መጽሐፈ ኩፋሌ 46

46 1 ወኮነ ፡ እምድኅረ ፡ ሞተ ፡ ያዕቆብ ፡ በዝኁ ፡ ውሉደ ፡ እስራኤል ፡ በምድረ ፡ ግብጽ ፡ ወኮኑ ፡ ሕዝበ ፡ ብዙኀ ፡ ወኮኑ ፡ ኵሎሙ ፡ ዕሩያነ ፡ በልቦሙ ፡ ከመ ፡ ያፍቅር ፡ እኅው ፡ እኅዋሁ ፡ ወከመ ፡ ይትራዳእ ፡ ብእሲ ፡ ምስለ ፡ እኁሁ ፡ ወበዝኁ ፡ ወፈድፋዱ ፡ ጥቀ ። ወዐሠርተ ፡ ሱባዔ ፡ ዓመታት ፡ ኵሎ ፡ መዋዕለ ፡ ሕይወቱ ፡ ለዮሴፍ ። 2 ወአልቦ ፡ ሰይጣነ ፡ ወአልቦ ፡ ምንተኒ ፡ እኩየ ፡ ኵሎ ፡ መዋዕለ ፡ ሕይወቱ ፡ ለዮሴፍ ፡ እለ ፡ ሐይወ ፡ እምድኅረ ፡ አቡሁ ፡ ያዕቆብ ። እስመ ፡ ኵሎሙ ፡ ግብጽ ፡ ያከብርዎሙ ፡ ለውሉደ ፡ እስራኤል ፡ ኵሎ ፡ መዋዕለ ፡ ሕይወቱ ፡ ለዮሴፍ ፡ 3 ወሞተ ፡ ዮሴፍ ፡ ወልደ ፡ ምእት ፡ ወዐሠርቱ ፡ ዓመት ፡ ወዐሠርተ ፡ ወሰብዐተ ፡ ዓመተ ፡ ነበረ ፡ ምድረ ፡ ከናአን ፡ ወዐሠርተ ፡ ዓመተ ፡ ነበረ ፡ እንዘ ፡ ይትቀነይ ። ወሠለስተ ፡ ዓመተ ፡ ውስተ ፡ ቤተ ፡ ሞቅሕ ፡ ወሰማንያ ፡ ዓመተ ፡ እምታሕተ ፡ ንጉሥ ፡ እንዘ ፡ ይኴንን ፡ ኵላ ፡ ምድረ ፡ ግብጽ ፡ 4 ወሞተ ፡ ወኵሎሙ ፡ አኀዊሁ ፡ ወኵላ ፡ ይእቲ ፡ ትውልድ ፡ 5 ወአዘዞሙ ፡ ለውሉደ ፡ እስራኤል ፡ ዘእንበለ ፡ ይሙት ፡ ከመ ፡ ይሰዱ ፡ አዕጽምቲሁ ፡ በመዋዕል ፡ አመ ፡ ይወፅኡ ፡ እምድረ ፡ ግብጽ ። 6 ወአምሐሎሙ ፡ በእንተ ፡ አዕጽምቲሁ ፡ እስመ ፡ አእመረ ፡ ከመ ፡ ኢይደግሙ ፡ ግብጽ ፡ አውፅኦቶ ፡ ወቀቢሮቶ ፡ በዕለት ፡ በምድረ ፡ ከናአን ። እስመ ፡ ማከማሮን ፡ ንጉሠ ፡ ከናአን ፡ እንዘ ፡ የኀድር ፡ ምድረ ፡ አሱር ፡ ተቃተለ ፡ በቈላ ፡ ምስለ ፡ ንጉሠ ፡ ግብጽ ፡ ወቀተሎ ፡ በህየ ። ወዴገኖሙ ፡ ድኅሬሆሙ ፡ ለግብጽ ፡ እስከ ፡ አንቀጸ ፡ ኤርሞን ፡ 7 ወስእነ ፡ በዊአ ፡ እስመ ፡ ነግሠ ፡ ካልእ ፡ ሐዲስ ፡ ንጉሥ ፡ ለግብጽ ፡ ወኀየለ ፡ እምኔሁ ፡ ወገብአ ፡ ምድረ ፡ ከናአን ፡ ወተዐጽወ ፡ አናቅጸ ፡ ግብጽ ፡ ወአልቦ ፡ ዘይወፅእ ፡ ወአልቦ ፡ ዘይበውእ ፡ ውስተ ፡ ግብጽ ። 8 ወሞተ ፡ ዮሴፍ ፡ በዘ ፡ አርብዓ ፡ ወስድስቱ ፡ ኢዮቤልዉ ፡ በሱባዔ ፡ ሳድስ ፡ በካልእ ፡ ዓመቱ ፡ ወቀበርዎ ፡ ውስተ ፡ ምድረ ፡ ግብጽ ፡ ወሞቱ ፡ ኵሎሙ ፡ አኀዊሁ ፡ እምድኅሬሁ ። 9 ወወፅአ ፡ ንጉሠ ፡ ግብጽ ፡ ከመ ፡ ይትቃተል ፡ ምስለ ፡ ንጉሠ ፡ ከናአን ፡ በዘ ፡ አርብዓ ፡ ወሰብዐቱ ፡ ኢዮቤልዉ ፡ በዳግም ፡ ሱባዔ ፡ በካልእ ፡ ዓመቱ ። ወአውፅኡ ፡ ውሉደ ፡ እስራኤል ፡ አዕጽምቲሆሙ ፡ ለውሉደ ፡ ያዕቆብ ፡ ኵሎ ፡ ዘእንበለ ፡ አዕጽምተ ፡ ዮሴፍ ፡ ወቀበርዎ ፡ ውስተ ፡ ገዳም ፡ ውስተ ፡ በአት ፡ ዘካዕበት ፡ ውስተ ፡ ደብር ። 10 ወገብኡ ፡ ብዙኃን ፡ ውስተ ፡ ግብጽ ፡ ወኅዳጣን ፡ ተርፉ ፡ እምኔሆሙ ፡ ውስተ ፡ ደብረ ፡ ኬብሮን ፡ ወተረፈ ፡ አብራም ፡ አቡከ ፡ ምስሌሆሙ ። 11 ወሞአ ፡ ንጉሠ ፡ ከናአን ፡ ለንጉሠ ፡ ግብጽ ፡ ወዐጸወ ፡ አናቅጸ ፡ ግብጽ ፡ 12 ወኀለየ ፡ ኅሊና ፡ እኩየ ፡ ላዕለ ፡ ውሉደ ፡ እስራኤል ፡ ከመ ፡ ያሕምሞሙ ፡ ወይቤሎሙ ፡ ለሰብአ ፡ ግብጽ ፡ 13 ናሁ ፡ ሕዝበ ፡ ውሉደ ፡ እስራኤል ፡ ልህቁ ፡ ወበዝኁ ፡ እምኔነ ፡ ንዑ ፡ ንጠበብ ፡ ላዕሌሆሙ ፡ ዘእንበለ ፡ ይብዝኁ ፡ ወናሕምሞሙ ፡ በቅኔ ፡ ዘእንበለ ፡ ይምጽአነ ፡ ቀትል ፡ ወእሙንቱኒ ፡ ዘእንበለ ፡ ይፅብኡነ ፡ ወእመ ፡ አኮሰ ፡ እሙንቱኒ ፡ ይዴመሩ ፡ ምስለ ፡ ፀር ፡ ወይወፅኡ ፡ እምድርነ ፡ እስመ ፡ ልቦሙ ፡ ወገጾሙ ፡ ውስተ ፡ ምድረ ፡ ከናአን ፡ 14 ወሠርዐ ፡ ላዕሌሆሙ ፡ ሊቃነ ፡ ገባር ፡ ከመ ፡ ያሕምምዎሙ ፡ በቅኔ ። ወሐነጹ ፡ አህጉረ ፡ ጽኑዓተ ፡ ለፈርዖን ፡ ጲቶሃ ፡ ወራምሴሃ ፡ ወሐነጹ ፡ ኵሎ ፡ ጥቅመ ፡ ወኵሎ ፡ አረፋተ ፡ ዘወድቀ ፡ በሀገረ ፡ ግብጽ ፡ 15 ወይቀንይዎሙ ፡ ግፉዐ ፡ ወመጠነ ፡ ያሐስሙ ፡ ላዕሌሆሙ ፡ ከማሁ ፡ ይበዝኁ ፡ ወከማሁ ፡ ይፈደፍዱ ፡ 16 ወያስተራኵስዎሙ ፡ ሰብአ ፡ ግብጽ ፡ ለውሉደ ፡ እስራኤል ።