መጽሐፈ ኩፋሌ 27

27 1 ወተናግራ ፡ ለርብቃ ፡ በሕልም ፡ ነገሮ ፡ ለዔሳው ፡ ወልዳ ፡ ዘይልህቅ ። ወፈኒዋ ፡ ርብቃ ፡ ጸውዐት ፡ ያዕቆብሃ ፡ ወልዳ ፡ ዘይንእስ ፡ ወትቤሎ ፡ 2 ናሁ ፡ ዔሳው ፡ እኁከ ፡ ይትቄየመከ ፡ ከመ ፡ ይቅትልከ ። 3 ወይእዜኒ ፡ ወልድየ ፡ ስማዕ ፡ ቃልየ ፡ ተንሥእ ፡ ወጕየይ ፡ ኀበ ፡ ላባ ፡ እኁየ ፡ ከራንሃ ፡ ወንበር ፡ ምስሌሁ ፡ ኀዳጠ ፡ መዋዕለ ፡ እስከ ፡ ይትመየጥ ፡ መዐተ ፡ እኁከ ፡ ወየኀድግ ፡ መዐቶ ፡ እምኔከ ፡ ወይረስዕ ፡ ኵሎ ፡ ዘመጠነ ፡ ረሰይኮ ፡ ወፈኒውየ ፡ እትቄበለከ ፡ እምህየ ። 4 ወይቤ ፡ ያዕቆብ ፡ ኢይፈርህ ፡ እመ ፡ ፈቀደ ፡ ይቅትለኒ ፡ እቀትሎ ፡ 5 ወትቤሎ ፡ ከመ ፡ ኢይምክን ፡ እምክልኤቱ ፡ ውሉድየ ፡ በአሐቲ ፡ ዕለት ። 6 ወይቤላ ፡ ያዕቆብ ፡ ለርብቃ ፡ እሙ ፡ ናሁ ፡ ታአምሪ ፡ ከመ ፡ ረስአ ፡ አቡየ ፡ ወእሬኢ ፡ እስመ ፡ ከብዳ ፡ አዕይንቲሁ ፡ ወእመኒ ፡ ኀደግዎ ፡ እኩይ ፡ ውእቱ ፡ በቅድመ ፡ አዕይንቲሁ ፡ እስመ ፡ አኀድጎ ፡ ወአሐውር ፡ እምኔክሙ ። ወይትመዓዕ ፡ አቡየ ፡ ወይረግመኒ ፡ ኢየሐውር ፡ ወእመ ፡ ፈነወኒ ፡ ባሕቱ ፡ አሐውር ፡ አሜሃ ። 7 ወትቤሎ ፡ ርብቃ ፡ ለያዕቆብ ፡ አነ ፡ እበውእ ፡ ወእነግሮ ፡ ወይፌንወከ ። 8 ወቦአት ፡ ርብቃ ፡ ወትቤሎ ፡ ለይስሐቅ ፡ ግእዝኩ ፡ ሕይወትየ ፡ እምክልኤሆን ፡ አዋልደ ፡ ኬጥ ፡ እለ ፡ ነሥአ ፡ ዔሳው ፡ ሎቱ ፡ አንስትያ ። ወእመ ፡ ነሥአ ፡ ሎቱ ፡ ያዕቆብ ፡ ብእሲተ ፡ እምውስተ ፡ አዋልደ ፡ ምድር ፡ እለ ፡ ከመ ፡ እለ ፡ ለምንት ፡ ሊተ ፡ እንከ ፡ አሐዩ ፡ እስመ ፡ እኩያት ፡ አዋልደ ፡ ምድረ ፡ ከናአን ። 9 ወጸውዐ ፡ ይስሐቅ ፡ ያዕቆብሃ ፡ ወልዶ ፡ ወባረኮ ፡ ወገሠጾ ፡ ወይቤሎ ፡ 10 ኢትንሣእ ፡ ለከ ፡ ብእሲተ ፡ እምኵሉ ፡ አዋልደ ፡ ከናአን ፡ ተንሥእ ፡ ሖር ፡ መስጴጦምያ ፡ ቤቶ ፡ ለባቱኤል ፡ አቡሃ ፡ ለእምከ ፡ ወንሣእ ፡ ለከ ፡ እምህየ ፡ ብእሲተ ፡ እምአዋልደ ፡ ላባ ፡ እኁሃ ፡ ለእምከ ። 11 ወአምላከ ፡ ሰዳይ ፡ ይባርከ ፡ ያልህቀ ፡ ወያብዝኅከ ፡ ወኩን ፡ መክብበ ፡ አሕዛብ ፡ ወየሀብከ ፡ በረከታቲሁ ፡ ለአቡየ ፡ አብርሃም ፡ ለከ ፡ ወለዘርእከ ፡ እምድኅሬከ ፡ ከመ ፡ ትረስ ፡ ምድረ ፡ ፍልሰትከ ፡ ወኵላ ፡ ምድረ ፡ እንተ ፡ ወሀቦ ፡ እግዚአብሔር ፡ ለአብርሃም ፡ ሖር ፡ ወልድየ ፡ በሰላም ። 12 ወፈነዎ ፡ ይስሐቅ ፡ ለያዕቆብ ፡ ወሖረ ፡ መስጴጦምያ ፡ ኀበ ፡ ላባ ፡ ኀበ ፡ ወልደ ፡ ባቱኤል ፡ ሶርያዊ ፡ እኁሃ ፡ ለርብቃ ፡ እሙ ፡ ለያዕቆብ ። 13 ወኮነ ፡ እምድኅረ ፡ ተንሥአ ፡ ያዕቆብ ፡ ለሐዊረ ፡ መስጴጦምያ ፡ ወሐዘነ ፡ መንፈሳ ፡ ለርብቃ ፡ ድኅረ ፡ ወልዳ ፡ ወትበኪ ። 14 ወይቤላ ፡ ይስሐቅ ፡ ለርብቃ ፡ እኅትየ ፡ ኢትብኪዪ ፡ በእንተ ፡ ወልድየ ፡ እስመ ፡ በሰላም ፡ የሐውር ፡ ወበሰላም ፡ ይትመየጥ ፡ 15 አምላክ ፡ ልዑል ፡ የዐቅቦ ፡ እምኵሉ ፡ እኩይ ፡ ወይሄሉ ፡ ምስሌሁ ። እስመ ፡ ኢየኀድጎ ፡ ኵሎ ፡ መዋዕሊሁ ፡ 16 እስመ ፡ እጤይቅ ፡ ከመ ፡ ይሤራሕ ፡ ፍናዊሁ ፡ በኵሉ ፡ ኀበ ፡ ሖረ ፡ እስከ ፡ አመ ፡ ይገብእ ፡ በሰላም ፡ ኀቤነ ፡ ወንሬእዮ ፡ በሰላም ። 17 ኢትፍርሂ ፡ በእንቲአሁ ፡ እኅትየ ፡ እስመ ፡ ራትዕ ፡ በፍኖቱ ፡ ውእቱ ፡ ወፍጹም ፡ ውእቱ ፡ ብእሲ ፡ ምእመን ፡ ውእቱ ፡ ወኢይትገደፍ ፡ ኢትብክዪ ። 18 ወይናዝዛ ፡ ይስሐቅ ፡ ለርብቃ ፡ በእንተ ፡ ያዕቆብ ፡ ወልዳ ፡ ወባረኮ ። 19 ወወፅአ ፡ ያዕቆብ ፡ እምዐዘቅተ ፡ መሐላ ፡ ከመ ፡ ይሖር ፡ ካራንሃ ፡ በዓመት ፡ ቀዳሚ ፡ ዘሱባዔ ፡ ካልእ ፡ ዘአርብዓ ፡ ወአርባዕቱ ፡ ኢዮቤሌዉ ፡ ወበጽሐ ፡ ወስተ ፡ ሉዛ ፡ እንተ ፡ ውስተ ፡ ደብር ፡ እንተ ፡ ይእቲ ፡ ቤቴል ፡ በሠርቀ ፡ ወርኅ ፡ ዘቀዳሚ ፡ ዘዝ ፡ ሱባዔ ፡ ወበጽሐ ፡ መካነ ፡ መሲዮ ፡ ወተግሕሠ ፡ እምፍኖተ ፡ ዐረቢሃ ፡ ለመንገድ ፡ በዛቲ ፡ ሌሊት ፡ ወኖመ ፡ ህየ ፡ እስመ ፡ ዐረበ ፡ ፀሐይ ። 20 ወነሥአ ፡ እምአእባነ ፡ ውእቱ ፡ መካን ፡ ወአንበሮ ፡ ታሕተ ፡ ውእቱ ፡ ዕፅ ፡ ወውእቱ ፡ ባሕቲቱ ፡ የሐውር ። ወኖመ ፡ 21 ወሐለመ ፡ በይእቲ ፡ ሌሊት ፡ ወናሁ ፡ መዓርግ ፡ ትክልት ፡ ውስተ ፡ ምድር ፡ ወርእሳ ፡ ትለክፍ ፡ ውስተ ፡ ሰማይ ። ወናሁ ፡ መላእክተ ፡ እግዚአብሔር ፡ የዐርጉ ፡ ወይወርዱ ፡ ባቲ ፡ ወናሁ ፡ እግዚአብሔር ፡ ይቀውም ፡ ውስቴታ ። 22 ወተናገረ ፡ ምስለ ፡ ያዕቆብ ፡ ወይቤ ፡ አነ ፡ ውእቱ ፡ አምላከ ፡ አብርሃም ፡ አቡከ ፡ ወአምላከ ፡ ይስሐቅ ፡ ምድር ፡ እንተ ፡ ዲቤሃ ፡ ትነውም ፡ አንተ ፡ ለከ ፡ እሁባ ፡ ወለዘርእከ ፡ እምድኅሬከ ። 23 ወይከውን ፡ ዘርእከ ፡ ከመ ፡ ኆጻ ፡ ምድር ፡ ወትበዝኅ ፡ ውስተ ፡ ባሕር ፡ ወጽባሕ ፡ ወሰሜን ፡ ወደቡብ ። ወይትባረኩ ፡ ብከ ፡ ኵሎሙ ፡ በሓውርተ ፡ አሕዛብ ፡ ወበዘርእከ ፡ 24 ወነየ ፡ አነ ፡ እሄሉ ፡ ምስሌከ ፡ ወአዐቅበከ ፡ በኵለሄ ፡ ወእደ ፡ ሖርከ ፡ ወአገብአከ ፡ ውስተ ፡ ዛምድር ፡ በሰላም ፡ እስመ ፡ ኢየኀድገከ ፡ እስከ ፡ ሶበ ፡ እገብር ፡ ኵሎ ፡ ዘእቤለከ ። 25 ወኖመ ፡ ያዕቆብ ፡ ንዋመ ፡ ወይቤ ፡ አማን ፡ ቤቱ ፡ ለእግዚአብሔር ፡ ዝመካን ፡ ወአነ ፡ ኢያእመርኩ ፡ ወፈርሀ ፡ ወይቤ ፡ ግሩም ፡ ዝንቱ ፡ መካን ፡ ዘኢኮነ ፡ ምንተኒ ፡ ዘእንበለ ፡ ቤተ ፡ እግዚአብሔር ፡ ወዛቲ ፡ አንቀጸ ፡ ሰማይ ። 26 ወገዪሶ ፡ ያዕቆብ ፡ ነግሀ ፡ ነሥአ ፡ እብነ ፡ ዘአንበረ ፡ ዲበ ፡ ርእሱ ፡ ወአቀሞ ፡ ሐውልተ ፡ ለትእምርት ፡ ወከዐወ ፡ ቅብአ ፡ ዲበ ፡ ርእሱ ፡ ወሰመየ ፡ ስሞ ፡ ለውእቱ ፡ መካን ፡ ቤቴል ፡ ወቀዲሙሰ ፡ ባሕቱ ፡ ሉዛ ፡ ስመ ፡ ብሔሩ ። 27 ወጸለየ ፡ ያዕቆብ ፡ ጸሎተ ፡ ለእግዚአብሔር ፡ እንዘ ፡ ይብል ፡ እመ ፡ ሀሎ ፡ እግዚአብሔር ፡ ምስሌየ ፡ ወዐቀበኒ ፡ በዛቲ ፡ ፍኖት ፡ እንተ ፡ ባቲ ፡ አሐውር ፡ አነ ፡ ወወሀበኒ ፡ ኅብስተ ፡ እብላዕ ፡ ወልብሰ ፡ እልብስ ፡ ወእትመየጥ ፡ ቤተ ፡ አቡየ ፡ በሰላም ፡ ወይከውነኒ ፡ እግዚአብሔር ፡ አምላክ ። ወዝኒ ፡ እብን ፡ ዘአቀምኩ ፡ ሐውልተ ፡ ለትእምርት ፡ በዝ ፡ መካን ፡ ይኩን ፡ ቤተ ፡ እግዚአብሔር ፡ ወኵሎ ፡ ዘወሀብከኒ ፡ አዐሥሮ ፡ ለከ ፡ አምላኪየ ።