መጽሐፈ ኩፋሌ 4

4 1 ወበሣልስ ፡ ሱባዔ ፡ በካልእ ፡ ኢዮቤልዉ ፡ ወለደቶ ፡ ለቃየን ፡ ወበራብዕ ፡ ወለደቶ ፡ ለአቤል ። ወበኃምስ ፡ ወለደታ ፡ ለአዋን ፡ ወለቱ ። 2 ወበቀዳሚሁ ፡ ለኢዮቤልዉ ፡ ሣልስ ፡ ቀተሎ ፡ ቃየን ፡ ወልደ ፡ በታስዕ ፡ ኢዮቤልዉ ፡ በሱባዔ ፡ ቀዳሚ ፡ በሣልስ ፡ ዓመት ፡ በሱባዔሁ ፡ ለዝ ፡ ወጸውዐ ፡ ስሞ ፡ መላልኤል ። 3 ወቀተሎ ፡ በገዳም ፡ ወጸርኀ ፡ ደሙ ፡ እምድር ፡ ውስተ ፡ ሰማይ ፡ እንዘ ፡ ይበኪ ፡ በአንተ ፡ ዘተቀትለ ። 4 ወዘለፎ ፡ እግዚአብሔር ፡ ለቃየን ፡ በእንተ ፡ አቤል ፡ በእንተ ፡ ዘቀተሎ ፡ ወገብረ ፡ ሎቱ ፡ ኑኅ ፡ ዲበ ፡ ምድር ፡ በእንተ ፡ ደመ ፡ እፓኑሁ ፡ ወረገሞ ፡ በዲበ ፡ ምድር ። 5 በእንተ ፡ ዝንቱ ፡ ተጽሕፈ ፡ ውስተ ፡ ጽሳተ ፡ ሰማይ ፡ ርጉም ፡ ዘይዘብጥ ፡ ካልኦ ፡ በእከይ ፡ ወይቤሉ ፡ ኵሎሙ ፡ እለ ፡ ርእዩ ፡ ይኩን ፡ ወሰብእ ፡ ዘርእየ ፡ ወኢነ ፡ ገረ ፡ ይኩን ፡ ርጉመ ፡ ከማሁ ። 6 በእንተዝ ፡ ንሕነ ፡ ናየድዕ ፡ መጺአነ ፡ ቅድመ ፡ እግዚአብሔር ፡ አምሳክነ ፡ ዙሎ ፡ ኃጢአተ ፡ ዘይከውን ፡ ውስተ ፡ ሰማይ ፡ ወምድር ፡ ወዘበብርሃን ፡ ወዘበጽልመት ፡ ወዘበዙሉ ። 7 ወሀለዉ ፡ አዳም ፡ ወብእሲቱ ፡ እንዘ ፡ ይሳሕዉ ፡ በእንተ ፡ አቤል ፡ አርባዕተ ፡ ሱባዔ ፡ ዓመት ። ወበራብዕ ፡ ዓመት ፡ ዘሱባዔ ፡ ኃምስ ፡ ተፈሥሑ ። ወአእመራ ፡ ዳግመ ፡ ለብእሲቱ ፡ ወወለደት ፡ ሎቱ ፡ ወልደ ፡ ወሰመዮ ፡ ስሞ ፡ ሴት ፡ እስመ ፡ ይቤ ፡ አንሥአ ፡ ለነ ፡ እግዚአብሔር ፡ ዘርአ ፡ ውስተ ፡ ምድር ፡ ካልአ ፡ ህየንተ ፡ አቤል ፡ እስመ ፡ ቀተሎ ፡ ቃየን ። 8 በሱባዔ ፡ ሳድስ ፡ ወለዳ ፡ ለአዙራ ፡ ወለቱ ። 9 ወነሥአ ፡ ቃየን ፡ ለአዋን ፡ እኅቱ ፡ ሎቱ ፡ ብእሲተ ፡ ወወለደት ፡ ሎቱ ፡ ኡኖኅሃ ፡ በፍጸሚ ፡ ራብዕ ፡ ኢዮቤልዉ ። ወበአሐዱ ፡ ዓመት ፡ ዘሱባዔ ፡ ቀዳሚ ፡ ኃምስ ፡ ኢዮቤልዉ ፡ ተሐንጹ ፡ አብያት ፡ ውስተ ፡ ምድር ፡ ወሐነጸ ፡ ቃየን ፡ ሀገረ ፡ ወሰመያ ፡ ስማ ፡ በስመ ፡ ወልዱ ፡ ኡኖኅ ። 10 ወአዳም ፡ አእመራ ፡ ለሔዋ ፡ ብእሲቱ ፡ ወወለደት ፡ ዓዲ ፡ ተስዓተ ፡ ደቂቀ ። 11 ወበሱባዔ ፡ ኃምስ ፡ ዘኃምስ ፡ ኢዮቤልዉ ፡ ነሠአ ፡ ሴት ፡ ለአዙራ ፡ እኅቱ ፡ ሎቱ ፡ ብእሲተ ፡ ወበራብዑ ፡ ሎቱ ፡ ወለደት ፡ ሎቱ ፡ ሄኖስሃ ፡ 12 ውእቱ ፡ ቀዳሚ ፡ ጸውዖ ፡ ስመ ፡ እግዚአብሔር ፡ በዲበ ፡ ምድር ። 13 ወበሳብዕ ፡ ኢዮቤልዉ ፡ በሱባዔ ፡ ሣልስ ፡ ነሥአ ፡ ኡኖስ ፡ ኖአምሃ ፡ እኅቶ ፡ ሎቱ ፡ ብእሲተ ፡ ወወለደት ፡ ሎቱ ፡ ወልደ ፡ በሣልስ ፡ ዓመት ፡ ዘኃምስ ፡ ሱባዔ ፡ ወሰመዮ ፡ ስሞ ፡ ቃይ ፡ ናን ። 14 ወበፍጸሜ ፡ ሳምን ፡ ኢዮቤልዉ ፡ ነሥአ ፡ ሎቱ ፡ ቃይናን ፡ ብእሲተ ፡ ሙአሌሊትሃ ፡ እኅቶ ፡ ሎቱ ፡ ብእሲተ ፡ ወወለደት ፡ ሎቱ ፡ ወልደ ፡ በታስዕ ፡ ኢዮቤልዉ ፡ በሱባዔ ፡ ቀዳሚ ፡ በሣልስ ፡ ዓመት ፡ በሱባዔሁ ፡ ለዝ ፡ ወጸውዐ ፡ ስሞ ፡ መሳልኡል ። 15 ወበካልእ ፡ ሱባዔ ፡ ዘዓሥር ፡ ኢዮቤልዉ ፡ ነሥአ ፡ ሎቱ ፡ መላልኤል ፡ ብእሲተ ፡ ዲናሃ ፡ ወለተ ፡ በራክኤል ፡ ወለተ ፡ እኅተ ፡ አቡሁ ፡ ሎቱ ፡ ብእሲተ ። ወወለደት ፡ ሎቱ ፡ ወልደ ፡ በሱባዔ ፡ ሣልስ ፡ በሳድስ ፡ ዓመቱ ፡ ወጸውዐ ፡ ስሞ ፡ ያሬድሃ ፡ እስመ ፡ በመዋዕሊሁ ፡ ወረዱ ፡ መላእክተ ፡ እግዚአብሔር ፡ ውስተ ፡ ምድር ፡ እለ ፡ ተሰምዩ ፡ ትጉሃነ ፡ ከመ ፡ ይምሀርዎሙ ፡ ለደቂቀ ፡ እጓለ ፡ እመሕያው ፡ ወይገብሩ ፡ ፍትሐ ፡ ወርትዐ ፡ በዲበ ፡ ምድር ። 16 ወበዓሥር ፡ ወአሐዱ ፡ ኢዮቤልዉ ፡ ነሥአ ፡ ሎቱ ፡ ያሬድ ፡ ብእሲተ ፡ ወስማ ፡ ባረከ ፡ ወለተ ፡ ራሱእያል ፡ ወለተ ፡ እኅተ ፡ አቡሁ ፡ ሎቱ ፡ ብእሲተ ፡ በሱባዔ ፡ ራብዕ ፡ ዘኢዮቤልዉ ፡ ዝንቱ ። ወወለደት ፡ ሎቱ ፡ ወልደ ፡ በሱባዔ ፡ ኃምስ ፡ በራብዕ ፡ ዓመት ፡ ዘኢዮቤልዉ ፡ ወጸውዐ ፡ ስሞ ፡ ሄኖክ ። 17 ውእቱ ፡ ቀዳሚ ፡ ተምህረ ፡ መጽሐፈ ፡ ወትምህርተ ፡ ወጥበበ ፡ እምእጓለ ፡ እመሕያው ፡ እምእለ ፡ ተወልዱ ፡ ዲበ ፡ ምድር ። ወዘጸሐፈ ፡ ተአምረ ፡ ሰማይ ፡ በከመ ፡ ሥረዓተ ፡ አውራኂሆሙ ፡ ውስተ ፡ መጽሐፍ ። ከመ ፡ ያእምሩ ፡ እጓለ ፡ እመሕያው ፡ ጊዜ ፡ ዓመታት ፡ በከመ ፡ ሥርዐታቲሆሙ ፡ ለለ ፡ ወርኆሙ ። 18 ውእቱ ፡ ቀዳሚ ፡ ጸሐፈ ፡ እምዐ ፡ ወአስምዐ ፡ ለደቂቀ ፡ እጓለ ፡ እመሕያው ፡ ውስተ ፡ ትዝምደ ፡ ምድር ፡ ወሱባዔሆሙ ፡ ለኢዮቤልዉሳት ፡ ነገረ ፡ ወመዋዕለ ፡ ዓመታት ፡ አይድዐ ፡ ወአውራኃተ ፡ ሠርዐ ፡ ወሰንበታተ ፡ ዓመታት ፡ ነገረ ፡ በከመ ፡ አይዳዕናሁ ፡ 19 ወዘኮነ ፡ ወዘይከውን ፡ ርእየ ፡ በራእየ ፡ ንዋሙ ፡ ዘከመ ፡ ይከውን ፡ ዲበ ፡ ደቂቀ ፡ እጓለ ፡ እመሕያው ፡ በትውልዶሙ ፡ እስከ ፡ አመ ፡ ዕለተ ፡ ደይን ፡ ኵሎ ፡ ርእየ ፡ ወአእመረ ። ወጸሐፎ ፡ ስምዐ ፡ ወአንበሮ ፡ ዲበ ፡ ምድር ፡ ላዕለ ፡ ኵሉ ፡ ደቂቀ ፡ እጓለ ፡ እመሕያው ፡ ወለትውልዶሙ ። 20 ወበዐሠርቱ ፡ ወክልኤቱ ፡ ኢዮበቤልዉ ፡ በሳብዕ ፡ ሱባዔሁ ፡ ሎቱ ፡ ነሥአ ፡ ሎቱ ፡ ብእኢተ ፡ ወስማ ፡ እድኒ ፡ ወለተ ፡ ዳንኤል ፡ ወለተ ፡ እኅተ ፡ አቡሁ ፡ ሎቱ ፡ ብእሲተ ። ወበሳድስ ፡ ዓመት ፡ ለሱባዔሁ ፡ ለዝ ፡ ወለደት ፡ ሎቱ ፡ ወልደ ፡ ወጸውዐ ፡ ስሞ ፡ ማቱሳላ ። 21 ወሀሎ ፡ እንከ ፡ ምስለ ፡ መላእክተ ፡ አምላክ ፡ ስድስተ ፡ ዘኢዮቤልዉሳት ፡ ዓመታተ ። ወአርአይዎ ፡ ኵሎ ፡ ዘውስተ ፡ ምድር ፡ ወዘበሰማያት ፡ ስልጣኖ ፡ ለፀሐይ ፡ ወጸሐፈ ፡ ኵሎ ፡ 22 ወአስምዐ ፡ ለትጉሃን ፡ ለእለ ፡ አበሱ ፡ ምስለ ፡ አዋልደ ፡ ሰብእ ። እስመ ፡ አኀዙ ፡ እሉ ፡ ይደመሩ ፡ ከመ ፡ ይርኰሱ ፡ ምስለ ፡ አዋልደ ፡ ምድር ፡ ወአስምዐ ፡ ሄኖክ ፡ ላዕለ ፡ ኵሎሙ ። 23 ወተንሥአ ፡ እማእከለ ፡ ደቂቀ ፡ እጓለ ፡ እመሕያው ፡ ወወሰድናሁ ፡ ውስተ ፡ ገነተ ፡ ኤዶም ፡ ለዕበይ ፡ ወለክብር ። ወናሁ ፡ ውእቱ ፡ በህየ ፡ ይጽሕፍ ፡ ደይነ ፡ ወኵነኔ ፡ ዓለም ፡ ወኵሉ ፡ እከዮሙ ፡ ለደቂቀ ፡ እጓለ ፡ እመሕያው ። 24 ወበእንቲአሁ ፡ ኢመጽአ ፡ ማየ ፡ አይኅ ፡ ዲበ ፡ ኵሉ ፡ ምድረ ፡ ኤዶም ፡ እስመ ፡ ህየ ፡ ተውህበ ፡ ውእቱ ፡ ለትእምርት ፡ ወከመ ፡ ያስምዕ ፡ ላዕለ ፡ ኵሉ ፡ ደቂቀ ፡ ሰብእ ፡ ከመ ፡ ይንግር ፡ ኵሎ ፡ ግብረ ፡ ትውልድ ፡ እስከ ፡ አመ ፡ ዕለተ ፡ ደይን ፡ 25 ወውእቱ ፡ ዐጠነ ፡ ዕጣነ ፡ ምሴተ ፡ መቅደስ ፡ ዘይሰጠው ፡ ቅድመ ፡ እግዚአብሔር ፡ በደብረ ፡ ቀትር ። 26 እስመ ፡ አርባዕቱ ፡ መካን ፡ በዲበ ፡ ምድር ፡ ለእግዚአብሔር ፡ ገነተ ፡ ኤዶም ፡ ወደብረ ፡ ጽባሕ ፡ ወዝደብር ፡ ዘሀሎከ ፡ አንተ ፡ ውስቴቱ ፡ ደብረ ፡ ሲና ፡ ዮም ፡ ወደብረ ፡ ጽዮን ፡ ይትቄደስ ፡ በፍጥረት ፡ ሐዳስ ፡ ለቅዳሴ ፡ ምድር ፡ በእንተዝ ፡ ትትቄደስ ፡ ምድር ፡ እምኵሉ ፡ አበሳ ፡ ወእምርኵሳ ፡ በትውልደ ፡ ዓለም ። 27 ወበኢዮቤልዉ ፡ ዘውእቱ ፡ ዓሥር ፡ ወራብዕ ፡ ኢዮቤልዉ ፡ ነሥአ ፡ ማቱሳላ ፡ እድናሃ ፡ ብእሲቶ ፡ ወለተ ፡ እዝራኤል ፡ ወለተ ፡ እኅተ ፡ አቡሁ ፡ ብእሲተ ፡ ሎቱ ፡ በሱባዔ ፡ ሣልስ ፡ በዓመት ፡ አሐዱ ፡ ዘውእቱ ፡ ዓመት ፡ ወወለደ ፡ ወልደ ፡ ወጸውዐ ፡ ስሞ ፡ ላሜክ ፡ 28 ወበዓሥር ፡ ወኃምስ ፡ ኢዮቤልዉ ፡ በሱባዔ ፡ ሣልስ ፡ ነሥአ ፡ ላሜክ ፡ ብእሲተ ፡ ወስማ ፡ ቤተኖስ ፡ ወለተ ፡ በራክኤል ፡ ወለተ ፡ እኅተ ፡ አቡሁ ፡ ሎቱ ፡ ብእሲተ ፡ ወበዝ ፡ ሱባዔ ፡ ወለደት ፡ ሎቱ ፡ ወልደ ፡ ወጸውዐ ፡ ስሞ ፡ ኖኅ ፡ እንዘ ፡ ይብል ፡ ዘይናዝዘኒ ፡ እምሐዘንየ ፡ ወእምኵሉ ፡ ግብርየ ፡ ወእምድር ፡ እንተ ፡ ረገማ ፡ እግዚአብሔር ። 29 ወበፍጻሜሁ ፡ ለዓሥር ፡ ወታስዕ ፡ ኢዮቤልዉ ፡ በሱባዔ ፡ ሳብዕ ፡ በሳድስ ፡ ዓመቱ ፡ ሎቱ ፡ ሞተ ፡ አዳም ፡ ወቀበርዎ ፡ ኵሎሙ ፡ ደቂቁ ፡ ወስተ ፡ ምድረ ፡ ፍጥረቱ ። ወውእቱ ፡ መቅድመ ፡ ተቀብረ ፡ ውስተ ፡ ምድር ። 30 ወሰብዓ ፡ ዓመተ ፡ አሕጸጸ ፡ እምዐሠርቱ ፡ ምእት ፡ ዓም ፡ እስመ ፡ ዐሠርቱ ፡ ምእት ፡ ዓመት ፡ አሐቲ ፡ ዕለተ ፡ ውስተ ፡ ስምዐ ፡ ሰማያት ። በእንተ ፡ ዝንቱ ፡ ተጽሕፈ ፡ በእንተ ፡ ዕፅ ፡ አእምሮ ፡ እስመ ፡ በዕለተ ፡ ትበልዑ ፡ እምኔሁ ፡ ትመውቱ ። በእንተዝ ፡ ኢፈጸመ ፡ ዓመታተ ፡ ዛቲ ፡ ዕለት ፡ እስመ ፡ ባቲ ፡ ሞተ ። 31 በተፍጻሜቱ ፡ ለዝንቱ ፡ ኢዮቤልዉ ፡ ተቀትለ ፡ ቃየን ፡ እምድኅሬሁ ፡ በአሐዱ ፡ ዓም ፡ ወወድቀ ፡ ቤቱ ፡ ላዕሌሁ ፡ ወሞተ ፡ በማእከለ ፡ ቤቱ ፡ ወተቀትለ ፡ በእበኒሃ ። እስመ ፡ በእብን ፡ ቀተሎ ፡ ለአቤል ፡ ወበእብን ፡ ተቀትለ ፡ በኵነኔ ፡ ጽድቅ ። 32 በእንተዝ ፡ ተሠርዐ ፡ ውስተ ፡ ጽላተ ፡ ሰማይ ፡ በንዋይ ፡ ዘቀተለ ፡ ብእሲ ፡ ቢጾ ፡ ቦቱ ፡ ይትቀትል ፡ በከመ ፡ አቍሰሎ ፡ ከማሁ ፡ ይግበሩ ፡ ሎቱ ። 33 ወበዕሥራ ፡ ወኃምስ ፡ ኢዮቤልዉ ፡ ነሥአ ፡ ሎቱ ፡ ኖኅ ፡ ብእሲተ ፡ ወስማ ፡ ዕምዛራ ፡ ወለተ ፡ ራኪኤል ፡ ወለተ ፡ እኅቱ ፡ ሎቱ ፡ ብእሲተ ። በቀዳሚ ፡ ዓመት ፡ በሱባዔ ፡ ኃምስ ፡ ወበሣልስ ፡ ዓመቱ ፡ ወለደት ፡ ሎቱ ፡ ሴምሃ ። ወበኃምስ ፡ ዓመቱ ፡ ወለደት ፡ ሎቱ ፡ ካምሃ ። ወበዓመት ፡ ቀዳሚ ፡ በሱባዔ ፡ ሳድስ ፡ ወለደት ፡ ሎቱ ፡ ያፌትሃ ።