መጽሐፈ ኩፋሌ 47

47 1 ወበሱባዔ ፡ ሳብዕ ፡ በሳብዕ ፡ ዓመት ፡ በዘ ፡ አርብዓ ፡ ወሰብዓቱ ፡ ኢዩቤልዉ ፡ መጽአ ፡ አቡከ ፡ እምድረ ፡ ከናአን ፡ ወተወለድከ ፡ በራብዕ ፡ ሱባዔ ፡ በሳድስ ፡ ዓመቱ ፡ በዘ ፡ አርብዓ ፡ ወሰማኒቱ ፡ ኢዮቤሌዎን ፡ ዘውእቱ ፡ መዋዕለ ፡ ምንዳቤ ፡ ላዕለ ፡ ውሉደ ፡ እስራኤል ። 2 ወአዘዘ ፡ ንጉሠ ፡ ግብጽ ፡ ፈርዖን ፡ ትእዛዘ ፡ ላዕሌሆሙ ፡ ከመ ፡ ይግድፉ ፡ ውሉዶሙ ፡ ኵሎ ፡ ሮሰ ፡ ዘተወልደ ፡ ውስተ ፡ ፈለግ ፡ 3 ወነበሩ ፡ እንዘ ፡ ይገድፉ ፡ ሰብዐተ ፡ ወርኀ ፡ እስከ ፡ አመ ፡ ዕለተ ፡ ተወለድከ ። ወኀብአተከ ፡ እምከ ፡ ሠለስተ ፡ አውራኀ ፡ ወነገሩ ፡ በእንቲሃ ። 4 ወገብረት ፡ ለከ ፡ ነፍቀ ፡ ወለበጠታ ፡ ፒሳ ፡ ወአስፋሊጦ ፡ ወአንበረቶ ፡ ውስተ ፡ ሣዕር ፡ ኀበ ፡ ድንጋገ ፡ ፈለግ ፡ ወአንበረተከ ፡ ውስቴታ ፡ ሰቡዐ ፡ መዋዕለ ። ወእምከ ፡ ትመጽእ ፡ በሌሊት ፡ ወታጠብወከ ፡ ወመዓልተ ፡ ተዐቅበከ ፡ ማርያ ፡ እኅትከ ፡ እምነ ፡ አዕዋፍ ፡ 5 ወበውእቱ ፡ መዋዕል ፡ ወፅአት ፡ ተርሙት ፡ ወለተ ፡ ፈርዖን ፡ ከመ ፡ ትትኀፀብ ፡ በውስተ ፡ ፈለግ ፡ ወሰምዐት ፡ ቃለከ ፡ እንዘ ፡ ትበኪ ፡ ወትቤ ፡ ለዕብራዊያቲሃ ፡ ከመ ፡ ያምጽአከ ፡ ወአምጽአከ ፡ ኀቤሃ ፡ 6 ወአውፅአተከ ፡ እምነፍቅ ፡ ወምሕረተከ ። 7 ወትቤላ ፡ እኅርከ ፡ እሖርኑ ፡ ወእጸውዕ ፡ ለኪ ፡ አሐተ ፡ እምዕብራዊያት ፡ እንተ ፡ ተሐፅኖ ፡ ወታጠብዎ ፡ ለኪ ፡ ለዝ ፡ ሕፃን ። [ወትቤላ ፡ ሑሪ ።] ፡ 8 ወሖረት ፡ ወጸውዐታ ፡ ለእምከ ፡ ለኢዮክቤት ፡ ወወሀበታ ፡ ዐስበ ፡ ወሐፀነተከ ። 9 ወእምዝ ፡ ልሂቀከ ፡ ወሰዱከ ፡ ቤተ ፡ ፈርዖን ፡ ወኮንከ ፡ ውሉዳ ፡ ወመሀረከ ፡ ዕብራን ፡ አቡከ ፡ መጽሐፈ ፡ ወእምዘ ፡ ፈጸምከ ፡ ሠለስተ ፡ ሱባዔ ፡ አብአከ ፡ ውስተ ፡ ዐጸደ ፡ መንግሥት ። 10 ወሀለውከ ፡ ውስተ ፡ ዐጸድ ፡ ሠለስተ ፡ ሱባዔ ፡ ዓመት ፡ እስከ ፡ መዋዕል ፡ አመ ፡ ወፃእከ ፡ እምዐጸደ ፡ መንግሥት ። ወርኢኮ ፡ ለግብጻዊ ፡ እንዘ ፡ ይዘብጦ ፡ ለካልእከ ፡ ዘእምነ ፡ ውሉደ ፡ እስራኤል ፡ ወቀተልኮ ፡ ወኀባእኮ ፡ ውስተ ፡ ኆጻ ። 11 ወበሳኒታ ፡ ዕለት ፡ ረከብከ ፡ ክልኤተ ፡ እንዘ ፡ ይትባአሱ ፡ እምውሉደ ፡ እስራኤል ፡ ወትቤሎ ፡ ለዘይትዔገል ፡ ለምንት ፡ ትዘብጥ ፡ እኅዋከ ፡ 12 ወተምዕዐ ፡ ወተቈጥዐ ፡ ወይቤ ፡ መኑ ፡ ሤመከ ፡ ላዕሌነ ፡ መልአከ ፡ ወመኰንነ ፡ ትቅትለኒኑ ፡ ትፈቅድ ፡ በከመ ፡ ቀተልኮ ፡ ለግብጻዊ ፡ ወፈራህከ ፡ ወጐየይከ ፡ እምቅድመ ፡ ዝንቱ ፡ ነገር ።