላእክተ ፡ ቅዳሴ ፡ ቀደሶ ፡ ለእስራኤል ፡ ከመ ፡ ይኩን ፡ ምስሌሁ ፡ ወምስለ ፡ መላእክቲሁ ፡ ቅዱሳን ። 28 ወአንተኒ ፡ አዝዝ ፡ ለውሉደ ፡ እስራኤል ፡ ወይዕቀቡ ፡ ትእምርተዝ ፡ ኪዳን ፡ ለትውልዶሙ ፡ ለሥርዓት ፡ ዘለዓለም ፡ ወኢይሠረው ፡ እምነ ፡ ምድር ፡ 29 እስመ ፡ ትእዛዝ ፡ ተሠርዐ ፡ ለኪዳን ፡ ከመ ፡ ይዕቀብዎ ፡ ለዓለም ። ዲበ ፡ ኵሎሙ ፡ ደቂቀ ፡ እስራኤል ፡ 30 እስመ ፡ ይስማዔልሃ ፡ ወውሉዶ ፡ ወአኃዊሁ ፡ ወዔሳውሃ ፡ ኢያቅረቦ ፡ ኀቤሁ ፡ እግዚአብሔር ፡ ወኢኀረየ ፡ ቦሙ ፡ እስመ ፡ እምውሉደ ፡ አብርሃም ፡ እሙንቱ ፡ እስመ ፡ አእመሮሙ ፡ ወእስራኤልሃ ፡ ኀረየ ፡ ይኩንዎ ፡ ሕዝበ ፡ 31 ወቀደሶ ፡ ወአስተጋብአ ፡ እምኵሉ ፡ ውሉደ ፡ ሰብእ ። እስመ ፡ ብዙኅ ፡ አሕዛብ ፡ ወብዙኅ ፡ ሕዝብ ፡ ወኵሉ ፡ ሎቱ ፡ ወዲበ ፡ ኵሉ ፡ አስለጠ ፡ መናፍስተ ፡ ከመ ፡ ያስሕቶሙ ፡ እምድኅሬሁ ፡ 32 ወዲበ ፡ እስራኤልሰ ፡ ኢያስለጠ ፡ ወኢመነሂ ፡ መልአከ ፡ ወመንፈሰ ። እስመ ፡ ውእቱ ፡ ባሕቲቱ ፡ መኰንኖሙ ፡ ወውእቱ ፡ የዐቅቦሙ ፡ ወይትኀሠሦሙ ፡ እምእደ ፡ መላእክቲሁ ፡ ወእምነ ፡ መናፍስቲሁ ፡ ወእምእደ ፡ ኵሉ ፡ ወኵሉ ፡ ትእዛዛቲሁ ፡ ከመ ፡ ይዕቀቦሙ ፡ ወይባርኮሙ ፡ ወይኩንዎ ፡ ሎቱ ፡ ወውእቱ ፡ ይኩኖሙ ፡ ሎሙ ፡ እምይእዜ ፡ ወእስከ ፡ ለዓለም ። 33 ወይእዜኒ ፡ አነ ፡ እዜንወከ ፡ ከመ ፡ በዛቲ ፡ ሥርዓት ፡ ይሔስዉ ፡ ውሉደ ፡ እስራኤል ፡ ወኢይከስቡ ፡ ውሉዶሙ ፡ በከመ ፡ ኵሉ ፡ ዝሕግ ፡ እስመ ፡ እምሥጋ ፡ ክስበቶሙ ፡ ይከውኑ ፡ መትርፋነ ፡ ውስተ ፡ ክስበተ ፡ ውሉዶሙ ፡ ወኵሎሙ ፡ ውሉደ ፡ ቤልአር ፡ የኀድጉ ፡ ውሉዶሙ ፡ ዘእንበለ ፡ ክስበት ፡ በከመ ፡ ተወልዱ ። 34 ወትከውን ፡ መዓት ፡ ላዕለ ፡ ውሉደ ፡ እስራኤል ፡ ዐባይ ፡ እምኀበ ፡ እግዚአብሔር ፡ እስመ ፡ ኀደጉ ፡ ኪዳኖ ፡ ወእምቃሉ ፡ ተግኅሡ ፡ ወወሐኩ ፡ ወፀረፉ ፡ በከመ ፡ ኢገብሩ ፡ ሥርዓቶ ፡ ለዝ ፡ ትእምርተ ። እስመ ፡ ገብሩ ፡ ነፍሳቲሆሙ ፡ ከመ ፡ አሕዛብ ፡ ለሰስሎ ፡ ወለተሠርዎ ፡ እምድር ፡ ወአልቦ ፡ እንከ ፡ ሎሙ ፡ ኅድገተ ፡ ወስርየተ ፡ ከመ ፡ ይስረይ ፡ ወይትኀደጉ ፡ እምኩሉ ፡ ኀጢአት ፡ ለስሕተተ ፡ ዛቲ ፡ ዘለዓለም ።