መጽሐፈ ኩፋሌ 39

39 1 ወኀደረ ፡ ያዕቆብ ፡ በምድረ ፡ ፍልሰተ ፡ አቡሁ ፡ ምድረ ፡ ከናአን ፡ 2 እለ ፡ ትዝምደ ፡ ያዕቆብ ። ወዮሴፍሰ ፡ ወልደ ፡ ዐሠርቱ ፡ ወሰብዐቱ ፡ ዓመት ፡ አውረድዎ ፡ ውስተ ፡ ግብጽ ፡ ወተሣየጦ ፡ ፋጢፋራን ፡ ኅፅዉ ፡ ለፈርዖን ፡ ሊቀ ፡ መብስላን ። 3 ወሤሞ ፡ ለዮሴፍ ፡ ዲበ ፡ ኵሉ ፡ ቤቱ ። ወኮነት ፡ በረከተ ፡ እግዚአብሔር ፡ ውስተ ፡ ቤተ ፡ ግብጻዊ ፡ በእንተ ፡ ዮሴፍ ፡ ወኵሎ ፡ ዘገብረ ፡ እግዚአብሔር ፡ ይሴርሖ ። 4 ወኀደገ ፡ ግብጻዊ ፡ ኵሎ ፡ ቅድሜሁ ፡ ለዮሴፍ ፡ እስመ ፡ ርእየ ፡ ከመ ፡ እግዚአብሔር ፡ ምስሌሁ ፡ ወኵሎ ፡ ዘገብረ ፡ እግዚአብሔር ፡ ይሴርሖ ። 5 ወዮሴፍሰ ፡ ሠናይ ፡ ራእዩ ፡ ወላሕይ ፡ ጥቀ ፡ ራእዩ ። ወአንሥአት ፡ አዕይንቲሃ ፡ ብእሲተ ፡ እግዚኡ ፡ ወርእየቶ ፡ ለዮሴፍ ፡ ወአፍቀረቶ ፡ ወአስተብቍዐቶ ፡ ከመ ፡ ይስክብ ፡ ምስሌሃ ፡ 6 ወኢመጠወ ፡ ነፍሶ ። ወተዘከሮ ፡ ለእግዚአብሔር ፡ ወቃላተ ፡ ዘያነብብ ፡ ያዕቆብ ፡ አቡሁ ፡ ዘእምውስተ ፡ ቃላተ ፡ አብርሃም ፡ ከመ ፡ አልቦ ፡ መነሂ ፡ ሰብእ ፡ ዘይዜሙ ፡ በብእሲት ፡ እንተ ፡ ባቲ ፡ ምተ ፡ ከመቦ ፡ ኵነኔ ፡ ሞት ፡ ዘተሠርዐ ፡ ሎቱ ፡ በሰማያት ፡ ቅድመ ፡ እግዚአብሔር ፡ ልዑል ። ወኀጢአት ፡ ተዐርግ ፡ በእንቲአሁ ፡ ውስተ ፡ መጻሕፍት ፡ ዘለዓለም ፡ በኵሉ ፡ መዋዕል ፡ ቅድመ ፡ እግዚአብሔር ። 7 ወተዘከረ ፡ ዮሴፍ ፡ ዘንተ ፡ ንባበ ፡ ወኢፈቀደ ፡ ይስክብ ፡ ምስሌሃ ፡ 8 ወአስተብቍዐቶ ፡ ዓመተ ፡ አሐተ ፡ ወካልአ ፡ ወአበያ ፡ ሰሚዐ ፡ 9 ወለጠቀቶ ፡ ወአኀዘቶ ፡ በቤት ፡ ከመ ፡ ትትባአሶ ፡ ይስክብ ፡ ምስሌሃ ። ወዐፀወት ፡ ኆኅተ ፡ ቤት ፡ ወአኀዘቶ ፡ ወኀደገ ፡ ልብሶ ፡ ውስተ ፡ እዴሃ ፡ ወሰበረ ፡ ማዕፆ ፡ ወጐየ ፡ አፍአ ፡ እምቅድመ ፡ ገጻ ። 10 ወርእየት ፡ ይእቲ ፡ ብእሲት ፡ ከመ ፡ ኢይሰክብ ፡ ምስሌሃ ፡ ወጠቀለቶ ፡ ቅድመ ፡ እግዚኡ ፡ እንዘ ፡ ትብል ፡ ኪያየ ፡ ፈቀደ ፡ ገብርከ ፡ ዕብራዊ ፡ ዘታፈቅር ፡ ይትዐገለኒ ፡ ከመ ፡ ይስክብ ፡ ምስሌየ ። ወኮነ ፡ ሶበ ፡ አልዐልኩ ፡ ቃልየ ፡ ጐየ ፡ ወኀደገ ፡ ልብሶ ፡ ውስተ ፡ እዴየ ፡ በጊዜ ፡ እንተ ፡ አኀዝክዎ ፡ ወሰበረ ፡ ማዕፆ ። 11 ወርእየ ፡ ግብጻዊ ፡ ልብሰ ፡ ዮሴፍ ፡ ወማዕፆ ፡ ስቡረ ። ወሰምዐ ፡ ነገረ ፡ ብእሲቱ ፡ ወወደዮ ፡ ለዮሴፍ ፡ ቤተ ፡ ሞቅሕ ፡ ውስተ ፡ መካን ፡ ኀበ ፡ ይነብሩ ፡ ሙቁሓን ፡ እለ ፡ ሞቅሐ ፡ ንጉሥ ፡ 12 ወሀሎ ፡ ህየ ፡ ውስተ ፡ ሞቅሕ ። ወወሀቦ ፡ እግዚአብሔር ፡ ሞገሰ ፡ ለዮሴፍ ፡ በቅድሜሁ ፡ ለሊቀ ፡ ዐቀብተ ፡ ሞቅሕ ፡ ወምሕረተ ፡ በቅድሜሁ ፡ እስመ ፡ ርእየ ፡ ከመ ፡ እግዚአብሔር ፡ ምስሌሁ ፡ ወኵሎ ፡ ዘገብረ ፡ እግዚአብሔር ፡ ይሴርሖ ። 13 ወኀደገ ፡ ኵሎ ፡ ቅድሜሁ ፡ ወአልቦ ፡ ሊቀ ፡ ዐቀብተ ፡ ሞቅሕ ፡ ዘያአምር ፡ ምስሌሁ ፡ ምንተኒ ፡ እስመ ፡ ዮሴፍ ፡ ኵሎ ፡ ይገብር ፡ ወእግዚአብሔር ፡ ይፌጽም ፡ ወነበረ ፡ ህየ ፡ ክልኤተ ፡ ዓመተ ። 14 ወበውእቱ ፡ መዋዕል ፡ ተምዕዐ ፡ ፈርዖን ፡ ንጉሠ ፡ ግብጽ ፡ ላዕለ ፡ ክልኤቱ ፡ ኅጽዋኒሁ ፡ ላዕለ ፡ ሊቀ ፡ መዘርት ፡ ወላዕለ ፡ ሊቀ ፡ ኀበዝት ፡ ወወደዮሙ ፡ ውስተ ፡ ሞቅሕ ፡ ውስተ ፡ ቤቱ ፡ ለሊቀ ፡ መበስላን ፡ ውስተ ፡ ሞቅሕ ፡ ኀበ ፡ ሀሎ ፡ ዮሴፍ ፡ እኁዝ ፡ ህየ ። 15 ወሠርዖ ፡ ለዮሴፍ ፡ ሊቀ ፡ ዐቀብተ ፡ ሞቅሕ ፡ ከመ ፡ ይትለአኮሙ ፡ ወይትለአክ ፡ በቅድሜሁ ፡ 16 ወሐለሙ ፡ ክልኤሆሙ ፡ ሕልመ ፡ ሊቀ ፡ መዘርት ፡ ወሊቀ ፡ ሐበዝት ፡ ወነገርዎ ፡ ለዮሴፍ ፡ 17 ወበከመ ፡ ፈከረ ፡ ሎሙ ፡ ከማሁ ፡ ኮኖሙ ። ወለሊቀ ፡ መዘርት ፡ አግብኦ ፡ ፈርዖን ፡ ውስተ ፡ ግብሩ ፡ ወለሐባዚሰ ፡ ሰቀሎ ፡ በከመ ፡ ፈከረ ፡ ሎቱ ፡ ዮሴፍ ። 18 ወረስዖ ፡ ሊቀ ፡ መዘርት ፡ ለዮሴፍ ፡ በቤተ ፡ ሞቅሕ ፡ እስመ ፡ አይድዖ ፡ ዘይከውኖ ፡ ወኢተዘከረ ፡ ከመ ፡ ያይድዕ ፡ ለፈርዖን ፡ ዘከመ ፡ ነገሮ ፡ ዮሴፍ ፡ እስመ ፡ ረስዐ ።