መጽሐፈ ኩፋሌ 5

5 1 ወኮነ ፡ አመ ፡ ወጠኑ ፡ ደቂቀ ፡ እጓለ ፡ እመሕያው ፡ ይብዝኁ ፡ ዲበ ፡ ገጸ ፡ ኵላ ፡ ምድር ፡ ወአዋልድ ፡ ተወልዳ ፡ ሎሙ ። ወርእይዎን ፡ መላእክተ ፡ እግዚአብሔር ፡ በአሐቲ ፡ ዘኢዮቤልዉ ፡ ዝንቱ ፡ እስመ ፡ ሠናያት ፡ ለርኢይ ፡ እማንቱ ፡ ወነሥእዎን ፡ ሎቶን ፡ ሎሙ ፡ አንስትያ ፡ እምኵሎን ፡ እለ ፡ ኀረዩ ፡ ወወለዳ ፡ ሎሙ ፡ ውሉደ ፡ ወእሙንቱ ፡ ረዓይት ። 2 ወልህቀት ፡ ዐመፃ ፡ ዲበ ፡ ምድር ፡ ወኵሉ ፡ ዘሥጋ ፡ አማሰነት ፡ ፍኖታ ፡ እምሰብእ ፡ እስከ ፡ እንስሳ ፡ ወእስከ ፡ አራዊት ፡ ወእስከ ፡ አዕዋፍ ፡ ወእስከ ፡ ኵሉ ፡ ዘያንሶሱ ፡ ውስተ ፡ ምድር ፡ ኵሎሙ ፡ አማሰኑ ፡ ፍኖቶሙ ፡ ወሥርዓቶሙ ። ወአኀዙ ፡ ይትባልዑ ፡ በበይናቲሆሙ ፡ ወዐመፃ ፡ ልህቀት ፡ ዲበ ፡ ምድር ፡ ወኵሉ ፡ ኅሊና ፡ አእምሮ ፡ ለኵሎሙ ፡ እጓለ ፡ እመሕያው ፡ ከመዝ ፡ እኵይ ፡ ኵሎ ፡ መዋዕለ ። 3 ወርእያ ፡ እግዚአብሔር ፡ ለምድር ፡ ወናሁ ፡ ማሰነት ፡ ወአማሰነት ፡ ኵላ ፡ ዘሥጋ ፡ ሥርዓታ ፡ ወአእከዩ ፡ ኵሎሙ ፡ ቅድመ ፡ አዕይንቲሁ ፡ ኩሉ ፡ ዘሀሎ ፡ ውስተ ፡ ምድር ። 4 ወይቤ ፡ ይደመስሶ ፡ ለሰብእ ፡ ወኵሉ ፡ ዘሥጋ ፡ ዘመልዕልተ ፡ ገጸ ፡ ምድር ፡ ዘፈጠረ ። 5 ወኖኅ ፡ ባሕቲቱ ፡ ረከበ ፡ ሞገሰ ፡ በቅድመ ፡ አዕይንቲሁ ። 6 ወዲበ ፡ መላእክቲሁ ፡ እለ ፡ ፈነወ ፡ ውስተ ፡ ምድር ፡ ተምዐ ፡ ፈድፋደ ፡ ይሠርዎሙ ፡ እምኵሉ ፡ ሥልጣኖሙ ። ወይቤለነ ፡ ከመ ፡ ንእስሮሙ ፡ ውስተ ፡ መዓምቅቲሃ ፡ ለምድር ። ወናሁ ፡ እሙንቱ ፡ እሱራን ፡ ማእከሎሙ ፡ ወብሕትዋን ። 7 ወዲበ ፡ ውሉዶሙ ፡ ወፅአ ፡ ቃል ፡ እምቅድመ ፡ ገጹ ፡ ከመ ፡ ይምሐፆሙ ፡ በሰይፍ ፡ ወያሰስሎሙ ፡ እምታሕተ ፡ ሰማይ ፡ 8 ወይቤ ፡ ኢይነብር ፡ መንፈስየ ፡ ዲበ ፡ ሰብእ ፡ ለዓለም ፡ እስመ ፡ እሙንቱ ፡ ሥጋ ፡ ወይኩን ፡ መዋዕሊሆሙ ፡ ምእት ፡ ወዕሥራ ፡ ዓመት ። 9 ወፈነወ ፡ ሰይፎ ፡ ማእከሎሙ ፡ ከመ ፡ ይቅትሉ ፡ አሐዱ ፡ ቢጾሙ ። ወወጠኑ ፡ ይቅትሉ ፡ ዝንቱ ፡ ዘንተ ፡ እስከ ፡ ወድቁ ፡ ኵሎሙ ፡ ውስተ ፡ ሰይፍ ፡ ወተደምሰሱ ፡ እምነ ፡ ምድር ፡ 10 ወአበዊሆሙሰ ፡ ይኔጽሩ ፡ ወእምድኅረዝ ፡ ተአስሩ ፡ ውስተ ፡ መዓምቅቲሃ ፡ ለምድር ፡ እስከ ፡ ዕለተ ፡ ደይን ፡ ዐባይ ፡ ለከዊነ ፡ ኵነኔ ፡ ዲበ ፡ ኵሎሙ ፡ እለ ፡ አማሰኑ ፡ ፍናዊሆሙ ፡ ወምግባሪሆሙ ፡ ቅድመ ፡ እግዚአብሔር ። 11 ወደምሰሰ ፡ ኵሎ ፡ እመካኖሙ ፡ ወኢተርፈ ፡ አሐዱ ፡ እምኔሆሙ ፡ ዘኢኰነነ ፡ በኵሉ ፡ እከዮሙ ፡ 12 ወገብረ ፡ ለኵሉ ፡ ግብሩ ፡ ፍጥረተ ፡ ሐዳሰ ፡ ወጻድቅተ ፡ ከመ ፡ ኢየአብሱ ፡ በኵሉ ፡ ፍጥረቶሙ ፡ እስከ ፡ ለዓለም ። ወይጸድቅ ፡ ኵሉ ፡ በበ ፡ ትዝምዱ ፡ ኵሎ ፡ መዋዕለ ። 13 ወኵነኔ ፡ ኵሎሙ ፡ ተሠርዐ ፡ ወተጽሕፈ ፡ ውስተ ፡ ጽላተ ፡ ሰማይ ፡ ወአልቦ ፡ ዐመፃ ። ወኵሎሙ ፡ እለ ፡ ይትዐደዉ ፡ እምፍኖቶሙ ፡ በእንተ ፡ ተሠርዐት ፡ ሎሙ ፡ ከመ ፡ ይሖሩ ፡ ባቲ ። ወለእመ ፡ ኢሖሩ ፡ ባቲ ፡ ተጽሕፈ ፡ ኵነኔ ፡ ለኵሉ ፡ ፍጥረት ፡ ወለኵሉ ፡ ትዝምድ ፡ 14 ወአልቦ ፡ ምንተኒ ፡ ዘበሰማይ ፡ ወዘበምድር ፡ ወውስተ ፡ ብርሃን ፡ ወውስተ ፡ ጽልመት ፡ ወበሲኦል ፡ ወውስተ ፡ ቀላይ ። ወውስተ ፡ መጽልም ፡ ወኵሉ ፡ ኵነኔሆሙ ፡ ሥሩዕ ፡ ወጽሑፍ ፡ ወቍሩጽ ፡ 15 በእንተ ፡ ኵሉ ፡ ለዐቢይ ፡ በከመ ፡ ዕበዩ ፡ ወለንኡስሂ ፡ በከመ ፡ ንእሱ ፡ ወለለ ፡ አሐዱ ፡ በከመ ፡ ፍኖቱ ፡ ይኴንኖ ። 16 ወኢኮነ ፡ ውእቱ ፡ ዘይነሥእ ፡ ገጸ ፡ ወኢኮነ ፡ ውእቱ ፡ ዘይነሥእ ፡ ሕልያነ ፡ እመ ፡ ይቤ ፡ ይግበር ፡ ኵነኔ ፡ ለለ ፡ አሐዱ ፡ ወአሐዱ ፡ እመ ፡ ወሀበ ፡ ኵሎ ፡ ዘውስተ ፡ ምድር ፡ ኢይነሥእ ፡ ገጸ ፡ ወኢይትሜጠው ፡ እምኔሁ ፡ እስመ ፡ መኰንነ ፡ ጽድቅ ፡ ውእቱ ። 17 ወዲበ ፡ ደቂቀ ፡ እስራኤል ፡ ተጽሕፈ ፡ ወተሠርዐ ፡ እመ ፡ ተመይጡ ፡ ኀቤሁ ፡ በጽድቅ ፡ የኀድግ ፡ ኵሎ ፡ አበሳሆሙ ፡ ወይሰሪ ፡ ኵሎ ፡ ኀጢአቶሙ ፡ 18 ተጽሕፈ ፡ ወተሠርዐ ፡ ይትመሐር ፡ ለኵሉ ፡ እለ ፡ ይትመየጡ ፡ እምኵሉ ፡ ጌጋዮሙ ። ምዕረ ፡ ለዓመት ፡ 19 ወዲበ ፡ ኵሎሙ ፡ እለ ፡ አማሰኑ ፡ ፍናዊሆሙ ፡ ወምክሮሙ ፡ እምቅድመ ፡ አይኅ ፡ ኢተንሥአ ፡ ገጾሙ ፡ ዘእንበለ ፡ ለኖኅ ፡ ባሕቲቱ ፡ እስመ ፡ ተንሥአ ፡ ሎቱ ፡ ገጹ ፡ በእንተ ፡ ውሉዱ ፡ እለ ፡ አድኀኖሙ ፡ እምነ ፡ ማየ ፡ አይኅ ፡ በእንቲአሁ ፡ እስመ ፡ ጻድቅት ፡ ይእቲ ፡ ልቡ ፡ በኵሉ ፡ ፍናዊሁ ። በከመ ፡ እዙዝ ፡ በእንቲአሁ ፡ ወኢተዐደወ ፡ እምኵሉ ፡ ዘሥሩዕ ፡ ሎቱ ። 20 ወይቤ ፡ እግዚአብሔር ፡ ይደመስስ ፡ ኵሉ ፡ ዘዲበ ፡ የብስ ፡ እምሰብእ ፡ እስከ ፡ እንስሳ ፡ እስከ ፡ አራዊት ፡ ወእስከ ፡ አዕዋፍ ፡ ወእስከ ፡ ዘይትሐወስ ፡ ዲበ ፡ ምድር ። 21 ወአዘዞ ፡ ለኖኅ ፡ ይግበር ፡ ሎቱ ፡ ታቦተ ፡ ከመ ፡ ያድኅኖ ፡ እምነ ፡ ማየ ፡ አይኅ ። 22 ወገብረ ፡ ኖኅ ፡ ታቦተ ፡ በኵሉ ፡ በከመ ፡ አዘዞ ፡ በክልኤቱ ፡ ኢዮቤልዉ ፡ ዓመታት ፡ በኃምስ ፡ ሱባዔ ፡ በኃምስ ፡ ዓመቱ ። 23 ወቦአ ፡ በሳድስ ፡ ሎቱ ፡ በካልእ ፡ ወርኅ ፡ በሠርቁ ፡ ለካልእ ፡ ወርኅ ፡ እስከ ፡ አመ ፡ ዐሡሩ ፡ ወሰዱሱ ፡ ቦአ ፡ ውእቱ ፡ ወኵሉ ፡ ዘአባእነ ፡ ሎቱ ፡ ወስተ ፡ ታቦት ። ወዐጸዎ ፡ እግዚአብሔር ፡ እንተ ፡ አፍኣሁ ፡ በዐሡሩ ፡ ወሰቡዑ ፡ ምሴት ። 24 ወአርኀወ ፡ እግዚአብሔር ፡ ሰብዓተ ፡ መንበሕባሕተ ፡ ሰማይ ፡ ወአፈወ ፡ አንቅዕተ ፡ ቀላይ ፡ ዐቢይ ፡ በሰብዑ ፡ አፈው ፡ በኆልቍ ። 25 ወአኀዙ ፡ መንበሕባሕት ፡ ያውርዱ ፡ ማየ ፡ እምሰማይ ፡ አርብዓ ፡ መዋዕለ ፡ ወአርብዓ ፡ ለያልየ ። ወአንቅዕተ ፡ ቀላይሂ ፡ ያዐርጉ ፡ ማያተ ፡ እስከ ፡ ሶበ ፡ መልአ ፡ ኩሉ ፡ ዓለም ፡ ማየ ፡ 26 ወልህቅ ፡ ማያት ፡ ዲበ ፡ ምድር ፡ ዐሠርተ ፡ ወኃምስተ ፡ በእመት ፡ ተለዐለ ፡ ማያት ፡ ዲበ ፡ ኵሉ ፡ ደብር ፡ ነዋኅ ፡ ወተለዐለት ፡ ታቦት ፡ እምዲበ ፡ ምድር ፡ ወታንሶሱ ፡ ዲበ ፡ ገጸ ፡ ማያት ። 27 ወሀሎ ፡ ማያት ። 27 ወሀሎ ፡ ማያት ፡ ይቀውም ፡ ዲበ ፡ ገጸ ፡ ምድር ፡ ኃምስተ ፡ አውራኀ ፡ ምእተ ፡ ወኃምሳ ፡ ዕለተ ፡ 28 ወሖረት ፡ ታቦት ፡ ወአዕረፈት ፡ ዲበ ፡ ርእሰ ፡ ሉባር ፡ አሐዱ ፡ እምአድባር ፡ አራራት ። 29 ወበወርኅ ፡ ራብዕ ፡ ተፈጸመ ፡ አንቅዕተ ፡ ቀላይ ፡ ዐቢይ ፡ ወመንበሕባሕተ ፡ ሰማይኒ ፡ ተእኅዘ ። ወበሠርቀ ፡ ወርኅ ፡ ሳብዕ ፡ ተርኅወ ፡ ኵሉ ፡ አፈወ ፡ መዓምቅተ ፡ ምድር ፡ ወአኀዘ ፡ ማያት ፡ ይረድ ፡ ውስተ ፡ ቀላይ ፡ ታሕቲት ። 30 ወበሠርቀ ፡ ወርኅ ፡ ዓሥር ፡ አስተርአየ ፡ አርእስተ ፡ አድባር ። ወበሠርቁ ፡ ለወርኅ ፡ ቀዳሚ ፡ አስተርአየት ፡ ምድር ፡ 31 ወነጸፈ ፡ ማያት ፡ እመልዕልተ ፡ ምድር ። በሱባዔ ፡ ኃምስ ፡ በሳብዕ ፡ ዓመቱ ፡ ሎቱ ፡ ወአመ ፡ ዓሡሩ ፡ ወሰቡዑ ፡ ዕለት ፡ ለካልእ ፡ ወርኅ ፡ የብሰት ፡ ምድር ። 32 ወአመ ፡ ዕሥራ ፡ ወሰቡዑ ፡ ሎቱ ፡ አርኀዋ ፡ ለታቦት ፡ ወፈነወ ፡ እምውስቴታ ፡ አራዊተ ፡ ወአዕዋፈ ፡ ወዘይትሐወስ ።