መጽሐፈ ኩፋሌ 41

41 1 ወበአርብ ፡ ወኀምስቱ ፡ ኢዮቤልዉ ፡ ወዳግም ፡ ሱባዔ ፡ በዓመት ፡ ካልእ ፡ ነሥአ ፡ ይሁዳ ፡ ለዔር ፡ በኵሩ ፡ ብእሲተ ፡ እምነ ፡ አዋልደ ፡ አራም ፡ ወስማ ፡ ትዕማር ። 2 ወጸልአ ፡ ወኢሰከበ ፡ ምስሌሃ ፡ እስመ ፡ እምአዋልደ ፡ ከናአን ፡ እሙ ፡ ወፈቀደ ፡ ይንሣእ ፡ ሎቱ ፡ ብእሲተ ፡ እምነገደ ፡ እሙ ፡ ወኢአብሖ ፡ ይሁዳ ፡ አቡሁ ። 3 ወውእቱ ፡ ዔር ፡ በኵሩ ፡ ለይሁዳ ፡ እኩይ ፡ ወቀተሎ ፡ እግዚአብሔር ። 4 ወይቤ ፡ ይሁዳ ፡ ለአውናን ፡ እኁሁ ፡ ባእ ፡ ኀበ ፡ ብእሲተ ፡ እኁሁ ፡ ወረስያ ፡ ኑዕልተ ፡ ወአንሥእ ፡ ዘርአ ፡ ለእኁከ ። 5 ወአእመረ ፡ አውናን ፡ ከመ ፡ ኢኮነ ፡ ዘዚአሁ ፡ ዘርእ ፡ ክመ ፡ ዘእኁሁ ። ወቦአ ፡ ቤተ ፡ ብእሲተ ፡ እኁሁ ፡ ወከዐወ ፡ ዘርአ ፡ ውስተ ፡ ምድር ። ወእኩየ ፡ ኮነ ፡ በቅድመ ፡ አዕይንተ ፡ እግዚአብሔር ፡ ወቀተሎ ። 6 ወይቤ ፡ ይሁዳ ፡ ለትዕማር ፡ መርዓቱ ፡ ንበሪ ፡ ቤተ ፡ አቡኪ ፡ እንዘ ፡ ትመዐስቢ ፡ እስከ ፡ አመ ፡ ይልህቅ ፡ ሴሎም ፡ ወልድየ ፡ ወእሁበኪ ፡ ሎቱ ፡ ብእሲተ ። 7 ወልህቀ ፡ ወኢኀደገት ፡ ቤድሱኤል ፡ ብእሲተ ፡ ይሁዳ ፡ ሴሎምሃ ፡ ወልዳ ፡ ከመ ፡ ያውስብ ። ወሞተት ፡ ቤድሱኤል ፡ ብእሲተ ፡ ይሁዳ ፡ በዓመት ፡ ኃምስ ፡ ዘዝ ፡ ሱባዔ ። 8 ወበሳድስ ፡ ዓመቱ ፡ ዐርገ ፡ ይሁዳ ፡ ይቅርጽ ፡ አባግዒሁ ፡ በቴምናታ ። ወነገርዋ ፡ ለትዕማር ፡ ናሁ ፡ ሐሙኪ ፡ የዐርግ ፡ ይቅርጽ ፡ አባግዒሁ ፡ በቴምናታ ። 9 ወአንበረት ፡ አልባሰ ፡ ምዕስብናሃ ፡ ወለብሰት ፡ ግልባቤ ፡ ወተሠነየት ፡ ወነበረት ፡ ውስተ ፡ አንቀጽ ፡ እንተ ፡ መንገለ ፡ ፍኖተ ፡ ቴምናታ ። 10 ወእንዘ ፡ የሐውር ፡ ይሁዳ ፡ ረከባ ፡ ወተሐዘባ ፡ ከመ ፡ ዘማዊት ፡ ወይቤላ ፡ እባእ ፡ ኀቤኪ ፡ ወትቤሎ ፡ ባእ ፡ ወቦአ ። 11 ወትቤሎ ፡ ሀበኒ ፡ ደነስየ ፡ ወይቤላ ፡ አልብየ ፡ ውስተ ፡ እዴየ ፡ ዘእንበለ ፡ ሕልቀት ፡ ዘአጽባዕትየ ፡ ወድጕልማየ ፡ ወበትርየ ፡ ዘውስተ ፡ እዴየ ፡ 12 ወትቤሎ ፡ ሀበኒ ፡ ኪያሆሙ ፡ እስከ ፡ ሶበ ፡ ትፌኑ ፡ ሊተ ፡ ደነስየ ። ወይቤላ ፡ አነ ፡ እፌኑ ፡ ለኪ ፡ መሕስአ ፡ ጠሊ ፡ ወወሀባ ፡ ኪያሆሙ ፡ ላቲ ፡ [ወሀሎ ፡ ምስሌሃ] ፡ ወጸንሰት ፡ ሎቱ ። 13 ወሖረ ፡ ይሁዳ ፡ ውስተ ፡ አባግዒሁ ፡ ወይእቲኒ ፡ ሖረት ፡ ቤተ ፡ አቡሃ ። 14 ወፈነወ ፡ ይሁዳ ፡ መሕስአ ፡ በእደ ፡ ኖላዊሁ ፡ አዶላማዊ ፡ ወኀጥአ ፡ ወተስእሎሙ ፡ ለሰብአ ፡ ብሔር ፡ እንዘ ፡ ይብል ፡ አይቴ ፡ ሀለወት ፡ ዘማዊት ፡ እንተ ፡ ዝየ ፡ ወይቤልዎ ፡ አልቦ ፡ ዝየስ ፡ ዘማዊት ፡ ወአልብነ ፡ ኀቤነ ፡ ዘማዊተ ፡ 15 ወገብአ ፡ ወአይድዖ ፡ ከመ ፡ ኀጥአ ፡ ወይቤሎ ፡ ተስእልኩ ፡ ሰብአ ፡ ብሔርኒ ፡ ወይቤሉኒ ፡ አልቦ ፡ ዝየስ ፡ ዘማዊተ ። ወይቤ ፡ ተንሥእ ፡ ከመ ፡ ኢንኩን ፡ ለስላቅ ። 16 ወእንዘ ፡ አእከለት ፡ ሠለስተ ፡ አውራኀ ፡ ተዐውቀት ፡ ከመ ፡ ፀንሰት ፡ ይእቲ ። ወነገርዎ ፡ ለይሁዳ ፡ እንዘ ፡ ይብሉ ፡ ናሁ ፡ ትዕማር ፡ መርዐትከ ፡ ፀንሰት ፡ በዝሙት ። 17 ወሖረ ፡ ይሁዳ ፡ ቤተ ፡ አቡሃ ፡ ወይቤሎሙ ፡ ለአቡሃ ፡ ወለአኀዊሃ ፡ አውፅእዋ ፡ ወያውዕይዋ ፡ እስመ ፡ ገብረት ፡ ርኵሰ ፡ በውስተ ፡ እስራኤል ። 18 ወኮነ ፡ ሶበ ፡ አውፅእዋ ፡ ከመ ፡ ያውዕይዋ ፡ ፈነወት ፡ ለሐሙሃ ፡ ሕልቀተ ፡ ወድጕልማ ፡ ወበትረ ፡ ወትቤ ፡ አእምርአ ፡ ዘመኑአ ፡ ዝንቱአ ፡ እስመአ ፡ ሎቱአ ፡ ፀነስኩአ ። 19 ወአእመረ ፡ ይሁዳ ፡ ወይቤ ፡ ጸድቀት ፡ ትዕማር ፡ እምኔየ ፡ ወኢያውዕይዋ ፡ እንከ ፡ 20 ወበእንተዝ ፡ ኢተውህበት ፡ ለሴሎም ፡ ወኢደገመ ፡ እንከ ፡ ቀሪቦታ ። 21 ወእምዝ ፡ ፀንሰት ፡ ወወለደት ፡ ክልኤተ ፡ ደቀ ፡ ፋሬስሃ ፡ ወዛራሃ ፡ በዓመት ፡ ሳብዕ ፡ ዘዝንቱ ፡ ሱባዔ ፡ ዘዳግም ፡ 22 ወእምዝ ፡ ተፈጸመ ፡ ሰብዐቱ ፡ ዓመት ፡ ዘሰምር ፡ ዘይቤሎ ፡ ዮሴፍ ፡ ለፈርዖን ። 23 ወአእመረ ፡ ይሁዳ ፡ ከመ ፡ እኩይ ፡ ግብር ፡ ዘገብረ ፡ እስመ ፡ ሰከበ ፡ ምስለ ፡ መርዓቱ ፡ ወአስተሐሠመ ፡ በቅድመ ፡ አዕይንቲሁ ፡ ወአእመረ ፡ ከመ ፡ አበሰ ፡ ወስሕተ ፡ እስመ ፡ ከሠተ ፡ ክድነተ ፡ ወልዱ ፡ ወአኀዘ ፡ ይላሑ ፡ ወይትመሐለል ፡ ቅድመ ፡ እግዚአብሔር ፡ በእንተ ፡ አበሳሁ ። 24 ወነገርናሁ ፡ በሕልም ፡ ከመ ፡ ይሰረይ ፡ ሎቱ ፡ እስመ ፡ ተማሕለለ ፡ ጥቀ ፡ ወእስመ ፡ ላሐወ ፡ ወኢገብረ ፡ እንከ ፡ 25 ወኮነ ፡ ሎቱ ፡ ስርየት ፡ እስመ ፡ ተመይጠ ፡ እምኀጢአቱ ፡ ወእምኢያእምሮቱ ፡ እስመ ፡ ዐቢይ ፡ አበሳ ፡ አምላክነ ። ወኵሉ ፡ ዘይገብር ፡ ከመዝ ፡ ኵሉ ፡ ዘይሰክብ ፡ ምስለ ፡ ሐማቱ ፡ ያውዕይዎ ፡ በእሳት ፡ ከመ ፡ የዐይ ፡ ቦቱ ፡ እስመ ፡ ርኵስ ፡ ወግማኔ ፡ ኮነ ፡ ላዕሌሆሙ ፡ በእሳት ፡ ያውዕይዎሙ ። 26 ወአንተኒ ፡ አዝዞሙ ፡ ለውሉደ ፡ እስራኤል ፡ ወኢይኩን ፡ ርኵስ ፡ በማእከሎሙ ፡ እስመ ፡ ኵሉ ፡ ዘይሰክብ ፡ ምስለ ፡ መርዓቱ ፡ ወምስለ ፡ ሐማቱ ፡ ርኵሰ ፡ ገብረ ፡ በእሳት ፡ ያውዕዩ ፡ ብእሴ ፡ ዘሰከበ ፡ ምስሌሃ ፡ ወብእሲተኒ ፡ ወየኀድግ ፡ መዓተ ፡ ወመቅሠፍተ ፡ እምእስራኤል ። 27 ወለይሁዳኒ ፡ ነገርናሁ ፡ ከመ ፡ ኢሰከቡ ፡ ምስሌሃ ፡ ክልኤሆሙ ፡ ደቂቁ ። በእንተዝ ፡ ቆመ ፡ ዘርኡ ፡ ለካልእ ፡ ነገድ ። ወኢይሤረዉ ፡ 28 እስመ ፡ በየውሀተ ፡ አዕይንቲሁ ፡ ሖረ ፡ ወኀሠሠ ፡ ኵነኔ ፡ እስመ ፡ እምፍትሐ ፡ አብርሃም ፡ ዘአዘዞሙ ፡ ለውሉዱ ፡ ፈቀደ ፡ ይሁዳ ፡ ያውዕያ ፡ በእሳት ።