መጽሐፈ ነገሥት ፩ 19

1 ወይቤሎ ፡ ሳኦል ፡ ለዮናታን ፡ ወልዱ ፡ ወለኵሉ ፡ ደቁ ፡ ከመ ፡ ይቅትልዎ ፡ ለዳዊት ። 2 ወዮናታን ፡ ወልደ ፡ ሳኦል ፡ ያፈቅሮ ፡ ለዳዊት ፡ ጥቀ ፡ ወአይድዖ ፡ ዮናታን ፡ ለዳዊት ፡ ወይቤሎ ፡ ሳኦል ፡ የኀሥሥ ፡ ይቅትልከ ፡ ወዑቅ ፡ ርእስከ ፡ ጌሠመ ፡ በነግህ ፡ ተኀባእ ፡ ወንበር ፡ ኀበ ፡ ተኀባእከ ። 3 ወእወጽእ ፡ ኀቤከ ፡ ኀበ ፡ ሀለውከ ፡ ውስተ ፡ ሐቅል ፡ ወእመጽእ ፡ ህየ ፡ ወእትናገር ፡ ምስለ ፡ አቡየ ፡ በእንቲአከ ፡ ወእሬኢ ፡ ዘከመ ፡ ይብለከ ፡ ወዘከመ ፡ ይቤ ፡ ኣየድዐከ ። 4 ወተናገረ ፡ ዮናታን ፡ በእንተ ፡ ዳዊት ፡ ሠናየ ፡ ኀበ ፡ ሳኦል ፡ አቡሁ ፡ ወይቤሎ ፡ ኢተአብስ ፡ ንጉሥ ፡ ላዕለ ፡ ገብርከ ፡ ዳዊት ፡ እስመ ፡ ኢአበሰ ፡ ላዕሌከ ፡ ወምግባሪሁኒ ፡ ሠናይ ፡ ጥቀ ። 5 ወአግብኣ ፡ ለነፍሱ ፡ ውስተ ፡ እዴሁ ፡ ወቀተሎሙ ፡ ለኢሎፍሊ ፡ ወገብረ ፡ እግዚአብሔር ፡ መድኀኒት ፡ ዐቢየ ፡ በላዕሌሁ ፡ ወርእዩ ፡ ኵሉ ፡ እስራኤል ፡ ወተፈሥሑ ፡ ወለምንት ፡ ትኤብስ ፡ ላዕለ ፡ ደም ፡ ንጹሕ ፡ ከመ ፡ ትቅትሎ ፡ ለዳዊት ፡ በከንቱ ። 6 ወስምዖ ፡ ሳኦል ፡ ዘይቤሎ ፡ ዮናታን ፡ ወመሐለ ፡ ሳኦል ፡ ወይቤ ፡ ሕያው ፡ እግዚአብሔር ፡ ከመ ፡ ኢይመውት ። 7 ወጸውዖ ፡ ዮናታን ፡ ለዳዊት ፡ ወአይድዖ ፡ ዘንተ ፡ ኵሎ ፡ ነገረ ፡ ወአብኦ ፡ ዮናታን ፡ ለዳዊት ፡ ኀበ ፡ ሳኦል ፡ ወነበረ ፡ ቅድሜሁ ፡ ከመ ፡ ዘልፍ ። 8 ወዳግመ ፡ መጽአ ፡ ፀብእ ፡ ወጸንዐ ፡ ዳዊት ፡ ወተቃተሎሙ ፡ ለኢሎፍሊ ፡ ወቀተሎሙ ፡ ዐቢየ ፡ ቀትለ ፡ ጥቀ ፡ ወጐዩ ፡ እምቅድመ ፡ ገጹ ። 9 ወኮነ ፡ መንፈስ ፡ እኩይ ፡ ላዕለ ፡ ሳኦል ፡ ወሀሎ ፡ ውስተ ፡ ቤቱ ፡ ይሰክብ ፡ ወኵናቱ ፡ ውስተ ፡ እዴሁ ፡ ወዳዊትሰ ፡ ይዜምር ፡ በእደዊሁ ። 10 ወፈቀደ ፡ ሳኦል ፡ ይርግዞ ፡ ለዳዊት ፡ በይእቲ ፡ ኵናት ፡ ወተግሕሠ ፡ ዳዊት ፡ እምቅድሜሁ ፡ ለሳኦል ፡ ወደርበያ ፡ ለኵናቱ ፡ ውስተ ፡ አረፍት ፡ ወዳዊት ፡ ተግሕሠ ፡ ወአምሰጠ ፡ በይእቲ ፡ ሌሊት ። 11 ወፈነወ ፡ ሳኦል ፡ ወዓሊሁ ፡ ይዕግቱ ፡ ቤተ ፡ ዳዊት ፡ ከመ ፡ ይቅትልዎ ፡ በጽባሕ ፡ ወአይድዐቶ ፡ ለዳዊት ፡ ሜልኮል ፡ ብእሲቱ ፡ ወትቤሎ ፡ ለእሙ ፡ ኢያድኀንከ ፡ ነፍሰከ ፡ በዛቲ ፡ ሌሊት ፡ ጌሠመ ፡ ትመውት ። 12 ወአውረደቶ ፡ ሜልኮል ፡ ለዳዊት ፡ እንተ ፡ መስኮት ፡ ወኀለፈ ፡ ወተኀጥአ ፡ ወአምሰጠ ። 13 ወነሥአት ፡ ሜልኮል ፡ ግንዘተ ፡ ወገነዘት ፡ ወአስከበቶ ፡ ውስተ ፡ አራት ፡ ወአንበረት ፡ ከብደ ፡ ጠሊ ፡ ትርሁ ፡ሲሁ ፡ ወከደነቶ ፡ አልባሰ ። 14 ወለአከ ፡ ሳኦል ፡ ሰብአ ፡ የአኀዝዎ ፡ ለዳዊት ፡ ወያምጽእዎ ፡ ወይቤልዎ ፡ ሕሙም ፡ ውእቱ ። 15 ወለአከ ፡ ኀበ ፡ ዳዊት ፡ ወይቤሎሙ ፡ ኦምጽእዎ ፡ በአራቱ ፡ ኀቤየ ፡ ወቅትልዎ ። 16 ወመጽኡ ፡ እልክቱ ፡ እለ ፡ ለአከ ፡ ወረከቡ ፡ ውእተ ፡ ግንዘተ ፡ ውስተ ፡ ምስከቡ ፡ ወከብደ ፡ ጠሊ ፡ ውስተ ፡ ትርኣሲሁ ። 17 ወይቤላ ፡ ሳኦል ፡ ለሜልኮል ፡ ለምንት ፡ ከመዝ ፡ አስተሐቀርክኒ ፡ ወአውጻእኪዮ ፡ ለፀርየ ፡ ወአምሰጠኒ ፡ ወትቤሎ ፡ ሜልኮል ፡ ለሳኦል ፡ ለሊሁ ፡ ይቤለኒ ፡ ፈንውኒ ፡ ወእመ ፡ አኮ ፡ እቀትለኪ ። 18 ወዳዊትሰ ፡ ተኀጥአ ፡ ወአምሰጠ ፡ ወሖረ ፡ ዳዊት ፡ ኀበ ፡ ሳሙኤል ፡ ውስተ ፡ አርማቴም ፡ ወዜነዎ ፡ ኵሎ ፡ ዘገብረ ፡ ላዕሌሁ ፡ ሳኦል ፡ ወሖሩ ፡ ዳዊት ፡ ወሳሙኤል ፡ ውስተ ፡ አውቴ ፡ ዘራማ ፡ ወነበሩ ፡ ህየ ። 19 ወዜነውዎ ፡ ለሳኦል ፡ ወይቤልዎ ፡ ሀሎ ፡ ዳዊት ፡ ውስተ ፡ አውቴ ፡ ዘራማ ። 20 ወለአከ ፡ ሳኦል ፡ ሰብአ ፡ የአኀዝዎ ፡ ለዳዊት ፡ ወረከቡ ፡ ማኅበሮሙ ፡ ለነቢያት ፡ ወሳሙኤል ፡ ይቀውም ፡ ማእከሌሆሙ ፡ ወመጽአ ፡ መንፈሰ ፡ እግዚአብሔር ፡ ላዕለ ፡ ሰብኡ ፡ ለሳኦል ፡ ወተነበዩ ። 21 ወዜነውዎ ፡ ለሳኦል ፡ ወፈነወ ፡ ካልኣነ ፡ እምነ ፡ ሰብኡ ፡ ወእሙንቱኒ ፡ ተነበዩ ። 22 ወተምዐ ፡ መዐተ ፡ ሳኦል ፡ ወሖረ ፡ ለሊሁ ፡ ውስተ ፡ አርማቴም ፡ ወሶበ ፡ በጽሐ ፡ ውስተ ፡ ዐዘቅቶሙ ፡ ለሕዝብ ፡ እለ ፡ ውስተ ፡ መሴፋ ፡ ወተስእለ ፡ ወይቤ ፡ አይቴ ፡ ሀለዉ ፡ ሳሙኤል ፡ ወዳዊት ፡ ወይቤልዎ ፡ ሀለዉ ፡ ውስተ ፡ አውቴ ፡ ዘራማ ። 23 ወሖረ ፡ እምህየ ፡ ውስተ ፡ አውቴ ፡ ዘራማ ፡ ወመጽአ ፡ ላዕሌሁኒ ፡ መንፈሰ ፡ እግዚአብሔር ፡ ወሖረ ፡ ወእንዘ ፡ የሐውር ፡ ይትኔበይ ፡ እስከ ፡ በጽሐ ፡ ውስተ ፡ አውቴ ፡ ዘራማ ። 24 ወአሰሰለ ፡ አልባሲሁ ፡ ወተነበየ ፡ ቅድሜሆሙ ፡ ወወድቀ ፡ ዕራቁ ፡ ኵላ ፡ ይእተ ፡ ዕለተ ፡ ወኵላ ፡ ይእተ ፡ ሌሊት ፡ ወበበይነ ፡ ዝንቱ ፡ ይቤሉ ፡ ወሳኦልኒ ፡ ውስተ ፡ ነቢያትኑ ።