መጽሐፈ ነገሥት ፩ 1

መጽሐፈ ፡ ነገሥት ፡ ቀዳማዊ ። 1 ሀለወ ፡ ብእሲ ፡ አሐዱ ፡ ዘእምነ ፡ አርማቴም ፡ ሲፋ ፡ እምነ ፡ ደብረ ፡ ኤፍሬም ፡ ወስሙ ፡ ሕልቃና ፡ ወልደ ፡ ኢያሬምያል ፡ ወልደ ፡ ኤሊ ፡ ወልደ ፡ ቶቄ ፡ ወልደ ፡ ናሴብ ፡ ኤፍራታዊ ። 2 ወቦ ፡ ክልኤተ ፡ አንስተ ፤ ስማ ፡ ለአሐቲ ፡ ሐና ፡ ወስማ ፡ ለካልእታ ፡ ፍናና ፤ ወባቲ ፡ ፍናና ፡ ደቂቀ ፡ ወሐናሰ ፡ አልባቲ ፡ ውሉደ ። 3 ወየዐርግ ፡ ውእቱ ፡ ብእሲ ፡ ለለመዋዕል ፡ እምነ ፡ ሀገሩ ፡ አርማቴም ፡ ከመ ፡ ይስግድ ፡ ወይሡዕ ፡ ለእግዚአብሔር ፡ በሴሎም ፡ ወሀለዉ ፡ ህየ ፡ ኤሊ ፡ ወደቂቁ ፡ ክልኤቱ ፡ ኦፍኒ ፡ ወፊንሐስ ፡ ካህናቲሁ ፡ ለእግዚአብሔር ። 4 ወእምዝ ፡ በአሐቲ ፡ ዕለት ፡ ሦዐ ፡ ሕልቃና ፡ ወወሀቦሙ ፡ ክፍሎሙ ፡ ለፍናና ፡ ብእሲቱ ፡ ወለደቂቃ ። 5 ወለሐናሂ ፡ ወሀባ ፡ አሐደ ፡ ክፍለ ፡ እስመ ፡ አልባቲ ፡ ውሉደ ፡ ወባሕቱ ፡ ሐናሃ ፡ ያፈቅር ፡ ሕልቃና ፡ እምእንታክቲ ፡ ወዐጸዋ ፡ እግዚአብሔር ፡ ማሕፀና ። 6 ወኢወሀባ ፡ እግዚአብሔር ፡ ውሉደ ፡ በከመ ፡ ሥቃያ ፡ ወበከመ ፡ ሐዘነ ፡ ትካዛ ፡ ወተሐዝን ፡ በበይነ ፡ ዝንቱ ፡ እስመ ፡ ዐጸወ ፡ እግዚአብሔር ፡ ማሕፀና ፡ ወኢወሀበ ፡ ውሉዶ ። 7 ወከመዝ ፡ ይገብር ፡ ለለዓመት ፡ የዐርግ ፡ ውስተ ፡ ቤተ ፡ እግዚአብሔር ፡ ወይእቲሰ ፡ ትቴከዝ ፡ ወትበኪ ፡ ወኢትበልዕ ። 8 ወይቤላ ፡ ሕልቃና ፡ ምታ ፡ ሐና ፡ ወትቤ ፡ ነየ ፡ እግዚእየ ፡ ወይቤላ ፡ ምንተ ፡ ኮንኪ ፡ ወምንት ፡ ያበክየኪ ፡ ወለምንት ፡ ኢትበልዒ ፡ ወለምንት ፡ ትቀሥፊ ፡ ልበኪ ፡ ኢይኄይሰኪኑ ፡ አነ ፡ እምዐሠርቱ ፡ ውሉድ ። 9 ወተንሥአት ፡ እምድኅረ ፡ በልዑ ፡ በሴሎም ፡ ወቆመት ፡ ቅድመ ፡ እግዚአብሔር ፡ (በሴሎም) ፡ ወኤሊ ፡ ካህን ፡ ይነብር ፡ ውስተ ፡ መንበር ፡ ኀበ ፡ መድረከ ፡ ኆኅት ፡ ዘቤተ ፡ እግዚአብሔር ። 10 ወይእቲሰ ፡ በሐዘነ ፡ ነፍሳ ፡ በከየት ። 11 ወጸለየት ፡ ኀበ ፡ እግዚአብሔር ፡ ወትቤ ፡ በፃእኩ ፡ ብፅአተ ፡ ለእግዚአብሔር ፡ አዶናይ ፡ እግዚእ ፡ ኤሎሄ ፡ ጸባኦት ፡ ለእመ ፡ ነጽሮ ፡ ነጸርከ ፡ ላዕለ ፡ ሕማማ ፡ ለአመትከ ፡ ወተዘከርከኒ ፡ ወወሀብከ ፡ ለአመትከ ፡ ዘርአ ፡ ብእሴ ፡ ወእሁቦ ፡ ቅድሜከ ፡ ሀብተ ፡ እስከ ፡ አመ ፡ ይመውት ፤ ወይነ ፡ ወሜሰ ፡ ኢይሰቲ ፡ ወሐፂን ፡ ኢየዐርግ ፡ ውስተ ፡ ርእሱ ። 12 ወእምዝ ፡ ሶበ ፡ አኅለቀት ፡ ጸልዮ ፡ ቅድመ ፡ እግዚአብሔር ፡ ወኤሊሰ ፡ ካህን ፡ ይትዐቀብ ፡ አፉሃ ። 13 ወይእቲኒ ፡ ትነብብ ፡ በልባ ፡ ወተሐውስ ፡ ከናፍሪሃ ፡ ወኢይሰማዕ ፡ ቃላ ፡ ወአምሰላ ፡ ኤሊ ፡ ከመ ፡ ስክርት ፡ ይእቲ ። 14 ወይቤላ ፡ ቍልዒሁ ፡ ለኤሊ ፡ እስከ ፡ ማእዜኑ ፡ ዝንቱ ፡ ስካርኪ ፤ አሰስሊ ፡ ወይነኪ ፡ ወእምቅድመ ፡ እግዚአብሔር ፡ ፃኢ ። 15 ወተሠጥወቶ ፡ ሐና ፡ ወትቤሎ ፡ አልቦ ፡ እግዚኦ ፤ ብእሲት ፡ እኪተ ፡ መዋዕል ፡ አነ ፤ ወይነሰ ፡ ወሜሰ ፡ ኢሰተይኩ ፡ ወእክዕዋ ፡ ለነፍስየ ፡ ቅድመ ፡ እግዚአብሔር ። 16 ወኢትረስያ ፡ ለአመትከ ፡ ከመ ፡ አዋልድ ፡ ርኩሳት ፡ እስመ ፡ እምብዝኀ ፡ ሐዘንየ ፡ ተመሰውኩ ፡ እስከ ፡ ይእዜ ። 17 ወተሠጥዋ ፡ ኤሊ ፡ ወይቤላ ፡ ሖሪ ፡ በሰላም ፡ አምላከ ፡ እስራኤል ፡ (የህሉ ፡ ምስሌኪ ፡ ወ)የሀብኪ ፡ ስእለተኪ ፡ ኵሎ ፡ ዘሰአልኪ ፡ በኀቤሁ ። 18 ወትቤሎ ፡ ሐና ፡ ረከበት ፡ ሞገሰ ፡ አመትከ ፡ በቅድሜከ ፡ (እግዚኦ ፡) ወሖረት ፡ ይእቲ ፡ ብእሲት ፡ ፍኖታ ፡ ወቦአት ፡ ቤታ ፡ ወበልዐት ፡ ምስለ ፡ ምታ ፡ ወሰትየት ፡ ወኢያውደቀት ፡ ገጻ ፡ እንከ ። 19 [ወተንሥኡ ፡ በጽባሕ ፡] ወሰገዱ ፡ ለእግዚአብሔር ፡ ወሖሩ ፡ በፍኖቶሙ ፡ ወቦአ ፡ ሕልቃና ፡ ውስተ ፡ ቤቱ ፡ ውስተ ፡ አርማቴም ፡ ወአእመራ ፡ ስሐና ፡ ብእሲቱ ፡ ወተዘከራ ፡ እግዚአብሔር ፡ ወፀንሰት ። 20 ወእምዝ ፡ አመ ፡ በጽሐ ፡ ጊዜ ፡ መዋዕሊሁ ፡ ለወሊዶታ ፡ ወለደት ፡ ወልደ ፡ ወሰመየቶ ፡ ስሞ ፡ ሳሙኤል ፡ እስመ ፡ እምኀበ ፡ እግዚአብሔር ፡ ጸባኦት ፡ ውእቱ ፡ ትቤ ፡ እስመ ፡ ሰአልክዎ ። 21 ወዐርገ ፡ ሕልቃና ፡ ወኵሉ ። 22 ቤቱ ፡ ከመ ፡ ይሡዕ ፡ በሴሎም ፡ መሥዋዕተ ፡ መዋዕል ፡ ወብፅዓቲሁ ፡ ወኵሎ ፡ ዓሥራተ ፡ ምድር ። 23 ወሐናሰ ፡ ኢዐርገት ፡ ምስሌሁ ፡ እስመ ፡ ትቤሎ ፡ ለምታ ፡ እስከ ፡ አመ ፡ የዐርግ ፡ ሕፃን ፡ ምስሌየ ፡ አመ ፡ አኅደግዎ ፡ ጥበ ፡ ወያስተርኢ ፡ ቅድመ ፡ ገጹ ፡ ለእግዚአብሔር ፡ ወይነብር ፡ ህየ ፡ እስከ ፡ ለዓለም ። 24 ወይቤላ ፡ ምታ ፡ ግበሪ ፡ ዘከመ ፡ ይኤድመኪ ፡ ለአዕይንትኪ ፡ ወንበሪ ፡ እስከ ፡ አመ ፡ ታኀድግዮ ፡ ጥበ ፡ ወባሕቱ ፡ አቅሚ ፡ ለእግዚአብሔር ፡ ዘወፅአ ፡ እምአፉኪ ፤ ወነበረት ፡ ይእቲ ፡ ብእሲት ፡ ወሐፀነት ፡ ወልዳ ፡ እስከ ፡ አመ ፡ አኅደገቶ ፡ ጥበ ። 25 ወዐርገት ፡ ምስሌሁ ፡ ውስተ ፡ ሴሎም ፡ ወነሥአት ፡ ላህመ ፡ ዘ፫ዓመቱ ፡ ወኅብስተ ፡ ወመስፈርተ ፡ ኤፍ ፡ ስንዳሌ ፡ ወመስፈርተ ፡ ኔባል ፡ ወይነ ፡ ወቦአት ፡ ቤተ ፡ እግዚአብሔር ፡ በሴሎም ፡ ወወልዶሙኒ ፡ ምስሌሆሙ ። 26 ወአብኡ ፡ ቅድመ ፡ እግዚአብሔር ፡ ወጠብሐ ፡ አቡሁ ፡ መሥዋዕቶ ፡ (ቅድመ ፡ እግዚአብሔር ፡) ዘይገብር ፡ ለለመዋዕል ፡ ለእግዚአብሔር ፡ ወአምጽኦ ፡ ለወልዱ ፡ ወሦዐ ፡ ላህመ ፡ ወአብአቶ ፡ ሐና ፡ እሙ ፡ ለወልዳ ፡ ኀበ ፡ ኤሊ ። 27 ወትቤ ፡ ስምዐኒ ፡ እግዚኦ ፡ ሐይወት ፡ ነፍስከ ፡ ከመ ፡ አነ ፡ ይእቲ ፡ እንታክቲ ፡ ብእሲት ፡ እንተ ፡ ቆምኩ ፡ ቅድሜከ ፡ ወበፃእኩ ፡ በኀቤከ ፡ ለእግዚአብሔር ፡ በእንተ ፡ ዝንቱ ፡ ሕፃን ፡ ወጸለይኩ ፡ ወወሀበኒ ፡ እግዚአብሔር ፡ ስእለትየ ፡ ዘሰአልኩ ፡ በኀቤሁ ። 28 ወአነ ፡ ወሀብክዎ ፡ ለእግዚአብሔር ፡ ኵሎ ፡ መዋዕስ ፡ ሕይወቱ ፡ ይትቀነይ ፡ ለእግዚአብሔር ።