መጽሐፈ ነገሥት ፩ 18

1 [ወከነ ፡ ሶበ ፡ ፈጸመ ፡ ተናግር ፡ ኀበ ፡ ሳኦል ፡ ወነፍሰ ፡ ዮናታን ፡ ተአስረ ፡ በነፍስ ፡ ዳዊት ፡ ወአፍቀሮ ፡ ዮናታን ፡ ከመ ፡ ነፍሱ ። 2 ወነሥኦ ፡ ሳኦል ፡ በውእቱ ፡ ዕለት ፡ ወኢወሀቦ ፡ ከመ ፡ ይትመየጥ ፡ ቤተ ፡ አቡሁ ። 3 ወተካየዱ ፡ ዮናታን ፡ ወዳዊት ፡ ኪዳነ ፡ ሶበ ፡ አፍቀሮ ፡ ከመ ፡ ነፍሱ ። 4 ወአውረደ ፡ ዮናታን ፡ ዐፅፈ ፡ ዘላዕሌሁ ፡ ወወሀቦ ፡ ለዳዊት ፡ ወማዳዮሂ ፡ ወሰይፎ ፡ ወእስከ ፡ ቀስቱ ፡ ወቅናቱ ። 5 ወይወፅእ ፡ ዳዊት ፡ ኀበ ፡ ኵሉ ፡ ዘፈነዎ ፡ ሳኦል ፡ ወይጠብብ ፡ ወያአምር ፡ ወሤሞ ፡ ላዕለ ፡ ዕደው ፡ መስተቃትላን ፡ ወአደሞ ፡ በቅድመ ፡ አዕይንቲሁ ፡ ወበቅድመ ፡ አዕይንቲሆሙ ፡ ለደቂቀ ፡ ሳኦል ። 6 ወሶበ ፡ ተመይጠ ፡ ዳዊት ፡ እምኀበ ፡ ቀተሎ ፡ ለኢሎፍላዊ ፡] ወወፅኣ ፡ ሐላይያት ፡ ወተቀበላሁ ፡ ለዳዊት ፡ እምነ ፡ ኵሉ ፡ አህጉረ ፡ እስራኤል ፡ በከበሮ ፡ ወበትፍሥሕት ፡ ወበማሕሌት ። 7 ወሐለያ ፡ አንስት ፡ ወይቤላ ፡ ቀተለ ፡ ሳኦል ፡ ዐሠርተ ፡ ምእተ ፡ ወዳዊት ፡ ቀተለ ፡ እልፈ ። 8 ወእኩየ ፡ ኮነ ፡ ዝንቱ ፡ ነገር ፡ ቅድመ ፡ አዕይንቲሁ ፡ ለሳኦል ፡ [ወይቤ ፡ ሳኦል ፡ ኦግብኣ ፡ ለዳዊት ፡ ፼ወሊተ ፡ ፲፻ ፡]፡ 9 ወእምይእቲ ፡ ዕለት ፡ ይጸንሖ ፡ ሳኦል ፡ ለዳዊት ፡ ወኵሎ ፡ ኦሚረ ። 12 ወፈርሀ ፡ ሳኦል ፡ እምቅድመ ፡ ገጹ ፡ ለዳዊት ። 13 ወአርሐቆ ፡ እምኀቤሁ ፡ ወሜሞ ፡ መስፍነ ፡ ወይበውእ ፡ ወይወጽእ ፡ ቅድመ ፡ ሕዝብ ። 14 ወዳዊትሰ ፡ ጠቢብ ፡ ውእቱ ፡ ወማእምር ፡ በኵሉ ፡ ፍናዊሁ ፡ ወእግዚአብሔር ፡ ሀሎ ፡ ምስሌሁ ። 15 ወሶበ ፡ ርእዮ ፡ ሳኦል ፡ ከመ ፡ ጠቢብ ፡ ውእቱ ፡ ፈርሀ ፡ ጥቀ ፡ እምቅድመ ፡ ገጹ ። 16 ወኵሉ ፡ እስራኤል ፡ ወይሁዳ ፡ ያፈቅርዎ ፡ ለዳዊት ፡ እስመ ፡ ውእቱ ፡ ይበውእ ፡ ወይወፅእ ፡ ቅድመ ፡ ገጾሙ ፡ ለሕዝብ ። 17 [ወይቤሎ ፡ ሳኦል ፡ ለዳዊት ፡ ነያ ፡ ወለትየ ፡ እንተ ፡ ተዐቢ ። 18 ሜሮብ ፤ ኪያሃ ፡ እሁበከ ፡ ብእሲተ ፡ ወባሕቱ ፡ ኩን ፡ ሊተ ፡ ወልደ ፡ ኀይል ፡ ወተቃተል ፡ ምስለ ፡ መስተቃትላነ ፡ እግዚአብሔር ፤ ወሳኦል ፡ ይዜ ፡ ኢትኩን ፡ እዴየ ፡ ላዕሌሁ ፡ ወትኩን ፡ ላዕሌሁ ፡ እደ ፡ ኢሎፍሊ ። 19 ወይቤሎ ፡ ዳዊት ፡ ለሳኦል ፡ መኑ ፡ አነ ፡ ወምንት ፡ ሕይወትየ ፡ እምሕዝበ ፡ አቡየ ፡ ውስተ ፡ እስራኤል ፡ ከመ ፡ እትሐመዎ ፡ ለንጉሥ ። 20 ወኮነ ፡ በጊዜ ፡ ዘትትወሀብ ፡ ሜሮብ ፡ ወለተ ፡ ሳኦል ፡ ለዳዊት ፡ ተውህበት ፡ ይእቲ ፡ ለአዲራኤል ፡ ሜሆላዊ ።] ወኦፍቀረቶ ፡ ሜልኮል ፡ ወለተ ፡ ሳኦል ፡ ለዳዊት ፡ ወአይድዕዎ ፡ ለሳኦል ፡ ወአደሞ ፡ ቅድመ ፡ አዕይንቲሁ ። 21 ወይቤ ፡ ሳኦል ፡ እሁቦ ፡ ኪያሃ ፡ ወትከውኖ ፡ ዕቅፍተ ፤ ወሀለወት ፡ ላዕለ ፡ ሳኦል ፡ እዴሁ ፡ ለኢሎፍሊ ። 22 ወአዘዞሙ ፡ ሳኦል ፡ ለደቁ ፡ ወይቤሎሙ ፡ በልዎ ፡ ጽምሚተ ፡ ለዳዊት ፡ ንጉሥ ፡ ያፈቅረከ ፡ ወሰብኡኒ ፡ ኵሎሙ ፡ ያፈቅሩከ ፡ ወአንተኒ ፡ ተሐመዎ ፡ ለንጉሥ ። 23 ወተናገርዎ ፡ ደቀ ፡ ሳኦል ፡ ለዳዊት ፡ ዘንተ ፡ ነገረ ፡ ወይቤሎሙ ፡ ዳዊት ፡ ይረትዐክሙኑ ፡ ከመ ፡ እትሐመዎ ፡ ለንጉሥ ፤ አነ ፡ ብእሲ ፡ ትሑት ፡ ዘኢኮንኩ ፡ ክቡረ ። 24 ወአይድዕዎ ፡ ደቁ ፡ ለሳኦል ፡ ዘንተ ፡ ነገረ ፡ ዘይቤ ፡ ዳዊት ። 25 ወይቤሎሙ ፡ ሳኦል ፡ በልዎ ፡ ለዳዊት ፡ ኢይፈቅድ ፡ ንጉሥ ፡ ሀብተ ፡ አላ ፡ ፻ቈላፋነ ፡ እምውስተ ፡ ኢሎፍሊ ፡ ከመ ፡ ይትበቀሉ ፡ ሎቱ ፡ ፀሮ ፡ ለንጉሥ ፤ ወሳኦልሰ ፡ ኀለየ ፡ ዘከመ ፡ ያገብኦ ፡ ውስተ ፡ እዴሆሙ ፡ ለኢሎፍሊ ። 26 ወነገርዎ ፡ ደቀ ፡ ሳኦል ፡ ለዳዊት ፡ ዘንተ ፡ ነገረ ፡ ወአደሞ ፡ ቅድመ ፡ አዕይንቲሁ ፡ ለዳዊት ፡ ከመ ፡ ይትሐመዎ ፡ ለንጉሥ ። 27 ወተንሥአ ፡ ዳዊት ፡ ወሖረ ፡ ምስለ ፡ ሰብኡ ፡ ወቀተለ ፡ እምውስተ ፡ ኢሎፍሊ ፡ ፻ብእሴ ፤ ወወሰደ ፡ ቍልፈተ ፡ ነፍስቶሙ ፡ ለንጉሥ ፡ ወተሐመዎ ፡ ለንጉሥ ፡ ወወሀቦ ፡ ሜልኮልሃ ፡ ወለቶ ፡ ትኩኖ ፡ ብእሲቶ ። 28 ወርእየ ፡ ሳኦል ፡ ከመ ፡ ሀለወ ፡ እግዚአብሔር ፡ ምስለ ፡ ዳዊት ፡ ወኵሉ ፡ እስራኤል ፡ ያፈቅሮ ። 29 ወይፈርሆ ፡ እንከ ፡ ለዳዊት ፡ ፈድፋደ ።