መጽሐፈ ነገሥት ፩ 2

1 ወትቤ ፡ ጸንዐ ፡ ልብየ ፡ በእግዚአብሔር ፡ ወተለዐለ ፡ ቀርንየ ፡ በአምላኪየ ፡ (ወመድኀንየ ፤) ርሕበ ፡ አፉየ ፡ ላዕለ ፡ ጸላእትየ ፡ ወተፈሣሕኩ ፡ በፍርቃንከ ። 2 እስመ ፡ አልቦ ፡ ቅዱስ ፡ ከመ ፡ እግዚአብሔር ፡ ወአልቦ ፡ ጻድቅ ፡ ከመ ፡ አምላክነ ፡ ወአልቦ ፡ ቅዱስ ፡ ዘእንበሌከ ። 3 ኢትትመክሑ ፡ ወኢትንብቡ ፡ ዐቢያተ ፡ ወኢይፃእ ፡ እምአፉክሙ ፡ ዐቢይ ፡ ነገር ፡ እስመ ፡ እግዚአብሔር ፡ አምላክ ፡ ማእምር ፡ ውእቱ ፡ ወእግዚአብሔር ፡ ያስተዴሉ ፡ [ምግባሮ] ። 4 ወአድከመ ፡ ቀስተ ፡ ኀያላን ፡ ወአቅነቶሙ ፡ ኀይለ ፡ ለድኩማን ። 5 ጽጉባነ ፡ እክል ፡ ኀጥኡ ፡ ወርኁባን ፡ ጸግቡ ፡ እስመ ፡ መካን ፡ ወለደት ፡ ሰብዐተ ፡ ወእንተሰ ፡ ብዙኅ ፡ ባቲ ፡ ስእነት ፡ ወሊደ ። 6 እግዚአብሔር ፡ ይቀትል ፡ ወያሐዩ ፡ ወያወርድ ፡ ውስተ ፡ ሲኦል ፡ ወያዐርግ ። 7 እግዚአብሔር ፡ ያነዲ ፡ ወያብዕል ፤ ያቴሕት ፡ ወያሌዕል ። 8 ያነሥኦ ፡ እምድር ፡ ለነዳይ ፡ ወይመጥቆ ፡ እምነ ፡ መሬት ፡ ለምስኪን ፡ ከመ ፡ ያንብሮ ፡ ምስለ ፡ ዕበይተ ፡ ሕዝቡ ፤ ወያወርሶ ፡ መንበረ ፡ ክብር ። 9 ወይሁቦ ፡ ጸሎቶ ፡ ለዘጸለየ ፡ ወባረከ ፡ ዓመቶሙ ፡ ለጻድቃን ፡ እስመ ፡ ኢኮነ ፡ ጽኑዐ ፡ ኀይለ ፡ እጓለ ፡ እመሕያው ። 10 እግዚአብሔር ፡ ያደውዮሙ ፡ ለፀሩ ፡ እግዚአብሔር ፡ (ባሕቲቱ ፡) ቅዱስ ፤ ኢይትመካሕ ፡ ጠቢብ ፡ በጥበቡ ፡ ወኢይትመካሕ ፡ ኀያል ፡ በኀይሉ ፡ ወኢይትመከሕ ፡ ባዕል ፡ በብዕሉ ። 11 አላ ፡ በዝንቱ ፡ ለይትመካሕ ፡ ዘይትሜከሕ ፡ ለብዉ ፡ ወአእምርዎ ፡ ለእግዚአብሔር ፡ ወይገብር ፡ ፍትሐ ፡ ወጽድቀ ፡ ውስተ ፡ ማእከለ ፡ ምድር ፤ እግዚአብሔር ፡ ዐርገ ፡ ውስተ ፡ ሰማያት ፡ ወአንጐድጐደ ፡ ወውእቱ ፡ ይኴንን ፡ ጽንፈ ፡ ምድር ፡ እስመ ፡ ጻድቅ ፡ ውእቱ ፡ ወይሁቦሙ ፡ ኀይለ ፡ ለነገሥትነ ፡ ወያሌዕል ፡ ቀርነ ፡ መሲሑ ። 12 ወኀደገቶ ፡ ህየ ፡ ቅድመ ፡ እግዚአብሔር ፡ ወአተወት ፡ አርማቴም ፡ ወሕፃንሰ ፡ ነበረ ፡ ይትለአክ ፡ ቅድመ ፡ እግዚአብሔር ፡ ወቅድመ ፡ ኤሊ ፡ ካህን ። 13 ወደቂቀ ፡ ኤሊ ፡ ካህን ፡ እኩያን ፡ እሙንቱ ፡ ወኢያአምርዎ ፡ ለእግዚአብሔር ፡ ወኢሕገ ፡ ካህን ፡ ዘእምኀበ ፡ ኵሉ ፡ ሕዝብ ፡ እለ ፡ ይሠውዑ ፡ ወይመጽእ ፡ ወልሰ ፡ ካህን ፡ ሶበ ፡ ያበስሉ ፡ ሥጋ ፡ ወያመጽእ ፡ መኈስሰ ፡ ምስሌሁ ። 14 ወይወድዮ ፡ ውስተ ፡ ጽሕርት ፡ ወእመኒ ፡ ውስተ ፡ ዐቢይ ፡ ጽሕርት ፡ ወእመኒ ፡ ውስተ ፡ መቅጹት ፡ ወኵሎ ፡ ዘአውፅአ ፡ ውእቱ ፡ መኈስስ ፡ ይነሥእ ፡ ሎቱ ፡ ካህን ፡ ወከማሁ ፡ ይገብሩ ፡ ለኵሉ ፡ እስራኤል ፡ ለእለ ፡ ይመጽኡ ፡ ይሡዑ ፡ ለእግዚአብሔር ፡ በሴሎም ። 15 ወዘእንበለ ፡ ይጢስ ፡ ሥብሕ ፡ ይመጽእ ፡ ወልደ ፡ ካህን ፡ ወይብሎ ፡ ለውእቱ ፡ ብእሲ ፡ ዘይሠውዕ ፡ ሀበኒ ፡ ሥጋ ፡ ዘንጠብስ ፡ ለካህን ፡ ወኢይነሥእ ፡ እምኀቤከ ፡ ብሱለ ፡ እምውስተ ፡ ጽሕርት ። 16 ወይቤሎ ፡ ዝክቱ ፡ ብእሲ ፡ ዘይሠውዕ ፡ ይጢስ ፡ ምዕረ ፡ ይቅድም ፡ ሥብሕ ፡ ዘበሕጉ ፡ ወንሣእ ፡ ለከ ፡ እምኵሉ ፡ ዘፈተወት ፡ ነፍስከ ፡ ወይቤሎ ፡ አልቦ ፤ ይእዜ ፡ ሀበኒ ፡ ወእመ ፡ አኮሰ ፡ እነሥእ ፡ ወአሀይደከ ። 17 ወኮነት ፡ ዛቲ ፡ ኀጢአቶሙ ፡ ለእሙንቱ ፡ ደቂቅ ፡ ቅድመ ፡ እግዚአብሔር ፡ ዐበየ ፡ ጥቀ ፡ እስመ ፡ አበሱ ፡ ላዕለ ፡ መሥዋዕተ ፡ እግዚአብሔር ። 18 ወሳሙኤልሰ ፡ ሀለወ ፡ ቅድመ ፡ እግዚአብሔር ፡ ይትለአክ ፡ ወወሬዛ ፡ ውእቱ ፡ ወይቀንት ፡ ኤፉደ ። 19 ወልብሰ ፡ ዐጽፍ ፡ ገብረት ፡ ሎቱ ፡ እሙ ፡ ንስቲተ ፡ ወወሰደት ፡ ሎቱ ፡ አመ ፡ መዋዕለ ፡ ተዐርግ ፡ ምስለ ፡ ምታ ፡ ከመ ፡ ይሡዑ ፡ መሥዋዕተ ፡ ዘለለመዋዕል ። 20 ወባረኮሙ ፡ ኤሊ ፡ ለሕልቃና ፡ ወለብእሲቱ ፡ ወይቤሎ ፡ ለይዕሲከ ፡ እግዚአብሔር ፡ ዘርአ ፡ እምነ ፡ ዛቲ ፡ ብእሲት ፡ ህየንተ ፡ ዝንቱ ፡ ዘአባእኮ ፡ ለእግዚአብሔር ፡ ወአተወ ፡ ውእቱ ፡ ብእሲ ፡ ብሔሮ ። 21 ወሐወጻ ፡ እግዚአብሔር ፡ ለሐና ፡ ወወለደት ፡ ዓዲ ፡ ሠለስተ ፡ ደቂቀ ፡ ወክልኤተ ፡ አዋልደ ፤ ወዐብየ ፡ ዝንቱ ፡ ወልድ ፡ ሳሙኤል ፡ ቅድመ ፡ እግዚአብሔር ። 22 ወኤሊሰ ፡ ልህቀ ፡ ጥቀ ፡ ወሰምዐ ፡ ዘከመ ፡ ይሬስይዎሙ ፡ ደቂቁ ፡ ለደቂቀ ፡ እስራኤል ። 23 ወይቤሎሙ ፡ ለምንት ፡ ትገብሩ ፡ ዘንተ ፡ ነገረ ፡ ዘእሰምዕ ፡ አነ ፡ በኀበ ፡ ኵሉ ፡ ሕዝበ ፡ እግዚአብሔር ። 24 እንቢክሙ ፡ ደቂቅየ ፡ እንቢክሙ ፡ እስመ ፡ ኢኮነ ፡ ሠናየ ፡ ዝንቱ ፡ ነገር ፡ ዘአነ ፡ እሰምዕ ፤ ኢትክልእዎ ፡ ለሕዝብ ፡ ተቀንዮ ፡ ለእግዚአብሔር ። 25 ለእመቦ ፡ ዘአበሰ ፡ አሐዱ ፡ ብእሲ ፡ ላዕለ ፡ ብእሲ ፡ ወገብረ ፡ ኀጢአተ ፡ ይጼልዩ ፡ ሎቱ ፡ ኀበ ፡ እግዚአብሔር ፡ ወእመሰ ፡ ለእግዚአብሔር ፡ አበስ ፡ መኑ ፡ ይጼሊ ፡ ሎቱ ፤ ወአበዩ ፡ ሰሚዖተ ፡ ቃለ ፡ አቡሆሙ ፡ እስመ ፡ ፈቂደ ፡ ፈቀደ ፡ እግዚአብሔር ፡ ያማስኖሙ ። 26 ወዝክቱሰ ፡ ወልድ ፡ ሳሙኤል ፡ የሐውር ፡ በሠናይ ፡ ምስለ ፡ እግዚአብሔር ፡ ወምስለ ፡ ሰብእ ። 27 ወመጽአ ፡ ብእሴ ፡ እግዚአብሔር ፡ ኀበ ፡ ኤሊ ፡ ወይቤሎ ፡ ከመዝ ፡ ይቤ ፡ እግዚአብሔር ፡ አስተርእዮ ፡ አስተርአይኩ ፡ ለቤተ ፡ አቡከ ፡ እንዘ ፡ ሀለዉ ፡ ውስተ ፡ ምድረ ፡ ግብጽ ፡ እንዘ ፡ አግብርት ፡ እሙንቱ ፡ ለፈርዖን ። 28 ወኀረይክዎ ፡ ለቤተ ፡ አቡከ ፡ እምነ ፡ ኵሉ ፡ ቤተ ፡ እስራኤል ፡ ከመ ፡ ይኩኑኒ ፡ ካህናተ ፡ ወያዕርጉ ፡ ውስተ ፡ ምሥዋዕየ ፡ ወይዕጥኑ ፡ ዕጣነ ፡ ወይጹሩ ፡ ኤፉደ ፡ ወወሀብክዎ ፡ ስቤተ ፡ አቡከ ፡ ኵሎ ፡ ዘበእሳት ፡ ይትገበር ፡ ዘእምኀበ ፡ ደቂቀ ፡ እስራኤል ። 29 ወለምንት ፡ በእኪት ፡ ዐይን ፡ ነጸርከ ፡ ላዕለ ፡ መሥዋዕትየ ፡ ወላዕለ ፡ ዕጣንየ ፡ ወአብደርከ ፡ ደቂቀከ ፡ እምኔየ ፡ በእንተ ፡ በረከት ፡ ቀዳሜ ፡ ኵሉ ፡ መሥዋዕቶሙ ፡ ለእስራኤል ፡ ዘበቅድሜየ ። 30 በእንተ ፡ ዝንቱ ፡ ከመዝ ፡ ይቤ ፡ እግዚአብሔር ፡ አምላከ ፡ እስራኤል ፡ እቤ ፡ ከመ ፡ ቤትከ ፡ ወቤተ ፡ አቡከ ፡ ትነብሩ ፡ ቅድሜየ ፡ ለዓለም ፡ ወይእዜሰ ፡ ይቤ ፡ እግዚአብሔር ፡ ሐሰ ፡ ሊተ ፤ ዳእሙ ፡ ለእለ ፡ አክበሩኒ ፡ ኣከብሮሙ ፡ ወዘኒ ፡ አስተሐቀረኒ ፡ ኣስተሐቅሮ ። 31 ወናሁ ፡ ይመጽእ ፡ መዋዕል ፡ ወእሤርዎ ፡ ለዘርእከ ፡ ወለዘርአ ፡ ቤተ ፡ አቡከ ። 32 ወኢይትረከብ ፡ ለከ ፡ በውስተ ፡ ቤትከ ፡ ልሂቅ ፡ በኵሉ ፡ መዋዕል ። 33 ወኢይሰዐር ፡ ብእሲ ፡ እምነ ፡ መሥዋዕትየ ፡ ዘይፌጽም ፡ በአዕይንቲሁ ፡ ወይጽህቅ ፡ በነፍሱ ፡ ወኵሉ ፡ እለ ፡ ተርፉ ፡ እምነ ፡ ቤትከ ፡ ይወድቁ ፡ በኲናተ ፡ ዕደው ። 34 ወዝንቱ ፡ ውእቱ ፡ ተኣምር ፡ ለከ ፡ ዘይመጽእ ፡ ላዕለ ፡ ክልኤሆሙ ፡ ደቂቅከ ፡ ኦፍኒ ፡ ወፊንሐስ ፡ ክልኤሆሙ ፡ ይመውቱ ፡ በአሐቲ ፡ ዕለት ። 35 ወኣቀውም ፡ ሊተ ፡ ካህነ ፡ ዘይገብር ፡ ኵሎ ፡ ዘውስተ ፡ ልብየ ፡ ወዘውስተ ፡ ነፍስየ ፡ ምእመነ ፡ ወአሐንጽ ፡ ሎቱ ፡ ቤተ ፡ ምእመነ ፡ ወይበውእ ፡ ቅድመ ፡ መሲሕየ ፡ በኵሉ ፡ መዋዕል ። 36 ወእለ ፡ ተርፉ ፡ እምነ ፡ ቤትከ ፡ ይመጽኡ ፡ ይስግዱ ፡ ሎቱ ፡ ለብሩር ፡ አቦሊ ፡ ወይብልዎ ፡ ግድፈኒ ፡ ውስተ ፡ አሐቲ ፡ እምካህናቲከ ፡ ኀበ ፡ እበልዕ ፡ እክለ ።