መጽሐፈ ነገሥት ፫ 10

1 ወእምዝ ፡ ሶበ ፡ ፈጸመ ፡ ሰሎሞን ፡ ሐኒጸ ፡ ቤተ ፡ እግዚአብሔር ፡ ወቤተ ፡ መንግሥቱ ፡ ወኵሉ ፡ ግብሩ ፡ ዘፈቀደ ፡ ሰሎሞን ፡ ይግበር ፤ 2 አስተርአዮ ፡ እግዚአብሔር ፡ ለሰሎሞን ፡ ዳግመ ፡ በከመ ፡ አስተርአዮ ፡ በገባኦን ። 3 ወይቤሎ ፡ እግዚአብሔር ፡ ሰማዕኩ ፡ ጸሎተከ ፡ ወስእለተከ ፡ ዘሰአልከ ፡ ቅድሜየ ፡ ወገበርኩ ፡ ለከ ፡ በከመ ፡ ኵሉ ፡ ጸሎትከ ፡ ወቀደስክዎ ፡ ለዝንቱ ፡ ቤት ፡ ዘሐነጽከ ፡ ከመ ፡ የሀሉ ፡ ስምየ ፡ ህየ ፡ ለዓለም ፡ ወይሄልዋ ፡ አዕይንትየ ፡ ወልብየ ፡ ህየ ፡ በኵሉ ፡ መዋዕል ። 4 ወአንተኒ ፡ ለእመ ፡ ሖርከ ፡ ቅድሜየ ፡ ከመ ፡ ሖረ ፡ ዳዊት ፡ በጽድቅ ፡ ወበንጽሓ ፡ ወበርትዕ ፡ በኵሉ ፡ መዋዕል ፡ ወከመ ፡ ትግበር ፡ ኵሎ ፡ ዘአዘዝኩከ ፡ ወትዕቀብ ፡ ሕግየ ፡ ወትእዛዝየ ፤ 5 ወኣቀውም ፡ መንበረ ፡ መንግሥትከ ፡ ላዕለ ፡ እስራኤል ፡ ለዓለም ፡ በከመ ፡ እቤሎ ፡ ለዳዊት ፡ አቡከ ፡ ኢያጠፍእ ፡ ብእሴ ፡ እምኔከ ፡ ዘይሰፍን ፡ ለእስራኤል ። 6 ወእመሰ ፡ ተመየጥክሙ ፡ ወኀደግሙኒ ፡ ወገባእክሙ ፡ ድኅሬክሙ ፡ አንትሙሂ ፡ ወውሉድክሙሂ ፡ ወኀደግሙኒ ፡ ወኢዐቀብክሙ ፡ ትእዛዝየ ፡ ወሕግየ ፡ ዘወሀብክዎ ፡ ለሙሴ ፡ በቅድሜክሙ ፡ ወሖርክሙ ፡ ወተቀነይክሙ ፡ ለባዕድ ፡ አማልክት ፡ ወስገድክሙ ፡ ሎሙ ፤ 7 ወእደመስሶሙ ፡ ለእስራኤል ፡ እምነ ፡ ምድር ፡ እንተ ፡ ወሀብክዎሙ ፡ ወዘንተኒ ፡ ቤተ ፡ ዘቀደስኩ ፡ ለስምየ ፡ እገድፎ ፡ እምቅድመ ፡ ገጽየ ፡ ወይከውን ፡ እስራኤል ፡ ለሙስና ፡ ወለነገር ፡ ውስተ ፡ ኵሉ ፡ አሕዛብ ። 8 ወዝንቱኒ ፡ ቤት ፡ ዘልዑል ፡ ኵሉ ፡ ዘየኀልፍ ፡ እንተ ፡ ኀቤሁ ፡ ይደነግፅ ፡ ወይትፋጸይ ፡ ወይብሉ ፡ በበይነ ፡ ምንት ፡ ገብራ ፡ እግዚአብሔር ፡ ለዛቲ ፡ ምድር ፡ ወለዛቲ ፡ ቤት ። 9 ወይብሉ ፡ እስመ ፡ ኀደግዎ ፡ ለእግዚአብሔር ፡ አምላኮሙ ፡ ዘአውፅኦሙ ፡ ለአበዊሆሙ ፡ እምነ ፡ ግብጽ ፡ እምነ ፡ ቤተ ፡ ቅንየት ፡ ወተለዉ ፡ አማልክተ ፡ ነኪር ፡ ወሰገዱ ፡ ወተቀንዩ ፡ ሎሙ ፡ ወበበይነ ፡ ዝንቱ ፡ አምጽኣ ፡ እግዚአብሔር ፡ ላዕሌሆሙ ፡ ለዛቲ ፡ እኪት ። ወይእተ ፡ አሚረ ፡ አእተዋ ፡ ሰሎሞን ፡ ለወለተ ፡ ፈርዖን ፡ ውስተ ፡ ቤት ፡ ዘሐነጸ ፡ ሎቱ ፡ በእማንቱ ፡ መዋዕል ፡ እምነ ፡ ሀገረ ፡ ዳዊት ። 10 በ፳ዓመት ፡ ሐነጸ ፡ ሰሎሞን ፡ ፪አብያተ ፡ ቤተ ፡ እግዚአብሔር ፡ ወቤተ ፡ መንግሥቱ ። 11 ወኪራም ፡ ንጉሠ ፡ ጢሮስ ፡ አርድኦ ፡ ለሰሎሞን ፡ በዕፀወ ፡ ቄድሮን ፡ ወበዕፀወ ፡ ጴውቂኖስ ፡ ወበወርቅ ፡ ወበኵሉ ፡ ዘፈቀደ ፡ ወወሀቦ ፡ ሰሎሞን ፡ ንጉሥ ፡ ይአተ ፡ አሚረ ፡ ለኪራም ፡ ፳አህጉረ ፡ በውስተ ፡ ምድረ ፡ ገሊላ ። 12 ወወፅአ ፡ ኪራም ፡ እምነ ፡ ጢሮስ ፡ ወሖረ ፡ ውስተ ፡ ገሊላ ፡ ይርአዮን ፡ ኪያሆን ፡ አህጉረ ፡ እለ ፡ ወሀቦ ፡ ሰሎሞን ፡ ወኢአደማሁ ። 13 ወይቤሎ ፡ ምንትኑ ፡ እላ ፡ አህጉር ፡ እለ ፡ ወሀብከኒ ፡ አንተ ፡ እኁየ ፡ ወሰመዮን ፡ ወሰነ ፡ እስከ ፡ ዮም ። 14 ወአምጽአ ፡ ኪራም ፡ ለሰሎሞን ፡ ፻ወ፳መካልየ ፡ ወርቅ ፤ 26 ወሐመረ ፡ በእንተ ፡ ዘገብረ ፡ ሰሎሞን ፡ ንጉሥ ፡ በጋሲዮን ፡ ዘጋቤር ፡ እንተ ፡ ምእኃዘ ፡ ኤላት ፡ እንተ ፡ ላዕለ ፡ ሐይቀ ፡ ባሕር ፡ ወምድረ ፡ ኤዶም ። 27 ወፈነወ ፡ ኪራም ፡ በውስተ ፡ ሐመሩ ፡ አግብርተ ፡ ዚአሁ ፡ ዕደወ ፡ ኖትያተ ፡ እለ ፡ ይክሉ ፡ ኀዲፈ ፡ ባሕር ፡ ምስለ ፡ አግብርቲሁ ፡ ለሰሎሞን ። 28 ወበጽሑ ፡ እስከ ፡ ሶፌራ ፡ ወነሥኡ ፡ እምህየ ፡ ፻ወ፳መክሊተ ፡ ወአምጽኡ ፡ ለሰሎሞን ።