መጽሐፈ ኩፋሌ 48

48 1 ወበሳድስ ፡ ዓመት ፡ ዘሱባዔ ፡ ሣልስ ፡ ዘአርብዓ ፡ ወተስዐቱ ፡ ኢዮቤልዉሳት ፡ ሖርከ ፡ ወነበርከ ፡ ህየ ፡ ኀምስተ ፡ ሱባዔ ፡ ወዓመተ ፡ አሐደ ፡ ወገባእከ ፡ ውስተ ፡ ግብጽ ፡ በሱባዔ ፡ ዳግም ፡ በዓመት ፡ ካልእ ፡ በውእቱ ፡ ኀምሳ ፡ ኢዮቤልው ። 2 ወአንተ ፡ ተአምር ፡ ዘተናገረ ፡ ለከ ፡ በደብረ ፡ ሲና ፡ ወምንተ ፡ ፈቀደ ፡ ይግበር ፡ ምስሌከ ፡ መኰንነ ፡ መስቴማ ፡ አመ ፡ ትገብእ ፡ ግብጽ ፡ በፍኖት ፡ በአላቴ ፡ ምጽላል ፡ 3 አኮሁ ፡ በኵሉ ፡ ኀይሉ ፡ ፈቀደ ፡ ይቅትልከ ፡ ወያድኅኖሙ ፡ ለግብጻዊያን ፡ እምእዴከ ፡ እስመ ፡ ርእየከ ፡ ከመ ፡ ተፈነውከ ፡ ትግበር ፡ ኵነኔ ፡ ወበቀለ ፡ ላዕለ ፡ ግብጻዊያን ፡ 4 ወባላሕኩከ ፡ እምእዴሁ ። ወገብርከ ፡ ተአምረ ፡ ወመንክረ ፡ በዘ ፡ ተፈኖከ ፡ ትግበር ፡ በግብጽ ፡ ላዕለ ፡ ፈርዖን ፡ ወላዕለ ፡ ኵሉ ፡ ቤቱ ፡ ወላዕለ ፡ አግብርቱ ፡ ወላዕለ ፡ ሕዝቡ ። 5 ወገብረ ፡ እግዚአብሔር ፡ ላዕሌሆሙ ፡ በቀለ ፡ ዐቢየ ፡ በእንተ ፡ እስራኤል ፡ ወመሐጾሙ ፡ ወቀተሎሙ ፡ በደም ፡ ወበቈርነነዓት ፡ ወበትንንያ ፡ ወበጽንጽያ ፡ ከልብ ፡ ወበእኩይ ፡ ቍስል ፡ ዘውእቱ ፡ ይፈልሕ ፡ ዕንጰዕንጴ ፡ ወእንስሳሆሙ ፡ በሞት ፡ ወበአእባነ ፡ በረድ ። በዝንቱ ፡ አጥፍአ ፡ ኵሎ ፡ ዘይሠርጽ ፡ ሎሙ ፡ ወበአንበጣ ፡ እንተ ፡ በልዐት ፡ ተረፈ ፡ ዘተረፎሙ ፡ እምበረድ ፡ ወበጽልመት ፡ በኵሮሙ ፡ ዘሰብእ ፡ ወዘእንስሳ ። ወበኵሉ ፡ አማልክቲሆሙ ፡ ገብረ ፡ እግዚአብሔር ፡ በቀለ ፡ ወአውዐዮሙ ፡ በእሳት ፡ 6 ወኵሉ ፡ ተፈነወ ፡ ወእዴከ ፡ ከመ ፡ ትግበር ፡ ዘእንበለ ፡ ይትገበር ፡ ወሀለውከ ፡ ትትናገሮ ፡ ለንጉሠ ፡ ግብጽ ፡ ወበቅድመ ፡ ኵሎሙ ፡ ላእካኒሁ ፡ ወበቅድመ ፡ ሕዝቡ ፡ 7 ወኵሉ ፡ ኮነ ፡ በቃልከ ፡ ዐሥሩ ፡ ኵነኔ ፡ ዐቢያት ፡ ወፀዋጋት ፡ መጽአ ፡ ውስተ ፡ ምድረ ፡ ግብድ ፡ ከመ ፡ ትግበር ፡ ቦቱ ፡ በቀለ ፡ እስራኤል ። 8 ወኵሎ ፡ ገብረ ፡ እግዚአብሔር ፡ በእንተ ፡ እስራኤል ። ወበከመ ፡ ሥርዐቱ ፡ ዘተካየደ ፡ ምስለ ፡ አብርሃም ፡ ከመ ፡ ይትበቀል ፡ ላዕሌሆሙ ፡ በከመ ፡ ይቀንይዎሙ ፡ በግፍዕ ። 9 ወመኰንነ ፡ መስቴማ ፡ ይትቀወመከ ፡ ቅድሜከ ፡ ወይፈቅድ ፡ ያውድቀ ፡ ውስተ ፡ እደ ፡ ፈርዖን ፡ ወይረድእ ፡ ሥራያቲሆሙ ፡ ለግብጽ ፡ ወይትቃወሙ ፡ ወይገብሩ ፡ በቅድሜከ ። 10 እከየሰኬ ፡ ኀደግናሆሙ ፡ ይግበሩ ፡ ወፈውሰ ፡ ኢናበውሖሙ ፡ ከመ ፡ ይትገበር ፡ በእደዊሆሙ ። 11 መሐጾሙ ፡ እግዚአብሔር ፡ በቍስል ፡ እኩይ ፡ ወስእኑ ፡ ተቃውሞ ፡ እስመ ፡ አሕጐልናሆሙ ፡ እምገቢረ ፡ ምንተሂ ፡ አሐደ ፡ ትእምርተ ። 12 ወበኵሉ ፡ ተአምር ፡ ወመንክር ፡ ኢኀፈረ ፡ መኰንነ ፡ መስቴማ ፡ እስከ ፡ ሶበ ፡ ኀየለ ፡ ወጸርኀ ፡ ሎሙ ፡ ለግብጽ ፡ ከመ ፡ ይዴግኑ ፡ ድኅሬከ ፡ በኵሉ ፡ ኀይሎሙ ፡ ለግብጽ ፡ በሰረገላቲሆሙ ፡ ወአፍራሲሆሙ ፡ ወበኵሉ ፡ ብዝኆሙ ፡ ለአሕዛበ ፡ ግብጽ ። 13 ወቆምኩ ፡ ማእከሌከ ፡ ወማእከሎሙ ፡ ለግብጽ ፡ ወማእከሎሙ ፡ ለእስራኤል ፡ ወባላሕናሆሙ ፡ ለእስራኤል ፡ እምእዴሁ ፡ ወእምእደ ፡ ሕዝብ ። ወአውፅኦሙ ፡ እግዚአብሔር ፡ እንተ ፡ ማእከለ ፡ ባሕር ፡ ከመ ፡ እንተ ፡ የብስ ፡ 14 ወኵሎሙ ፡ ሕዝብ ፡ ዘአውፅአ ፡ ይዴግኑ ፡ ድኅሬሆሙ ፡ ለእስራኤል ፡ ወወረዎሙ ፡ እግዚአብሔር ፡ አምላክነ ፡ ማእከለ ፡ ባሕር ፡ ውስተ ፡ መዓምቅቲሃ ፡ ለቀላይ ፡ በታሕቴሆሙ ፡ ለውሉደ ፡ እስራኤል ፡ በከመ ፡ ወረዉ ፡ ውሉዶሙ ፡ ሰብአ ፡ ግብጽ ፡ ውስተ ፡ ፈለግ ፡ ምእተ ፡ እልፈ ፡ ተበቀሎሙ ። ወዐሠርቱ ፡ ምእት ፡ ዕደው ፡ ኀያላን ፡ ወእለሂ ፡ ሠለስተ ፡ ይዳለጉ ፡ ጠፍኡ ፡ በእንተ ፡ አሐዱ ፡ ጠባዊት ፡ ዘገደፉ ፡ ማእከለ ፡ ፈለግ ፡ እምውሉደ ፡ ሕዝብከ ። 15 ወአመ ፡ ዐሡር ፡ ወረቡዕ ፡ ዕለት ፡ ወአመ ፡ ዐሡር ፡ ወኀሙስ ፡ ወአመ ፡ ዐሡር ፡ ወሰዱስ ፡ ወአመ ፡ ዐሡር ፡ ወሰቡዕ ፡ ወአመ ፡ ዐሡር ፡ ወሰሙን ፡ ሀሎ ፡ መኰንነ ፡ መስቴማ ፡ እሱር ፡ ወዕፅው ፡ እምድኅሬሆሙ ፡ ለውሉደ ፡ እስራኤል ፡ ከመ ፡ ኢያስተዋድዮሙ ። 16 ወአመ ፡ ዕለተ ፡ ዐሡር ፡ ወተሱዕ ፡ ፈታሕናሆሙ ፡ ከመ ፡ ይርድእዎሙ ፡ ለግብጽ ፡ ወከመ ፡ ይዴግኑ ፡ ድኅሬሆሙ ፡ ለውሉደ ፡ እስራኤል ፡ 17 ወአጽንዐ ፡ አልባሲሆሙ ፡ ወአኀየሎሙ ፡ ወተኀየሉ ፡ እምኀበ ፡ እግዚአብሔር ፡ አምላክነ ፡ ከመ ፡ ይምሐጾሙ ፡ ለግብጽ ፡ ወይወርዎሙ ፡ ማእከለ ፡ ባሕር ። 18 ወአመ ፡ ዐሡር ፡ ወረቡዕ ፡ ዕለት ፡ አሰርናሁ ፡ ከመ ፡ ኢያስተዋድዮሙ ፡ ለደቂቀ ፡ እስራኤል ፡ በዕለት ፡ አመ ፡ ሀለዉ ፡ ይስእሉ ፡ ንዋየ ፡ ወአልባሰ ፡ እምኀበ ፡ ሰብአ ፡ ግብጽ ፡ ንዋየ ፡ ብሩር ፡ ወንዋየ ፡ ወርቅ ፡ ወንዋየ ፡ ብርት ፡ ወከመ ፡ ይማህርክዎሙ ፡ ለግብጽ ፡ ህየንተ ፡ ተቀንዩ ፡ እንተ ፡ ቀነይዎሙ ፡ በግፍዕ ። 19 ወኢያውፃእናሆሙ ፡ ለውሉደ ፡ እስራኤል ፡ እምግብጽ ፡ ዕራቆሙ ።