መጽሐፈ ኩፋሌ 40

40 1 ወበውእቱ ፡ መዋዕል ፡ ሐለመ ፡ ፈርዖን ፡ ሕልመ ፡ ክልኤተ ፡ በአሐቲ ፡ ሌሊት ፡ በእንተ ፡ ነገረ ፡ ዐባር ፡ ዘይከውን ፡ ዲበ ፡ ኵሉ ፡ ምድር ፡ ወነቅሀ ፡ እምንዋሙ ፡ ወጸውዖሙ ፡ ለኵሎሙ ፡ መፈክራነ ፡ ሕልም ፡ እለ ፡ ውስተ ፡ ግብጽ ፡ ወረቀይት ፡ ወነገሮሙ ፡ ክልኤሆሙ ፡ ሕልሞ ፡ ወኢክህሉ ፡ አእምሮ ። 2 ወእምዝ ፡ ተዘከሮ ፡ ለዮሴፍ ፡ ሊቀ ፡ መዘርት ፡ ወነገረ ፡ በእንቲአሁ ፡ ለንጉሥ ፡ ወአውፅእዎ ፡ እምነ ፡ ቤተ ፡ ሞቅሕ ፡ ወነገረ ፡ በቅድሜሁ ፡ ክልኤሆሙ ፡ ሕለሚሁ ። 3 ወይቤ ፡ በቅድሜሁ ፡ ለፈርዖን ፡ ከመ ፡ ክልኤሆሙ ፡ ሕለሚሁ ፡ አሐዱ ፡ እሙንቱ ። ወይቤሎ ፡ ሰብዐቱ ፡ ዓመት ፡ ይመጽእ ፡ ጽጋብ ፡ ውስተ ፡ ኵሉ ፡ ምድረ ፡ ግብጽ ፡ ወእምድኅረዝ ፡ ሰብዐቱ ፡ ዓመተ ፡ ዐባር ፡ ዘኢኮነ ፡ ከማሁ ፡ ዐባር ፡ ውስተ ፡ ኵሉ ፡ ምድር ። 4 ወይእዜኒ ፡ ይሥራዕ ፡ ፈርዖን ፡ ውስተ ፡ ኵሉ ፡ ምድረ ፡ ግብጽ ፡ ከያደ ፡ ወይዝግቡ ፡ ሲሲተ ፡ ለሀገር ፡ ውስተ ፡ ሀገር ፡ በመዋዕለ ፡ ዓመታት ፡ ዘጽጋብ ፡ ወይከውን ፡ ሲሲተ ፡ ለሰብዐቱ ፡ ዓመታተ ፡ ዐባር ፡ ወኢትትሐጐል ፡ ምድር ፡ እምቅድመ ፡ ገጸ ፡ ዐባር ፡ እስመ ፡ ኀያል ፡ ይከውን ፡ ጥቀ ። 5 ወወሀቦ ፡ እግዚአብሔር ፡ ለዮሴፍ ፡ ሞገሰ ፡ ወምሕረተ ፡ በቅድመ ፡ አዕይንቲሁ ፡ ለፈርዖን ፡ ወይቤ ፡ ፈርዖን ፡ ለላእካኒሁ ፡ ኢንረክብ ፡ ብእሴ ፡ ጠቢበ ፡ ወማእምረ ፡ ዘከመዝ ፡ ብእሲ ፡ እስመ ፡ መንፈሰ ፡ እግዚአብሔር ፡ ምስሌሁ ። 6 ወሤሞ ፡ ዳግመ ፡ ውስተ ፡ ኵሉ ፡ መንግሥቱ ፡ ወአኰነኖ ፡ ውስተ ፡ ኵሉ ፡ ግብጽ ፡ ወአጽዐኖ ፡ ዲበ ፡ ሰረገላሁ ፡ ካዕብ ፡ ዘፈርዖን ፡ 7 ወአልበሶ ፡ ልብሰ ፡ ቢሶስ ፡ ወአዕነቆ ፡ ባዝግና ፡ ወርቅ ፡ ውስተ ፡ ክሳዱ ። ወሰበከ ፡ በቅድሜሁ ፡ ወይቤ ፡ ኢል ፡ ኢል ፡ ወአቢርር ፡ ወወሀቦ ፡ ማዕተበ ፡ ውስተ ፡ እዴሁ ፡ ወአመበሎ ፡ ዲበ ፡ ኵሉ ፡ ቤቱ ፡ ወአዕበዮ ። ወይቤሎ ፡ ኢየዐቢ ፡ እምኔከ ፡ ዘእንበለ ፡ መንበር ፡ ባሕቲቶ ። 8 ወመበለ ፡ ዮሴፍ ፡ ውስተ ፡ ኵሉ ፡ ምድረ ፡ ግብጽ ፡ ወአፍቅርዎ ፡ ኵሎሙ ፡ መኳንንቲሁ ፡ ለፈርዖን ፡ ወኵሎሙ ፡ ላእካኒሁ ፡ ወኵሎሙ ፡ እለ ፡ ይገብሩ ፡ ግብረ ፡ ንጉሥ ። እስመ ፡ በርትዕ ፡ የሐውር ፡ ወአልቦ ፡ ትዕቢተ ፡ ወአዕብዮ ፡ ልብ ፡ ወነሢአ ፡ ገጽ ፡ ወአልቦ ፡ ነሢአ ፡ ሕልያን ፡ እስመ ፡ በርትዕ ፡ ይኴንን ፡ ለኵሉ ፡ አሕዛበ ፡ ምድር ። 9 ወተሰናአወት ፡ ምድረ ፡ ግብድ ፡ በቅድሜሁ ፡ ለፈርዖን ፡ በእንተ ፡ ዮሴፍ ፡ እስመ ፡ እግዚአብሔር ፡ ምስሌሁ ፡ ወወሀቦ ፡ ሞገሰ ፡ ወምሕረተ ፡ ላዕለ ፡ ኵሎሙ ፡ ዘመዱ ፡ በቅድመ ፡ ኵሎሙ ፡ እለ ፡ ያአምርዎ ፡ ወለእለ ፡ ይሰምዑ ፡ ስምዐ ፡ ምስሌሁ ፡ ወረትዐት ፡ መንግሥተ ፡ ፈርዖን ፡ ወአልቦ ፡ ሰይጣነ ፡ ወአልቦ ፡ እኩየ ፡ 10 ወጸውዐ ፡ ንጉሥ ፡ ስሞ ፡ ለዮሴፍ ፡ ስፋንጢፋንስ ። ወወሀቦ ፡ ወለተ ፡ ፉጢፋራን ፡ ብእሲተ ፡ ለዮሴፍ ፡ ወለተ ፡ ሳውዕ ፡ ዘኢሊዮጰሊስ ፡ ሊቀ ፡ መብስላን ፡ 11 ወበዕለተ ፡ ቆመ ፡ ዮሴፍ ፡ ኀበ ፡ ፈርዖን ፡ ወልደ ፡ ሠላሳ ፡ ክረምት ፡ አመ ፡ ቆመ ፡ ቅድመ ፡ ፈርዖን ። 12 ወበውእቱ ፡ ዓመት ፡ ሞተ ፡ ይስሐቅ ፡ ወበጽሐ ፡ በከመ ፡ ነገረ ፡ ዮሴፍ ፡ በእንተ ፡ ፍካሬ ፡ ክልኤቱ ፡ ሕልሙ ፡ ዘከመ ፡ ነገሮ ፡ ወኮነ ፡ ሰብዐቱ ፡ ክረምት ፡ ዘጽጋብ ፡ ውስተ ፡ ኵሉ ፡ ምድረ ፡ ግብጽ ፡ ወፈርየት ፡ ምድረ ፡ ብዙኀ ፡ አሐቲ ፡ መስፈርት ፡ ዐሠርተ ፡ ወሰማኒተ ፡ ምእተ ፡ መሳፍረ ። 13 ወአስተጋብአ ፡ ዮሴፍ ፡ ሲሲተ ፡ ለሀገር ፡ ውስተ ፡ ሀገር ፡ እስከ ፡ መልአ ፡ ሥርናይ ፡ እስከ ፡ ሶበ ፡ ይስእኑ ፡ ኆልቆቶ ፡ ወሰፊረ ፡ እምነ ፡ ብዝኁ ።