መጽሐፈ ነገሥት ፩ 29

1 ወአስተጋብኡ ፡ ኢሎፍሊ ፡ ኵሎ ፡ ተዓይኒሆሙ ፡ ውስተ ፡ ሳፌቅ ፡ ወእስራኤልኒ ፡ ተዐየኑ ፡ ውስተ ፡ ኤንዶር ፡ እንተ ፡ [ኢይዝ]ራኤል ። 2 ወሖሩ ፡ መሳፍንቲሆሙ ፡ ለኢሎፍሊ ፡ ምስለ ፡ ፻፻ብእሲ ፡ ወምስለ ፡ ፲፻፲፻ወዳዊትሰ ፡ ወአንኩስ ፡ ወሰብኡ ፡ የሐውሩ ፡ ከወላ ። 3 ወይቤሉ ፡ መሳፍንተ ፡ ኢሎፍሊ ፡ መኑ ፡ እሉ ፡ እለ ፡ የሐውሩ ፡ ድኅሪተ ፡ ወይቤሎሙ ፡ አንኩስ ፡ ለ[መሳፍንተ ፡] ኢሎፍሊ ፡ ዳዊት ፡ ውእቱ ፡ ገብረ ፡ ሳኦል ፡ ንጉሠ ፡ እስራኤል ፡ ዘገብአ ፡ ኀቤነ ፡ ናሁ ፡ ዝንቱ ፡ ፪ዓመት ፡ ወአልቦ ፡ ዘኣንከርክዎ ፡ ወኢምንተኒ ፡ እምአመ ፡ መጽአ ፡ ኀቤየ ፡ እስከ ፡ ዮም ። 4 ወተምዑ ፡ ሳዕሌሁ ፡ መሳፍንተ ፡ ኢሎፍሊ ፡ ወይቤልዎ ፡ አግብኦ ፡ ለዝንቱ ፡ ብእሲ ፡ ውስተ ፡ መካኑ ፡ እምኀበ ፡ ነሣእኮ ፡ ወኢይምጻእ ፡ ምስሌነ ፡ ውስተ ፡ ፀብእ ፡ ወኢይኩኖሙ ፡ አዕይንተ ፡ ውስተ ፡ ተዓይኒነ ፡ ወበምንት ፡ ይገብእ ፡ ዝንቱ ፡ ኀበ ፡ እግዚኡ ፡ እንበለ ፡ በአርእስቲሆሙ ፡ ለእልክቱ ፡ ዕደው ። 5 አኮኑ ፡ ዝንቱ ፡ ውእቱ ፡ ዳዊት ፡ ዘበእንቲአሁ ፡ ወፅኣ ፡ ሐላይያት ፡ እንዘ ፡ ይብላ ፡ ቀተለ ፡ ሳኦል ፡ ፲፻ወዳዊት ፡ ፼ ። 6 ወጸውዖ ፡ አንኩስ ፡ ለዳዊት ፡ ወይቤሎ ፡ ሕያው ፡ እግዚአብሔር ፡ ከመ ፡ ጻድቅ ፡ አንተ ፡ ወኄር ፡ በቅድመ ፡ አዕይንትየ ፡ በበአትከኒ ፡ ወበፀአትከኒ ፡ ምስሌየ ፡ ውስተ ፡ ትዕይንት ፡ ወኢረከብኩ ፡ ላዕሌከ ፡ እኪተ ፡ እምአመ ፡ መጻእከ ፡ ኀቤየ ፡ እስከ ፡ ዮም ፡ ወቅድመሰ ፡ አዕይንቲሆሙ ፡ ለመሳፍንተ ፡ ኢሎፍሊ ፡ ኢኮንከ ፡ ኄረ ። 7 ወይእዜኒ ፡ ተመየጥ ፡ ውእቱ ፡ በሰላም ፡ ወአልቦ ፡ ዘይከውን ፡ እኩየ ፡ ቅድመ ፡ አዕይንቲሆሙ ፡ ለመሳፍንተ ፡ ኢሎፍሊ ። 8 ወይቤሎ ፡ ዳዊት ፡ ለእንኵስ ፡ ምንተ ፡ ረሰይኩከ ፡ ወምንተ ፡ ረከብከ ፡ ላዕለ ፡ ገብርከ ፡ አበሳ ፡ እምአመ ፡ መጻእኩ ፡ ኀቤከ ፡ እስከ ፡ ዮም ፡ ከመ ፡ ኢይምጻእ ፡ ወኢይትቃተሎሙ ፡ ለፀረ ፡ እግዚእየ ፡ ንጉሥ ። 9 ወይቤሎ ፡ እንኵስ ፡ ለዳዊት ፡ ኣአምር ፡ ከመ ፡ ጻድቅ ፡ አንተ ፡ ቅድመ ፡ አዕይንትየ ፡ ወባሕቱ ፡ መሳፍንቲሆሙ ፡ ለኢሎፍሊ ፡ ይብሉ ፡ ኢይምጻእ ፡ ምስሌነ ፡ ውስተ ፡ ፀብእ ። 10 ወይእዜኒ ፡ ጊሥ ፡ በጽባሕ ፡ እንተ ፡ ወደቀ ፡ እግዚእከ ፡ እለ ፡ መጽኡ ፡ ምስሌከ ፡ ወሖሩ ፡ እትዉ ፡ እምኀበ ፡ መጻእክሙ ፡ ወሕሡመ ፡ ነገረ ፡ ኢትደይ ፡ ውስተ ፡ ልብከ ፡ እስመ ፡ ጻድቅ ፡ አንተ ፡ በቅድመ ፡ አዕይንትየ ፡ ወጊሡ ፡ ፍኖተክሙ ፡ ሶበ ፡ ጸብሐክሙ ፡ ወሖሩ ። 11 ወጌሡ ፡ ዳዊት ፡ ወሰብኡ ፡ ከመ ፡ ይሖሩ ፡ ወይዕቀቡ ፡ ፍኖቶሙ ፡ ለኢሎፍሊ ፡ ወኢሎፍሊሰ ፡ ዐርጉ ፡ ይትቃተሉ ፡ ምስለ ፡ እስራኤል ።