መጽሐፈ ነገሥት ፩ 28

1 ወእምዝ ፡ ተጋብኡ ፡ ኢሎፍሊ ፡ በእማንቱ ፡ መዋዕል ፡ ምስለ ፡ ተዓይኒሆሙ ፡ ወወፅኡ ፡ ይፅብእዎሙ ፡ ለእስራኤል ፡ ወይቤሎ ፡ አንኩስ ፡ ለዳዊት ፡ አእምሮ ፡ አእምር ፡ ከመ ፡ ምስሌየ ፡ ትወፅእ ፡ ፀብአ ፡ አንተ ፡ ወሰብእከ ። 2 ወይቤሎ ፡ ዳዊት ፡ ለአንኩስ ፡ እምይእዜ ፡ አይድዖ ፡ ለገብርከ ፡ ዘከመ ፡ ይገብር ፡ ወይቤሎ ፡ አንኩስ ፡ ለዳዊት ፡ ናሁ ፡ ሤምኩከ ፡ ዐቃቤ ፡ ሥጋየ ፡ ለዝላፉ ፡ በኵሉ ፡ መዋዕል ። 3 ወሞተ ፡ ሳሙኤል ፡ ወበከይዎ ፡ ኵሉ ፡ እስራኤል ፡ ወቀበርዎ ፡ ውስተ ፡ አርማቴም ፡ ውስተ ፡ ሀገሩ ፡ ወሳኦልሰ ፡ ሰዐሮሙ ፡ ለእለ ፡ ያነቅሁ ፡ ምውተ ፡ ወለማእምራን ፡ እምነ ፡ ምድር ። 4 ወተጋብኡ ፡ ኢሎፍሊ ፡ ወመጽኡ ፡ ወተዐየኑ ፡ ውስተ ፡ ሱማን ፡ ወአለተጋብኦሙ ፡ ሳኦል ፡ ለኵሉ ፡ ሰብአ ፡ እስራኤል ፡ ወተዐየኑ ፡ በጌላቡሄ ። 5 ወሶበ ፡ ርእየ ፡ ሳኦል ፡ ተዓይኒሆሙ ፡ ለኢሎፍሊ ፡ ፈርሀ ፡ ወደንገፀ ፡ ልቡ ፡ ጥቀ ። 6 ወተስእለ ፡ ሳኦል ፡ ቃለ ፡ እግዚአብሔር ፡ ወኢያውሥኦ ፡ ወኢበሐላምያን ፡ ወኢበመንግራን ፡ ወኢበነቢያት ። 7 ወይቤሎሙ ፡ ሳኦል ፡ ለደቁ ፡ ኅሡ ፡ ሊተ ፡ ብእሲተ ፡ እንተ ፡ ታነቅህ ፡ ምውት ፡ ወእሖር ፡ ኀቤሃ ፡ ወእስኦላ ፤ ወይቤልዎ ፡ ደቁሀለወት ፡ ብእሲት ፡ እንተ ፡ ታነቅህ ፡ ምውተ ፡ በኤንዶር ። 8 ወተገልበበ ፡ ሳኦል ፡ ወለብሰ ፡ ባዕደ ፡ አልባሰ ፡ ወሖረ ፡ ውእቱ ፡ ወካልኣን ፡ ክልኤቱ ፡ ዕደው ፡ ምስሌሁ ፡ ወመጽእ ፡ ኀቤሃ ፡ ለይእቲ ፡ ብእሲት ፡ በሌሊት ፡ ወይቤላ ፡ ሳኦል ፡ አስተቃስሚ ፡ ሊተ ፡ ወአንቅህዮ ፡ ሊተ ፡ ለዘ ፡ አነ ፡ እቤለኪ ። 9 ወትቤሎ ፡ ይእቲ ፡ ብእሲት ፡ ታኣምር ፡ ለሊከ ፡ ኵሎ ፡ ዘገብረ ፡ ሳኦል ፡ ወዘከመ ፡ ሠረዎን ፡ ለእለ ፡ ያነቅሃ ፡ ምውተ ፡ ወለማእምራን ፡ እምነ ፡ ምድር ፡ ወለምንት ፡ አንተ ፡ ታሠግራ ፡ ለነፍስየ ፡ ከመ ፡ ታቅትላ ። 10 ወመሐለ ፡ ላቲ ፡ ሳኦል ፡ ወይቤላ ፡ ሕያው ፡ እግዚአብሔር ፡ ከመ ፡ አልቦ ፡ ዘይረክበኪ ፡ ሕሡም ፡ በበይነ ፡ ዝንቱ ፡ ነገር ። 11 ወትቤሎ ፡ ይእቲ ፡ ብእሲት ፡ መነ ፡ ትፈቅድ ፡ ኣንቅህ ፡ ለከ ፡ ወይቤላ ፡ ሳሙኤልሃ ፡ ኣንቅሂ ፡ ሊተ ። 12 ወሶበ ፡ ርእየቶ ፡ ይእቲ ፡ ብእሲት ፡ ለሳሙኤል ፡ ጸርኀት ፡ በዐቢይ ፡ ቃል ፡ ወትቤሎ ፡ ይእቲ ፡ ብእሲት ፡ ለሳኦል ፡ ለምንት ፡ እስተሐቀርከኒ ፡ እንዘ ፡ አንተ ፡ ውእቱ ፡ ሳኦል ። 13 ወይቤላ ፡ ንጉሥ ፡ ኢትፍርሂ ፡ ንግርኒ ፡ ዳእሙ ፡ መነ ፡ ርኢኪ ፡ ወትቤሎ ፡ አማልክተ ፡ ርኢኩ ፡ የዐርጉ ፡ እምነ ፡ ምድር ። 14 ወይቤላ ፡ ምንተ ፡ ርኢሊ ፡ ወትቤሎ ፡ ብእሴ ፡ ዘርቱዐ ፡ የዐርግ ፡ እምነ ፡ ምድር ፡ ወይላብስ ፡ ዐጽፈ ፤ ወኣእመረ ፡ ሳኦል ፡ ከመ ፡ ሳሙኤል ፡ ውእቱ ፡ ወደነነ ፡ ወሰገደ ፡ ሎቱ ፡ በገጹ ፡ ውስተ ፡ ምድር ። 15 ወይቤሎ ፡ ሳሙኤል ፡ ለምንት ፡ አጽሐብከኒ ፡ ከመ ፡ ታዕርገኒ ፡ ወይቤሎ ፡ ሳኦል ፡ እስመ ፡ ተመንደብኩ ፡ ጥቀ ፡ እስመ ፡ ፀብኡኒ ፡ ኢሎፍሊ ፡ ወእግዚአብሔርኒ ፡ ኀደገኒ ፡ ወኢያውሥአኒ ፡ ዳግመ ፡ እንከ ፡ ወኢበእደ ፡ ነቢያት ፡ ወኢበላዕለ ፡ ሐላምያን ፡ ወይእዜኒ ፡ ጸዋዕኩከ ፡ ከመ ፡ ታይድዐኒ ፡ ዘከመ ፡ እገብር ። 16 ወይቤሎ ፡ ሳሙኤል ፡ ለምንት ፡ ትሴአለኒ ፡ እንዘ ፡ እግዚአብሔር ፡ ኀደገከ ፡ ወገብአ ፡ ምስለ ፡ ካልእከ ። 17 ወገብረ ፡ እግዚአብሔር ፡ ላዕሌከ ፡ በከመ ፡ ነበበ ፡ በእዴየ ፡ ወይሳጥጣ ፡ እግዚአብሔር ፡ ለመንግሥትከ ፡ እምነ ፡ እዴከ ፡ ወይሁባ ፡ ለካልእከ ፡ ለዳዊት ። 18 እስመ ፡ ኢሰማዕከ ፡ ቃለ ፡ እግዚአብሔር ፡ ወኢገበርከ ፡ ሎቱ ፡ መዐቶ ፡ ላዕለ ፡ ዐማሌቅ ፡ ወበበይነ ፡ ዝንቱ ፡ ነገር ፡ ገብረ ፡ እግዚአብሔር ፡ ላዕሌከ ፡ ዮም ። 19 ወያገብእሙ ፡ እግዚአብሔር ፡ ለእስራኤል ፡ ምስሌከ ፡ ውስተ ፡ እዴሆሙ ፡ ለኢሎፍሊ ፡ ወይቤሎ ፡ ሳሙኤል ፡ ጌሠመ ፡ አንተ ፡ ወደቂቅከ ፡ ምስሌከ ፡ ትወድቁ ፡ ወትዕይንቶሙ ፡ ለእስራኤል ፡ ያገብኦሙ ፡ ውስተ ፡ እዴሆሙ ፡ ለኢሎፍሌ ። 20 ወወድቀ ፡ ፍጡነ ፡ ሳኦል ፡ እንዘ ፡ ይቀውም ፡ ውስተ ፡ ምድር ፡ ወፈርሀ ፡ ጥቀ ፡ እምነ ፡ ቃሉ ፡ ለሳሙኤል ፡ ወአልቦ ፡ ኀይለ ፡ እስመ ፡ ኢበልዐ ፡ እከለ ፡ ይእተ ፡ አሚረ ፡ ሌሊተ ፡ ወመዓልተ ። 21 ወቦአት ፡ እንታክቲ ፡ ብእሲት ፡ ኀቤሁ ፡ ለሳኦል ፡ ወረከበቶ ፡ ድንጉፀ ፡ ጥቀ ፡ ወትቤሎ ፡ ናሁ ፡ ሰምዐተከ ፡ አመትከ ፡ ቃለከ ፡ ወመጠውክዋ ፡ ለነፍስየ ፡ በእዴየ ፡ ወሰማዕኩ ፡ ቃለከ ፡ ዘነባብከኒ ። 22 ወይእዜኒ ፡ ስማዕ ፡ ቃላ ፡ ለአመትከ ፡ ወኣምጽእ ፡ ኅብስተ ፡ ቅድሜከ ፡ ወትብላዕ ፡ ወትርከብ ፡ ኀይለ ፡ እስመ ፡ ተሐውር ፡ ውስተ ፡ ፍኖት ። 23 ወአበየ ፡ በሊዐ ፡ ወአጽሐብዎ ፡ ደቁ ፡ ወይእቲኒ ፡ ብእሲት ፡ ወሰምዐ ፡ ቃሎሙ ፡ ወተንሥእ ፡ እምነ ፡ ምድር ፡ ወነበረ ፡ ዲበ ፡ መንበር ። 24 ወባቲ ፡ ይእቲ ፡ ብእሲት ፡ እጓለ ፡ ላህም ፡ ሥቡሐ ፡ ውስተ ፡ ቤታ ፡ ወጠብሐቶ ፡ ፍጡነ ፡ ወነሥአት ፡ ሐሪጸ ፡ ወሎሰት ፡ ወደፈነት ፡ ናእተ ። 25 ወአምጽአት ፡ ቅድሜሁ ፡ ለሳኦል ፡ ወቅድመ ፡ ደቁ ፡ ወበልዑ ፡ ወተንሥኡ ፡ ወሖሩ ፡ በይእቲ ፡ ሌሊት ።