መጽሐፈ ኩፋሌ 49

49 1 ተዘከር ፡ ትእዛዘ ፡ ዘአዘዘከ ፡ እግዚአብሔር ፡ በእንተ ፡ ፋሲካ ፡ ከመ ፡ ትግበር ፡ በጊዜሁ ፡ አመ ፡ ዐሡር ፡ ወረቡዑ ፡ ለወርኅ ፡ ቀዳማዊ ፡ ከመ ፡ ትጥብሖ ፡ ዘእንበለ ፡ ይምሰይ ፡ ወከመ ፡ ይብልዕዎ ፡ በሌሊት ፡ አመ ፡ ምሴት ፡ ዘዐሡር ፡ ወኀሙስ ፡ እምጊዜ ፡ ዕርበተ ፡ ፀሐይ ፡ 2 እስመ ፡ በዛቲ ፡ ሌሊት ፡ ቀዳሜ ፡ በዓል ፡ ይእቲ ፡ ወቀዳሜ ፡ ፍሥሐ ፡ ይእቲ ፡ አንትሙ ፡ ትነብሩ ፡ ትብልዑ ፡ ጳስካ ፡ በግብጽ ። ወኵሎን ፡ ኀይላቲሁ ፡ ለመስቴማ ፡ ተፈነወ ፡ ከመ ፡ ይቅትል ፡ ኵሎ ፡ በኵረ ፡ በምድረ ፡ ግብጽ ፡ እምበኵሩ ፡ ለፈርዖን ፡ እስከ ፡ በኵረ ፡ ላእኪት ፡ ፄዋዊት ፡ እንተ ፡ ማሕረፅ ፡ ወላዕለ ፡ እንስሳኒ ፡ 3 ወዛቲ ፡ ዘወሀበ ፡ እግዚአብሔር ፡ ሎሙ ፡ ውስተ ፡ ኵሉ ፡ ቤት ፡ ዘርእዩ ፡ ውስተ ፡ አንቀጹ ፡ ደመ ፡ በግዕ ፡ ዘዓመት ፡ ኢይባኡ ፡ ውስተ ፡ ቤቱ ፡ ለቀቲል ፡ አላ ፡ ይትዓደዉ ፡ ከመ ፡ ይድኀኑ ፡ ኵሎሙ ፡ እለ ፡ ውስተ ፡ ቤት ፡ እስመ ፡ ትእምርተ ፡ ደም ፡ ውስተ ፡ አንቀጹ ፡ 4 ወገብሩ ፡ ኀይላቲሁ ፡ ለእግዚአብሔር ፡ ኵሎ ፡ ዘመጠነ ፡ አዘዞሙ ፡ እግዚአብሔር ፡ ወተዐደዉ ፡ እምኵሉ ፡ ደቂቀ ፡ እስራኤል ፡ ወኢቦአ ፡ ላዕሌሆሙ ፡ መቅሠፍት ፡ ለአማስኖ ፡ እምኔሆሙ ፡ ኵሎ ፡ ነፍሰ ፡ እምእንስሳ ፡ እስከ ፡ ሰብእ ፡ ወእስከ ፡ ከልብ ። 5 ወኮነ ፡ መቅሠፍት ፡ በግብጽ ፡ ጥቀ ፡ ዐቢይ ፡ ወአልቦ ፡ ቤተ ፡ በግብጽ ፡ ዘአልቦ ፡ በድነ ፡ ውስቴታ ፡ ወብካየ ፡ ወዐውያተ ፡ 6 ወኵሉ ፡ እስራኤል ፡ ይነብር ፡ እንዘ ፡ ይበልዕ ፡ ሥጋ ፡ ጳስካ ፡ ወእንዘ ፡ ይሰቲ ፡ ወይነ ፡ ወይሴብሕ ፡ ወይባርክ ፡ ወያአኵት ፡ እግዚአብሔር ፡ አምላከ ፡ አበዊሁ ፡ ወድልወ ፡ ይከውን ፡ ለወፂእ ፡ እምአርዑተ ፡ ግብጽ ፡ ወእምቅኔ ፡ እኪት ። 7 ወአንተኒ ፡ ተዘከር ፡ ዛተ ፡ ዕለተ ፡ ኵሎ ፡ መዋዕለ ፡ ሕይወትከ ፡ ወግበራ ፡ እምዓም ፡ ለዓም ፡ ኵሎ ፡ መዋዕለ ፡ ሕይወትከ ፡ ምዕረ ፡ ለዓመት ፡ በዕለቱ ፡ በከመ ፡ ኵሉ ፡ ሕጉ ፡ ወኢታስተኃልፍ ፡ ዕለተ ፡ እምዕለት ፡ ወእምወርኅ ፡ ለወርኅ ፡ 8 እስመ ፡ ሥርዐት ፡ ዘለዓለም ፡ ውእቱ ፡ ወቍሩጽ ፡ ውስተ ፡ ጽላተ ፡ ሰማይ ፡ ላዕለ ፡ ውሉደ ፡ እስራኤል ፡ ከመ ፡ ይግበርዎ ፡ በኵሉ ፡ ዓመት ፡ ወዓመት ፡ በዕለቱ ፡ ምዕረ ፡ በዓመት ፡ ውስተ ፡ ኵሉ ፡ ትውልዶሙ ፡ ወአልቦ ፡ ወሰነ ፡ መዋዕል ፡ እስመ ፡ ለዓለም ፡ ውእቱ ፡ ሥሩዕ ፡ 9 ወብእሲ ፡ እንዘ ፡ ንጹሕ ፡ ውእቱ ፡ ወኢመጽአ ፡ ይግበሮ ፡ በጊዜ ፡ ዕለቱ ፡ ለአብኦ ፡ ቍርባን ፡ ዘይሠምር ፡ ቅድመ ፡ እግዚአብሔር ፡ ወለበሊዕ ፡ ወለሰቲይ ፡ በቅድመ ፡ እግዚአብሔር ፡ በዕለተ ፡ በዓሉ ፡ ወይሠረዉ ፡ ውእቱ ፡ ብእሲ ፡ ዘንጹሕ ፡ ወቅሩብ ፡ እስመ ፡ ቍርባነ ፡ እግዚአብሔር ፡ ኢያብአ ፡ በጊዜሁ ፡ ወኀጢአተ ፡ ይነሥእ ፡ ውእቱ ፡ ብእሲ ፡ ለርእሱ ፡ 10 ከመ ፡ ይኩኑ ፡ ውሉደ ፡ እስራኤል ፡ እለ ፡ ይመጽኡ ፡ ወይገብሩ ፡ ጰስከ ፡ በዕለተ ፡ ጊዜሁ ፡ አመ ፡ ዐሡሩ ፡ ወረቡዑ ፡ ለወርኅ ፡ ቀዳማዊ ፡ በማእከለ ፡ ምስያታት ፡ እምሣልስታ ፡ ለዕለት ፡ እስከ ፡ ሣልስታ ፡ ለሌሊት ፡ እስመ ፡ ክልኤ ፡ መክፈልታ ፡ ለዕለት ፡ ተውህበ ፡ ለብርሃን ፡ ወሣልስታ ፡ ለምሴት ፡ 11 ዝውእቱ ፡ ዘአዘዘከ ፡ እግዚአብሔር ፡ ከመ ፡ ትግበሮ ፡ በማእከለ ፡ ምሴታት ። 12 ወኢይከውን ፡ ጠቢሖቱ ፡ በኵሉ ፡ ጊዜ ፡ ብርሃን ፡ ዘእንበለ ፡ ጊዜ ፡ ወሰነ ፡ ምሴት ፡ ወይበልዕዎ ፡ በጊዜ ፡ ምሴት ፡ እስከ ፡ ሣልስተ ፡ ሌሊት ፡ ወዘተርፈ ፡ እምኵሉ ፡ ሥጋሁ ፡ እምሣልስተ ፡ ሌሊት ፡ ወከሐ ፡ በእሳት ፡ ያውዕይዎ ። 13 ወኢይከውን ፡ ያብስልዎ ፡ በማይ ፡ ወኢይብልዕዎ ፡ ጥራየ ፡ አላ ፡ ጥቡሰ ፡ በእሳት ፡ ብሱለ ፡ በእሳት ፡ በአስተሐምሞ ፡ ርእስ ፡ ምስለ ፡ ንዋየ ፡ ውስጡ ፡ ወምስለ ፡ እገሪሁ ። ይጥብስዎ ፡ በእሳት ፡ ወአልቦ ፡ ሰቢረ ፡ ዐጽም ፡ እምውስቴቱ ፡ ምንተኒ ፡ እስመ ፡ ኢይትቀጠቀጥ ፡ እምውሉደ ፡ እስራኤል ፡ ምንተሂ ፡ ዐጽም ። 14 በእንተዝ ፡ አዘዞሙ ፡ እግዚአብሔር ፡ ለውሉደ ፡ እስራኤል ፡ ከመ ፡ ይግበሩ ፡ ጳስካ ፡ በዕለተ ፡ ጊዜሁ ። ወኢይከውን ፡ ሰቢረ ፡ ዐጽም ፡ ምንተሂ ፡ እምኔሁ ፡ እስመ ፡ ዕለተ ፡ በዓል ፡ ይእቲ ፡ ወዕለት ፡ እዝዝት ፡ ይእቲ ፡ ወአልቦ ፡ ተዐድዎ ፡ እምውስቴቱ ፡ ዕለተ ፡ እምዕለት ፡ ወእምወርኅ ፡ ወርኅ ፡ እስመ ፡ አመ ፡ ዕለተ ፡ በዓሉ ፡ ይትገበር ። 15 ወአንተሂ ፡ አዝዞሙ ፡ ለውሉደ ፡ እስራኤል ፡ ከመ ፡ ይግበሩ ፡ ጳስካ ፡ በመዋዕሊሆሙ ፡ በኵሉ ፡ ዓመት ፡ ምዕረ ፡ ለዓመት ፡ በዕለተ ፡ ጊዜሁ ፡ ወይመጽእ ፡ ተዝካር ፡ እምቅድመ ፡ እግዚአብሔር ፡ ዘይሠምር ፡ ወኢይመጽኦሙ ፡ መቅሠፍት ፡ ለቀቲል ፡ ወለማኅፀት ፡ በውእቱ ፡ ዓመት ፡ አመ ፡ ገብሩ ፡ ጳስካ ፡ በጊዜሁ ፡ በኵሉ ፡ በከመ ፡ ተአዘዘ ። 16 ወኢይከውን ፡ እንከ ፡ ለበሊዖቱ ፡ በአፍአ ፡ እምቤተ ፡ መቅደሱ ፡ ለእግዚአብሔር ፡ ወበአንጸረ ፡ ቤተ ፡ መቅደሱ ፡ ለእግዚአብሔር ፡ ወኵሉ ፡ ሕዝበ ፡ ማኅበሮሙ ፡ ለእስራኤል ፡ ይግበርዎ ፡ በጊዜሁ ። 17 ኵሉ ፡ ሰብእ ፡ ዘመጽአ ፡ በዕለቱ ፡ ይብልዖ ፡ በቤተ ፡ መቅደሱ ፡ ለአምላክክሙ ፡ በቅድመ ፡ እግዚአብሔር ፡ ዘእምዕሥራ ፡ ዓመት ፡ ወላዕለ ፡ እስመ ፡ ከመዝ ፡ ተጽሕፈ ፡ ወተሠርዐ ፡ ከመ ፡ ይብልዕዎ ፡ በቤተ ፡ መቅደሱ ፡ ለእግዚአብሔር ። 18 ወእምከመ ፡ ቦኡ ፡ ውሉደ ፡ እስራኤል ፡ ውስተ ፡ ምድር ፡ እንተ ፡ ይእኅዙ ፡ ውስተ ፡ ምድረ ፡ ከናአን ፡ ወይተክሉ ፡ ደብተራ ፡ እግዚአብሔር ፡ ማእከለ ፡ ምድር ፡ ውስተ ፡ አሐዱ ፡ እምነ ፡ ሠራዊቶሙ ፡ እስከ ፡ አመ ፡ ይትሐነጽ ፡ መቅደሱ ፡ ለእግዚአብሔር ፡ በዲበ ፡ ምድር ። ወይኩኑ ፡ እንዘ ፡ ይመጽኡ ፡ ወይገብሩ ፡ ጳስከ ፡ በማእከለ ፡ ደብተራሁ ፡ ለእግዚአብሔር ፡ ወይጠብሕዎ ፡ በቅድመ ፡ እግዚአብሔር ፡ እምዓመት ፡ በዓመት ። 19 ወበመዋዕል ፡ አመ ፡ ተሐንጸ ፡ ቤት ፡ በስመ ፡ እግዚአብሔር ፡ በምድረ ፡ ርስቶሙ ፡ ህየ ፡ ይሖሩ ፡ ወይጥብሑ ፡ ጳስካ ፡ ምሴተ ፡ እንዘ ፡ የዐርብ ፡ ፀሐይ ፡ በትሥልስታ ፡ ለዕለት ፡ 20 ወያዐርጉ ፡ ደሞ ፡ ውስተ ፡ ምክያዳ ፡ ለምሥዋዕ ፡ ወሥብሐ ፡ ያንብሩ ፡ ዲበ ፡ እሳት ፡ ዘላዕለ ፡ ምሥዋዕ ፡ ወሥጋሁ ፡ ይብልዑ ፡ ጥቡሰ ፡ በእሳት ፡ በውስተ ፡ ዐጸደ ፡ ቤተ ፡ መቅደስ ፡ በስመ ፡ እግዚአብሔር ። 21 ወኢይክሉ ፡ ገቢረ ፡ ጳስካ ፡ በአህጉሪሆሙ ፡ ወበኵሉ ፡ በሓውርት ፡ ዘእንበለ ፡ በቅድመ ፡ ደብተራ ፡ እግዚአብሔር ፡ ወእመ ፡ አኮ ፡ በቅድመ ፡ ቤት ፡ ኀበ ፡ ኀደረ ፡ ስመ ፡ ዚአሁ ፡ ወስቴቱ ፡ ወኢይስሕቱ ፡ ድኅረ ፡ እግዚአብሔር ። 22 ወአንተኒ ፡ ሙሴ ፡ አዝዞሙ ፡ ለውሉደ ፡ እስራኤል ፡ ወይዕቀቡ ፡ ሥርዐተ ፡ ጳስካ ፡ በከመ ፡ ተአዘዘ ፡ ለከ ፡ ከመ ፡ ትንግሮሙ ፡ ዓመቶ ፡ ለለ ፡ ዓመት ፡ ወዕለቶ ፡ ለዕለታት ፡ ወበዓለ ፡ ናእት ፡ ከመ ፡ ይብልዑ ፡ ናእተ ፡ ሰቡዐ ፡ ዕለተ ፡ ከመ ፡ ይግበሩ ፡ በዓሎ ፡ ከመ ፡ ያብኡ ፡ ቍርባኖ ፡ ዕለተ ፡ እምዕለት ፡ በእላ ፡ ሰቡዕ ፡ መዋዕለ ፡ ፍሥሐ ፡ ቅድመ ፡ እግዚአብሔር ፡ ዲበ ፡ ምሥዋዐ ፡ አምላክክሙ ፡ 23 እስመ ፡ ዛተ ፡ በዓለ ፡ በውልዋሌ ፡ ገበርክምዋ ፡ አመ ፡ ትወፅኡ ፡ እምግብጽ ፡ እስከ ፡ አመ ፡ ተዐድዉ ፡ ባሕረ ፡ ውስተ ፡ ገዳመ ፡ ሱር ፡ እስመ ፡ በኀበ ፡ ድንጋገ ፡ ባሕር ፡ ሰለጥክምዋ ።