መጽሐፈ ኩፋሌ 26

26 1 ወበዓመት ፡ ሳብዕ ፡ ዘዝ ፡ ሱባዔ ፡ ጸውዐ ፡ ይስሐቅ ፡ ዔሳውሃ ፡ ወልዶ ፡ ዘይልህቅ ፡ ወይቤሎ ፡ ወልድየ ፡ አነ ፡ ረሣእኩ ፡ ወናሁ ፡ አዕይንትየ ፡ ከፍአ ፡ ለርእይ ፡ ወኢያአምር ፡ ዕለተ ፡ ሞትየ ። 2 ወይእዜኒ ፡ ንሣእ ፡ ንዋየ ፡ ነዓዌከ ፡ ምጕንጳከ ፡ ወቀስተከ ፡ ወፃእ ፡ ሐቅለ ፡ ወነዐው ፡ ሊተ ፡ ወአኀዝ ፡ ሊተ ፡ ወልድየ ፡ ወግበር ፡ ሊተ ፡ መብልዐ ፡ ከመ ፡ ዘታፈቅር ፡ ነፍስየ ፡ ወአምጽእ ፡ ሊተ ፡ ከመ ፡ እብላዕ ፡ ወትባርከ ፡ ነፍስየ ፡ ዘእንበለ ፡ እሙት ። 3 ወርብቃሰ ፡ ትሰምዕ ፡ እንዘ ፡ ይነግሮ ፡ ለዔሳው ፡ ይስሐቅ ። 4 ወጌሰ ፡ ዔሳው ፡ ገዳመ ፡ ከመ ፡ ያሥግር ፡ ወየአኀዝ ፡ ወያምጽእ ፡ ለአቡሁ ። 5 ወጸውዐት ፡ ርብቃ ፡ ያዕቆብሃ ፡ ወልዳ ፡ ወትቤሎ ፡ ናሁ ፡ ሰማዕክዎ ፡ ለይስሐቅ ፡ አቡከ ፡ እንዘ ፡ ይትናገር ፡ ምስለ ፡ ዔሳው ፡ እኁከ ፡ እንዘ ፡ ይብል ፡ አስግር ፡ ሊተ ፡ ወግበር ፡ ሊተ ፡ መብልዐ ፡ ወአብእ ፡ ሊተ ፡ ወእብላዕ ፡ ወእባርከከ ፡ በቅድመ ፡ እግዚአብሔር ፡ ዘእንበለ ፡ እሙት ። 6 ወይእዜኒኬ ፡ ስማዕ ፡ ወልድየ ፡ ቃልየ ፡ ዘአነ ፡ እኤዝዘከ ፡ ሖር ፡ ውስተ ፡ መርዔትከ ፡ ወንሣእ ፡ ሊተ ፡ ክልኤተ ፡ መሓስአ ፡ ጠሊ ፡ ሠናያነ ፡ ወእግበሮሙ ፡ መብልዐ ፡ ለአቡከ ፡ ዘከመ ፡ ያፈቅር ፡ ወታብእ ፡ ለአቡከ ፡ ወይብላዕ ፡ ከመ ፡ ይባርክ ፡ ቅድመ ፡ እግዚአብሔር ፡ ዘእንበለ ፡ ይሙት ። ወትኩን ፡ ቡሩከ ። 7 ወይቤላ ፡ ያዕቆብ ፡ ለርብቃ ፡ እሙ ፡ እሞ ፡ ኢይምሕክ ፡ በእንተ ፡ ኵሉ ፡ ዘይበልዕ ፡ አቡየ ፡ ወያሠምሮ ፡ ወባሕቱ ፡ እፈርህ ፡ አነ ፡ እሞ ፡ ከመ ፡ ኢይለቡ ፡ ቃልየ ፡ ወኢይፍቅድ ፡ ይግሥሠኒ ። 8 ወአንቲ ፡ ታአምሪ ፡ ከመ ፡ አነ ፡ ልሙጽ ፡ ወዔሳው ፡ እኁየ ፡ ጸጓር ፡ ወእከውን ፡ ቅድመ ፡ አዕይንቲሁ ፡ ከመ ፡ ዘያስተአኪ ፡ ወእገብር ፡ ግብረ ፡ ዘኢአዘዘኒ ፡ ወይትመዐዐኒ ፡ ወአመጽእ ፡ ላዕሌየ ፡ መርገመ ፡ ወአኮ ፡ በረከተ ። 9 ወትቤሎ ፡ ርብቃ ፡ እሙ ፡ ላዕሌየ ፡ መርገምከ ፡ ኦወልድየ ፡ ዳእሙ ፡ ስማዕ ፡ ቃልየ ። 10 ወሰምዐ ፡ ያዕቆብ ፡ ቃለ ፡ ርብቃ ፡ እሙ ። ወሖረ ፡ ወነሥአ ፡ ክልኤተ ፡ መሓስአ ፡ ጠሊ ፡ ሠናያነ ፡ ወስቡሓነ ፡ ወአምጽኦሙ ፡ ለእሙ ። ወገብረቶሙ ፡ እሙ ፡ ዘከመ ፡ ያፈቅር ፡ 11 ወነሥአት ፡ ርብቃ ፡ አልባሰ ፡ ወልዳ ፡ ዔሳው ፡ ዘይልህቅ ፡ ዘይትፈተው ፡ ዘሀሎ ፡ ኀቤሃ ፡ ውስተ ፡ ቤታ ፡ ወአልበሰቶ ፡ ለያዕቆብ ፡ ወልዳ ፡ ዘይንእስ ። ወአምእስተ ፡ መሓስአ ፡ ጠሊ ፡ አንበረት ፡ ዲበ ፡ እደዊሁ ፡ ወውስተ ፡ ዕርቃነ ፡ ክሳዱ ። 12 ወወሀበቶ ፡ ተብሲለ ፡ ወኅብስተ ፡ ዘገብረት ፡ ውስተ ፡ እደ ፡ ያዕቆብ ፡ ወልዳ ። 13 ወቦአ ፡ ኀበ ፡ አቡሁ ፡ ወይቤ ፡ አነ ፡ ወልድከ ፡ ገበርኩ ፡ በከመ ፡ ትቤለኒ ፡ ተንሥእ ፡ ወንበር ፡ ወብልዕ ፡ እምዘ ፡ አሥገርኩ ፡ አባ ፡ ከመ ፡ ትባርከኒ ፡ ነፍስከ ። 14 ወይቤሎ ፡ ይስሐቅ ፡ ለወልዱ ፡ ምንተ ፡ ከመዝ ፡ ዘአፍጠንከ ፡ ረኪበ ፡ ወልድየ ። 15 ወይቤ ፡ ያዕቆብ ፡ ዘአርከበኒ ፡ አምላክከ ፡ ቅድሜየ ። 16 ወይቤሎ ፡ ይስሐቅ ፡ ቅረብ ፡ ወእግሥሥከ ፡ ወልድየ ፡ እመ ፡ አንተ ፡ ወልድየ ፡ ዔሳው ፡ ወእመ ፡ ኢኮነሁ ። 17 ወቀርበ ፡ ያዕቆብ ፡ ኀበ ፡ ይስሐቅ ፡ አቡሁ ፡ ወገሰሶ ፡ ወይቤ ፡ 18 ቃል ፡ ቃለ ፡ ያዕቆብ ፡ ወእደው ፡ እደወ ፡ ዔሳው ፡ ወኢያእመሮ ፡ እስመ ፡ ሚጠት ፡ ውእቱ ፡ እምሰማይ ፡ ለአኅልፎ ፡ መንፈሱ ፡ ወኢያእመረ ፡ ይስሐቅ ፡ እስመ ፡ እደዊሁ ፡ ከመ ፡ እደወ ፡ ዔሳው ፡ ጸጓር ፡ ከመ ፡ ይባርኮ ። 19 ወይቤ ፡ አንተሁ ፡ ወልድየ ፡ ዔሳው ፡ ወይቤ ፡ አነ ፡ ወልድከ ፡ ወይቤ ፡ አቅርብ ፡ ሊተ ፡ ወእብላዕ ፡ እምዘ ፡ አሥግርከ ፡ ወልድየ ፡ ከመ ፡ ትባርከ ፡ ነፍስየ ፡ 20 ወአቅረበ ፡ ሎቱ ፡ ወበልዐ ፡ ሎቱ ፡ ወይነ ፡ ወሰትየ ። 21 ወይቤሎ ፡ ይስሐቅ ፡ አቡሁ ፡ ቅረብ ፡ ወሰዐመኒ ፡ ወልድየ ። ወቀርበ ፡ ወሰዐሞ ፡ 22 ወአጼነወ ፡ ጼና ፡ ወዐዛ ፡ አልባሲሁ ፡ ወባረኮ ፡ ወይቤ ፡ ናሁ ፡ ጼና ፡ ወልድየ ፡ ከመ ፡ ጼና ፡ ገዳም ፡ ዘባረኮ ፡ እግዚአብሔር ። 23 ወየሀብከ ፡ እግዚአብሔር ፡ ወያብዝኅከ ፡ እምጠለ ፡ ሰማይ ፡ ወእምጠለ ፡ ምድር ፡ ወብዝኀ ፡ ስርናይ ፡ ወቅብእ ፡ ያብዝኅ ፡ ለከ ። ወይትቀነዩ ፡ ለከ ፡ አሕዛብ ፡ ወይስግዱ ፡ ለከ ፡ ሕዝብ ፡ 24 ኩን ፡ እግዚአ ፡ ለአኀዊከ ፡ ወይስግዱ ፡ ለከ ፡ ውሉደ ፡ እምከ ፡ ወኵሎን ፡ በረከት ፡ ዘባረከኒ ፡ እግዚአብሔር ፡ ወባረኮ ፡ ለአብርሃም ፡ አቡየ ፡ ይኩና ፡ ለከ ፡ ወለዘርእከ ፡ እስከ ፡ ለዓለም ፡ ዘይረግመከ ፡ ርጉም ፡ ወዘይባርከከ ፡ ቡሩክ ። 25 ወኮነ ፡ እምድኅረ ፡ አኅለቀ ፡ እንዘ ፡ ይባርኮ ፡ ይስሐቅ ፡ ለወልዱ ፡ ያዕቆብ ፡ ወኮነ ፡ እምድኅረ ፡ ወፅአ ፡ ወፂኦ ፡ ያዕቆብ ፡ እምይስሐቅ ፡ አቡሁ ፡ ተኀብአ ። ወዔሳውሰ ፡ እኁሁ ፡ በጽሐ ፡ እምነዐዊሁ ፡ 26 ወገብረ ፡ ውእቱሂ ፡ መብልዐ ፡ ወአብአ ፡ ለአቡሁ ። ወይቤሎ ፡ ለአቡሁ ፡ ይትነሣእ ፡ አቡየ ፡ ወይብላዕ ፡ እመሥገርትየ ፡ ወከመ ፡ ትባርከኒ ፡ ነፍስከ ። 27 ወይቤሎ ፡ ይስሐቅ ፡ አቡሁ ፡ መኑ ፡ አንተ ፡ ወይቤሎ ፡ አነ ፡ በኵርከ ፡ ዔሳው ፡ ወልድከ ፡ ገበርኩ ፡ በከመ ፡ አዘዝከኒ ። 28 ወተደመ ፡ ይስሐቅ ፡ ድማመ ፡ ዐቢየ ፡ ጥቀ ፡ ወይቤ ፡ መኑ ፡ ውእቱ ፡ ዝንቱ ፡ ዘነዐወ ፡ ወአሥገረ ፡ ሊተ ፡ ወአምጽአ ፡ ወበለዕኩ ፡ እምኵሉ ፡ እንበለ ፡ ትምጻእ ፡ ወባረክዎ ፡ ቡሩከ ፡ ይኩን ፡ ወኵሉ ፡ ዘርኡ ፡ እስከ ፡ ለዓለም ። 29 ወኮነ ፡ ሶበ ፡ ሰምዐ ፡ ዔሳው ፡ ነገረ ፡ አቡሁ ፡ ይስሐቅ ፡ ጸርኀ ፡ በቃል ፡ ዐቢይ ፡ ወመራር ፡ ጥቀ ፡ ወይቤሎ ፡ ለአቡሁ ፡ ባርከኒ ፡ ኪያየኒ ፡ አባ ። 30 ወይቤሎ ፡ መጽአ ፡ እኁከ ፡ በሕብል ፡ ወነሥአ ፡ በረከታቲከ ። ወይቤ ፡ ይእዜ ፡ አእመርኩ ፡ በዘ ፡ ተሰምየ ፡ ስሙ ፡ ያዕቆብ ፡ አዕቀጸኒ ፡ ናሁዝ ፡ ዳግሙ ፡ ቀዲሙ ፡ ልደትየኒ ፡ ነሥአ ፡ ወይእዜኒ ፡ ነሥአ ፡ በረከትየ ። 31 ወይቤ ፡ ኢያትረፍከኑ ፡ ሊተ ፡ በረከተ ፡ አባ ። ወአውስአ ፡ ይስሐቅ ፡ ወይቤሎ ፡ ለዔሳው ፡ ናሁ ፡ እግዚአ ፡ ሤምክዎ ፡ ለከ ፡ ወኵሎሙ ፡ አኀዊሁ ፡ ወሀብክዎ ፡ ሎቱ ፡ ይኩንዎ ፡ አግብርተ ፡ ወበብዝኀ ፡ ስርናይ ፡ ወወይን ፡ ወቅብእ ፡ አጽናዕክዎ ፡ ወለከ ፡ ምንተ ፡ እሬሲ ፡ ለከ ፡ ይእዜ ፡ ወልድየ ። 32 ወይቤ ፡ ዔሳው ፡ ለይስሐቅ ፡ አቡሁ ፡ አሐቲኑ ፡ ክመ ፡ በረከትከ ፡ እንቲአከሰ ፡ አባ ፡ ባርከኒ ፡ ኪያየኒ ፡ አባ ፡ ወአንሥአ ፡ ዔሳው ፡ ቃሎ ፡ ወበክየ ። ወአውሥአ ፡ ይስሐቅ ፡ ወይቤሎ ፡ ናሁ ፡ እምጠለ ፡ ምድር ፡ ይኩን ፡ ንብረትከ ፡ ወእምጠለ ፡ ሰማይ ፡ እምላዕሉ ፡ 34 ወበመጥባሕትከ ፡ ተሐዩ ፡ ወለእኁከ ፡ ትትቀነይ ። ወይኩን ፡ እመ ፡ ዐበይከ ፡ ወአሰሰልከ ፡ አርዑቶ ፡ እምክሳድከ ፡ አሜሃ ፡ ትኤብስ ፡ አበሳ ፡ ኵሎ ፡ ለሞት ፡ ወይሤሮ ፡ ዘርእከ ፡ እምታሕተ ፡ ሰማይ ። 35 ወይትሜአከ ፡ ዔሳው ፡ ያዕቆብሃ ፡ በእንተ ፡ በረከት ፡ እንተ ፡ ባረኮ ፡ አቡሁ ፡ ወይቤ ፡ በልቡ ፡ ይእዜኒ ፡ ይበጽሕ ፡ መዋዕለ ፡ ላሐ ፡ አቡየ ፡ ወእቀትሎ ፡ ለያዕቆብ ፡ እኁየ ።